Ukulondoloza Ukholo Ngaphansi Kokucindezela Kobushiqela

NJENGOBA ILANDISWA NGUMICHAEL DASEVICH

“EJalimane siyabadubula oFakazi BakaJehova. Uyasibona lesiya sibhamu?” kubuza isikhulu samaGestapo sikhomba isibhamu ekhoneni. “Ngingakuhlakaza ngaso maqede kungabi ndaba zalutho.”

Ngangineminyaka engu-15 kuphela ubudala lapho ngiso-ngelwa kanje phakathi nokuhlasela kwamaNazi kwelakithi ngo-1942.

NGAZALWA ngo-November 1926 edolobhaneni elincane eduze kwaseStanislav (manje ebizwa ngokuthi i-Ivano-Frankivs’k), ngaleso sikhathi eyayiyingxenye yePoland. Phakathi neMpi Yezwe II, kusukela ngo-September 1939 kuya ku-May 1945, indawo yakithi yaqale yaba ngaphansi kweSoviet Union, yabe isiba ngaphansi kweJalimane isikhashana, yagcina seyingaphansi kweSoviet futhi. Ngemva kwempi yaba ingxenye ye-Ukrainian Soviet Socialist Republic, futhi lapho iSoviet Union ichithwa ngo-1991, yaba ingxenye ye-Ukraine.

Ubaba owayedabuka ePoland nomama owayedabuka eBelorussia babengamalungu eSonto LamaKatolika angamaGreki. Kodwa-ke ngo-1939, abesifazane ababili bebandla loFakazi BakaJehova lababengu-30 edolobhaneni eliseduze laseHoryhliady basishiyela incwajana ethi Universal War Near. Yayichaza izimo engangizibona zenzeka. Ngakho, lapho le ncwajana ibuza, “Yisiphi isizathu sangempela esenza izizwe zigijimele empini?,” ngaqaphelisisa incazelo eyayiyinikeza esekelwe eBhayibhelini.

Impi yayingekuphela kwenkinga esasibhekene nayo e-Ukraine. Kwakunendlala enkulu. Izimiso zikaNdunankulu waseSoviet uJoseph Stalin zabangela ukuba sidingiselwe eRussia ngenkani. Ukuhlupheka engakubona kwenza ukuba ngilihlolisise iBhayibheli. Ngacela uFakazi eHoryhliady ukuba atadishe nami iBhayibheli.

Idolobhana lethu lase-Odajiv lingaphesheya koMfula iDniester uma usuka eHoryhliady, futhi izikhathi ezimbalwa ngesonto, ngangiwela lowo mfula ngesikebhe esincane ukuze ngiyofunda iBhayibheli. Ngo-August 1941, mina nodadewethu u-Anna sabhapathizwa kuwo lowo mfula kanye nabanye ababili.

Ukuphenywa Ngemibuzo NgamaGestapo

Ukubusa kweJalimane kwaqala ngo-1941, futhi naphezu kokuqhubeka besisongela ngokusijezisa, asizange siwuyeke umsebenzi wethu wobuKristu. Ngonyaka olandelayo ngaqala ukuphayona, ngihamba ngebhayisikili. Akubanga sikhathi esitheni ngemva kwalokho lapho ngahilizisana khona namaGestapo aseJalimane njengoba ngichaze esethulweni. Nakhu okwenzeka.

Lapho ngibuya ensimini ngolunye usuku, ngavakashela amaKristu esikanye nawo amabili, umama nendodakazi yakhe. Umyeni wendodakazi wayephikisa futhi wayemagange efuna ukuthola ukuthi yayizithathephi izincwadi zayo zeBhayibheli. Ngalolo suku ngangingaphethe nje izincwadi kuphela kodwa nemibiko yenkonzo yamanye amaKristu. Umyeni wayo wangibona ngiphuma endlini.

Wamemeza: “Yima!” Ngathatha isikhwama sami ngacela empunzini.

“Yima! Sela ndini!” ememeza. Izisebenzi emasimini zacabanga ukuthi kukhona engangikuntshontshile, ngakho zangimisa ngenkani. Le ndoda yangiyisa emaphoyiseni, lapho kwakukhona khona isikhulu samaGestapo.

Lapho sibona izincwadi esikhwameni sami, lesi sikhulu samemeza ngesiJalimane, sithi: “URutherford! URutherford!” Kwakusobala ukuthi sasicasulwa yini. Igama likaJoseph F. Rutherford, owayekade engumongameli we-Watch Tower Bible and Tract Society, lalisekhasini lesihloko sezincwadi ezinyatheliswa oFakazi BakaJehova. Lo myeni wabe esengimangalela ngokuthi ngithandana nomkakhe. Amaphoyisa nesikhulu samaGestapo babebona ukuthi lokhu akunangqondo, ngoba umkakhe wayemdala ngokwanele ukuba abe umama wami. Base beqala ukungihloma imibuzo.

Babefuna ukwazi ukuthi ngingubani nokuthi ngivelaphi, ikakhulukazi nokuthi ngizithathephi lezi zincwadi. Kodwa ngangingeke ngibatshele. Bangishaya izikhathi ezimbalwa bangenza inhlekisa, base bengivalela egumbini elingaphansi kwendlu. Izinsuku ezintathu ezalandela ngangihlonywa imibuzo. Ngabe sengiyiswa ehhovisi lesikhulu samaGestapo, lapho sangisongela khona ngokungihlakaza ngesibhamu. Ngaleso sikhathi ngangingazi ukuthi sizokwenza ngempela yini lokho esasingisongela ngakho. Ngagobisa ikhanda, futhi kwathula kwathi dú isikhathi eside. Sabe sesisho ngokhahlo sithi: “Hamba.”

Njengoba ungase ubone, ukushumayela ngaleso sikhathi kwakuyinselele enkulu, kanjalo nokuqhuba imihlangano yethu. Sagubha iSikhumbuzo saminyaka yonke sokufa kukaKristu ngo-April 19, 1943, sisebenzisa amagumbi amabili endlu eHoryhliady. (Luka 22:19) Lapho sesizoqala imihlangano, kwahlatshwa umkhosi wokuthi amaphoyisa ayeza. Abanye bethu bacasha engadini, kodwa udadewethu u-Anna nabanye besifazane abathathu baya ekamelweni elingaphansi kwendlu. Amaphoyisa abathola lapho futhi abadonsa ngamunye ngamunye abahloma imibuzo. Baphathwa ngesihluku amahora amaningi, futhi omunye wabo walimala kabuhlungu.

Isimo Sezwe Siyashintsha

Ehlobo lika-1944, amaJalimane ahoxa futhi iSoviet yabuyela ngakithi. Njengezinceku zikaJehova, sanamathela ezimisweni zeBhayibheli ezifanayo esasikade siphila ngazo sisaphethwe amaNazi. Senqaba ukuba nengxenye kwezempi noma kwezombangazwe. Ngokushesha ukunamathela kwethu ezimisweni zeBhayibheli ezinjalo kwavivinywa.—Isaya 2:4; Mathewu 26:52; Johane 17:14.

Phakathi nezinsuku ezimbalwa, abaseSoviet baqala ukubuthela zonke izinsizwa empini. Okwenza kwaba nzima nakakhulu ukuthi abaseSoviet kwakungebona kuphela abafuna abantu abazobabuthela impi. Abashokobezi base-Ukraine basesha le ndawo befuna izinsizwa, bazithatha baziyisa ehlathini bayoziqeqeshela ukulwa. Ngakho-ke thina boFakazi saba sesimweni esinzima sokuba sifakazele ukuthi asithathi hlangothi emaqenjini amabili aphikisanayo—abaseSoviet nabashokobezi.

La maqembu amabili ayelwela edolobhaneni lethu, ashiya abashokobezi ababili befile emgwaqweni ngaphandle kwasekhaya. Izikhulu zaseSoviet zeza ekhaya zizobuza ukuthi siyabazi yini laba abafile. Izikhulu ezafika zanquma ukuhamba nami zangibuthela ebuthweni lazo, elalakha ibutho lamasosha asePoland. Ngenxa yokuthi ngangidabuka ePoland, kwakufanele ngibe kulelo butho.

Mina kanye nabanye oFakazi abane, senqaba ukubuthelwa empini, ngakho sathathwa ngesitimela sayiswa eDnipropetrovs’k, idolobha elisebangeni elingamakhilomitha angu-770 ngasempumalanga. Lapho, kulapho savalelwa khona ngesikhathi kusalungiselelwa ukuqulwa kwecala, ngemva kokuchaza ukuthi sasingeke sihlanganyele empini ngenxa yezinkolelo zethu ezisekelwe eBhayibhelini. Ngesikhathi sivela enkantolo, sathola ukuthi umseshi wayengumJuda. Lapho sizivikela, lo mseshi elalele ngokucophelela, sachaza izinkolelo zethu. Sasho izinto esasazi ukuthi zazizomthakazelisa, kuhlanganise nokucindezelwa kwama-Israyeli kanye nokukhululwa kwawo nguMose eGibithe.

Phakathi nezinyanga ezandulela ukukhishwa kwesigwebo enkantolo, savalelwa esitokisini kanye nabanye abantu abangu-25. Lapho bezwa ukuthi sasenqabile ukuhlanganyela empini, bamemeza: “Ningabafowethu!” Nokho, sasheshe sathola ukuthi babengebona oFakazi kodwa babengamaBaptist. Babezimisele ukubhalisa ebuthweni lempi, kodwa baboshwa ngoba benqaba ukuphatha izikhali.

Ngo-May 1945, ngesikhathi sisavalelwe eDnipropetrovs’k, phakathi kwamabili savuswa ukuqhuma kwezibhamu nokumemeza kwabantu ekamu nasemigwaqweni ngaphandle. Sazibuza ukuthi ingabe udlame, impi noma ukugujwa komkhosi othile. Ngakusasa ngesikhathi sokudla kwasekuseni, sezwa izindaba ngomgundi wezinwele: Impi yayisiphelile! Ngokushesha ngemva kwalokho, inkantolo yakhipha izigwebo zethu. Sathola isigwebo esifanayo thina namaBaptist—iminyaka eyishumi ekamu leziboshwa.

Ikamu Leziboshwa ERussia

Thina boFakazi abahlanu sathunyelwa ekamu leziboshwa eRussia. Ngemva kohambo lwesitimela lwamasonto amabili, ekugcineni sehla eSukhobezvodnoje, ebangeni elingamakhilomitha angu-400 empumalanga yeMoscow. ISukhobezvodnoje yayiyisikhungo esasiqondisa amakamu okuhlushwa angu-32 ayegudla ujantshi. Ikamu ngalinye lalinezinkulungwane zeziboshwa. Ngemva kwezinyanga eziyisithupha eSukhobezvodnoje, ngathunyelwa eKamu No. 18. Abaningi enganginabo lapho babeboshelwe ubugebengu noma ezombangazwe.

Izikhulu zasifaka emsebenzini wokugawula izihlahla, okwakuwumsebenzi onzima kakhulu. Ngezinye izikhathi kwakudingeka sihambe eqhweni elifika okhalweni, sigawule izihlahla ngesaha, bese sizidonsa eqhweni. Kanye ngesonto, ngemva kokudla kwasekuseni ngeSonto, ngangiba nethuba lokuxoxa ngeBhayibheli nabanye oFakazi abane ababekuleli kamu. Leyo kwakuyimihlangano yethu. Sasigubha neSikhumbuzo, ngomunye unyaka sasigubhela endlini yokugezela. Sasebenzisa ujusi wamajikijolo ukuze ufanekisele igazi likaJesu ngoba sasingenalo iwayini.

Umzwangedwa wawunamandla. Ngathululela inhliziyo yami kuJehova, owangiqinisa njengoba aqinisa u-Eliya ngesikhathi lo mprofethi ehlushwa imizwa efanayo. (1 AmaKhosi 19:14, 18) UNkulunkulu wangisiza ukuba ngibone ukuthi asisodwa. Ngempela wayeyinsika engazamazami, eqinile ekuphileni kwami, ngisho nangaphansi kwalezo zimo ezinzima.

Amanye amakamu aseduze neSukhobezvodnoje, ngalinye lalinedlanzana loFakazi, futhi sasikwazi ukuhlala sixhumana nabo ngomunye uFakazi owayenomsebenzi owawumvumela ukuba ahambele wonke amakamu. Wasebenza njengeposi, eshushumbisa izincwadi phakathi kwamakamu ethu. Lokhu kwenza ukuba sikwazi ukuhlanganyela noma iziphi izincwadi ezimbalwa esasinazo. Yeka ukuthi lokho kwasikhuthaza kanjani!

Ukuphindela E-Ukraine

Ngenxa kashwele owakhishwa uHulumeni, isigwebo sami sehliswa eminyakeni eyishumi saba iminyaka emihlanu. Ngakho, ngo-April 1950, ngaphindela ebandleni lakithi eHoryhliady. Umsebenzi wethu e-Ukraine wawusavinjelwe, futhi kwakuyingozi kakhulu ukuhlanganyela enkonzweni. Kodwa nemivuzo yayimikhulu.

Lapho ngisanda kubuya, ngaxoxa nendoda egama layo linguKozak, eyayihlala eZhabokruky, idolobhana eliqhele ngamakhilomitha angu-20 ukusuka ekhaya. Ngayibuza ukuthi babephila kanjani yona nomkhaya wayo. Ngangazi ukuthi izisebenzi zasemapulazini kahulumeni zazizabalaza ukuze zithole okuzozigcina ziphila, ngakho ngangazi ukuthi umbuzo onjalo wawuyindlela enhle yokuqala ingxoxo. Ngachaza ukuthi iBhayibheli lakubikezela ukuntuleka kokudla nezimpi esikhathini sethu. (Mathewu 24:3-14) Yafuna ukwazi okwengeziwe. Ngakho ngaphinde ngayivakashela. Isonto nesonto ngangihamba amakhilomitha angaba ngu-40 ukuya nokubuya eZhabokruky ukuze ngiyofunda iBhayibheli nabakwaKozak. Ngazikhohlwa zonke izingozi, ingasaphathwa eyesikhathi esasihilelekile, lapho abakwaKozak bebhapathizwa ngo-August 1950.

Ngokushesha nje ngemva kokuba abakwaKozak bebhapathiziwe badingiswa kanye nezinye izinkulungwane zoFakazi. Kungazelelwe, balandwa amasosha ahlomile ekuqaleni kuka-April 1951 futhi—ngaphandle kokuqulwa kwecala—bayiswa eSiberia. AbakwaKozak nabanye abangane bami abaningi baphoqelelwa ukuba benze leyo ndawo ibe yikhaya labo elisha.a

Emikhayeni yoFakazi engu-15 eHoryhliady, kwadingiswa emine kuphela. Nokho, kwamanye amabandla inani loFakazi abadingiswa lalilikhulu kakhulu. Kwahlelwa kanjani lokhu kudingiswa kwabantu abaningi kangaka? Phela, izikhulu zazinohlu loFakazi futhi zakwazi ukuqoqa inani labo elikhulu ngokuthanda. Kubonakala sengathi lolu hlu lwalwenziwe ngo-1950, ngesikhathi ngisesejele eRussia, ngakho igama lami lalingekho. Esikhathini esingangenyanga ngaphambili, ngo-March 1951, ngangishade noFenia, inceku eqotho kaJehova. Abakubo kaFenia badingiswa bonke, kodwa yena wasinda ngoba wayeseshade nami futhi esebizwa ngesibongo sami, esasingekho ohlwini.

Ukuvivinywa Kokholo Okunzima

Ngemva kokudingiswa kwabanye, labo bethu ababesele kwakudingeka bahlele kabusha umsebenzi. Ngacelwa ukuba nginakekele amabandla esifunda esiseduze sase-Ivano-Frankivs’k, lapho, ngisho nangemva kokudingiswa, kwakusenoFakazi abangaba ngu-30 ababesahlanganyela ebandleni ngalinye kwangu-15. Njengombazi ozisebenzayo, nganginesimiso esasilawulwa yimi, ngakho ngangihlangana ngasese nabazalwane bebandla ngalinye kanye ngenyanga.

Ngokuvamile sasihlangana ebusuku emathuneni lapho sasiqiniseka ukuthi sizoba sodwa khona. Indaba eyinhloko esasixoxa ngayo kwakuyindlela yokuqiniseka ukuthi wonke amabandla anezincwadi zeBhayibheli ezithile. Ngezikhathi ezithile sasithola INqabayokulinda ngesiPolish noma ngesiRomania bese siyihumusha ngesi-Ukraine. Nokho, izikhulu zazihlala zisigadile, zizama ukuthola futhi zicekele phansi imishini yethu emidala yokwenza amakhophi.

Kodwa inkinga yethu enkulu kwakuwukuthi sasiqhelelene nabafowethu abangamaKristu abakwamanye amazwe, kuhlanganise nabaseBrooklyn, eNew York, ababehola emsebenzini wethu wobuKristu. Umphumela waba ukuthi amabandla ethu ayehlale ehlushwa ukuhlukana, inzwabethi nozungu. Abanye oFakazi bayishiya inhlangano futhi bakha amaqembu aphikisayo. Kwakukhona ngisho nezindaba ezingamanga nezimbi ezazikhulunywa ngalabo abaholayo eBrooklyn.

Ngakho, abaningi bethu bathola ukuthi uvivinyo lokholo lwethu olunzima lwalungabangelwa ukushushiswa abaphikisi kodwa izingxabano emabandleni. Ngisho noma abanye bakhetha ukuba bangabe besahlanganyela nathi ekukhulekeleni, safunda ukuthi kubalulekile ukubambelela enhlanganweni futhi silindele uJehova ukuba alungise izinto. Ngokujabulisayo, oFakazi abaningi endaweni yakithi benza lokho kanye. Ngiyajabula nokusho ukuthi abaningi balabo abashiya inhlangano balibona iphutha labo futhi kamuva babuya bakhonza uJehova kanye nathi.

Ngisho nangalezo zikhathi ezinzima zokuhlukaniswa, sahlala simatasa enkonzweni yasobala futhi sabusiswa ngokucebile. Futhi yeka imivuzo esiye sayibona! Njalo lapho ngiya eSifundweni Sencwadi Sebandla, ngikhumbula izibusiso zikaJehova. Ngamunye kwabangu-20 noma ngaphezulu abaseqenjini lesifundo sethu wasizwa amalungu omkhaya wakithi ukuba afunde iqiniso.

Abazali bami nodadewethu u-Anna baze bafa bethembekile kuJehova. Mina noFenia sisashiseka ngangokunokwenzeka ekukhonzeni uJehova. Isikhathi siye sashesha ngempela. Phakathi neminyaka engu-30 edlule, oFakazi BakaJehova e-Ukraine baye babona izenzakalo ezimangalisayo engingenakukwazi ukuzilandisa kule ndaba emfushane. Kodwa kuyangenelisa ukubheka emuva eminyakeni eminingi yokukhonza uJehova, ngiqiniseka ukuthi uyohlale eyinsika yami futhi engisekela, ngoba uthi ngaye: “Mina Jehova angiguquki.”—Malaki 3:6.

[Umbhalo waphansi]

[Amazwi acashunwe esihlokweni ekhasini 21]

Babefuna ukwazi ukuthi ngingubani nokuthi ngivelaphi, ikakhulukazi nokuthi ngizithathephi lezi zincwadi. Kodwa ngangingeke ngibatshele

[Amazwi acashunwe esihlokweni ekhasini 22]

Umzwangedwa wawunamandla. Ngathululela inhliziyo yami kuJehova, owangiqinisa

[Isithombe ekhasini 20]

Mina noFenia ngo-1952

[Isithombe ekhasini 23]

NginoFenia namuhla