Ukubhekana Novivinyo Ngamandla KaNkulunkulu
NJENGOBA ILANDISWA NGUSTEPAN KOZHEMBA
Ngobunye ubusuku ekuqaleni kuka-April 1951, amaloli agcwele amabutho aseSoviet atheleka edolobhaneni lakithi eStenyatyn, e-Ukraine. Amasosha ahlomile azungeza imizi eyayikhethwe kusengaphambili futhi athatha yonke imikhaya yoFakazi BakaJehova ayiyisa eSiberia. Njengengane eneminyaka engu-12 esheshe izwele, ngazibuza ukuthi kungani babephathwa ngale ndlela nokuthi babengakubekezelela kanjani lokhu kuhlupheka.
NGAZALELWA edolobhaneni laseStenyatyn ngo-October 1938. Umama washona nginamasonto amabili ubudala, futhi ubaba wabulawa ngo-1944 ebuthweni laseSoviet elalilwa namaJalimane. Obabekazi, u-Olena no-Anna, bangithatha bangikhulisa.
Ngisewumfana ngangazi oFakazi BakaJehova abaningana edolobhaneni lakithi. Noma nini lapho kuvela ithuba babexoxa nathi ngoMbuso KaMesiya. Ngokuhamba kwesikhathi, ngaba umngane wabanye oFakazi abasebancane. Ngamangala ngempela lapho bethathwa amabutho aseSoviet ebayisa eSiberia.
Kodwa akubona bonke oFakazi abadingiswa. UStepan, uFakazi owayehlala ngasekhaya, wavunyelwa ukuba asale ngoba abakubo babengebona oFakazi. Wayengishiya ngeminyaka eyisithupha, futhi lapho ngiphothula esikoleni ngasebenza naye njengombazi. Watadisha nami iBhayibheli, esebenzisa noma imaphi amakhophi e-Nqabayokulinda ayekhona. UStepan, manje okhonza uNkulunkulu weqiniso, uJehova, e-Estonia, wajabula kakhulu lapho ngibhapathizwa ngo-July 1956.
Ukuphikiswa kwakuyingxenye yokuphila kwanoma isiphi isikhonzi sikaJehova e-Ukraine. Iziphathimandla zazisesha indlu ngendlu zifuna izincwadi zeBhayibheli, ngakho nganginezindawo eziningana zokuzifihla. Obabekazi u-Olena no-Anna, ababengamaKatolika angamaGreki, babengavumelani nokuxhumana kwami noFakazi. Baze bazama nokungenza ukuba ngihlukane nabo. Njengomphostoli uPawulu, ngezinye izikhathi ngangizizwa sengathi ‘ngingaphansi kokucindezeleka okudlulele okungaphezu kwamandla ami.’ Kodwa ubuhlobo bami noJehova uNkulunkulu bangiqinisela ukuba ngikhuthazelele konke ukulingwa.—2 Korinte 1:8; Filipi 4:13.
Ukulwela Kwami Ukuhlala Ngingathathi Hlangothi
Izinsizwa ezineminyaka engu-18 ubudala zazibuthelwa ebuthweni lempi laseSoviet ngempoqo. Ngenxa yolwazi lwami lweBhayibheli, ngangizimisele ukuhlala ngingathathi hlangothi ezindabeni zezwe, okwakusho ukwenqaba ukujoyina ibutho laseSoviet. (Isaya 2:4; Johane 17:14-16) U-Olena no-Anna bangikhuthaza ukuba ngibe isosha, yize umfowabo, ubaba, ayebulawe empini.
Ngemva kokuthola amafomu okubuthwa, ngaya ekomkhulu lamabutho endaweni yakithi ngachaza ukuma kwami. Ngaboshwa ngaleso sikhathi futhi ngavalelwa lapho kusalungiselelwa ukuqulwa kwecala. Umphakathi wawungavunyelwe ukuzolalela ukuqulwa kwecala; ngisho nobabekazi abatshelwanga usuku. Nganikeza ubufakazi, ngahluba udlub’ ekhasini phambi kwejaji, umshushisi, nabasizi bejaji ababili. Ngemva kwemizuzu engu-20, lase liphelile. Isigwebo sami—ukuvalelwa iminyaka emihlanu kanye neminye iminyaka emihlanu ngephucwe amalungelo njengesakhamuzi.
Ukudonsa Isigwebo Sami
Ngemva kokuqulwa kwecala ngagqunywa ejele laseLviv. Izinyanga ezintathu ngiboshiwe kuze kube yilapho ngithunyelwa ekamu lokuhlushwa, akukho mKristu engangixhumana naye, ngangingenaBhayibheli futhi ngingenancwadi yeBhayibheli. Nokho, ngahlala ngiphila ngokomoya ngokufakaza kwezinye iziboshwa, ezakuthola kunzima ukuqonda ukwenqaba kwami ukuhlanganyela empini. Phakathi nalezo zinyanga, ngathembela emaphuzwini engangiwathole esifundweni somuntu siqu enganginaso ngaphambi kokuboshwa. Lokhu kwangifundisa isifundo esibalulekile: Isifundo seBhayibheli somuntu siqu sisisiza ukuba sakhe inqolobane engokomoya esisekelayo uma kuphakama uvivinyo.—Johane 14:26.
Ngo-April 1958, ngathunyelwa ekamu 21, eduze kwaseDnepropetrovsk, amakhilomitha angu-700 ukusuka ekhaya, ukuba ngiyoqedela khona isigwebo sami. Lapho, sasivuka ngo-6 ekuseni futhi ngemva kokudla, sasifakwa emalolini sihambe ibanga elingaba amakhilomitha angu-50 siya emsebenzini ngaphandle kwekamu. Sasisebenza amahora angu-8 esakhiweni, bese sibuyiselwa ekamu ebusuku.
Sasilala emakamu ayehlala abantu abayikhulu ikamu ngalinye. Ukudla kwakungenamsoco futhi izimo zokuphila ziphansi; kodwa okungenani nganginabangane ababili abangoFakazi emakamu engangikuwo. Ngamunye wethu wayenza umzamo wokuzimisela wokukhuthaza abanye ababili. Lena enye indlela uJehova aqinisa ngayo izinceku zakhe lapho zisosizini—ngobungane babantu ezikholwa nabo.—2 Korinte 7:6.
Sebebonke, babengu-12 oFakazi ekamu. Abanye babo babenezihlobo ngaphandle ezazishushumbisa amakhasi e-Nqabayokulinda efihlwe emaphaseleni okudla. Onogada babevula amaphasela amaningi, behlola okuphakathi ngaphambi kokuba basinike wona. Kodwa ukuze angabonwa, amakhasi e-Nqabayokulinda ayegoqwa ngepulasitiki abese efakwa emathinini kajamu, onogada ababengazihluphi ngokuwavula. Lapho sesizitholile izihloko, sasizikopisha ngesandla bese sabelana ngazo.
Sasenza ngokusemandleni ukushumayela ngoMbuso kaNkulunkulu futhi uJehova wayibusisa imizamo yethu. Ngokwesibonelo, ngazana nomunye esasiboshwe naye, uSergei, owayekade engumhlaziyi wamabhuku ezimali ebhizinisini likahulumeni empumalanga ye-Ukraine. Lapho kutholakala ukukhwabanisa emsebenzini wakhe, wabekwa icala futhi wagwetshwa iminyaka eyishumi ejele. Baningana oFakazi abafunda naye ejele, besebenzisa noma ibaphi omagazini ababekhona. USergei wasabela kahle futhi ekugcineni wangitshela: “Uma ngikhululwa ekamu, ngifuna ukubhapathizwa njengoFakazi KaJehova!” Njengokwesithembiso sakhe, uSergei wabhapathizwa ngokushesha ngemva kokudedelwa futhi wakhonza uJehova ngokwethembeka waze wafa.
Ukudideka NgabaseRoma Isahluko 13
Ngadedelwa ngo-January 1963 futhi ngaphindela edolobhaneni lakithi, eStenyatyn. Ngokushesha lapho ngifika ngezwa ukuthi kukhona okushaya amanzi ebandleni lendawo laseSokal. Isimo sasishubile kubafowethu. Yayiyini inkinga? Yini eyayiholele kulesi simo sokuba manqikanqika?
Kwase kuyiminyaka iziphathimandla zaseSoviet zizama ukutshala ukungezwani phakathi kwabantu bakaJehova ngokuvalela abazalwane zibahlome imibuzo futhi zibatshele ukuthi oFakazi babesetshenziselwa ukuthuthukisa izithakazelo zase-United States of America. Iziphathimandla zatusa ukuba oFakazi baseSoviet Union bakhe eyabo inhlangano ehlukile, zithi ngaleyo ndlela babengajabulela ubuhlobo obunokuthula noHulumeni futhi bavunyelwe ukuqhuba inkolo yabo ngaphandle kokushushiswa. Izikhulu zakwenza konke lokhu kwabonakala kukhanga.
Kwabe sekuthi INqabayokulinda ka-November 15, 1962, eyavela kamuva ohlelweni lwase-Ukraine ngo-July 1, 1964, yanikeza incazelo entsha ngabaseRoma isahluko 13. Kuze kube ngaleso sikhathi, sasiqonda ukuthi ‘amagunya aphakeme’ okukhulunywa ngawo evesini 1 kwakunguJehova uNkulunkulu noJesu Kristu, kodwa INqabayokulinda yaphawula ukuthi ‘amagunya aphakeme’ empeleni amelela ohulumeni basemhlabeni nokuthi laba ‘bami ezikhundleni zabo ezilinganiselwe babekwe uNkulunkulu.’—Roma 13:1.
Abanye oFakazi bakuthola kunzima ukuwukholelwa lo mbono olungisiwe, njengoba abaholi bakahulumeni wasemhlabeni eSoviet Union babenonya kakhulu bezama ukuqeda ukukhulekelwa kukaNkulunkulu kweqiniso. Ngakho-ke, labo Fakazi bacabanga ukuthi INqabayokulinda enencazelo entsha yayingaveli enhlanganweni engokomthetho yoFakazi BakaJehova. Kunalokho, bacabanga ukuthi lokhu kwaziswa kwakusungulwe yilabo abavumelana neziphathimandla ukuze benze oFakazi balalele uHulumeni waseSoviet.
Ngakho isikhonzi sikaJehova ngasinye e-Ukraine sasibhekene nombuzo, Yiliphi iqembu eliqinisile, yiliphi elinephutha? Ngabona oFakazi besekela uhlangothi ngalunye lwempikiswano futhi ngazibuza, ‘Banaziphi izisusa?’ Ngokushesha ngakwazi ukuthola umehluko phakathi kwalezi zinhlangothi zombili.
Iningi loFakazi BakaJehova, abanye okungenzeka babengayiqondi ngokuphelele incazelo entsha yabaseRoma isahluko 13, babefuna ukunamathela ngokwethembeka kuJehova nasenhlanganweni yakhe. Nokho, abanye base beqala ukungabaza ukuthi izincwadi zakamuva ze-Watch Tower Bible and Tract Society zazisavela enhlanganweni engokomthetho yoFakazi BakaJehova yini. Abanjalo babethambekele ekubeni nemibono eyeqisayo ngezindaba eziningana. Ngokwesibonelo, babenomuzwa wokuthi akulungile ngomakoti ukugqoka ingubo emhlophe lapho eshada nokuthi abangane bomshado akufanele bafake izindandatho zomshado. Abantu abaningi bayishiya inhlangano. Nokho, ngokuhamba kwesikhathi abaningana balibona iphutha labo futhi babuyela ekukhonzeni uJehova.
Ukusebenza Ngomshoshaphansi
Ngisho noma inkonzo yethu yobuKristu yayivinjelwe, uma kwenzeka sasiba nemihlangano yethu yamasonto onke ngamaqembu abantu abayishumi kuya kwabangu-15. Sasithola ukuqiniswa okungokomoya emihlanganweni, kokubili esifundweni sethu seBhayibheli nasebudlelwaneni ngemva kwemihlangano. Sasiqhathanisa izimo zethu, futhi lokhu kwasisiza ukuba siqaphele ukuthi ngamunye wethu wayesemshikashikeni ofanayo. Sakwazisa lokhu umphostoli uPetru akubhala: “Izinto ezifanayo eziyizinhlupheko ziyafezwa kuyo yonke inhlangano yabafowenu ezweni.”—1 Petru 5:9.
Ngokuyinhloko sasixoxa ngezihloko ze-Nqabayokulinda. Sasibathola kanjani omagazini? OFakazi ababeyizithunywa babewela umngcele namakhophi e-microfilm bangene e-Ukraine. La mafilimu ayedluliswa ngomzila ohlelwe kusengaphambili kusuka komunye uFakazi kuya komunye. Khona-ke, ngamunye wayenza amakhophi azokwanela ibandla lakubo. Ngezinye izikhathi nami ngangiwenza lawo makhophi. Ngangisebenza usuku lonke futhi ngibe matasa enkonzweni kaJehova ebusuku ngikhiqiza omagazini ngenza nezinye izinto. Kwakuyinselele ukuhambisana nesimiso, kodwa labo bethu ababenomthwalo wemfanelo enhlanganweni bafunda ukuthi uJehova ‘upha oyethileyo amandla.’—Isaya 40:29.
Sasivula amathuba okukhuluma ngeBhayibheli nabantu esasihlangana nabo. Abaningi bethu babenza lokhu lapho behamba ngezinto zokuhamba zomphakathi. Enye indlela eyayivamile yokuqala ingxoxo kwakuwukumane ufunde iphephandaba lansuku zonke bese uxoxela umgibeli okanye naye izindaba zamuva. Lapho ingxoxo isiqalile, sasifaka isihloko seBhayibheli. Ngale ndlela sasakaza izindaba ezinhle endaweni yakithi.
Umfazi Okhuthele
Ngo-1965, ngashada noTamara owayekhuliswe njengesikhonzi sikaNkulunkulu weqiniso futhi azi ukuthi kusho ukuthini ukumelela ukholo lwakhe ovivinyweni. Umfowabo uSergei wayeseboshwe kathathu futhi waquliswa icala ngezinkonzo zakhe njengoFakazi. Kulokhu kokugcina, watholakala ephethe amakhophi e-Nqabayokulinda, futhi wagwetshwa iminyaka eyishumi ejele. UTamara yena wathathwa iziphathimandla zamyisa ekomkhulu lazo ziyomhloma imibuzo futhi wasongelwa ngokuboshwa.
Ngemva kokushada kwakunzima ukuthola indawo yokuhlala, kodwa umkhaya owawuhlala eSokal owawunobungane koFakazi wasinikeza ikamelo elincane emzini wawo ngemali ephansi. Lo mkhaya wasiqinisekisa ukuthi uTamara wayengaqhubeka ehlala kuleli kamelo uma mina ngiphinda ngiboshwa futhi ngivalelwa ejele. Mina nomkami sambonga uJehova ngesibusiso sakhe sabonga nalo mkhaya ngomusa wawo. Kamuva, lapho lo mkhaya ushonelwa, uTamara wasebenzisa lelo thuba ukuba achazele indodakazi yakhona, uGalina, ngethemba lovuko. Imbewu yeqiniso leBhayibheli yathela izithelo, futhi uGalina wakhula ekuthandeni uMdali wethu. Wabhapathizwa futhi manje ukhonza uJehova kanye nomyeni wakhe.
Izimpelasonto eziningi ngawo-1970, ngangiya ezingxenyeni ezihlukahlukene ze-Ukraine naseMoldavia (Moldova) naseziNtabeni zaseCarpathian, ngihlangana nalabo ababehola enhlanganweni kaJehova futhi ngibakhuthaza. Ngokuvamile ngangihamba ngoLwesihlanu ntambama ngibuye ngeSonto ebusuku. UTamara wayengazi ukuthi ngiyaphi futhi ngezinye izikhathi wayengaqiniseki nokuthi ngizobuya yini. Lesi simo saqhubeka iminyaka. Ngivumelana nalokho iBhayibheli elikushoyo ngomfazi okhutheleyo: “Inani lakhe lidlula kakhulu amarubi.”—IzAga 31:10.
Ngalezo zinsuku noma iyiphi inkonzo yoFakazi BakaJehova yayikufaka engozini. Amandla anikezwa uJehova kuphela asenza sakwazi ukuqhubeka. Izikhathi eziningi ngangibhekana nezimo ezinzima futhi ngingazi ukuthi ngenzenjani. Ngakho ngangimane ngithandaze buthule futhi ngincike kuJehova ukuze ngithole amandla. Ukwenza kanjalo kwaba indlela yethu yokuphila.—IzEnzo 4:29.
Izikhathi Zamuva
Ngokuhamba kwesikhathi, ukuphila kwaba lula ezincekwini zikaJehova e-Ukraine. Ushushiso lwadamba futhi izigwebo zasejele zathathelwa indawo yinhlawulo. Ngawo-1980, iziphathimandla zaqaphela ukuthi oFakazi BakaJehova ngempela bayinhlangano yomhlaba wonke. Ngaleyo ndlela, ngokubopha oFakazi e-Ukraine nakwezinye izindawo eSoviet Union, uHulumeni wawuzenzela idumela elibi kwamanye amazwe. Ngikhumbula ngibuzwa esinye isikhulu esathi: “Manje sesiyabona ukuthi inkolo akudingeki ukuba ibe yimbi. Into esiyikhathalela kakhulu ukuthi inkolo ingaphazamisi uHulumeni.”
EMpumalanga Yurophu baqala ukuphela ubuKhomanisi ekupheleni kwawo-1980, futhi kusukela ngaleso sikhathi siye sajabulela inkululeko eyengeziwe e-Ukraine. Ngo-1991 umsebenzi wethu wokushumayela wavunyelwa ngokomthetho. Kwase kuthi ngo-September 1998, i-Watch Tower Society yavula ihhovisi legatsha eLviv. Ekuqaleni kuka-1999 kwaqala umsebenzi wokwakha isakhiwo segatsha esisha esizohlalisa izisebenzi ezingaphezu kuka-170. Manje e-Ukraine sinabangaphezu kuka-112 000 abahlanganyela emsebenzini wokushumayela, futhi bangaphezu kuka-250-000 ababekhona eSikhumbuzweni ngo-2000. Okumangaza kakhulu inani lentsha esinayo. Emhlanganweni eKiev ngo-1991, intatheli yephephandaba yangibuza:
“Bavelaphi bonke laba bantu? Bengicabanga ukuthi abekho oFakazi eSoviet Union, dukuduku sekunezinkulungwane!”
Ngathi kuyo: “Asivelanga saqhibuka njengamakhowe. Besilokhu sikhonza uJehova lapha iminyaka eminingi.”
“Nenza kanjani ukuba nibe nentsha eningi kangaka enkolweni yenu?” yayifuna ukwazi.
“Kungcono ubuze yona intsha ngokwayo. Ikutshele ukuthi kungani ifuna ukukhonza uJehova.”
Intatheli yathi: “Sengiyibuzile. Ithi iyakujabulela.”
Ngathi: “Yileso-ke isizathu. Uma intsha yethu isho kanjalo, yileyo-ke incazelo.”
Akuyona intsha kuphela ejabulela ukukhonza uJehova. Mina noTamara sesimkhonze iminyaka engaphezu kwengu-80 ihlangene futhi asifuni ukwenana ukholo lwethu nganoma yini. Yize singoFakazi BakaJehova, sinazo izinkinga. Siyaqaphela ukuthi uma nje lesi simiso esidala sisaqhubeka, sonke siyobhekana nobunzima. Kodwa sikuhlomele kangcono ukubhekana novivinyo kunanoma yiliphi elinye iqembu labantu emhlabeni. Ngamandla kaNkulunkulu ongumninimandla onke, uJehova, sizimisele ukubhekana nalezi zinkinga njengoba siye senza esikhathini esidlule. Sizizwa ngendlela uMose azizwa ngayo lapho ehlabelela ingoma yokunqoba: “UJehova ungamandla ami nehubo lami; waba yinsindiso kimi.”—Eksodusi 15:2.
[Isithombe ekhasini 22]
Nginabanye oFakazi ekamu 21
[Isithombe ekhasini 22]
I-“microfilm” ye-“Nqabayokulinda” yesi-Ukraine (ubungako bayo bangempela)
[Isithombe ekhasini 23]
Nginomkami, uTamara
[Isithombe ekhasini 24, 25]
Umfanekiso womdwebi wesakhiwo segatsha esisha esakhiwayo eLviv
[Izithombe ekhasini 25]
Kungani kunentsha eningi kangaka ekhonza uJehova e-Ukraine?