Okuphawulwa Abafundi Balo Magazini

Amachashaza Isihloko esithi “Amachashaza Phambi Kwamehlo Akho?” (June 8, 2000) sathinta ukuphila kwami ngokujulile. Ngathola lo magazini ezinsukwini ezintathu nje ngaphambi kokuba i-retina yeso lami lesokudla ihlukane ngokwengxenye. Izimpawu ezachazwa kulesi sihloko zangiqaphelisa isidingo sokubonana nodokotela ngokushesha. Kwasetshenziswa imisebe ye-laser ukulungisa umonakalo, ngakho amehlo ami awathintekanga. Ngiyabonga ngezihloko ezicwaningwe kahle neziwusizo ngale ndlela.

C. V., South Africa

Inkulumo-ze Ngisanda kufunda umagazini ka-June 22, 2000, futhi ngiyabonga ngochungechunge oluthi “Ingabe Kufanele Ukholelwe Yikho Konke Okuzwayo?” Endaweni engihlala kuyo, sekuwumkhuba ukugcona amaRomany (amaGypsy). Abantu bahlekisa ngendlela okuthiwa angamasela ngayo. Ngenxa yalezi zihloko, ngiyaqaphela ukuthi amahlaya anjalo awafanele, futhi senginqume ukuba ngingawahleki.

K. M., Czech Republic

Ukuhlala Kwelinye Izwe Ngiyabonga ngesihloko esithi “Intsha Iyabuza . . . Ingabe Kufanele Ngiyohlala Kwelinye Izwe?” (June 22, 2000) Ngangilokhu ngilufunda lolu chungechunge, kodwa ngangiba nomuzwa wokuthi ezinye izingozi enizichazayo ziwukweqisa. Nyakenye ngaya kwelinye izwe ngenxa yomkhankaso wezobuciko wesikole sethu nenye iyunivesithi. Nakuba kwakuyisenzakalo esithakazelisayo, sasingazuzisi ngokomoya.

M. P., Italy

Lesi sihloko kanye nesithi “Intsha Iyabuza . . . Ngingahlala Kanjani Ngokuphumelelayo Kwelinye Izwe?” (July 22, 2000) zaba ‘ukudla ngesikhathi esifanele’ kimi. (Mathewu 24:45) Kakade ngase nginqume ukuyochitha unyaka kwelinye izwe ukuze ngifunde ulimi lwakhona. Ngakho ngiyabonga ngempela ngokusikisela nangamacebiso awusizo.

I. Z., Switzerland

I-Easter Island Isihloko esithi “Ukufunda Okukhulu Esiqhingini Esincane” (June 22, 2000) siveza ukukhathazeka kwabantu abaningi abakhathalela imvelo. Kodwa nginomuzwa wokuthi bambalwa abaziqaphelayo izingozi esibhekene nazo. Uma ngicabanga indlela abantu abaye bawuphatha kabi ngayo lo mhlaba, ngihlengezela izinyembezi.

K. M., Japan

I-Daylight Saving Time Uma sikhuluma ngesihloko esithi “I-DST—Umqondo Owafika Kungakabi Isikhathi?” (July 8, 2000), ingabe i-DST iyinto okufanele inconywe ngempela? UMdali wethu omkhulu nguyena owamisa izikhathi zonyaka. Ubani onelungelo lokuzishintsha? Lokho okubizwa ngokuthi i-daylight saving time kuyinto engenangqondo!

I. L., Germany

Isihloko sethu asizange sincome noma sigxeke i-DST. Samane sabika umlando wayo othakazelisayo. UNkulunkulu akazange anikeze iziyalezo eziqondile zokuthi isikhathi kufanele sibalwe kanjani. Ngakho-ke, izinqubo zamanje zokugcina isikhathi zenziwe umuntu futhi azimiswanga uNkulunkulu. I-DST ayizishintshi izikhathi zonyaka. Ngenxa yala maqiniso, kubonakala kungenasimiso saphezulu esisephulayo ngokushintsha amawashi ethu kabili ngonyaka.—ED.

Ukumamatheka Ngiyabonga ngokunyathelisa isihloko esiyigugu esithi “Mamatheka—Kukulungele!” (July 8, 2000) Ngivumelana ngokugcwele nalokho esikushoyo. Sangikhumbuza ukuba ngicabange ngendlela eyakhayo njalo ukuze ngimamatheke ngobuqotho. Yebo, ukumamatheka kusisiza ukuba sakhe ubungane nabanye. Futhi kudambisa isimo esishubile.

P. C., China