Intsha Iyabuza . . .

Ngingakuqeda Kanjani Ukukhathazeka Kangaka?

“Enye yezinto ezicindezela kakhulu kosemusha yikusasa lakhe. Ukhathazeka ngesimo sakho. Ingabe kufanele ngihambe ekhaya? Ngiye esikoleni? Ngingenele inkonzo yesikhathi esigcwele? Ngishade? Izinto ongakhetha kuzo ziningi kangangokuba zikubangela ukwesaba.”—UShane, oneminyaka engu-20.

INGABE ukhathazeka kakhulu? Intsha eningi iyakhathazeka, futhi ngenxa yezizathu ezihlukahlukene. Ipheshana elanyatheliswa njengesiqondiso kubazali labika: “Inhlolo-vo yamuva nje yomhlaba wonke yentsha eneminyaka engu-15 kuya kwengu-18 emazweni angu-41 yembula ukuthi intsha yanamuhla ikhathalela kakhulu ukuthola umsebenzi okahle.” Okulandelayo ohlwini ukukhathazeka ngempilo yabazali. Ukwesaba ukulahlekelwa umuntu emthandayo nakho kwakuphezulu ohlwini.

Inhlolo-vo yoMnyango Wezemfundo e-United States yathola ukuthi intsha eningi e-United States ikhathalela kakhulu “ukuthola amamaki aphambili esikoleni.” Inhlolo-vo efanayo yembula ukuthi intsha eningi izizwa njengoShane (ocashunwe ekuqaleni). Omunye osemusha, okuthiwa ngu-Ashley, uthi: “Ngikhathazekile ngekusasa lami.”

Kodwa enye intsha ikhathazeka ngokuphepha kwayo ngokomzimba. Ngokwenhlolo-vo ka-1996, cishe amaphesenti angu-50 entsha yase-United States ayenomuzwa wokuthi kunobudlova obandayo esikoleni. Intsha engaphezu kwezigidi ezingu-8 (amaphesenti angu-37) yabika ukuthi yayazi othile owayedutshuliwe!

Nokho, akuzona zonke izinkathazo ezimbi ngale ndlela. Intsha eningi ikhathazeke kakhulu ngokuphila kwezenhlalo. Umagazini okuyi-Internet oqondiswe kubazali uthi: “Intsha iyakhathazeka ngokuba nesoka noma intombi, kodwa ngokuvamile ikhathazeka ngokuntula abangane ngokuphelele.” Intombazane esakhula okuthiwa uMeagan iyakhononda: “Yini ongayenza ukuze ubukeke futhi wenze izinto njengohlakaniphile? Ngidinga abangane.” Ekhuluma ngendaba efanayo, osemusha ongumKristu oneminyaka engu-15 okuthiwa uNatanael uthi: “Izingane esikoleni zikhathazeka ngokuba sesitayeleni. Zikhathazeka ngokuthi zihamba, zikhuluma futhi zibukeka kanjani kwabanye. Ziyakwesaba ukubukeka njengeziwula.”

Izinkinga—Ziyingxenye Yokuphila

Bekungaba kuhle uma besingaphila ukuphila okungenazinkathazo. Kodwa iBhayibheli lithi: “Umuntu ozelwe ngowesifazane imihla yakhe mifushane, igcwele ukuyaluza.” (Jobe 14:1) Ngakho-ke, izinkinga—kanye nezinkathazo ezihambisana nazo—ziyingxenye yokuphila. Kodwa uma uvumela izinkinga nezinkathazo zibuse ukucabanga kwakho, ungazilimaza kakhulu. IBhayibheli liyaxwayisa: “Ukukhathazeka enhliziyweni yomuntu kuyayithobisa.”—IzAga 12:25.

Enye indlela yokugwema ukukhathazeka ngokungadingekile ukulawula indlela oziphatha ngayo. U-Ana oneminyaka engu-16 ubudala uthi: “Abaningi engifunda nabo ekilasini bakhathazeke ngokukhulelwa noma ngokuthola isifo esithathelwana ngobulili.” Kodwa ungakugwema ukukhathazeka okunjalo ngokunamathela ezindinganisweni zeBhayibheli zokuziphatha. (Galathiya 6:7) Noma kunjalo, akuzona zonke izinkinga obhekene nazo ezicacile noma okulula kangako ukuzixazulula. Ungakuqeda kanjani ukukhathazeka kangaka?

“Khathazeka Ngokuhlakanipha”

Abantu abaningi bavumela ukukhathazeka kubathene amandla. Kodwa isihloko esavela kumagazini wentsha sasikisela ukuthi umuntu ‘angakhathazeka ngokuhlakanipha’ ngokuthatha isinyathelo esifanele ngalokho kukhathazeka! IBhayibheli linezimiso eziningi ezingakusiza ukuba wenze lokho. Cabangela izAga 21:5: “Imicabango yokhutheleyo isenzuzweni.” Ngokwesibonelo, ake sithi ufuna ukwenza umbuthano wabangane ebandleni. Ukuhlela kahle kungakusiza ugweme ukukhathazeka okukhulu. Zibuze, ‘Obani ngempela abazomenywa? Ngifuna bafike ngasikhathi sini? Ngifuna bahambe nini? Kungakanani ukudla neziphuzo engikudingayo? Yimiphi imidlalo ejabulisayo wonke umuntu angayijabulela?’ Lapho ucabangisisa ngokucophelela, cishe umbuthano wakho uyohamba kahle.

Nokho, ungazibangela ukukhathazeka ngokuvumela izinto zibe yisixakaxaka. UJesu Kristu wamnikeza lesi seluleko owesifazane owazikhathaza ngokweqile elungiselela isivakashi sakhe: “Nokho, kudingeka izinto ezimbalwa, noma eyodwa kuphela.” (Luka 10:42) Ngakho zibuze, ‘Yini ngempela ebalulekile ekwenzeni lo mbuthano uphumelele?’ Ukugcina izinto zilula kungase kukusize ekunciphiseni ukukhathazeka.

Esinye isizathu sokukhathazeka kungase kube ukuphepha kwakho esikoleni. Kuncane ongakwenza ukuze ushintshe leso simo. Kodwa ungathatha izinyathelo ezifanele zokuzivikela. IzAga 22:3 zithi: “Oqondileyo uyabona ububi, acashe.” Ukumane ugweme izindawo eziyingozi—hhayi nje kuphela izindawo ezingasese kodwa ngisho nezindawo ezingagadiwe okubuthana kuzo izichwensi—kunganciphisa amathuba okungena engozini.

Umsebenzi wesikole ungaba esinye isizathu sokukhathazeka. Mhlawumbe unezabelo eziningi ezibalulekile zomsebenzi wesikole futhi unexhala ngokuthi ngeke ukwazi ukuziqeda zonke ngesikhathi. Isimiso esikweyabaseFilipi 1:10 siwusizo: “Niqiniseke ngezinto ezibaluleke ngokwengeziwe.” Yebo, funda ukuhlela izinto eziza kuqala! Bheka ukuthi yisiphi isabelo esiphuthuma kakhulu, uqale ngaso. Bese udlulela kwesilandelayo. Ngokuhamba kwesikhathi, uyozizwa unamandla okuhambisa konke ngohlelo.

Thola Amacebiso

Lapho u-Aaron esakhula, wakhathazeka kakhulu ngokuphumelela ekuhlolweni kokugcina kangangokuba waba nobuhlungu esifubeni. Uyakhumbula: “Ngaxoxa nabazali bami, futhi bangiyisa kudokotela. Ngokushesha wabona ukuthi kwakungonakele lutho ngenhliziyo yami wayesechaza ukuthi ukukhathazeka kungawuthinta kanjani umzimba. Kamuva abazali bami bangisiza ukuba ngiqaphele ukuthi ngangenze konke okusemandleni ukuze ngilungele ukuhlolwa nokuthi kwase kuyisikhathi sokuba ngikhathazeke ngokuzinakekela mina. Ukukhathazeka kwadamba, nobuhlungu besifuba baphela, futhi ngaphumelela ekuhlolweni.”

Uma ukhungethwe ukukhathazeka, ungakuthwali uwedwa. Umbhalo wezAga 12:25, okuke kwacashunwa ingxenye yawo, uma uphelele uthi: “Ukukhathazeka enhliziyweni yomuntu kuyayithobisa, kepha izwi elihle liyayithokozisa.” Uma uveza ‘okukukhathazayo’ ungathola “izwi elihle” lesikhuthazo!

Okokuqala, ungase ufise ukukhuluma nabazali bakho; bangase baveze ukusikisela okuthile. Abavuthiwe ngokomoya ebandleni lakini lobuKristu bangomunye umthombo wokusekelwa. UJanelle oneminyaka engu-15 ubudala uyalandisa: “Ngangikhathazekile ngokuyofunda esikoleni esiphakeme, ngesaba ukubhekana nazo zonke izinto—izidakamizwa, ubulili ubudlova—ngaze ngakhuluma nomdala ebandleni. Wanginika ukusikisela okuningi okuwusizo. Ngazizwa ngingcono ngokushesha ngoba ngase ngiqaphela ukuthi ngingabhekana nesimo.”

Ungazindeli

Ngezinye izikhathi kuba nokuthile okufanele sikwenze, kodwa sizindele ngoba singakujabuleli. Ngokwesibonelo, uShevone oneminyaka engu-19 ubudala wayexabene nomunye umKristu. Wayazi ukuthi kufanele baxoxe ngalokhu, kodwa wazindela. Uyavuma: “Lapho ngiqhubeka ngikuhlehlisa, kwangikhathaza nakakhulu.” UShevone wabe esekhumbula amazwi kaJesu akuMathewu 5:23, 24, akhuthaza amaKristu ukuba alungise izinkinga ezinjalo ngokushesha. “Lapho ekugcineni ngenza lokho,” kuvuma uShevone, “ngathola impumuzo.”

Ingabe kukhona ozindelayo ukukwenza—isabelo ongasithandi noma ukubonisana nothile ngento engakuphethe kahle? Kwenze ngokushesha, futhi ziyoncipha izinto ezikukhathazayo.

Izimo Ezingathi Sína

Akuzona zonke izimo ezixazululeka kalula kanjalo. Cabanga ngensizwa okuthiwa u-Abdur. Unina unomdlavuza, futhi u-Abdur kufanele amondle yena nomfowabo omncane. Njengokulindelekile, u-Abdur uyakhathazeka ngesimo sikanina. Kodwa uthi: “Ngilandela icebiso lamazwi kaJesu, ‘Ubani kini ongathi ngokukhathazeka anezele ingalo eyodwa ebudeni besikhathi sakhe sokuphila?’ Esikhundleni sokuphela amandla, ngizama ukucabanga ngesimo nginqume ukuthi yini ezoletha imiphumela engcono.”—Mathewu 6:27.

Ukuzola lapho ubhekene nenhlekelele akulula. Abanye bacindezeleka kangangokuba bangabe besazinakekela, bazile ukudla. Nokho, incwadi ethi Helping Your Teenager Deal With Stress ixwayisa ngokuthi uma uzincisha ukudla okufanele, “ngeke ukwazi ukumelana nobunzima bokucindezeleka futhi usengozini enkulu yokuhlaselwa yizifo ezinkulu.” Ngakho zinakekele ngokomzimba. Phumula futhi udle ngokwanele.

Ungathola impumuzo enkulu ngokulandela iseluleko seBhayibheli: “Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.” (IHubo 55:22) UShane, ocashunwe ekuqaleni, wayekhathazeke ngekusasa lakhe. Uyakhumbula: “Ngaqala ukugxila kakhulu eZwini likaNkulunkulu nasenjongweni yakhe.” Ngokushesha waqaphela ukuthi wayezoba nekusasa eliqhakazile uma esebenzisa ukuphila kwakhe ekukhonzeni uNkulunkulu. (IsAmbulo 4:11) “Ngayeka ukukhathazeka ngesimo sami,” kusho uShane. “Kwakunokuthile okubaluleke nakakhulu okwakufanele ngicabange ngako.”

Ngakho uma uzithola ukhathazeka ngokweqile, funa izindlela ezakhayo zokubhekana nenkinga yakho. Thola iseluleko sabavuthiwe. Ngaphezu kwakho konke, yazisa uJehova ngalokho okukukhathazayo ‘ngoba uyakukhathalela.’ (1 Petru 5:7) Ngosizo lwakhe, mhlawumbe uyoyeka ukukhathazeka kangaka.

[Isithombe ekhasini 13]

Xoxa nabazali bakho ngalokho okukukhathazayo

[Isithombe ekhasini 14]

Uma usingatha izinkinga ngokushesha, ukukhathazeka kuyodlula ngokushesha