Ubuzalwane Obunobunye Obungenakuzanyazanyiswa
Ngumlobeli we-Phaphama! e-El Salvador
NGO-11:34 EKUSENI, NGO-JANUARY 13, 2001, LONKE ELASE-EL SALVADOR LAGADLWA UKUZAMAZAMA KOMHLABA OKWAKUNGU-7,6 ESIKALINI SIKARICHTER, OKWEZWAKALA KUSUKELA EPANAMA KUYA EMEXICO. BAMBALWA ABAYOKUKHOHLWA LOKHO ABABEKWENZA NGESIKHATHI KUGADLA.
“LAPHO ukuzamazama okubi kakhulu kudamba, saphakamisa amakhanda sabona isiqongo sentaba siqhekezeka futhi kwaba sengathi siyabambeka okwesikhashana,” kukhumbula uMiriam Quezada. “Indodakazi yami yamemeza ithi, ‘Mama! Baleka! Baleka!’” Isiqongo sentaba sabe sesiqhephuka sehla siza ngakubo. Kwafa cishe abantu abangu-500 emphakathini waseLas Colinas, eNueva San Salvador, noma eSanta Tecla, futhi kwabhubha imizi engaba ngu-300.
URoxana Sánchez uyalandisa: “Ngangisanda kuphuma ekhaya futhi ngisesitobhini sebhasi lapho ukuzamazama kugadla. Lapho sekudlulile, ngasiza intokazi ethile ukuthatha izikhwama zayo ngase ngicabanga, ‘Kungcono ngibuyele ekhaya ngoba umkhaya wami uzokhathazeka ngami.’” Lapho uRoxana ebamba ijika lomgwaqo, wabona inqwaba yenhlabathi eyayivale wonke umgwaqo wabo. Umuzi wakhe wawushabalele!
Ukusiza Ngokushesha
Ingqikithi yenani loFakazi BakaJehova e-El Salvador ingaphezu kuka-28 000, kanti kunezinkulungwane ezihlala endaweni yenhlekelele—indawo egudle ugu lwase-El Salvador. Nakuba babeselusizi ngenxa yenhlekelele eyayibehlele, abaningi ngokushesha baqala ukugxila ezidingweni zabanye. UMario Suarez, umbonisi ojikelezayo woFakazi bakaJehova, okhonza eSanta Tecla, uyalandisa: “Cishe ngemva kwehora kube nokuzamazama, ngathola ucingo kucelwa usizo. Kwathiwa abanye abafowethu nodade abangamaKristu babevaleleke ezindlini. Ngokushesha kwahlelwa iqembu lezisebenzi zokuzithandela.
“Sasicabanga ukuthi mhlawumbe kwakuwe izindonga nokuthi kwakudingeka sisuse nje imvithi sivule indlela ukuze abavalelekile bakwazi ukuphuma. Kodwa akekho kithina owayeke wacabanga ukuthi le nhlekelele inkulu kangakanani. Eqinisweni, lapho sifika khona, sabuza ukuthi ikuphi imizi. Sashaqeka lapho sizwa ukuthi sasimi phezu kwayo! Imizi yayimbozwe ngokuphelele yinhlabathi engamamitha amathathu. Kwakushaqisa!”
Njengoba intambama iqhubeka, cishe oFakazi abangu-250 ababevela emabandleni angomakhelwane batheleka bezosiza. Ziphethe nje amapiki, amafosholo, amahalavu epulasitiki kanye nezandla zazo, lezi zisebenzi zokuzithandela zazama ngokuzikhandla ukusiza abasindile. Nokho, bambalwa kakhulu abatholakala besaphila eSanta Tecla. Phakathi kwamakhulu ashona—ngenxa yokuswela umoya noma yokugqitshwa inhlabathi—kwakunoFakazi BakaJehova abahlanu.
Imizamo Yokusiza Ehleliwe
Kulo lonke izwe, amabandla oFakazi ahlanganyela ekunikezeni usizo. EComasagua, e-Ozatlán, eSanta Elena, eSantiago de María nase-Usulután, kunoFakazi abaningi ababelahlekelwe yimizi yabo. AmaHholo OMbuso nemizi kwenziwa izikhungo zokuqongelela izinto. “Ukusekela kwakukukhulu,” kusho umbonisi ojikelezayo u-Edwin Hernández. “Abafowethu bafika nokudla, izingubo zokugqoka, omatilasi, imithi ngisho nemali yokusiza ngezindleko zomngcwabo.”
Ikomiti yokunikeza usizo, eyamiswa ihhovisi legatsha lendawo loFakazi BakaJehova, yahlela ukuba amabandla angathintekanga kakhulu anakekele izidingo eziphuthumayo zalabo ababethinteke kakhulu. Kwamiswa amaqembu ezisebenzi anoFakazi abaphakathi kwabayishumi nabangu-20, futhi enza umsebenzi wokulungisa owawudingeka.
Ngaphezu kwalokho, amaKomiti Okwakha Esifunda oFakazi BakaJehova, avame ukuhlela ukwakhiwa kwamaHholo OMbuso, ahlela amaqembu okwakha imizi yesikhashana yalabo imizi yabo eyayicekeleke phansi ngokuphelele. E-El Salvador intengo kathayela yenyuka yamba eqolo, ngakho igatsha loFakazi BakaJehova laseGuatemala lanikela ngothayela omningi ngesihle. Izingodo zokweseka izindlu zanikelwa amagatsha ase-United States naseHonduras.
Phakathi nalesi siyaluyalu, ukundindizela kwakusaqhubeka. Imiphakathi yonke yayilala emigwaqweni ngaphansi kwamatende epulasitiki namashidi amadala. Abantu babehlalele ovalweni. Ngo-February 12, kwase kubikwe ukundindizela okungu-3 486.
Ukuzamazama Kwesibili Okukhulu
Ngo-February 13, 2001, ngo-8:22 ekuseni, esikhathini esiyinyanga ngemva kokuzamazama kokuqala, kwagadla ukuzamazama komhlaba kwesibili e-El Salvador, okwakunesilinganiso esingu-6,6 esikalini sikaRichter. Nalapha futhi, imizamo yoFakazi BakaJehova yokutakula abantu nokubasiza yenziwa ngokushesha. Umdala okuthiwa uNoé Iraheta wachaza: “Umqhubi ngamunye weSifundo Sencwadi Sebandla wahamba eyofuna oFakazi ababelwe eqenjini lakhe ukuze aqiniseke ukuthi bonke babephephile yini.”
Idolobha laseSan Vicente nelaseCojutepeque kanye nendawo ewazungezile athinteka kakhulu. Amadolobhana aseSan Pedro Nonualco, iSan Miguel Tepezontes neSan Juan Tepezontes ayengamanxiwa. ECandelaria, eCuscatlán, lapho kwakubhubhe khona cishe yonke into, kwadilika isikole sesifunda sombhishobhi, kwafa izingane ezingaphezu kuka-20. USalvador Trejo, uFakazi wendawo, uyalandisa: “Cishe ngemva kwehora, ngezwa othile ememeza emgwaqweni, ethi ‘Mfoweth’ uTrejo!’ Ekuqaleni, angibonanga lutho ngenxa yothuli. Kodwa ngokungazelelwe, kwaqhamuka oFakazi baseCojutepeque. Babezohlola ukuthi isimo sethu sasinjani!”
Amabandla angomakhelwane aphinde ahlelwa ukuba anakekele izidingo zezisulu zale nhlekelele yesibili. Alandela isibonelo sekhulu lokuqala samaKristu aseMakedoniya anxusa ukuba anikezwe ilungelo lokupha, nakuba nawo ngokwawo ayeswele. Ngokwesibonelo, abantu bamabandla asedolobheni laseSantiago Texacuangos, abalahlekelwa kakhulu phakathi nokuzamazama kokuqala, bapheka ukudla bakuyisa kushisa kubafowabo eSan Miguel Tepezontes engumakhelwane.
Kulinganiselwa ukuthi sekukonke, kwafa abantu abangaphezu kuka-1 200 ekuzamazameni komhlaba kwase-El Salvador, futhi kwabikwa ukuthi kwafa abanye abangu-8 eGuatemala engumakhelwane.
Yaziswa Kakhulu Imizamo
Amanye amaqembu anikeza usizo ayazisa imizamo ehlelekile yoFakazi yokusiza izisulu. Kwafika imoto ye-National Emergency Committee ilethe izinto zosizo oluphuthumayo eHholo LoMbuso elalisetshenziswa njengendawo yokukhosela. Ummeleli wale nhlangano wababaza, ethi: “Kuzo zonke izikhungo zokukhosela esesizivakashele, lesi esokuqala esihlelekile. Ngiyanihalalisela!” Akekho lapho owayegijimela elolini, edudula abanye, njengoba kwakunjalo kwezinye izikhungo. Eqinisweni, abantu asebekhulile babecatshangelwa kuqala lapho kwabiwa izinto ezinikelwe.
OFakazi abazange bagcine ngokusiza amanye amakholwa kuphela. Ngokwesibonelo, eSan Vicente omakhelwane abaningi abangebona oFakazi babalekela emagcekeni eHholo LoMbuso. URegina Durán de Cañas wathi: “Lapha eHholo LoMbuso LoFakazi BakaJehova, abantu banezinhliziyo ezinhle. Basamukela bathi, ‘Ngenani!’ futhi nakhu silapha. Ngisho nasebusuku bayashintshana besigadile lapho silele.”
Ukuhlelwa Kokwakha
Ngemva kokubala izindleko zomonakalo, kwathunyelwa izihlongozo zokwakha izindlu ezazidingeka ehhovisi legatsha. Kwakhiwa imizi yesikhashana yalabo ababelahlekelwe yimizi yabo. Futhi, nemizi eyayibhidlike nganxanye yalungiswa. La maqembu azikhandlayo, nasebenza ngekhono adonsa amehlo abantu, njengoba omakhelwane baphuma bezowabukela esebenza.
Owesifazane othile, owayecabanga ukuthi lezi zisebenzi zazivela edolobheni zizonikeza usizo njengoba kwakukade kuthenjisiwe, weza ezokhononda ngokuthi akekho owayemsizile ukususa imvithi kwakhe. Izingane zomakhelwane zachaza: “Cha mama, abaveli edolobheni. Bavela eMbusweni!” Omunye ongeyena uFakazi, uMoisés Antonio Díaz, wathi: “Kuyinto enhle ukubona indlela oFakazi BakaJehova ababasiza ngayo abasweleyo. Lena inhlangano enobunye ngempela, futhi ngenxa kaNkulunkulu, banomusa wokusisiza thina bantu abampofu. Ngiye ngasebenza nabo futhi ngizimisele ukuqhubeka ngenza kanjalo.”
Udade ongumKristu owakhelwa umuzi wesikhashana wayekhala izinyembezi lapho ethi: “Mina nomyeni wami siswele amazwi okubonga—okokuqala kuJehova bese kuba nakulaba bafowethu, abaye basisiza ngokushesha, yize bengasazi.”
Maphakathi no-April, oFakazi base bakhe imizi engu-567 yesikhashana yezisulu zokuzamazama komhlaba, kanti eminye imikhaya engaba yikhulu yase ithole izinto zokulungisa imizi yayo eyayibhidlikile. Lapho imikhaya esweleyo yayisinemizi evikelekile, oFakazi base begxila emaHholo OMbuso angu-92 ayedinga ukulungiswa noma ukwakhiwa kabusha.
Ukuvuselela Ukuphila Kwabantu
Ngaphandle kokuvuselelwa kwezakhiwo nemizi, abaningi babejabule kakhulu ngokuqiniswa ngokomoya nokunakekelwa kwenhlala-kahle yabo engokomzwelo.
UMiriam, okukhulunywe ngaye ekuqaleni, wathi: “Ngaphansi kwalezi zimo, ngenxa yokuthi ukundindizela kwakuqhubeka, kwakunezikhathi lapho ngangihlalela ovalweni, kodwa abafowethu babewumthombo wobudlelwano nesikhuthazo njalo. Besiyoba yini nje ngaphandle kwabafowethu?”
Ukunakekela kukaJehova kothando esebenzisa ibandla kuye kwashukumisa izisulu zokuzamazama komhlaba ngezindlela ezimangalisayo. EComasagua, cishe yonke imizi yoFakazi yayibhidlikile noma icekelwe phansi ukuzamazama kokuqala. Kodwa, abangu-12 kulab’ oFakazi abangu-17 balapho, babhalisela ukuhlanganyela enkonzweni yesikhathi esigcwele phakathi no-April no-May, futhi ababili sebeyizikhonzi ezivamile zesikhathi esigcwele.
Amabandla esifundeni saseCuscatlán, enye yezindawo ezathintwa kakhulu ukuzamazama kwesibili, aba nomhlangano wawo wosuku olukhethekile ngo-March. Kwakunenani eliyingqopha-mlando labangu-1 535, futhi kwabhapathizwa abantu abangu-22. Okwamangaza abahleli bomhlangano ukuthi naphezu kweqiniso lokuthi abaningi ababekhona babesanda kulahlekelwa imizi yabo, banikela imali eningi eHholo LoMhlangano.
Ezwakalisa ukubonga kwabaningi, uFakazi othile waseSan Vicente wathi: “Ngangifunde ezincwadini indlela inhlangano esabela ngayo phakathi nezikhathi zenhlekelele, kodwa manje sengizibonele mathupha, futhi ngiye ngakubona ukusekela kwabazalwane. Siye sabona ukusebenza kothando lobuKristu. Yeka ilungelo esinalo lokuba ingxenye yalaba bantu abanobunye!”
[Isithombe ekhasini 23]
Ukudilika kwenhlabathi okwabangelwa ukuzamazama kwagqiba imizi engaphezu kuka-300 eLas Colinas
[Umthombo]
Bottom of pages 23-5: Courtesy El Diario de Hoy
[Isithombe ekhasini 24]
Izakhamuzi zasebenzisa amapiki, amafosholo namabhakede emsebenzini wokutakula
[Umthombo]
Courtesy of La Prensa Gráfica (photograph by Milton Flores/Alberto Morales/Félix Amaya)
[Isithombe ekhasini 25]
Amanxiwa eHholo LoMbuso eTepecoyo
[Isithombe ekhasini 26]
Abazalwane bahlela indawo yokukhosela ngokushesha eTepecoyo ukuze baqhube imihlangano yabo
[Izithombe ekhasini 26]
OFakazi bakha kabusha ngokushesha amaHholo OMbuso futhi bakha nemizi yesikhashana engaphezu kuka-500
[Isithombe ekhasini 26]
Umama ongayedwa nendodakazi yakhe abanokwazisa babukele njengoba kuvuselelwa umuzi wabo owawubhidlikile