Umbono WeBhayibheli
Indlela Yokuphila Ehlukile—Ingabe UNkulunkulu Uyayamukela?
“NGIZOKWAZI nini ukuthi mina nginakuphi ukuthambekela kobulili?” Yabuza kanjalo intombazanyana eneminyaka engu-13 ibhalela ingosi enikeza izeluleko entsheni. Umbuzo wayo uveza isimo sengqondo sabaningi abanomuzwa wokuthi abantu bakhululekile ukuba baphishekele noma iyiphi indlela yobulili abayikhethayo.
Kungenzeka ukuthi kunabantu abalwisana ngobuqotho nemizwa yokukhungatheka ngokuphathelene nemizwa yabo yobulili. Abanye bazamukela obala izindlela zokuphila okuhlukile njengobungqingili. Kanti abanye benza futhi bagqokise okomuntu wobulili obuhlukile bengahlonizi. Abanye bayahlinzwa bashintshe ubulili babo. Kukhona ngisho nabantu abathi abantu abadala kufanele bavunyelwe ukuba babe nobuhlobo bobulili nezingane.
Ingabe ngempela imikhuba yomuntu yobulili nokuthi ufuna ukuba ngowabuphi ubulili kumane kuyindaba yokuzikhethela kwakhe? Lithini iZwi likaNkulunkulu ngalezi zindaba?
“Wabadala Kwaba Owesilisa Nowesifazane”
Ngokwencwadi yeBhayibheli kaGenesise, uNkulunkulu ngokwakhe wadala umahluko okhona phakathi kwabesilisa nabesifazane. Umlando uthi: “UNkulunkulu wabe esemdala umuntu ngomfanekiso wakhe . . . Wabadala kwaba owesilisa nowesifazane. Ngaphezu kwalokho, uNkulunkulu wababusisa futhi uNkulunkulu wathi kubo: ‘Zalani nande nigcwalise umhlaba niwunqobe.’”—Genesise 1:27, 28.
UNkulunkulu wadala abantu benenkululeko yokuzikhethela futhi wabanikeza namathuba okuba bayijabulele le nkululeko. (IHubo 115:16) Njengoba umuntu ayephathiswe umthwalo wokunakekela zonke ezinye izinto eziphilayo emhlabeni, wavunyelwa ngisho nokuba akhethe amagama afanele ayezoziqamba wona. (Genesise 2:19) Nokho, ezindabeni zobulili, uNkulunkulu wanikeza iziqondiso eziqondile.—Genesise 2:24.
Ngenxa yokungalaleli kuka-Adamu, sonke siye sazuza ukungapheleli njengefa. Ngakho-ke kumelwe silwisane nobuthakathaka benyama nezifiso ezinamandla ezingavumelani nenjongo kaNkulunkulu yasekuqaleni. Ngakho, emithethweni eyanikezwa ngoMose, uNkulunkulu wabalula imikhuba yobulili eyayenyanyeka kuye—okungukuthi, ukuphinga, ukulala nesihlobo, ubungqingili, nokulala nesilwane. (Levitikusi 18:6-23) UNkulunkulu wakwenqabela ngokuqondile nokuzenza ubukeke njengomuntu wobulili obuhlukile ngenjongo yokuziphatha kabi ngokobulili. (Duteronomi 22:5) IBhayibheli lifundisa ngokungaguquguquki ukuthi ubuhlobo bobulili okuwukuphela kwabo obamukelekayo kuNkulunkulu yilobo obuphakathi kwabantu bobulili obungafani abashadile. (Genesise 20:1-5, 14; 39:7-9; IzAga 5:15-19; Hebheru 13:4) Ingabe lezo zindinganiso zinengqondo?
Kukhetha Bani?
IBhayibheli lifanisa isimo somuntu phambi koMdali wakhe nobumba ezandleni zombumbi. Lithi: “O muntu, ungubani-ke ngempela ukuba uphendulane noNkulunkulu? Into ebunjiwe ingasho yini kulowo oyibumbile ukuthi, ‘Ungenzeleni ngale ndlela?’” (Roma 9:20) Uma ubheka indlela uNkulunkulu enze ngayo amadoda nabesifazane kusobala ukuthi kungokwemvelo ukuba bakhangane ngokobulili. Ngenxa yalokho ukukhangwa ngokobulili ngumuntu wobulili obufanayo, isilwane, noma ingane akukhona okungokwemvelo.—Roma 1:26, 27, 32.
Ngenxa yalokhu, abantu abaphishekela lokho kuthambekela kobulili okungekhona okungokwemvelo baphikisana noNkulunkulu. IBhayibheli liqukethe lesi sixwayiso: “Maye kulowo ophikisene noMbumbi wakhe, njengodengezi luphikisana nezinye izindengezi zomhlabathi! Ingabe kufanele yini ubumba luthi kumbumbi walo: ‘Yini oyenzayo?’” (Isaya 45:9) Ngokuqinisekile kunengqondo ukuba uMenzi wabantu anikeze isiqondiso ezindabeni zobulili. Akunangqondo-ke yini ukuba abantu balandele leso siqondiso?
Ukulawula Isitsha Sakho
Umlobi weBhayibheli uPawulu wasebenzisa umfanekiso ofanayo lapho enikeza amaKristu isiqondiso ngokuziphatha kobulili. Wathi: “Ngamunye wenu [kufanele] azi ukuthi angasilawula kanjani isitsha sakhe siqu ngokungcweliswa nangodumo, kungabi ngesifiso sobulili sokukhanuka.” (1 Thesalonika 4:4, 5) UPawulu uqhathanisa umzimba womuntu nesitsha. Ukulawula leso sitsha kusho ukwenza imicabango nezifiso zakho kuvumelane nemithetho kaNkulunkulu yokuziphatha.
Kuyavunywa ukuthi lokhu kungase kungabi lula. Kuyaqondakala ukuthi angase abe nobunzima umuntu oye wanukubezwa ngokobulili esemncane, umuntu abazali noma ababheki bakhe abaye bambekela isibonelo esiphendukezelwe ngobudoda noma ngobufazi, noma umuntu oye wachayeka ezithombeni zobulili ezingcolile esemncane. Ufuzo, ama-hormone nokusebenza kwengqondo nakho kungase kube nendima ekuphendukezeleni imizwa yobulili. Nokho, kuyaduduza ukwazi ukuthi uMdali wethu angabanikeza usizo futhi abasekele labo abakudingayo.—IHubo 33:20; Hebheru 4:16.
Vuma UMbumbi Omkhulu Akulolonge
Isigaxa sobumba kudingeka ukuba siqondane nesondo lombumbi ngaphambi kokuba aqale ukusilolonga nokusibumba. Khona-ke njengoba leli sondo lijikeleza, umbumbi ngobuciko ulucindezela ngesineke lolu bumba ngeminwe yakhe ukuze lube yinto ethandekayo. Ngaphambi kokuba nathi silolongwe sibe abantu abathandekayo emehlweni kaNkulunkulu, kudingeka ukuba sigxile ezimisweni nasemithethweni kaNkulunkulu engaphelelwa yisikhathi. Lapho nje siqala ukwenza umzamo, uNkulunkulu ngothando usilolonga ngesineke ngeBhayibheli, umoya wakhe ongcwele, nobuzalwane bobuKristu. Umuntu ube eseqala ukuzwa nokunambitha ekuphileni kwakhe ukuthi uNkulunkulu uyamkhathalela.
Yebo, kumelwe sifunde ukukwethemba ukuhlakanipha kukaNkulunkulu, sethembe ukuthi uyazi ukuthi yikuphi okungcono kakhulu kithi. Lokhu kumethemba kuhlakulelwa ngomthandazo nangokutadisha iBhayibheli ngenkuthalo. Umuntu obhekana nenkinga yemizwa yobulili engafanele enaleso simo sengqondo uyalolongeka ezandleni zoMdali. Eyoku-1 Petru 5:6, 7 ithi: “Ngakho-ke, zithobeni ngaphansi kwesandla sikaNkulunkulu esinamandla, ukuze aniphakamise ngesikhathi esifanele; kuyilapho niphonsa zonke izinkathazo zenu phezu kwakhe, ngoba uyanikhathalela.”
Ukufunda iBhayibheli njalo kusenza sijwayelane nenkumbula yezinceku zikaNkulunkulu ezithembekile ezalwisana nezifiso zenyama futhi zenqaba ukugoba uphondo. Yeka ukuthi lezi zibonelo zikhuthaza kangakanani! Singakuzwa ukukhungatheka umphostoli uPawulu aba nakho ngezinye izikhathi lapho ethi: “Yeka mina muntu wosizi! Ubani oyongophula kulo mzimba othola lokhu kufa?” Kodwa, wabuye wasiqondisa emthonjeni oyinhloko wosizo lapho eziphendula yena: “Makabongwe uNkulunkulu ngoJesu Kristu iNkosi yethu!”—Roma 7:24, 25.
Amandla Okushintsha
Singathola nosizo lomoya ongcwele kaNkulunkulu. Ungamandla amakhulu okushintsha. Umoya ongcwele usisiza ukuba ‘silahle ubuntu obudala futhi sigqoke ubuntu obusha obadalwa ngokwentando kaNkulunkulu ngokulunga kweqiniso nokuthembeka.’ (Efesu 4:22-24) UBaba wethu wasezulwini onothando akwenzeki nakanye angasabeli lapho sicela umoya wakhe ongcwele ngobuqotho ukuba usisize ekwenzeni lolu shintsho. UJesu uyasiqinisekisa ukuthi uBaba “uyobanika umoya ongcwele labo abawucela kuye.” (Luka 11:13) Kodwa-ke kudingeka ukuba siphikelele emthandazweni njengoba amazwi akhe ebonisa: “Qhubekani nicela, niyophiwa.” (Mathewu 7:7) Lokhu kuyoba njalo ikakhulukazi lapho silwela ukulawula izifiso ezinamandla zobulili.
UNkulunkulu uyasisiza nangobuzalwane bobuKristu beqiniso, obakhiwa abantu bazo zonke izizinda. Amanye amaKristu ebandleni lekhulu lokuqala eKorinte ngaphambili ayephakathi ‘kwamadoda agcinelwe izinjongo ezingezona ezemvelo namadoda alala namadoda.’ Yize ayenjalo, ashintsha. Igazi likaKristu lawahlanza, futhi amukeleka emehlweni kaNkulunkulu. (1 Korinte 6:9-11) Abanye namuhla kudingeka benze ushintsho olufanayo. Labo bantu bangathola ukusekelwa ebandleni lobuKristu njengoba belwisana nezifiso ezimbi.
Ingabe lokhu kusho ukuthi uma nje umuntu eba umKristu ziyaphela ngaso leso sikhathi zonke izifiso eziphambukile noma ukukhungatheka ngobulili bakhe? Akunjalo. Ukuphikelela ekusebenziseni izimiso zeBhayibheli kuye kwabasiza abanye ukuba baphile ukuphila okuvamile. Noma kunjalo, ezimweni eziningi la maKristu kuye kwadingeka ukuba nsuku zonke alwisane nezifiso ezimbi. AmaKristu anjalo akhonza uNkulunkulu yize ‘eneva’ elingokomfanekiso “enyameni.” (2 Korinte 12:7) Uma nje eqhubeka elwisana nokuthambekela okubi futhi elondoloza ukuziphatha okulungile, uNkulunkulu uwabheka njengezinceku ezithembekile futhi ahlanzekile emehlweni akhe. Angabheka phambili esikhathini esizayo lapho sonke isintu ‘siyokhululwa khona ekugqilazweni ukonakala sibe nenkululeko ekhazimulayo yabantwana bakaNkulunkulu.’—Roma 8:21.
Njengoba sisalindele leso sikhathi, bonke abathanda ukuthokozisa uNkulunkulu kumelwe banamathele ezindinganisweni zakhe zokulunga. AmaKristu eqiniso akhetha ukukhonza uNkulunkulu—hhayi ukulandela ukuthambekela kwawo kobugovu. Labo abalalela intando kaNkulunkulu ngokuthobeka kuzo zonke izici zokuphila bayovuzwa ngenjabulo nentokozo yaphakade.—IHubo 128:1; Johane 17:3.
Uma ungakujabulela ukuthola ukwaziswa okwengeziwe noma ungathanda ukuba othile akuvakashele ekhaya azokuqhubela isifundo seBhayibheli samahhala, siza ubhale, ufake igama lakho nekheli lendawo ohlala kuyo, ukuthumelele OFakazi BakaJehova, Private Bag X2067, Krugersdorp, 1740, South Africa, noma ekhelini elifanele ekhasini 5.
[Amazwi acashunwe esihlokweni ekhasini 30]
Ezindabeni zobulili, uNkulunkulu wanikeza iziqondiso eziqondile
[Amazwi acashunwe esihlokweni ekhasini 31]
Amanye amaKristu ebandleni lekhulu lokuqala eKorinte ngaphambili ‘ayengamadoda agcinelwe izinjongo ezingezona ezingokwemvelo namadoda alala namadoda.’ Yize ayenjalo, ashintsha
[Isithombe ekhasini 32]
Ukutadisha iBhayibheli kusiza umuntu ukuba ahlakulele izindinganiso eziphakeme zokuziphatha