Inkulisa Engenawo Amathoyizi
NGUMLOBELI WE-PHAPHAMA! EJALIMANE
Ngolunye usuku ekuseni lapho izingane zingena enkulisa, zathola amagumbi engenalutho ngaphandle kwefenisha. Zabafuna zaze zancama onodoli nezinye izinto zokudlala. Kwakungekho zincwadi nazinto zokwakha amathoyizi. Kungekho ngisho nephepha nesikele. Wonke amathoyizi ayesusiwe futhi engezukubuyiswa kuze kuphele izinyanga ezintathu. Kwakwenzenjani?
Le nkulisa ingenye yezinkulisa ezandayo e-Austria, eJalimane, naseSwitzerland ezihlanganyela emkhankasweni ophawulekayo nosanda kuhlongozwa okuthiwa Izinkulisa Ezingenamathoyizi. Yize kungase kuzwakale kuyinqaba, lo mkhankaso, oye wanconywa kakhulu izazi zempilo zoMbimbi LweYurophu, uhloselwe ukuvimbela ukulutheka. Eminyakeni yamuva abacwaningi baye baqaphela ukuthi abantu akuvamile ukuba babe imilutha yanoma iluphi uhlobo uma behlakulela amakhono okuxhumana nabanye abantu besebancane. Umbiko wephephandaba uthi la makhono ahlanganisa “amakhono okuxoxa nawokujwayelana kalula nabantu, ukulungisa izingxabano, ukuqaphela izenzo zakho, ukuzikhuza, ukubona izinkinga, ukufuna usizo nokuthola isixazululo.” Ngokwabagqugquzeli balo mkhankaso, umuntu kufanele afunde la makhono esemncane ngangokunokwenzeka, futhi izikhathi zokungabi namathoyizi ziwusizo ekufezeni lokhu, zithuthukisa ukuzicabangela nokuzethemba.
Inkathi yokungabi namathoyizi izinyanga ezintathu iye yahlelwa ngokucophelela futhi kwaxoxwa ngayo nabazali nazo izingane. Ekuqaleni ezinye izingane zivele zingazi ukuthi zingenzani ngaphandle kwamathoyizi. Umbiko uphawula ukuthi “kunezinkulisa lapho izingane ziba uqanduqandu amasonto amane okuqala,” nabahleli baphelelwe amasu. Kodwa izingane ziyajwayela futhi zifunde ukusebenzisa umqondo wazo. Njengoba zingenawo amathoyizi okudlala, izingane ziyaxoxa, zihlele, zidlale ndawonye ngokwengeziwe, kanjalo zithuthukise amakhono azo okuxhumana nabantu nolimi. Ezinye ezazivame “ukucasha” ngamathoyizi azo manje sezizenzela abangane. Abazali nabo baye baphawula izinguquko ezinhle. Bathi izingane ziziphatha kangconywana lapho zidlala futhi manje zithambekele kakhulu ekusebenziseni umqondo wazo kunangaphambili.