Indlela Izilwane Ezondlana Futhi Zinakekelane Ngayo
Ngumlobeli we-Phaphama! eSpain
A BAZALI abangabantu ngokuvamile bachitha iminyaka engamashumi amabili bekhulisa ingane. Nokho, izilwane eziningi zona kumelwe zondle abantwana bazo zibuye zibaqeqeshe ngokuphelele phakathi nezinyanga nje ezimbalwa zasehlobo. Izibonelo ezimbalwa zizosisiza sibone umsebenzi onzima ezinye izilwane ezingabazali ezibhekana nawo unyaka nonyaka.
1. Unogolantethe Unogolantethe osesithombeni esikule ndaba awunaso isikhathi sokuphumula ehlobo. Njengoba unamaphuphu asakhula okufanele uwondle, kumelwe uye uphindelela echibini eliseduze uyofuna amaselesele, izinhlanzi ezincane, izibankwa, noma izintethe, ngaphandle kokulungisa isidleke ngezikhathi ezithile. Bobabili abazali bangena bephuma usuku lonke. Amaphuphu ayizidlakudla. Phela, phakathi namasonto okuqala ambalwa, angadla ukudla okungangesigamu sesisindo sawo usuku ngalunye! Ngisho nalapho sebekwazi ukundiza, onogolantethe abasebancane bayaqhubeka bethembele kubazali amanye amasonto ambalwa.
2. Ingulule Izingulule ngokuvamile ziyimikhaya enomzali oyedwa, futhi umama onakekela amawundlu. Kufanele athole ukudla cishe nsuku zonke ukuze azondle ngokwanele ngesikhathi esancelisa amawundlu akhe—avame ukuba mathathu kuya kwamahlanu. Lokhu akuwona neze umsebenzi olula, njengoba uke aphume kaningi eyozingela kodwa abuye nenduku yombangandlala. Ngaphezu kwalokho, njalo ngemva kwezinsuku ezimbalwa kufanele athuthele umkhaya wakhe komunye umphandu ngoba amabhubesi ahlale efuna amawundlu angavikelekile. Lapho amawundlu esenezinyanga ezingu-7 ubudala, uqala ukuwaqeqeshela ukuzingela, okuwumsebenzi odla isikhathi, futhi othatha esinye isikhathi esingangonyaka. La mawundlu avame ukuhlala nonina isikhathi esiwunyaka kuya kwesingaba unyaka nesigamu.
3. Idada I-“grebe” Ama-grebe namaphuphu awo angamathe nolimi. Ngemva nje kokuchamusela, amaphuphu ashiya isidleke sawo esintanta emanzini anamathele emhlane wabazali onethezekile. La maphuphu angena phakathi kwezimpaphe zamaphiko nezesisila kubazali bawo. Lapho, athola indawo efudumele nesivikelo kuyilapho umama noma ubaba eqhubeka ebhukuda. Abazali bayashintshana ngokudoba nokunakekela amaphuphu. Nakuba ngokushesha la maphuphu efunda ukuzidobela ngokwawo ukuze athole ukudla, isibopho anaso nabazali bawo siqhubeka isikhathi esithile.
4. Indlulamithi Akuvamile ukuba izindlulamithi zibe namankonyane angaphezu kwelilodwa ngesikhathi, futhi akunzima ukubona ukuthi kungani kunjalo. Indlulamithi esanda kuzalwa, njengale esesithombeni esihambisana nale ndaba, ingase ibe nesisindo esingamakhilogremu angu-60 futhi ibe ngamamitha amabili ukuphakama! Ngemva kwehora lizelwe, inkonyane lendlulamithi lisuke selizihambela futhi ngokushesha liqala ukuncela kunina. Lincela izinyanga ezingu-9, nakuba liqala ukudla ngokushesha ngemva kokuzalwa. Lapho lisongelwa yingozi, inkonyane lima phakathi kwemilenze kanina, ngoba imilenze yakhe enamandla lapho ekhahlela iyisivikelo esihle kakhulu kubazingeli abaningi.
5. Isivuba Izivuba kufanele zisheshe futhi zikhethe lapho zidobela amaphuphu azo izinhlanzi. Izazi zezinyoni ziye zathola ukuthi bobabili abazali bafunza amaphuphu ngezinhlanzi ezincane ezingaphansi kwamasentimitha amabili nesigamu ubude. Umzali ubamba inhlanzi ngomsila. Lokhu kwenza izinto zibe lula ngamaphuphu alambile, ngoba angakugwinya kalula ukudla kwawo uma eqala ngekhanda. Njengoba amaphuphu ekhula, abazali baletha izinhlanzi ezinkudlwana. Abazali baqala nokuwafunza kaningana amaphuphu abo. Ekuqaleni, iphuphu ngalinye lifunzwa njalo ngemva kwemizuzu engaba ngu-45. Kodwa lapho amaphuphu esenezinsuku ezingaba ngu-18, aqala ukudla impela, athola inhlanzi njalo ngemva kwemizuzu engu-15! Iphuphu elisesithombeni kakade seliphumile esidlekeni futhi lizoqala ukuzidobela lona maduzane. Ungase ucabange ukuthi kuleli qophelo abazali bazolijabulela ithuba lokuphumula ekukhuliseni abantwana. Kodwa akunjalo ngezivuba! Zivame ukuyiqala phansi futhi yonke le nqubo zikhulise iqembu lesibili ngalo kanye lelo hlobo.
Kuyiqiniso ukuthi ayikaziwa imininingwane eminingi yendlela izilwane ezihlukahlukene ezinakekela ngayo abantwana bazo. Kodwa njengoba izazi zemvelo ziqhubeka zithola okwengeziwe, kuya kucaca ukuthi umuzwa wemvelo wokuba umzali unamandla kakhulu ezilwaneni. Uma uNkulunkulu eyihlomise kanjalo indalo yakhe eyizilwane, ngokuqinisekile ufisa ukuba abazali abangabantu banakekele futhi bondle izingane zabo ngendlela efanele.