Lokho Lowo “Owukuphela KukaNkulunkulu Weqiniso” Akuthembisayo
UJEHOVA UNKULUNKULU wabeka umbhangqwana wokuqala ongabantu epharadesi lasemhlabeni—insimu yase-Edene. Wawuyala ukuba ube nabantwana futhi ‘unqobe umhlaba,’ okwakuyohlanganisa nokwandisa ikhaya lawo eliyiPharadesi njengoba umkhaya wawo wanda. (Genesise 1:26-28; 2:15) Ingabe iyoke ifezeke nje le njongo kaNkulunkulu yokuba isintu sijabulele ipharadesi lasemhlabeni?
Ngokuqinisekile iyofezeka! “Empeleni,” ngokwesiprofetho seBhayibheli, “[uJehova] uyokugwinya ukufa kuze kube phakade” futhi “ngokuqinisekile [uyosula] izinyembezi ebusweni bonke.” Lapho lokhu kwenzeka, ‘ngokuqinisekile umuntu uyothi: “Bheka! Lona nguNkulunkulu wethu. Sithembele kuye, uyosisindisa. Lona nguJehova. Sithembele kuye. Masijabule sithokoze ngensindiso yakhe.”’—Isaya 25:8, 9.
Incwadi yokugcina yeBhayibheli ichaza izimo eziyoba khona emhlabeni ngemva kokususwa kwalo mhlaba okhona manje, noma isimiso sezinto esibuswa uSathane. Maqondana “nomhlaba omusha” owakhiwa isintu esithanda uNkulunkulu, iBhayibheli lithi: “Itende likaNkulunkulu likanye nabantu, uyohlala nabo, babe ngabantu bakhe. UNkulunkulu ngokwakhe uyoba nabo. Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.”—IsAmbulo 21:1-4.
Yeka izithembiso ezinhle! Ingabe zikhona izisekelo zokuzikholelwa? Cabanga ngendlela ukufa kukaJesu okuwumhlatshelo kanye nezimangaliso azenza okusinika ngayo isisekelo sokuqiniseka ukuthi uNkulunkulu uyokufeza konke akuthembisayo.—2 Korinte 1:20.
Ukuphila KukaJesu Okuyisihlengo
Lapho uSathane eyenga u-Adamu ukuba eqe umyalo kaNkulunkulu futhi one, yonke inzalo ka-Adamu yazuza isono njengefa. IBhayibheli lithi: “Njengoba nje ngomuntu oyedwa isono sangena ezweni nokufa kwangena ngesono, . . . ukufa kwasakazekela kubantu bonke ngenxa yokuthi bonke bonile.” Kodwa lokhu kulandisa kweBhayibheli kuyaqhubeka: “Ngokulalela komuntu oyedwa [umuntu ophelele uJesu] abaningi bayoba ngabalungileyo.” (Roma 5:12, 19) Njengoba sekuphawuliwe esihlokweni sokuqala kulolu chungechunge, uJesu ‘ungu-Adamu wokugcina,’—lowo ‘ovela ezulwini’—owanikela ngokuphila kwakhe ‘njengesihlengo sabaningi.’—1 Korinte 15:45, 47; Mathewu 20:28.
Ngakho bonke ababonisa ukholo kuJesu bangakwazi “ukukhululwa [esonweni] ngesihlengo” futhi bangathola ukuphila okuphakade. (Efesu 1:7; Johane 3:36) Ngokuqinisekile siyajabula ngokuthi uJehova uNkulunkulu walithanda kakhulu izwe lesintu waze wanikela ngeNdodana yakhe njengoMsindisi wethu! (Luka 2:10-12; Johane 3:16) Ukuhlola lokho uJesu akwenzela isintu esihluphekayo ekhulwini lokuqala kusenza sibe nombono ngekusasa. Futhi kuyamangalisa ngempela lokho uJesu akwenza!
Amazwibela Ezwe Elisha
UJesu wayenamandla okwelapha bonke abantu abagulayo ababelethwa kuye. Akekho noyedwa ahluleka ukumelapha aphile sáka, kungakhathaliseki isifo esasimphethe. Ngaphezu kwalokho, ngezinhlanzi nezinkwa ezimbalwa nje wasuthisa izinkulungwane ngokuyisimangaliso, futhi lokhu wakwenza izikhathi eziningana.—Mathewu 14:14-22; 15:30-38.
Lapho uJesu evula amehlo endoda eyazalwa iyimpumputhe, omakhelwane nezihlobo bavuma ukuthi lesi kwakuyisimangaliso sangempela, kodwa abaholi benkolo yamaJuda abazange bavume. Ngakho le ndoda eyayivulwe amehlo yabonisana nabo: “Kusukela kudala akukaze kuzwakale ukuthi ukhona owavula amehlo omuntu owazalwa eyimpumputhe. Ukube lo muntu ubengaveli kuNkulunkulu, ubengeke enze lutho nhlobo.”—Johane 9:32, 33.
Njengoba uJesu ayeqhubeka nenkonzo yakhe, umzala wakhe owayeboshiwe, uJohane uMbhapathizi, wathumela izithunywa ukuze ziyobona ukuthi le mibiko ayeyizwa ngoJesu injalo yini. IBhayibheli lithi: ‘Ngalelo hora uJesu welapha ukugula okuningi nezifo ezimbi nemimoya emibi, futhi wapha izimpumputhe eziningi umusa wokubona.’ Khona-ke uJesu wabe esethi kulezi zithunywa: ‘Bikelani uJohane lokho enikubonile nenikuzwile: izimpumputhe ziyabona, izinyonga ziyahamba, abanochoko bayahlanjululwa nezithulu ziyezwa, abafileyo bayavuswa.’—Luka 7:18-22.
Ake ucabange ngalokhu: Uma kwake kwenzeka okuthile okuhle esikhathini esidlule, bekungeke yini lokho kukunikeze isiqinisekiso sokuthi lokho kungaphinde kwenzeke futhi? Ngezimangaliso azenza, uJesu wabonisa ngokwezinga elincane lokho ayeyokwenza ngokwezinga elikhulu lapho esebusa njengeNkosi yoMbuso kaNkulunkulu. Izimangaliso azenza zinikeza ubufakazi bokuthi wayethunywe uNkulunkulu nokuthi wayeyiNdodana kaNkulunkulu isibili.
Lapho uMbuso kaNkulunkulu usubusa, ziyogcwaliseka ngokoqobo iziprofetho ezibikezela ngezinto ezinhle. Njengoba kwabikezelwa, amehlo ezimpumputhe nezindlebe zezithulu kuyovulwa, unyonga luyotshakadula njengendluzele futhi akekho oyobe egula. Futhi kuyoba khona ukuthula nokulondeka kuyo yonke indawo emhlabeni. Ngisho nezilwane eziyingozi njengamanje ziyoba nokuthula nabantu.—Isaya 9:6, 7; 11:6-9; 33:24; 35:5, 6; 65:17-25.
Ungathanda yini ukuphila phakade ngaphansi kokubusa koMbuso kaNkulunkulu, uhaqwe yilezi zimo? UJesu wabonisa ukuthi yini okumelwe uyenze lapho ethandaza kuyise: “Lokhu kusho ukuphila okuphakade, ukungenisa kwabo ulwazi ngawe, owukuphela kukaNkulunkulu weqiniso, nangalowo omthumileyo, uJesu Kristu.” (Johane 17:3) Kwangathi ungevumele lutho lukuvimbele ekubeni uqhubeke ungenisa lolu lwazi olunikeza ukuphila.
[Isithombe ekhasini 23]
Yilokhu uNkulunkulu akuthembisayo ngomhlaba