Amasiko Asendulo EMexico Yanamuhla

NGUMLOBELI WE-PHAPHAM! EMEXICO

AMASIKO nezinkolelo zasendulo kusekhona nakuba eMexico yanamuhla sekusetshenziswa umakhalekhukhwini ne-Internet. Emakhulwini eminyaka adlule amasiko athile amaNdiya ayexubene nobuRoma Katolika. Empeleni, lawo masiko asatholakala ekukhulekeleni kwamaKatolika aseMexico.

Ngokwesibonelo, njalo ngonyaka, abantu abaningi eMexico baya emathuneni ngo-November 2 ukuze bakhumbule uSuku Lwayo Yonke Imiphefumulo, olubizwa nangokuthi uSuku Lwabafileyo. Abathandekayo abafileyo bangabekelwa izimbali, ukudla notshwala. Abanye baze bahlele ngisho nokuba kube namaqembu adlala izingoma othandekayo wabo ayethanda ukuzilalela. AmaKatolika amaningi akha nama-altare emakhaya futhi angase abeke kuwo nesithombe sothandekayo wawo ofile.

I-Enciclopedia de México iphawula ukuthi amasiko amaningi aphathelene nokudunyiswa kwabafile kubonakala sengathi “asalondoloze izici zemikhosi yamaNdiya ezazenziwa ngenyanga ka-ochpaniztli neka-teotleco, lapho kwakunikelwa khona izimbali ze-cempasúchil nesinkwa sommbila kuma-manes [imiphefumulo yabafileyo] ngesikhathi sonyaka sangemva nje kokuqoqwa kwesivuno—ekupheleni kuka-October nasekuqaleni kuka-November.” Njengoba le ncwadi ibonisa, amanye amasiko aqukethe imicikilisho efanayo eyayikhona ngezikhathi zangaphambi kwamaHispanic, eyayihlanganisa nomoya onjengowemikhosi.

Ukudunyiswa Kwabantu Okungokwenkolo

U-December 12 uyiholidi kumaKatolika aseMexico. Ngalolo suku, izinkulungwane zabakhulekeli abavela kwezinye izifundazwe zaseMexico zibuthana esontweni leNcasakazi yaseGuadalupe eseceleni kweGquma laseTepeyac eMexico City. Abaningi, kuphela izinsuku behamba, bethandaza njengoba belibangise eNcasakazini. Lapho befika bangena esontweni ngendlela engokwesiko begaqa ngamadolo (ngenhla) banikele ngezimbali.

Izithombe zeNcasakazi yaseGuadalupe ziyatholakala nanamuhla emakhaya nasemafulethini kanye naseziteshini zamabhasi nezinye izindawo zomphakathi. INcasakazi yaseGuadalupe iye yanikezwa iziqu ezinjengesithi “uMama KaNkulunkulu” nesithi “Othandekayo WaseTepeyac Onebala Elinsundu.” Kusukela ngekhulu le-16, amakholwa abelokhu ethi iyona ebangela izenzo zokuphulukisa nezinye izimangaliso.

Umsuka Wokuzinikela Kuyo

Ukudunyiswa kukankulunkulukazi, kanye nezinye izici zaleli holidi, zisukela emuva ekukhulekelweni kukankulunkulukazi wama-Aztec uCihuacóatl, owayebizwa nangokuthi uTonantzin, okusho ukuthi “uMama Wethu Othandekayo.” Incwadi ethi México a través de los siglos (IMexico Phakathi Namakhulu Eminyaka) ithi lo nkulunkulukazi, kanye nendodana yakhe uHuitzilopochtli, wafika nama-Aztec okuqala eTenochtitlán—eyayiyinhloko-dolobha yoMbuso Wama-Aztec, manje eyiMexico City.

Ithempeli likaCihuacóatl, eliseGqumeni laseTepeyac, labhujiswa abaseSpain. Umlando uthi ngemva kweminyaka engaphansi kwengu-40 uColumbus efike kuleli zwekazi, iNcasakazi yaseGuadalupe yabonakala kumNdiya womdabu, uJuan Diego. Kuthiwa yacela ukuba yakhelwe ithempeli kule ndawo.

Ama-Aztec ayemhlonipha kakhulu uCihuacóatl. Kubikwa ukuthi wayenezinwele ezinde ezingalukiwe futhi egqoka ingubo emhlophe qwa. Umnyango wethempeli lakhe wawumfushane kangangokuba umuntu wayekwazi ukungena egaqa ngamadolo kuphela. Lapho esengenile, umkhulekeli wayebona isithombe sakhe sizungezwe yizithixo, okwakumenza abonakale “engumama . . . wonkulunkulu.”

Umkhosi kaCihuacóatl wawuhlanganisa ukwenziwa kwabantu umhlatshelo, ukudansa nombukiso wamaqhawe ayehlobe “ngezimbali ezandleni, ezintanyeni nasemakhanda.” Lezi zipho zazishiywa ethempelini njengomnikelo kuHuitzilopochtli. Amanye amaNdiya, kuhlanganise namaningi aseGuatemala, ayehamba amakhilomitha angaphezu kuka-1 500 eya emkhosini kaCihuacóatl.

Ingabe Umsuka Unendaba?

Kusobala ukuthi ukukhulekelwa komfanekiso weNcasakazi yaseGuadalupe enkolweni yamaKatolika umsuka wako usemicikilishweni yabantu ababengamkhulekeli uNkulunkulu weBhayibheli. (IHubo 83:18) Ingabe lokhu kufanele kwenze umahluko? Ingabe umsuka wendlela ethile yokukhulekela unendaba ngempela?

Umphostoli uPawulu wanikeza iseluleko esihlakaniphile ngokuphathelene nale ndaba, ethi: “Ningaboshelwa ejokeni nabangakholwa. . . . Kunakuvumelana kuni phakathi kukaKristu noBheliyali? Noma, unasabelo sini umuntu okholwayo nongakholwa?” UPawulu wabuye wathi: “Qinisekani ngazo zonke izinto; bambelelani niqinise kokuhle.”—2 Korinte 6:14, 15; 1 Thesalonika 5:21.

Isikhuthazo esinjalo sisabalulekile nanamuhla. Kufanele sicabangisise ngokukhulekela kwethu uNkulunkulu bese sizibuza: ‘Ingabe indlela yami yokukhulekela ibambelela ngokuqinile ezimfundisweni zeZwi likaNkulunkulu, iBhayibheli? Noma ingabe izici zayo zisuselwa endleleni yokukhulekela yabantu abakhonza onkulunkulu bamanga?’ Umuntu ofisa ukuthokozisa uJehova, uNkulunkulu weqiniso, ngokuhlakanipha uyofuna izimpendulo zemibuzo enjalo.

[Isithombe ekhasini 23]

Abakhulekeli befika esontweni leNcasakazi yaseGuadalupe

[Isithombe ekhasini 23]

Abaculi emathuneni ngo-November 2