Uthando Luyalunqoba Ubandlululo

“Umphakathi wenkolo omusha wabonakala okokuqala ngqa emlandweni: hhayi isizwe esikhulekela ubuzwe, kodwa iqembu elizikhethele ukubeka eceleni ukuhlukanisa, ngokwenhlalo, ubuhlanga nobuzwe: amadoda nabesifazane abahlangana babe yimbumba phambi kukaNkulunkulu.”—A History of Christianity, kaPaul Johnson.

NJENGOBA ubuKristu beqiniso babusakazeka kuwo wonke uMbuso wamaRoma, abantu babona okuthile okumangalisayo—umndeni ongokomoya womhlaba wonke owawufunde ukuhlala ndawonye ngokuthula nangobunye. Imfihlo yenjabulo yalo “mndeni” kwakuwuthando lwangempela, olwalungasekelwe nje emuzweni ongasho lutho, kodwa ezimisweni ezifundiswa nguNkulunkulu.

Lezi zimiso zabonakala kuJesu Kristu, owayeyisisulu sokuzondwa nokubandlululwa. (1 Petru 2:21-23) WayengowaseGalile, futhi abaseGalile—iningi labo elalingabalimi nabadobi—babebukelwa phansi abaholi benkolo bamaJuda baseJerusalema. (Johane 7:45-52) UJesu futhi wayengumfundisi omangalisayo, owayethandwa futhi ehlonishwa abantu abavamile. Ngenxa yalokhu, abaholi benkolo baba nomona kangangokuba basakaza amanga ngaye futhi baze bambophela uzungu lokumbulala!—Marku 15:9, 10; Johane 9:16, 22; 11:45-53.

UJesu akazange neze ‘abuyisele okubi ngokubi.’ (Roma 12:17) Ngokwesibonelo, lapho abaFarisi abathile—abangamalungu ehlelo lamaJuda elaliphikisa uJesu—beya kuJesu ngobuqotho bembuza imibuzo, uJesu wabaphendula ngomusa. (Johane 3:1-21) Waze wadla nabo abaFarisi, kuhlanganise nalowo owayembandlululile ngezinga elithile uJesu. Kanjani? Ngalezo zinsuku kwakuyisiko ukugeza izinyawo zezivakashi; kodwa, lo mFarisi akasenzanga leso senzo somusa kuJesu. Ingabe uJesu waphatheka kabi? Cha. Empeleni, wasebenzisa lobo busuku ukuba afundise isifundo esihle kakhulu sesihawu nokuthethelela.—Luka 7:36-50; 11:37.

UJesu Wayebathanda Abadelelekile

Omunye wemifanekiso eyaziwa kakhulu kaJesu owendoda engumSamariya olungileyo, eyakhokha izindleko zokunakekela izidingo zomJuda owayeshaywe futhi wagcwelezwa yizigebengu. (Luka 10:30-37) Kungani lesi senzo somSamariya saba sihle kangaka? Ekuphileni okungokoqobo, amaJuda namaSamariya ayezondana. Empeleni, igama elithi “umSamariya” amaJuda ayevame ukulisebenzisela ukudelela—lasetshenziswa nakuJesu uqobo. (Johane 8:48) Njengoba isimo sasinjalo, awukho umfanekiso owawungaba namandla ukudlula lowo uJesu awusebenzisa wothando lukamakhelwane olungakhethi.

UJesu wasekela amazwi akhe ngokubeka isibonelo, welapha ngisho nomSamariya onochoko. (Luka 17:11-19) Ngaphezu kwalokho wafundisa ngisho namanye amaSamariya ayenokwazisa, waze waxoxa isikhathi eside nowesifazane ongumSamariya—isenzakalo esiphawuleka ngokukhethekile. (Johane 4:7-30, 39-42) Kungani? Orabi bamaJuda abalukhuni babengakhulumi nanoma yimuphi owesifazane emphakathini—ngisho noyisihlobo esiseduze—ingasaphathwa-ke eyowesifazane ongumSamariya!

Nokho, uJehova umbheka kanjani umuntu onobandlululo kodwa olwa kanzima nokulukhipha enhliziyweni yakhe? IBhayibheli liphinde lisinikeze ukwasiswa okududuzayo ngale ndaba.

UNkulunkulu Uyasibekezelela

Ekhulwini lokuqala, amaKristu amaningi angamaJuda ayethonywe ukubandlulula abantu abangewona amaJuda okwase kuyisikhathi eside kukhona, nakuba iningi labo lase liba ngamakholwa. UJehova uNkulunkulu wayisingatha kanjani le nkinga eyayibangela ukwehlukana? Walifundisa ngesineke ibandla lobuKristu. (IzEnzo 15:1-5) Leso sineke sathela izithelo ezinhle, ngoba njengoba kubonisiwe ekuqaleni kwalesi sihloko, “kwabekwa eceleni ukwehlukana ngokwenhlalo, ubuhlanga, nobuzwe.” Ngenxa yalokho, “amabandla aqhubeka eqiniswa okholweni futhi anda ngesibalo usuku nosuku.”—IzEnzo 16:5.

Sifundani? Ungadikibali, kodwa qhubeka ufuna uNkulunkulu, obapha ngokungagodli ukuhlakanipha namandla labo ‘abaqhubeka becela ngokholo.’ (Jakobe 1:5, 6) Uyamkhumbula uJennifer, uTimothy, uJohn no-Olga okukhulunywe ngabo esihlokweni sokuqala salolu chungechunge? Ngesikhathi uJennifer eqala esikoleni esiphakeme, wayesekhulile ngokomoya futhi esefunde ukungakunaki ukubandlululwa nokugconwa ngokubukeka kwakhe. Ngokushesha ngemva kwalokho, lapho enye intombazane ayefunda nayo iba yisisulu sokugconwa, uJennifer wayivikela futhi wayiduduza.

Yini eyasiza uTimothy ukuba azibambe lapho afunda nabo bemthuka ngezosha zobandlululo? Uthi: “Ngangikhathazeke ngesihlamba engangiyosiletha egameni likaJehova uNkulunkulu. Ngaqhubeka ngikhumbula nokuthi kufanele siqhubeke ‘sinqoba okubi ngokuhle’ futhi singavumeli ukuba ububi businqobe.”—Roma 12:21.

UJohn walunqoba ubandlululo ayenalo ngomHausa ayefunda naye. Uyakhumbula: “Lapho ngiseyibhobhodleyana ngaba nabangane abangamaHausa. Ngasizana nomunye wabo emsebenzini wesikole, futhi sazwana kahle nje. Manje ngizama ukubheka abantu ngabanye, hhayi ngokubahlobanisa nohlanga noma isizwe esithile.”

U-Olga nowayeyisithunywa sevangeli kanye naye abazange besabe lapho beshushiswa abaphikisi abanenzondo, kodwa bahlala beqinile, beqiniseka ukuthi abanye bayosamukela isigijimi seBhayibheli. Iningi lasemukela. U-Olga uthi: “Ngemva kweminyaka engu-50, indoda ethile yeza kimi yanginikeza isikhwama esihle. Kuso kwakunamatshe amancane ayebhalwe izimfanelo zobuKristu ezinjengobuhle, umusa, uthando nokuthula. Yabe isingitshela ukuthi yayingomunye walabo bafana abasijikijela ngamatshe nokuthi manje isingumfowethu ongumKristu. Yona nomkayo babe sebengipha nezimbali ezimhlophe.”

Lapho Ukucwasa Nobandlululo Kuyobe Kungasekho!

Ukucwasa nobandlululo kuzophela ngokushesha. Kanjani? Esikwaziyo ukuthi, umhlaba uzoba noMbusi oyedwa, uJesu Kristu, yena kanye owabonisa ukuthi “ngeke ahlulele ngokwanoma yikuphi okubonakala emehlweni akhe.” (Isaya 11:1-5) Ngaphezu kwalokho, abangaphansi kokubusa kukaJesu bayosibonisa ngokuphelele isimo sakhe sengqondo, ngoba bonke bayobe befundiswe nguye noYise, uJehova uNkulunkulu.—Isaya 11:9.

Leyo mfundo engokomoya iyaqhubeka njengamanje, ilungiselela abantu bakaNkulunkulu ukuphila esimisweni sezinto esisha ngokuphelele. Khona-ke kungani ungasisebenzisi leso simiso semfundo yamahhala ngokuba nesakho isifundo seBhayibheli?a Yebo, uNkulunkulu akakhethi; kuyintando yakhe ukuba zonke izinhlobo zabantu “zisindiswe futhi zifinyelele olwazini olunembile lweqiniso.”—1 Thimothewu 2:3, 4.

[Umbhalo waphansi]

[Amazwi acashunwe esihlokweni ekhasini 8]

Ngokushesha ukucwasa nobandlululo ngeke kusasihlupha isintu

[Ibhokisi/Isithombe ekhasini 8, 9]

IZIMISO ZIKANKULUNKULU ESINGAPHILA NGAZO

◼ “Ningabuyiseli muntu okubi ngokubi. . . . Qhubeka unqoba okubi ngokuhle.” (Roma 12:17-21) Liyini iphuzu? Vumela ububi babanye buveze ubuhle bakho. UJesu Kristu wathi: “Bangizonda ngaphandle kwesizathu.” Kodwa, akazange aphindisele.—Johane 15:25.

◼ “Masingabi abazazisayo, . . . sifelana umona.” (Galathiya 5:26) Umona nokuqhosha okungafanele kuyingozi ngokomoya, ngokuvamile kuholela enzondweni nasekubandlululaneni.—Marku 7:20-23.

◼ “Ngakho-ke, zonke izinto enifuna abantu bazenze kini, nani kumelwe nizenze ngokufanayo kubo.” (Mathewu 7:12) Zibuze, ‘Iyiphi indlela engingathanda ukuphathwa ngayo?’ Phatha abanye abantu ngendlela efanayo, kungakhathaliseki ubudala babo, ibala lesikhumba, ulimi nesizinda.

◼ “Thandani abanye ngezinhliziyo zenu, njengoba nje noKristu anithanda ngenhliziyo yakhe.” (Roma 15:7, Phillips) Ingabe uyazama ukubazi abantu abanezizinda namasiko ahlukahlukene, ikakhulukazi uma beyizinceku zikaNkulunkulu kanye nawe?—2 Korinte 6:11.

◼ “Noma kungenzeka ubaba nomama bangishiye, uJehova yena ubeyongamukela.” (IHubo 27:10) Kungakhathaliseki ukuthi abanye bangase bakuphathe kanjani, uNkulunkulu akasoze akulahla uma uhlala uthembekile kuye.

[Isithombe ekhasini 7]

UmSamariya olungileyo usiza umJuda ogcweleziwe