Okuphawulwa Abafundi Balo Magazini
Intsha Iyabuza . . . Yini Embi Kangaka Ngenhlamba? (March 2008) Ngakhulela emkhayeni wamaKristu, kodwa ngangenwa umkhuba omubi wokuba nenhlamba. Ngazama kaningi ukuwuyeka, ngehluleka. Kodwa, lesi sihloko singenze ngakwazi ukuzibamba. Njengoba kushiwo esihlokweni, angifuni ukusisebenzisa kabi isipho sokukhuluma. Manje sengiyacabangisisa ngaphambi kokuba ngikhulume. Ngiyabonga kakhulu.
C. P., Brazil
Ngineminyaka engu-12 ubudala. Ngizungezwe abantu abanenhlamba esikoleni, ngiyesaba ukuthi ngelinye ilanga nami ngingase ngithuke inhlamba. Bengithi ngisazobhala ngicele ukuba nibhale isihloko “seNtsha Iyabuza” esikhuluma ngale ndaba, kanti sizophuma kuyi-Phaphama! Lesi sihloko singikhumbuze ukuthi kungani ukuba nenhlamba kukubi, futhi sanginika amandla. Qhubekani nibhala ngezihloko ezifana nalezi!
A. P., United States
Mina nomyeni wami siziphilisa ngokuhlanza izindlu, futhi elinye lamakhasimende ethu lasitshela ngomgomo walo wonyaka, ukuyeka ukuthuka inhlamba. Lasitshela ukuthi lithandaza nsuku zonke, licela uNkulunkulu ukuba alisize liyeke lo mkhuba. Langicela ukuba ngilinike noma iyiphi incwadi ekhuluma ngale ndaba. Ngathandaza ngalokhu, futhi njengenhlala yenza, ngathola omagazini bamuva engosini ethi www.pr2711.com ngabafaka kuyi-MP3 player yami. Ungase ucabange indlela engajabula ngayo lapho ngilalela uhlu lwezihloko ngosuku olulandelayo. Ngajabula kakhulu! Nakuba lesi sihloko sasibhalelwe intsha, ngangazi ukuthi lingathola izeluleko ezisebenzayo kuso. Ngaba magange ukusifunda nalo.
S. C., United States
Ukulawulwa Kwezindiza Emoyeni—Kukuvikela Kanjani? (April 2008) “Sesikulungele ukusuka!” lawa amazwi engawasho ngemva kokufunda lesi sihloko. Ngakhuthazeka futhi ngazizwa ngivikelekile ngenxa yokuthi i-Phaphama! yangibonisa ukuthi abalawuli bezindiza emoyeni bafuna siphephe ngempela. Ngiyabonga.
T. S., Brazil
Ubungaphendula Kanjani? Ngineminyaka engu-12 futhi ngihlala eningizimu Ireland. Ngithanda ukunibonga ngemidlalo ekhethekile yezingane esekhasini elingemuva le-Phaphama! Mihle ngempela. Yenza izingane ziwufunde lo magazini. Ngicela niqhubeka niyifaka. Ngiyabonga.
A. C., Ireland