Ukubuka Okwezwe

◼ “Muva nje iRussia inamathani emfucumfucu enobuthi angaba izigidi zezigidi ezimbili, futhi ayikho indlela esheshayo yokuyilahla.”—I-RIA NOVOSTI, ERUSSIA.

◼ Ekhulwini leminyaka lama-21 kuye kwanda ukudunwa kwemikhumbi. Ngokwesibonelo ngo-2007 nje kuphela, “kuzanywe futhi kwadunwa imikhumbi izikhathi ezingu-263.”—I-WALL STREET JOURNAL, E-U.S.A.

Ukuphuza Utshwala Ukhulelwe

Unyaka ngamunye eJalimane izingane ezingaba ngu-10 000 zizalwa zinokukhubazeka okubangelwa utshwala, kubika iphephandaba i-Süddeutsche Zeitung. Ezingaba ngu-4 000 kulezi zingane zizalwa zikhubazeke kakhulu noma ngokuphelele. UKhomishane Wezidakamizwa uSabine Bätzing, uyaxwayisa: “Asikho isilinganiso esiqinisekile sokuphuza utshwala lapho ukhulelwe esingeyona ingozi. Kudingeka sigcizelele kodokotela, kubabelethisi nakwabesifazane abakhulelwe ukuthi ngisho nokuphuza ingilazi eyodwa [kowesifazane okhulelwe] ngezikhathi ezithile kungalimaza ingqondo nomzimba wengane noma kubangele izinkinga eziphathelene nokuziphatha.”

Ukusebenza Engadini—Kuthuthukisa Impilo

“Abacwaningi bathola ukuthi ukuzitshalela ukudla—noma okungakanani—kuhle ngendlela engakaze icatshangwe empilweni yakho,” kusho umagazini i-Psychology Today. Ucwaningo lubonise ukuthi lapho “ama-mycobacteria asemhlabathini” egwinywa noma ehogelwa, “asivuselela ngokushesha isimiso sokuvikela umzimba.” Lo magazini uthi, ngenxa yalokho “kuya kubonakala sengathi ukudla izakhi zomhlabathi kungase kubaluleke ngezinga elifanayo empilweni yomuntu njengokudla izithelo nemifino etshalwa kuwo.

Inyoni Endize Ibanga Elide Kunazo Zonke

Ososayensi base-U.S. Geological Survey (USGS) babike ‘uhambo olude kunalo lonke oluthathwe yizinyoni ezichitha isikhathi esiningi phansi.’ Iningi lezinyoni okuthiwa ama-godwit zalandelwa ngesiphuphutheki njengoba zenza ufuduko lwazo lwaminyaka yonke phezu koLwandle iPacific. Enye yensikazi yandiza izinsuku eziyisishagalolunye ingami ndawo, okuyibanga elingamakhilomitha angu-11 650 isuka e-Alaska iya eNew Zealand. Umagazini i-Week uthi, ngesikhathi ifika khona “yayisinciphe ngamagremu angu-700.” Uma esebuya lama godwit, asuka eNew Zealand adlule eChina abese ephindela e-Alaska—okuyibanga elingamakhilomitha angu-29 000 selilonke. I-USGS ithi, “Uma ibanga elingamakhilomitha angu-29 000 kuyibanga elindizwa yilezi zinyoni unyaka ngamunye, kusho ukuthi i-godwit esikhulile iyobe isindize ibanga elingamakhilomitha angu-463 000 ekuphileni kwayo konke.”

Ukubamba Amasela Omdolofiya

ISaguaro National Park, e-Arizona, e-U.S.A., ilahlekelwa yizihlahla zayo zomdolofiya eziyingqayizivele ngenxa yamasela. UJim McGinnis, osebenza ehhovisi lwezophenyo olukhethekile loMnyango Wezolimo, uthi: “Bonke abantu bafuna ukuba ne-saguaro [uhlobo oluthile lomdolofiya] emagcekeni abo. Ngakho akukhona okungavamile ukubona izimoto ogwadule zithwele izihlahla zomdolofiya. Amasela eba izihlahla eziyimitha elilodwa kuya kwamabili ngokukhethekile, ezingabiza inkulungwane yama-dollar noma ngaphezulu. Ukuze kunqotshwe amasela, abaphathi bahlela ukufaka ama-microchip ezihlahleni zomdolofiya. Ama-scanner aphathwayo kufanele abonise ukuthi izihlahla ezidayiswayo ezimakethe noma kwamanye amabhizinisi ezitshalo azebiwanga yini eSaguaro National Park.