“Inkosi Yehlathi” YaseNtshonalanga Yenkabazwe
YINI leyo? I-jaguar, ikati elikhulu kunawo wonke emazweni aseMelika. Ungalitholaphi? Emahlokozini, emaxhaphozini, emahlathini, ogwadule nasezindaweni ezinezihlahlana ezincane eMelika Ephakathi naseMelika Eseningizimu. Ngokungafani namakati amaningi, leli liyathanda ukuhlala hhayi nje endaweni eyomile noma emithini kuphela kodwa ngisho nasemanzini.
Ake uzicabange umi eceleni kwe-jaguar yeduna esikhulile. Ingase ibe amamitha amabili ubude, uma singawubali umsila, futhi inesisindo esingamakhilogremu angu-120 noma ngaphezulu. Njengoba ithanda ukuhlala yodwa, i-jaguar ihlangana namanye ngesikhathi sokukhwelana kuphela. Iduna lisuke selikulungele lokhu lapho lineminyaka emithathu noma emine ubudala, kanti insikazi ingase iqale ukuba nemithinyana lapho isineminyaka emibili. Imithinyana yayo evame ukuba mibili izalwa ngemva kwezinyanga ezintathu kuya kwezine. Kunamanye ama-jaguar okwaziwayo ukuthi aphila iminyaka engaphezu kwengu-20 lapho evalelwe.
Sikhuluma ngomkhuba wokuzifihla nokungaqondakali kwala makati amakhulu, esinye isazi semvelo sathi: “Kunzima kakhulu ukuyibona i-jaguar! Ngingama eceleni kwayo, . . . kodwa ngingayiboni nhlobo.” Uboya baleli kati obunsundu ngokusagolide obunamabala amnyama anamanye amancane ngaphakathi, buyalisiza ukuba likwazi ukucasha lingabonakali.
Izingela Yodwa Buthule
Njengoba ingumzingeli onekhono, i-jaguar idla izinhlobo zezilwane ezingaba ngu-85, ezihlanganisa ama-tapir, izinyamazane nezinkawu. Ngenxa yokuthi ihlala nasemanzini, i-jaguar izibamba kalula izinhlanzi nezimfudu. Abantu bake babona i-jaguar ibulala ihhashi elidala, yalihudula amamitha angaba ngu-80 yabe isiwela nalo umfula.
Leli kati elihlakaniphile liqamekela inyamazane njengoba licuthile phezulu esihlahleni. Nakuba ziyizilwane ezisheshayo, izingulube zasendle okuthiwa ama-peccary ezingasoli lutho, i-jaguar iyazibhozomela njengoba zidlula ngaphansi. Ibulala eyodwa ngokuyiluma nje kanye futhi ngokushesha iphindele esihlahleni. Ihlala lapho uze udlule lo mhlambi ngaphambi kokuba ilande inyamazane yayo.
Kodwa, mancane kakhulu amathuba okuba i-jaguar ihlasele umuntu kunawo wonke la makati amakhulu, futhi ayikaze ichazwe njengesilwane esidla umuntu. Empeleni, abantu bawusongo olukhulu kuyo kunokuba kunjalo ngayo kubo.
Okwenza Abe Mbalwa Kangaka
Ama-jaguar ake ehla enyuka eningizimu ye-United States kuya ngasemaphethelweni eNingizimu Melika. Namuhla, awasekho endaweni engaba yingxenye yaleyo ayetholakala kuyo eminyakeni eyikhulu edlule. Abazingeli babebulala izinkulungwane zama-jaguar befuna isikhumba sawo, kwaze kwaba maphakathi nawo-1970. Ngo-1968 kuphela, kwathunyelwa izikhumba zezilwane ezingaphezu kuka-13 500 zisuka emazweni aseMelika. Ngo-2002, kulinganiselwa ukuthi kwase kusele ama-jaguar angaphansi kuka-50- 000. Manje, kungenzeka angaba ngu-15 000 kuphela asasele endle.
Ucwaningo lwe-Wildlife Conservation Society lubika ukuthi indawo engaba amaphesenti angu-40 ama-jaguar ayevame ukuhlala kuyo isicekelwe phansi ngenxa yokugawulwa kwamahlathi. EMexico kuphela, kubikwa ukuthi kucekelwa phansi indawo elingana nenkundla kanobhutshuzwayo njalo ngomzuzu. Lokhu kuphoqa ama-jaguar ukuba adle imfuyo ukuze aqhubeke ephila.
Imizamo Yokuwalondoloza
Kunamazwe angaba ngu-200 asekela izimiso ze-Convention on International Trade in Endangered Species ezikwenza kube ukwephula umthetho ukuzingela ama-jaguar ngenjongo yezentengiselwano. Kuye kwakhiwa iziqiwu zokuvikela indawo yawo engokwemvelo. Ngo-1986 iCockscomb Basin Wildlife Sanctuary eBelize yaba indawo yokuqala yokulondoloza ama-jaguar emhlabeni. Kanti nelaseMexico selibekele eceleni indawo engamahlathi emvula engamahektare angaphezu kuka-150 000 eCalakmul Biosphere Reserve eYucatán Peninsula ukuze kuvikelwe ama-jaguar.
Ukuthi imizamo enjalo yabantu yokuvikela le “nkosi yehlathi” iyophumelela kangakanani kusazobonakala. Kodwa singaduduzeka ngokwazi ukuthi maduze uMdali wethu onothando ‘uzobhubhisa ababhubhisa umhlaba’ nokuthi ngokuhamba kwesikhathi kuyoba nokuthula phakathi kwabantu nezilwane, njengoba uNkulunkulu ayehlosile.—IsAmbulo 11:18; Isaya 11:6-9.
[Ibalazwe ekhasini 24, 25]
(Ukuze ubone ukuthi indaba ihlelwe kanjani, bheka encwadini)
Indawo Yama-jaguar
◻ Indawo ayekuwo kuqala
◼ Indawo atholakala kuyo manje
INYAKATHO MELIKA
IMELIKA EPHAKATHI
ININGIZIMU MELIKA