Umthombo Oqinisekile Wesiqondiso Nethemba
NGOKUNGEFANI namademoni, uJehova uNkulunkulu uhlakaniphile futhi unamandla onke. Uphinde abe ukwenziwa samuntu kothando. (1 Johane 4:8) Iseluleko sakhe sihlale sisihle, usinikeza sona ngesihle futhi usifisela okuhle ngempela. Yeka indlela esihluke ngayo eselulekweni esinikezwa izangoma! UNkulunkulu uthi: “We nina nonke enomileyo [ngokomoya]! Wozani emanzini. Nani eningenayo imali! Wozani, nithenge nidle. Yebo, wozani, nithenge iwayini nobisi, yebo, nithenge ngaphandle kwemali nangaphandle kwentengo. Kungani niqhubeka nikhokha imali ngalokho okungesona isinkwa, futhi kungani ukukhandleka kwenu kungokwalokho okungaphumeli ekwanelisekeni? Ngilalelisiseni, nidle okuhle, futhi umphefumulo wenu mawuthole injabulo enkulu ngokukhuluphala.”—Isaya 55:1, 2.
Ngenxa yokuthi iBhayibheli laphefumulelwa uMdali wethu onothando, lisinika ithemba, isivikelo esingokomoya, injongo yokuphila nezimiso ezingcono kakhulu esingaphila ngazo. Kunganjani uke uthi ukuhlola le mibuzo elandelayo nezindima zeBhayibheli ezihlobene nayo?
[Ibhokisi ekhasini 7]
● Ngingakuthola kanjani ukuthula kwangempela kwangaphakathi? IBhayibheli lithi: “Yilokhu uJehova akushilo, uMhlengi, oNgcwele ka-Israyeli: ‘Mina, Jehova, nginguNkulunkulu wakho, Lowo okufundisayo ukuze uzuze, Lowo okubangela ukuba unyathele endleleni okufanele uhambe ngayo. O ukube ubuyoyilalela nokuyilalela imiyalo yami! Khona-ke ukuthula kwakho bekuyoba njengomfula, nokulunga kwakho kube njengamagagasi olwandle.’”—Isaya 48:17, 18.
● Ingabe ububi buyohlale bukhona? “Ngabaqotho abayohlala emhlabeni, futhi ngabangasoleki abayosala kuwo. Kepha ababi bayonqunywa emhlabeni; abakhohlisayo bona, bayosishulwa kuwo.” (IzAga 2:21, 22) Ngempela, abantu ababi kuhlanganise nezingelosi ezimbi, bayobhujiswa phakade, njengokungathi ngomlilo.—IsAmbulo 20:10, 14.
● Ingabe ukugula nokuhlupheka kuyoke kuphele? “Bheka! Itende likaNkulunkulu likanye nabantu, uyohlala nabo, babe ngabantu bakhe. UNkulunkulu ngokwakhe uyoba nabo. Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili [izinkinga eziningi zanamuhla] zidlulile.”—IsAmbulo 21:3, 4.
Ngokungefani namademoni, uNkulunkulu akalokothi aqambe amanga. Eqinisweni, ‘akanakuwaqamba amanga.’ (Thithu 1:2) Ngaphezu kwalokho, njengoba isihloko sokugcina salolu chungechunge sizobonisa, iqiniso lakhe liyakhulula futhi linika ukuphila.—Johane 8:32; 17:3.