“Siyabonga Ngalolu Chungechunge!”
● Kuwo wonke umhlaba abantu balujabulele uchungechunge lwezihloko ezithi “Ukubukeza Komkhaya” eziba sekhasini 30 no-31 kumagazini we-Phaphama! Imidwebo nemibuzo okuxoxwa ngayo, amakhasi eBhayibheli asikwayo abese ebekwa, izithombe ezifunwa yizingane nokungase kwenziwe umkhaya, kuyafundisa futhi kuwujabulisa wonke umkhaya. Ake ucabange ngalokho okushiwo abanye:
“Ngifunda iBhayibheli ngeposi nabazukulu bami ababili abaneminyaka engu-12. Ngisebenzisa isihloko esithi ‘Ukubukeza Komkhaya,’ ngiyabacela ukuba babhale izimpendulo zabo bese bengithumelela zona. Babonakala besijabulela kakhulu abazukulu bami isifundo sethu, futhi ukubhalelana kwethu kwenza ngikwazi ukuwachaza kahle amaphuzu. Nginibonga kakhulu ngalolu chungechunge!”
V. C., United States.
“Muva nje, lapho indodana yami eneminyaka eyisihlanu isiyolala, ingicele ukuba sihlole ingxenye ethi ‘Yini Engalungile Ngalesi Sithombe?’ Ngayithola eyodwa, sabe sesiqala ukuxoxa ngesithombe. Yalalelisisa njengoba ngifunda ukulandisa kweBhayibheli. Manje, cishe njalo kusihlwa ifuna sihlole le ngxenye. Mina nomkhaya wami sinibonga ngokusuka enhliziyweni ngokusiza izingane zethu ukuba zithole injabulo eBhayibhelini.”
M. F., France.
“Ngahlangana noDavid oneminyaka engu-12, noJennifer oneminyaka eyisithupha, esitobhini sebhasi. Ubaba wabo wabona ukuthi nginika abagibeli i-Phaphama!, ngakho wabayeka beza kimi saxoxa. Njengoba ubaba nendodana beqala ukufunda omagazini, mina noJennifer osemncane sajabulela ukuhlola imifanekiso emihle nezithombe zezinyoni nezilwane. Sakhuluma ngazo zonke izinto ezinhle uJehova uNkulunkulu asenzele zona ukuze sijabule. Lapho sifika ekhasini 31, sazama ukuhlola ingxenye ethi ‘Izingane Zifuna Izithombe.’ Njengoba ngangizama ukuthola esokuqala, uJennifer waphenya amakhasi ngokushesha futhi wasithola ngemizuzwana nje. Sazama ukuthola esesibili nesesithathu, nakulokhu futhi waba ngowokuqala ukuzithola. Empeleni, uJennifer waqhubeka efuna izithombe nakwabanye omagazini abayishumi! Ekugcineni, wacela amanye amakhophi amabili ukuze awanike uyise nomfowabo. Lapho sihlukana, bobathathu babonisa ukubonga okukhulu ngalokho ababekufundile.”
M. C., Ecuador.