Uyilinganisa Kanjani Impumelelo?

Ukuze uzihlole, cabanga ngezimo ezilandelayo zezinto ezingase zenzeke.

Ubani kulaba ongathi uphumelela ngempela?

• 

  U-ALEX

  U-Alex unebhizinisi. Uqotho, ukhuthele futhi uyahlonipha. Ibhizinisi lakhe liyachuma futhi ngenxa yalokho, yena nomndeni wakhe baphila ngokunethezeka.

• 

  UCAL

  UCal naye unebhizinisi elifanayo futhi wenza imali eningi kuno-Alex. Nokho, ukuze ahambe phambili kozakwabo, uCal usebenza ngokweqile futhi usenanezifo eziningi.

• 

  UJANET

  UJanet ungumfundi wasesikoleni samabanga aphakathi ozimiselayo futhi okujabulelayo ukufunda. Ngenxa yalokho, uphumelela kahle.

• 

  U-ELLEN

  U-Ellen uthola amamaki angcono kakhulu kunoJanet futhi uphumelela ngamalengiso​—kodwa uyakopela phakathi nokuhlolwa futhi kuncane akuthandayo ezintweni azifundayo.

Uma uthi uCal no-Ellen​—noma bonke​—bayaphumelela, kungenzeka ulinganisa impumelelo ngemiphumela kuphela, kungakhathaliseki ukuthi leyo miphumela itholakale kanjani.

Ngakolunye uhlangothi, uma ukhethe u-Alex noJanet kuphela, kungenzeka ulinganisa impumelelo nezici zobuntu bomuntu nemikhuba yakhe yokusebenza. Kunengqondo ukwenza kanjalo. Cabangela lezi zibonelo ezilandelayo:

• Yini eyosiza uJanet ukuphila kwakhe konke​—ukuthola amamaki aphezulu noma ukuhlakulela uthando lokufunda?

• Ikuphi okuyosiza abantwana baka-Alex​—ukuba nazo zonke izinto ezingathengwa ngemali noma ukuba nobaba okwazisayo ukuchitha isikhathi nezingane zakhe?

Iphuzu elisemqoka: Impumelelo yokuzikhohlisa isekelwe kulokho okubonakala ngaphandle; impumelelo yangempela isekelwe ezindinganisweni ezifanele.