Bonisa Uzwela
Inkinga
Uma sigxila kakhulu endleleni abanye abantu abahluke ngayo kithi, singaphetha ngokuthi lowo mehluko uwukushiyeka okuthile. Ngaleyo ndlela, siyobe sibabhekela phansi labo abahlukile kithi. Lapho sesinalo mbono ongemuhle ngabanye abantu, kuyoba nzima ukubonisa uzwela. Ukwehluleka kwethu ukubonisa uzwela kungaba uphawu lwenkinga enkulu, ubandlululo.
Lokho Okushiwo YiBhayibheli
“Jabulani nabantu abajabulayo; khalani nabantu abakhalayo.” —ROMA 12:15.
Kusho ukuthini lokhu? Lo myalo ungafingqwa ngamagama amabili—bonisa uzwela. Ukuba nozwela kusho ukukwazi ukuzibeka esimweni somunye umuntu nokuzizwa ngendlela azizwa ngayo.
Indlela Okusiza Ngayo Ukuba Nozwela
Lapho sizwelana nomuntu, siyayiqaphela indlela esifana ngayo naye. Siyaqaphela ukuthi angase azizwe ngendlela esizizwa ngayo futhi enze ngendlela nathi esenza ngayo. Uzwela luyasisiza sibone ukuthi bonke abantu bawumndeni owodwa, kungakhathaliseki ukuthi bavelaphi. Lapho sigxila kakhudlwana endleleni abafana ngayo nathi, ayoba mancane amathuba okuthi sibe nombono ongemuhle ngabo.
Uzwela luyosisiza ukuba sihloniphe abanye. U-Anne Marie waseSenegal, wake wababhekela phansi abantu ababhekwa njengabadelelekile emphakathini wangakubo. Uyachaza ukuthi ukuba nozwela kwamsiza kanjani: “Lapho ngibona ubunzima ababebhekene nabo labo bantu, ngazibuza ukuthi ngangiyozizwa kanjani ukube kwakuyimi. Ngenxa yalokho, ngabona ukuthi ngangingaphakeme kunalabo bantu, ngoba akukho engangikwenzile ukuze ngibe ngcono kunabo.” Uma sizama ukuqonda ubunzima abanye abantu ababhekene nabo, cishe siyozwelana nabo kunokuba sibagxeke.
Ongakwenza
Uma kunohlobo lwabantu onombono ongemuhle ngalo, zama ukuqonda izindlela enifana ngazo nalabo bantu. Ngokwesibonelo, cabanga ukuthi bazizwa kanjani
Uzwela luyasisiza sibone ukuthi bonke abantu bawumndeni owodwa
lapho bedla ukudla nemindeni yabo
lapho beqeda ukwenza umsebenzi okhandlayo ekupheleni kosuku
lapho behleli nabangane
lapho belalele umculo abawuthandayo
Ngemva kwalokho, zama ukuzicabanga usesimweni abakuso. Zibuze:
‘Bengingenzenjani uma othile engenza ngizizwe ngingelutho?’
‘Bengingazizwa kanjani uma abanye bengibeka amabala bengangazi nakungazi?’
‘Ukube bengingomunye wabo, bengingathanda ukuthi bangiphathe kanjani abanye abantu?’