INgxenye 8
Phila Kuze Kube Phakade Emhlabeni OyiPharadesi
1, 2. Ukuphila kuyoba njani ngaphansi kokubusa koMbuso kaNkulunkulu?
1 Ukuphila kuyoba njani lapho uNkulunkulu esusa ububi nokuhlupheka emhlabeni futhi eletha izwe lakhe elisha ngaphansi kokulawula kothando koMbuso wakhe wasezulwini? UNkulunkulu uthembisa ‘ukuvula isandla sakhe; asuthise ukufisa kwakho konke okuphilayo.’—IHubo 145:16.
2 Ziyini izifiso zakho ezifanelekile? Akukhona yini ukuphila okujabulisayo, umsebenzi ozuzisayo, inala yezinto ezibonakalayo, indawo ezungezile enhle, ukuthula phakathi kwabantu bonke, nokukhululeka ekungabini nabulungisa, ekuguleni, ekuhluphekeni, nasekufeni? Futhi kuthiwani ngombono ongokomoya ojabulisayo? Zonke lezozinto zizogcwaliseka ngokushesha ngaphansi kobubusi boMbuso kaNkulunkulu. Phawula lokho iziprofetho zeBhayibheli ezikushoyo ngezibusiso ezimangalisayo ezizoba khona kulelozwe elisha.
Isintu Sinokuthula Ngokuphelele
3-6. Yisiphi isiqinisekiso esinaso sokuthi abantu bayoba nokuthula ezweni elisha?
3 “[UNkulunkulu] uphelisa ukulwa kuze kube-semikhawulweni yomhlaba; uyaphula umnsalo, anqume umkhonto, izinqola zempi azishise ngomlilo.”—IHubo 46:9.
4 “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.”—Isaya 2:4.
5 “Kepha abathobekileyo bazakulidla ifa lomhlaba, bathokoze ngokuthula okukhulu.”—IHubo 37:11.
6 “Wonke umhlaba uyaphumula, usenokuthula; baqhumuka ngokuhlabelela.”—Isaya 14:7.
Umuntu Nezilwane Banokuthula
7, 8. Yikuphi ukuthula okuyoba khona phakathi kwabantu nezilwane?
7 “Impisi iyakuhlala newundlu, ingwe ibuthise ndawonye nezinyane lembuzi, ithole nebhongo lengonyama kukhuluphaliswe kanyekanye, nomntwana omncane uyakukuqhuba. Inkomo nebhere kuyakuklaba, amazinyane akho abuthise ndawonye, ingonyama idle utshani njengenkabi. Umntwana oncelayo uyakudlala ngasemgodini webululu, olunyuliweyo elulele isandla sakhe esiseleni sikamantshingeyana. Abayikwenza okubi, bangachithi.”—Isaya 11:6-9.
8 “Ngalolosuku ngiyakubenzela isivumelwano nezilwane zasendle, nezinyoni zezulu nezilwanyana ezinwabuzelayo emhlabeni . . . ngibalalise belondekile.”—Hoseya 2:18.
Impilo Ephelele, Ukuphila Okuphakade
9-14. Chaza izimo zempilo ezweni elisha.
9 “Khona amehlo ezimpumputhe ayakuvulwa, zivuleke nezindlebe zezithulu. Khona unyonga luyakutshekula njengendluzele, nolimi lwesimungulu luyakuhuba.”—Isaya 35:5, 6.
10 “[UNkulunkulu] azesule izinyembezi zonke emehlweni abo; ukufa akusayikuba-khona; nokudabuka‚ nokukhala‚ nobuhlungu akusayikuba-khona.”—IsAmbulo 21:4.
11 “Abakhé khona abayikusho ukuthi: Ngiyagula.”—Isaya 33:24.
12 “Inyama yakhe ibentsha kuneyomntwana, abuyele emihleni yobusha bakhe.”—Jobe 33:25.
13 “Isipho somusa sikaNkulunkulu singukuphila okuphakade kuKristu Jesu iNkosi yethu.”—Roma 6:23.
14 “Yilowo nalowo okholwa yiyo [uyoba] . . . nokuphila okuphakade.”—Johane 3:16.
Abafileyo Bayobuyiselwa Ekuphileni
15-17. Yiliphi ithemba elikhona ngalabo asebefile kakade?
15 “Kuyakuba-khona ukuvuka kwabafileyo‚ okwabalungile nokwabangalungile.”—IzEnzo 24:15.
16 “Isikhathi siyeza‚ lapho bonke abasemathuneni [enkumbulo kaNkulunkulu] beyakulizwa izwi layo [baphume, NW].”—Johane 5:28, 29.
17 “Nolwandle lwakhipha abafileyo ababekulo‚ nokufa neHayidese [ithuna] kwakhipha abafileyo ababekukho.”—IsAmbulo 20:13.
Umhlaba, IPharadesi Lenala
18-22. Umhlaba uyoguqulwa ube yini?
18 “[Kuyoba khona] izihlambi zesibusiso. Umuthi osendle uyakuthela izithelo zawo, umhlabathi uthele ukudla kwawo, zihlale zilondekile ezweni lazo.”—Hezekeli 34:26, 27.
19 “Umhlaba uthelile izithelo zawo; uNkulunkulu, uNkulunkulu wethu, uyasibusisa.”—IHubo 67:6.
20 “Kuyakujabula ihlane nogwadule, kuthokoze uqwathule, lukhahlele njengentebe.”—Isaya 35:1.
21 “Izintaba namagquma kuyakuqhumuka ngokuhlabelela phambi kwenu, nemithi yonke yasendle iyakushaya ihlombe. Esikhundleni sogagane kuyakumila umsayipuresi, nasesikhundleni samakhakhasi kuyakumila umbomvana.”—Isaya 55:12, 13.
22 “Uzakuba-nami eParadisi.”—Luka 23:43.
Izindlu Ezinhle Zabo Bonke
23, 24. Yisiphi isiqinisekiso esinaso sokuthi kuyoba nezindlu ezinhle ezanele zabo bonke?
23 “Bayakwakha izindlu, bahlale kuzo . . . Abayikwakha, kuhlale omunye; abayikutshala, kudle omunye, . . . nomsebenzi wezandla zabakhethiweyo bami uyakugugela kubo. Abayikushikashikela ize, bazalele izinhlupheko.”—Isaya 65:21-23.
24 “Bayakuhlala, kube-yilowo nalowo phansi komvini wakhe naphansi komkhiwane wakhe; akakho oyakubesabisa.”—Mika 4:4.
Ungaphila Kuze Kube Phakade EPharadesi
25. Yiliphi ithemba elimangalisayo esinalo ngekusasa?
25 Yeka ithemba elimangalisayo ngekusasa! Yeka ukuthi ukuphila kungaba nenjongo engokoqobo kanjani manje uma kugxiliswe ethembeni eliqinile lokuthi ezweni elisha likaNkulunkulu zonke izinkinga zanamuhla ziyoba ezesikhathi esidlule kuze kube phakade! “Izinto zakuqala aziyikukhunjulwa, zingene enhliziyweni.” (Isaya 65:17) Futhi yeka ukuthi kududuza kanjani ukwazi ukuthi ukuphila ngalesosikhathi kuyoba okuphakade: “[UNkulunkulu] uyakugwinya ukufa kuze kube-phakade.”—Isaya 25:8.
26. Siyini isihluthulelo sokuphila kuze kube phakade ezweni elisha likaNkulunkulu?
26 Uyafuna yini ukuphila kuze kube phakade kulelozwe elisha eliyiPharadesi eliseduze kakhulu manje? Ungase ubuze, ‘Yini okuyodingeka ngiyenze ukuze ngizuze umusa kaNkulunkulu ekupheleni kwalelizwe futhi ngiqhubeke ngiphila ngize ngingene ezweni lakhe elisha?’ Kudingeka wenze lokho uJesu akubonisa lapho ethandaza kuNkulunkulu: “Ukuphila okuphakade yilokhu ukuba bazi wena-Nkulunkulu wedwa oqinisileyo‚ nomthumileyo‚ uJesu Kristu.”—Johane 17:3.
27. Yini okumelwe uyenze ukuze ube nengxenye enjongweni kaNkulunkulu?
27 Ngakho-ke, thola iBhayibheli, futhi uqinisekise lokho okufunde kulencwajana engangomagazini. Funa abanye abawafundayo futhi bawafundise lamaqiniso eBhayibheli. Hlukana nezinkolo zobuzenzisi ezifundisa futhi zenze izinto eziphambene neBhayibheli. Funda ukuthi, wena kanye nabanye abayizigidi abenza intando kaNkulunkulu kakade, ningahlanganyela kanjani enjongweni kaNkulunkulu yokuba abantu baphile kuze kube phakade emhlabeni oyipharadesi. Futhi ukwamukele ngokungathi sína lokho iZwi likaNkulunkulu elikushoyo ngesikhathi esizayo esiseduze: “Izwe liyadlula kanye nenkanuko yalo; kepha owenza intando kaNkulunkulu uhlala kuze kube-phakade.”—1 Johane 2:17.
[Isithombe ekhasini 31]
Injongo kaNkulunkulu yokubuyisela ipharadesi lasemhlabeni izofezeka ngokushesha