Kingdom News No. 34
Kungani Ukuphila Kugcwele Izinkinga Kangaka?
Ingabe ipharadesi elingenazinkathazo lingaba khona?
IZINKINGA EZINGATHI SÌNA ZIYA ZIDLANGA—KUNGANI?
Abantu bebelokhu benazo izinkinga. Nakuba abaningi bebecabanga ukuthi ezobuchwepheshe zanamuhla zingazixazulula, izinkinga ezingathi sína ziya zidlanga.
Ubugebengu: Bambalwa abantu abazizwa belondekile uma behamba emigwaqweni noma behleli nasemakhaya abo. Kwelinye izwe laseYurophu, cishe umuntu oyedwa kwabathathu ube isisulu sokugetshengwa onyakeni wamuva.
Indawo Ezungezile: Ukungcola komoya, indawo okuhlalwa kuyo, namanzi kwande kakhulu. Emazweni asathuthuka, ingxenye yesine yabantu ayiwatholi amanzi ahlanzekile.
Ubumpofu: Kunabantu abampofu nabalambayo abaningi kunanini ngaphambili. Abantu abangaphezu kwamaphesenti angu-90 kwamanye amazwe bampofu; amaphesenti angu-30 ezisebenzi, cishe abayizigidi ezingu-800 abasebenzi noma benza umsebenzi ongabaholeli ngokwanele—futhi amanani ayanda.
Indlala: Ngisho noma wena unakho ukudla okwanele, izigidi ezandayo azinakho. Emazweni angakathuthuki, unyaka ngamunye kufa okungenani abantu abayizigidi ezingu-13, ikakhulukazi izingane, bebulawa indlala.
Impi: Udlame lwamuva phakathi kwezizwe lubulale amakhulu ezinkulungwane zabantu. Futhi kulelikhulu lama-20, izimpi zibulale abantu abangaphezu kwezigidi eziyikhulu.
Ezinye Izinkinga: Kulezizinkinga ezingenhla, nezela nokuwohloka kwemikhaya okuqhubekayo, omama abaningi abangashadile, ukungabi namakhaya okwandayo, ukusetshenziswa kabi kwezidakamizwa okusakazekile, ukuziphatha okubi okuthé chithi saka. Owayeyilungu lomkhandlu wase-United States washo ngokufanelekile: “Ziningi kakhulu izimpawu . . . zokuthi impucuko yonakele.” Enkathini yamuva eyiminyaka engu-30, abantu base-United States banda ngamaphesenti angu-41, kodwa ubugebengu bobudlova banda ngamaphesenti angu-560, ukuzala okungemthetho kwanda ngamaphesenti angu-400, izehlukaniso zanda ngamaphesenti angu-300, ukuzibulala kwentsha kwanda ngamaphesenti angu-200. Isimo singesifanayo nakwamanye amazwe.
Kungani Izinkinga Ziye Zadlanga?
UMdali wethu usinikeza impendulo. IZwi lakhe libiza lezizikhathi ezigcwele izinkinga ngokuthi ‘izinsuku zokugcina,’ lapho kuyoba khona “izikhathi ezibucayi okunzima ukubhekana nazo.” (2 Thimothewu 3:1) Izinsuku zokugcina zani? IBhayibheli likhuluma ‘ngokuphela kwezwe.’—Mathewu 24:3, King James Version.
Izinkinga zanamuhla ezandayo ziwubufakazi obucacile bokuthi isiphelo salesisimiso sezinto siseduze, kuhlanganise nokuphela kobubi nalabo ababubangelayo. (Mathewu 24:3-14; 2 Thimothewu 3:1-5; IsAmbulo 12:7-12) Masinyane uNkulunkulu uzongenela futhi aqikelele ukuthi zonke izinkinga zanamuhla zixazululwe ngokuphelele.—Jeremiya 25:31-33; IsAmbulo 19:11-21.
IZINKOLO ZALELIZWE ZIHLULEKILE
Esikhundleni sokusiza ekuxazululeni izinkinga zanamuhla, izimiso zenkolo zalelizwe ziyenezela kuzo. Ezimpini, amaKatolika abulala amaKatolika, amaProthestani abulala amaProthestani—izigidi zabo. Muva nje eRwanda, lapho iningi lingamaKatolika, abantu babulalana kwafa amakhulu ezinkulungwane! (Bheka isithombe esingakwesobunxele.)
Ingabe uJesu ubengaya empini ephethe isibhamu noma ucelemba bese ebulala abafundi bakhe ngenxa yokuthi bangabesinye isizwe? Lutho neze! “Othanda uNkulunkulu,” kusho iBhayibheli, “kufanele athande nomfowabo.” (1 Johane 4:20, 21) Izinkolo zalelizwe zihlulekile ukwenza lokho. “Bavuma obala ukuthi bayamazi uNkulunkulu‚ kodwa bayamphika ngemisebenzi yabo.”—Thithu 1:16.
Ngaphezu kwalokho, ngokungazisekeli ngobuqotho izindinganiso zeBhayibheli zokuziphatha, izinkolo zezwe zinengxenye ekuwohlokeni kokuziphatha okushaqisayo emhlabeni wonke.
UJesu wathi ungakwazi ukuhlukanisa inkolo yeqiniso kweyamanga ‘ngezithelo zayo,’—ngokwalokho okwenziwa amalungu ayo. Wathi futhi: “Yonke imithi engatheli izithelo ezinhle iyagawulwa iphonswe emlilweni.” (Mathewu 7:15-20) IZwi likaNkulunkulu lisinxusa ukuba siyibalekele inkolo ethela izithelo ezimbi futhi ngenxa yalokho ezobhujiswa.—IsAmbulo 18:4.
Inkolo Yeqiniso Ayihlulekanga
Inkolo yeqiniso “ithela izithelo ezinhle,” ikakhulukazi uthando. (Mathewu 7:17; Johane 13:34, 35) Yibaphi abantu abawubuzalwane bobuKristu bomhlaba wonke ababonisa uthando olunjalo? Obani abenqaba ukubulala abantu benkolo yakubo, nanoma ubani nje?—1 Johane 3:10-12.
OFakazi BakaJehova banedumela lokuthela ‘lesosithelo esihle.’ Embulungeni yonke, emazweni angaphezu kuka-230, ‘bakhande izinkemba zabo zaba ngamakhuba.’ (Isaya 2:4) Ukuthanda kwabo abantu kuboniswa nawukulalela kwabo umyalo kaKristu wokushumayela ‘izindaba ezinhle’ zoMbuso kaNkulunkulu emhlabeni wonke. (Mathewu 24:14) Baphila nangokuvumelana nezindinganiso eziphakeme zokuziphatha ezifundiswa eBhayibhelini futhi bayazisekela.—1 Korinte 6:9-11.
Inkolo yeqiniso ayihlulekanga. Iqondisa abantu kuMuntu okuwukuphela kwakhe ongaxazulula izinkinga zesintu. Masinyane Lowo uzoletha umhlaba omusha ngokuphelele. Ungubani Lowo? (Sicela ubheke ikhasi elingemuva.)
IPHARADESI ELINGENAZINKATHAZO LIQINISEKILE
Ukube ubungase ukwazi, ubungeke yini uzixazulule zonke izinkinga ezihlupha isintu? Ngempela ubungazixazulula! Ingabe kufanele sicabange ukuthi uMdali wethu onothando, okunguyena kuphela onamandla nokuhlakanipha okudingekayo ukuze kuxazululwe izinkinga zesintu, ngeke azixazulule?
IBhayibheli lembula ukuthi uNkulunkulu uyongenela ezindabeni zabantu ngohulumeni wakhe wasezulwini osezandleni zikaJesu Kristu. “Uyakuchoboza” ohulumeni abonakele emhlabeni. (Daniyeli 2:44; Mathewu 6:9, 10) Ngani? Umhubi unikeza impendulo lapho ekhuluma noNkulunkulu: “Bazi ukuthi nguwe wedwa ogama lakho linguJehova; ungoPhezukonke emhlabeni wonke.”—IHubo 83:18.
Lapho lelizwe liphela, bayoba khona yini abayosinda? “Izwe liyadlula,” kusho iBhayibheli, “kodwa lowo owenza intando kaNkulunkulu uhlala kuze kube phakade.” (1 Johane 2:17) Laba abasindile bayophila phakade kuphi? IBhayibheli liyaphendula: “Abalungileyo bazakudla ifa lomhlaba bahlale kuwo njalonjalo.”—IHubo 37:9-11, 29; IzAga 2:21, 22.
Ezweni likaNkulunkulu elisha, “ukufa ngeke kusaba khona, noma ukulila noma ukukhala noma ubuhlungu ngeke kusaba khona.” (IsAmbulo 21:4) Ngeke busaba khona ubugebengu, ubumpofu, indlala, ukugula, ukudabuka, noma ukufa! Ingani nabafile bayophinde baphile! “Luyoba khona uvuko.” (IzEnzo 24:15) Umhlaba uqobo lwawo uyoguqulwa ube ipharadesi elingokoqobo.—Isaya 35:1, 2; Luka 23:43.
Yini okumelwe siyenze ukuze sijabulele ukuphila ezweni elisha likaNkulunkulu? UJesu wathi: “Lokhu kusho ukuphila okumi phakade, ukungenisa kwabo ulwazi ngawe, owukuphela kukaNkulunkulu weqiniso, nangalowo owamthuma, uJesu Kristu.” (Johane 17:3) Izigidi zabantu abanhliziyo ziqotho emhlabeni wonke zingenisa lolo lwazi. Lubenza bakwazi ukubhekana nezinkinga eziningi zabo siqu manje, kodwa okubaluleke nakakhulu, lubanikeza ithemba eligcwele lokuthi izinkinga ezingaphezu kwamandla abo ukuzixazulula ziyoqedwa nyá ezweni elisha likaNkulunkulu.
[Umthombo Wesithombe ekhasini 2]
WHO photo by P. Almasy
[Umthombo Wesithombe ekhasini 3]
Jerden Bouman/Sipa Press