Ingabe Zonke Izinkolo Ziyamjabulisa UNkulunkulu?

Ingabe unomuzwa wokuthi zonke izinkolo ziyamjabulisa uNkulunkulu? Cishe zonke izinhlobo zokukhulekela ozaziyo zikhuthaza ukuziphatha okuhle, okungenani ngezinga elithile. Kodwa ingabe lokho kwanele ukujabulisa uNkulunkulu?

ABANYE bathi, ‘Mane nje ube qotho ekukhulekeleni kwakho, uNkulunkulu uzojabula. Zonke izinkolo zinokuthile okuhle.’ Ngokwesibonelo, iNkolo YamaBahai iye yavumela lombono kwaze kwaba sezingeni lokwamukela izinkolelo zezinkolo zezwe ezingu-9 eziyinhloko. Leli qembu lenkolo likholelwa ukuthi zonke zinomsuka waphezulu futhi ziyizici zeqiniso elilodwa. Kungenzeka kanjani lokho?

Ngaphezu kwalokho, kufanelekile ukuba uzibuze ukuthi ingamjabulisa kanjani uNkulunkulu inkolo etshela amalungu ayo ukuba atshale ezindaweni zomphakathi isisi esiphazamisa izinzwa, esingase sibulale abantu abaningi. Elinye iqembu lenkolo eJapane libekwe lelo cala. Noma ingabe uNkulunkulu iyamjabulisa inkolo ebangela amalungu ayo ukuba azibulale? Kwenzeka lokho kubalandeli bomholi wenkolo uJim Jones eminyakeni embalwa edlule.

Lapho sibheka emuva ezikhathini zakudala, singabuza kufanele, Zingamjabulisa yini uNkulunkulu izinkolo uma ziphemba impi, njengasendabeni yeMpi Yeminyaka Engu-30, eyalwiwa kusukela ngo-1618 kuya ku-1648? Ngokwe-Universal History of the World, leyompi yenkolo phakathi kwamaKatolika namaProthestani ‘yayingenye yezimpi ezesabeka kunazo zonke emlandweni waseYurophu.’

Kusukela ngekhulu le-11 kuya kwele-13 iziMpi Zenkolo nazo ziye zaphumela ekuchithweni kwegazi okwesabekayo. Ngokwesibonelo, eMpini Yenkolo yokuqala, labo okwakuthiwa bangabalwi bempi yenkolo abangamaKristu babulala ngonya amaSulumane namaJuda ayehlala eJerusalem.

Cabanga nangalokho okwenzeka phakathi nokuQulwa Kwamacala Ezihlubuki, okwaqala ngekhulu le-13 futhi kwaqhubeka iminyaka engaba ngu-600. Izinkulungwane zahlushwa futhi zashiswa zaze zafa ngenxa yokuyala kwabaholi benkolo. Encwadini yakhe ethi Vicars of Christ—The Dark Side of the Papacy, uPeter De Rosa uthi: “Egameni likapapa, [abaqulisi] babangela ukuhlaselwa okunonya kwempucuko yabantu nokwaqhubeka isikhathi eside kunakho konke emlandweni wohlanga [lwesintu].” Maqondana nomqulisi waseSpain uTorquemada owayengumDominican, uDe Rosa uthi: “Emiswe ngo-1483, wabusa ngobushiqela iminyaka eyishumi nanhlanu. Wabangela ukufa kwabantu abangaphezu kuka-114 000 okwathi abangu-10 220 kubo bashiswa.”

Yebo, akuzona izinkolo zeLobukholwa kuphela ezinecala legazi. Encwadini yaso ethi Pensées, isazi sefilosofi esingumFulentshi uBlaise Pascal saphawula: “Abantu ababenzi ububi ngokuphelele nangokwenama okukhulu njengalapho bebenza ngesisusa esingokwenkolo.”

Babonakala Ngezithelo Zabo

NgokukaNkulunkulu, ukwamukeleka kwenkolo akuxhomekile esicini esisodwa kuphela. Ukuze inkolo yamukeleke kuye, izimfundiso nemisebenzi yayo kumelwe kuvumelane neZwi lakhe leqiniso elilotshiwe, iBhayibheli. (IHubo 119:160; Johane 17:17) Izithelo zokukhulekela okuvunyelwa uNkulunkulu kumelwe zihambisane nezindinganiso zikaJehova uNkulunkulu.

ENtshumayelweni yakhe yaseNtabeni, uJesu Kristu wabonisa ukuthi kwakuyoba nabaprofethi abazisholo ukuthi bamelela uNkulunkulu kungenjalo. UJesu wathi: “Qaphelani abaprofethi bamanga abeza kini bembethe isembozo semvu, kodwa ngaphakathi beyizimpisi eziphangayo. Niyobabona ngezithelo zabo. Abantu abakhi neze amagilebhisi emeveni noma amakhiwane emakhakhasini, akunjalo? Ngokufanayo yonke imithi emihle ithela izithelo ezinhle, kodwa yonke imithi ebolile ithela izithelo ezingenanzuzo; umuthi omuhle awunakuthela izithelo ezingenanzuzo, nomuthi obolile awunakuthela izithelo ezinhle. Yonke imithi engatheli izithelo ezinhle iyagawulwa iphonswe emlilweni. Khona-ke, ngempela lababantu niyobazi ngezithelo zabo.” (Mathewu 7:15-20) Lamazwi abonisa ukuthi kudingeka siqaphe ngokomoya. Singase sicabange ukuthi umholi noma iqembu elithile lenkolo liyamukeleka kuNkulunkulu noKristu, kodwa kungenzeka siyaphaphalaza.

Isidingo Sokuqapha

Nakuba inkolo ethile izisholo ukuthi ivunyelwa uNkulunkulu futhi abefundisi bayo befunda izindima zeBhayibheli, lokho akusho ukuthi iyindlela yokukhulekela emjabulisayo uNkulunkulu. Abaholi bayo bangase benze ngisho nezinto ezimangalisayo ezenza kubonakale sengathi basetshenziswa uNkulunkulu. Noma kunjalo, leyo nkolo isengaba ngeyamanga, engakhiqizi izithelo ezamukelekayo kuNkulunkulu. Abapristi baseGibithe abenza imilingo bosuku lukaMose babekwazi ukwenza izinto ezimangalisayo, kodwa ngokuqinisekile babengavunyelwa uNkulunkulu.—Eksodusi 7:8-22.

Njengasesikhathini esidlule, namuhla izinkolo eziningi zithuthukisa imibono namafilosofi abantu kunokuba zinamathele kulokho uNkulunkulu athi kuyiqiniso. Khona-ke, sifaneleka ngokukhethekile isixwayiso seBhayibheli: “Xwayani: mhlawumbe kungase kube khona othile oyomuka nani njengezisulu zakhe ngefilosofi nenkohliso eyize ngokwesiko labantu, ngokwezinto zokucathula zezwe futhi hhayi ngokukaKristu.”—Kolose 2:8.

Ngemva kokukhuluma ngezithelo ezinhle nezimbi, uJesu wathi: “Akuwona wonke umuntu othi kimi, ‘Nkosi, Nkosi,’ oyongena embusweni wamazulu, kodwa lowo owenza intando kaBaba osemazulwini nguye oyongena. Abaningi bayothi kimi ngalolosuku, ‘Nkosi, Nkosi, asiprofethanga yini egameni lakho, futhi saxosha amademoni egameni lakho, senza nemisebenzi eminingi yamandla egameni lakho?’ Kodwa nokho ngiyovuma kubo ngalesosikhathi: Angizange nginazi! Sukani kimi, nina zisebenzi zokungabi namthetho.”—Mathewu 7:21-23.

Hlola Izithelo

Khona-ke, kuyacaca ukuthi kubalulekile ukubheka izithelo zenkolo ngaphambi kokuphetha ngokuthi iyamukeleka kuNkulunkulu. Ngokwesibonelo, ingabe leyo nkolo ihileleke kwezombangazwe? Khona-ke phawula lamazwi, alotshwe kuJakobe 4:4: “Noma ubani ofuna ukuba umngane wezwe uzenza isitha sikaNkulunkulu.” Ngaphezu kwalokho, uJesu washo lokhu ngabalandeli bakhe beqiniso: “Abayona ingxenye yezwe, njengoba nje nami ngingeyona ingxenye yezwe.” (Johane 17:16) Inkolo enhle emehlweni kaNkulunkulu ayihileleki kwezombangazwe zalelizwe, ‘elisemandleni omubi,’ isidalwa somoya esingabonakali, uSathane uDeveli. (1 Johane 5:19) Kunalokho, inkolo evunyelwa uNkulunkulu isekela ngokwethembeka uMbuso wakhe ngaphansi kukaJesu Kristu futhi imemezela izindaba ezinhle ezimayelana nalowo hulumeni wasezulwini.—Marku 13:10.

Ingabe inkolo iyamukeleka kuNkulunkulu uma isekela ukungalaleli kwezakhamuzi? Impendulo isobala uma silalela iseluleko somphostoli uPawulu: “Qhubeka ubakhumbuza ukuba bazithobe futhi balalele ohulumeni neziphathimandla njengababusi, ukuba balungele yonke imisebenzi emihle.” (Thithu 3:1) Yebo, uJesu wabonisa ukuthi abalandeli bakhe kwakufanele ‘babuyisele izinto zikaKesari kuKesari, kodwa izinto zikaNkulunkulu kuNkulunkulu.’—Marku 12:17.

Ake sithi inkolo ikhuthaza ukuhlanganyela ezimpini zezizwe. Eyoku-1 Petru 3:11 isinxusa ukuba ‘senze okuhle’ nokuba ‘sifune ukuthula futhi sikuphishekele.’ Ingamjabulisa kanjani uNkulunkulu inkolo uma amalungu ayo ekulungele ukubulala abakhulekeli abakanye nawo abakwelinye izwe empini? Amalungu enkolo evunyelwa uNkulunkulu abonisa imfanelo yakhe eyinhloko—uthando. Futhi uJesu wathi: “Bonke bayokwazi ngalokhu ukuthi ningabafundi bami, uma ninothando phakathi kwenu.” (Johane 13:35) Lolo thando aluhlangene ngalutho nenzondo enobudlova ekhuthazwa ezimpini zezizwe.

Inkolo yeqiniso ishintsha abantu abayizilwi babe abathandi bokuthula. Lokhu kwabikezelwa ngalamazwi: “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.” (Isaya 2:4) Kunokuba bakhiphe amazwi enzondo, labo abaqhuba ukukhulekela kweqiniso benza ngokuvumelana nalomyalo: “Kumelwe uthande umakhelwane wakho njengoba uzithanda wena.”—Mathewu 22:39.

Labo abaqhuba inkolo yeqiniso bazama ukuphila ngezindinganiso eziphakeme zikaJehova uNkulunkulu, benqaba ukwamukela indlela yokuphila yokuziphatha okubi. IZwi likaNkulunkulu lithi: “Babeshane! Anazi yini ukuthi abantu abangalungile ngeke bawuzuze njengefa umbuso kaNkulunkulu? Ningadukiswa. Izifebe, noma abakhonza izithombe, noma iziphingi, noma amadoda agcinelwe izinjongo ezingezona ezemvelo, noma amadoda alala namadoda, noma amasela, noma abantu abahahayo, noma izidakwa, noma izithuki, noma abaphangi ngeke bawuzuze njengefa umbuso kaNkulunkulu. Kodwa nokho yilokho abanye kini ababeyikho. Kodwa seniye nagezwa nahlanzeka, kodwa seniye nangcweliswa, kodwa sekuthiwe nilungile egameni leNkosi yethu uJesu Kristu nangomoya kaNkulunkulu wethu.”—1 Korinte 6:9-11.

Isikhathi Sesinyathelo Esiwujuqu

Kubalulekile ukubona umehluko phakathi kokukhulekela kwamanga nenkolo yeqiniso. Encwadini yeBhayibheli yesAmbulo, umbuso wezwe wenkolo yamanga ubizwa ngokuthi “iBabiloni Elikhulu,” isifebe esingokomfanekiso “leso amakhosi omhlaba enza naso ubufebe.” Sinecala legazi futhi siphethe indebe yegolide ‘egcwele izinengiso nezinto ezingahlanzekile zobufebe baso.’ (IsAmbulo 17:1-6) Akukho lutho lwaso olwamukelekayo kuNkulunkulu.

Lesi isikhathi sokuthatha isinyathelo esiwujuqu. Kubantu abaqotho abaseseBabiloni Elikhulu, uMdali wethu onothando ukhipha lesi simemezelo: “Phumani kulo, bantu bami, uma ningafuni ukuhlanganyela nalo ezonweni zalo, futhi ningafuni ukwamukela ingxenye yezinhlupho zalo.”—IsAmbulo 18:4.

Uma ufisa ukuqhuba inkolo ejabulisa uNkulunkulu, kungani ungajwayelani kangcono noFakazi BakaJehova? Ishadi elikulesi sihloko linikeza uhlu lwezinye zezinkolelo zabo, kanye nezizathu ezingokomBhalo ezisekela lezi zinkolelo. Hlola iBhayibheli lakho ubone ukuthi izinkolelo zoFakazi ziyavumelana yini neZwi likaNkulunkulu. Hlolisisa ukuze uthole ukuthi inkolo yabo iveza izithelo obungazilindela yini ekukhulekeleni kweqiniso. Uma uthola ukuthi iveza zona, uyobe uyitholile inkolo ejabulisa uNkulunkulu.

[Ibhokisi ekhasini 5]

LOKHO OFAKAZI BAKAJEHOVA ABAKUKHOLELWAYO

INKOLELO ISISEKELO ESINGOKWEBHAYIBHELI

Igama likaNkulunkulu nguJehova Eksodusi 6:3; IHubo 83:18

Isintu asiziphendukelanga Genesise 1:27; 2:7

ngokwemvelo kodwa sadalwa

Abantu bafa ngenxa yesono Roma 5:12

somuntu wokuqala

Ekufeni umphefumulo uyayeka UmShumayeli 9:5, 10;

ukuphila Hezekeli 18:4

Isihogo siyithuna elivamile Jobe 14:13; IsAmbulo 20:13,

lesintu King James Version

Kunethemba lovuko ngabafileyo Johane 5:28, 29; 11:25;

IzEnzo 24:15

UKristu wanikela ngokuphila Mathewu 20:28; 1 Petru 2:24;

kwakhe kwasemhlabeni 1 Johane 2:1, 2

Imithandazo kumelwe iqondiswe Mathewu 6:9;

kuJehova kuphela ngoKristu Johane 14:6, 13, 14

Imithetho yeBhayibheli 1 Korinte 6:9, 10

ngokuziphatha kumelwe ilalelwe

Akumelwe kusetshenziswe izithombe Eksodusi 20:4-6;

ekukhulekeleni 1 Korinte 10:14

Ukusebenzelana nemimoya kumelwe Duteronomi 18:10-12;

kugwenywe Galathiya 5:19-21

Igazi akumelwe lifakwe emzimbeni Genesise 9:3, 4;

IzEnzo 15:28, 29

Abalandeli bakaJesu beqiniso Johane 15:19; 17:16;

bazigcina behlukile ezweni Jakobe 1:27; 4:4

AmaKristu ayafakaza, ememezela Isaya 43:10-12;

izindaba ezinhle Mathewu 24:14; 28:19, 20

Ukubhapathizwa ngokucwiliswa Marku 1:9, 10; Johane 3:22;

ngokuphelele emanzini kubonisa IzEnzo 19:4, 5

ukuzinikezela kuNkulunkulu

Iziqu ezingokwenkolo azivumelani Jobe 32:21, 22;

nemiBhalo Mathewu 23:8-12

Siphila ‘esikhathini sokuphela’ Daniyeli 12:4;

Ukuba khona kukaKristu Mathewu 24:3; Johane 14:19;

akubonakali 1 Petru 3:18

USathane ungumbusi walelizwe Johane 12:31; 1 Johane 5:19

ongabonakali

UNkulunkulu uzosibhubhisa Daniyeli 2:44;

isimiso sezinto samanje IsAmbulo 16:14, 16; 18:1-8

UMbuso kaNkulunkulu ngaphansi Isaya 9:6, 7;

kukaKristu uzobusa umhlaba Daniyeli 7:13, 14;

ngokulunga Mathewu 6:10

‘Umhlambi omncane’ uzobusa Luka 12:32;

ezulwini noKristu IsAmbulo 14:1-4; 20:4

Abanye abavunyelwa uNkulunkulu Luka 23:43; Johane 3:16;

bazokwamukela ukuphila IsAmbulo 21:1-4

[Isithombe ekhasini 4]

Phakathi nokuQulwa Kwamacala Ezihlubuki kwabulawa izinkulungwane

[Isithombe ekhasini 6]

IziMpi Zenkolo zaphumela ekuchithweni kwegazi okwesabekayo

[Isithombe ekhasini 7]

Inkolo yeqiniso yaziwa ngezithelo zayo ezinhle

[Umthombo Wesithombe ekhasini 2]

Cover: Garo Nalbandian