ImiBhalo Ifundwe Ngokugcizelela Okufanele

LAPHO ukhuluma nabanye ngezinjongo zikaNkulunkulu, kungakhathaliseki ukuthi ngasese noma endaweni yesikhulumi, ingxoxo yakho kumelwe igxile kulokho okuseZwini likaNkulunkulu. Lokhu ngokuvamile kuhlanganisa ukufunda imibhalo eBhayibhelini, okumelwe kwenziwe kahle.

Ukugcizelela Okufanele Kuhlanganisa Nomuzwa. ImiBhalo kufanele ifundwe ngomuzwa. Cabangela ezinye izibonelo. Lapho ufunda amaHubo 37:11 ngokuzwakalayo, izwi lakho kufanele lizwakale likulangazelela ngenjabulo ukuthula okuthenjiswa lapho. Lapho ufunda isAmbulo 21:4 ngokuphathelene nokuphela kokuhlupheka nokufa, izwi lakho kufanele libe nokwazisa okufudumele ngempumuzo emangalisayo ebikezelwa lapho. IsAmbulo 18:2, 4, 5 esisinxusa ukuba siphume “eBabiloni Elikhulu” elicwile esonweni, kufanele sifundwe ngomuzwa wokuphuthuma. Yiqiniso, umuzwa ovezwayo kufanele usuke enhliziyweni, kodwa kungeqiswa. Ukuthi imizwelo iyohileleka ngezinga elingakanani kuyonqunywa indaba ngokwayo nawumongo.

Gcizelela Amagama Afanele. Uma ukhulumela ingxenye ethile yevesi, kufanele ugcizelele leyo ngxenye lapho ufunda umbhalo. Ngokwesibonelo, lapho ufunda uMathewu 6:33, awunakugcizelela amagama athi “nokulunga kwakhe” noma athi “zonke lezi ezinye izinto” uma uhlose ukuchaza lokho okushiwo ‘ukufuna umbuso kuqala.’

Enkulumweni yoMhlangano Wenkonzo, ungase uhlele ukufunda uMathewu 28:19. Yimaphi amagama okufanele uwagcizelele? Uma ufuna ukubagqugquzela ukuba bakhuthalele ukuqala izifundo zeBhayibheli zasekhaya, gcizelela amagama athi ‘ukwenza abafundi.’ Kanti uma uhlela ukuxoxa ngomthwalo wemfanelo womKristu wokuhlanganyela iqiniso leBhayibheli nabantu abayizifiki, noma ufuna ukukhuthaza abamemezeli ukuba bakhonze lapho kunendingeko enkulu khona, ungase ugcizelele amagama athi “abantu bazo zonke izizwe.”

Ngokuvamile, umbhalo ufundwa ngenjongo yokuphendula umbuzo noma ukusekela iphuzu elithile abanye abalibheka njengeliyimpikiswano. Uma wonke amagama asevesini egcizelelwa ngokulinganayo, izilaleli zakho zingase zingalitholi iphuzu. Iphuzu lingase likucacele wena kodwa lingazicaceli zona.

Ngokwesibonelo, lapho ufunda amaHubo 83:18 eBhayibhelini elinegama likaNkulunkulu, uma ugcizelela kakhulu elithi “ungoPhezukonke,” umninikhaya angase alahlekelwe iqiniso elisobala lokuthi uNkulunkulu unegama lakhe siqu. Kufanele ugcizelele igama elithi “linguJehova.” Nokho, uma usebenzisa wona lo mbhalo ekuchazeni ubukhosi bukaJehova, kufanele ugcizelele kakhulu igama elithi “ungoPhezukonke.” Ngokufanayo, lapho ufunda uJakobe 2:24 ukuze uveze ukubaluleka kokubonisa ukholo ngemisebenzi, ukugcizelela ngokuyinhloko amagama athi “kuzothiwa ulungile” esikhundleni selithi “ngemisebenzi,” kungase kwenze abakulalele balahlekelwe iphuzu.

Esinye isibonelo esiwusizo sitholakala kweyabaseRoma 15:7-13. Lena ingxenye yencwadi eyabhalwa umphostoli uPawulu ebhalela ibandla elalinabeZizwe namaJuda emvelo. Lapha, umphostoli uthi inkonzo kaKristu ayizuzisi nje kuphela amaJuda asokile, kodwa nabantu bezizwe ukuze “izizwe zikhazimulise uNkulunkulu ngesihe sakhe.” UPawulu ube esecaphuna imibhalo emine, ekhuluma ngalelo thuba elivulekele izizwe. Kufanele uzifunde kanjani lezo zingcaphuno ukuze ugcizelele iphuzu uPawulu ayenalo engqondweni? Uma uwadwebela amagama ozowagcizelela, ungase udwebele elithi “izizwe” evesini 9, “nina zizwe” evesini 10, “nonke nina zizwe” nathi “bonke abantu” evesini 11, nelithi “izizwe” evesini 12. Zama ukufunda eyabaseRoma 15:7-13 ugcizelele lawo magama. Njengoba wenza kanjalo, wonke amaphuzu kaPawulu ayocaca ngokwengeziwe futhi kube lula nakakhulu ukuwaqonda.

Izindlela Zokugcizelela. Amagama aphethe umqondo ofuna ugqame angase agcizelelwe ngezindlela eziningi. Izindlela ozisebenzisayo kumelwe zihambisane nombhalo kanye nokuhlelwa kwenkulumo. Kunikezwe ukusikisela okumbalwa lapha.

Ukugcizelela ngezwi. Lokhu kuhlanganisa noma yiluphi ushintsho ezwini olwenza amagama aphethe umqondo agqame emushweni wonke. Ukugcizelela kungenziwa ngokushintsha izwi—kungaba ngokulikhuphula noma ngokulehlisa. Ezilimini eziningi, ukuphakamisa iphimbo kuyagcizelela. Nokho, kwezinye izilimi, lokhu kungase kuyishintshe ngokuphelele incazelo yamagama. Uma uwabiza ngokunensa amagama abalulekile, kuyowenza abe nesisindo. Ezilimini ezingawagcizeleli ngezwi amagama athile, kuyodingeka wenze lokho okwenziwa kulolo limi ukuze uthole imiphumela oyifunayo.

Ukuhlaba ikhefu. Kungase kwenziwe ngaphambi noma ngemva kokufunda ingxenye eyisihluthulelo yombhalo—noma ungakwenza kokubili. Ukuhlaba ikhefu ngaphambi nje kokufunda iphuzu elisemqoka kwakha ukulangazelela; ukuhlaba ikhefu kamuva kwenza lokho okushilo kugxile ezingqondweni. Nokho, uma ikhefu lihlatshwa kaningi, akukho lutho oluyovelela.

Ukuphindaphinda. Ungase ugcizelele iphuzu elithile ngokuba uthi ukuma, uphinde ulifunde futhi igama noma umshwana. Indlela etusekayo ukuba uwufunde uwuqede umbhalo bese uphinde ufunda amagama ayinhloko.

Ukushukuma komzimba. Ukushukuma komzimba kanye nesimo sobuso ngokuvamile kungase kufake umzwelo egameni noma emshweni othile.

Ukungafani kwezwi. Kwezinye izilimi ngezinye izikhathi amagama angase afundwe ngezwi elishintsha incazelo yawo futhi liwenze angefani. Nalapha futhi, kufanele kusetshenziswe ukuqonda ikakhulukazi lapho kungamazwi okubhuqa.

Lapho Abanye Befunda Imibhalo. Lapho umninikhaya efunda umbhalo, angase agcizelele amagama angafanele noma angawagcizeleli nhlobo. Kumelwe wenze njani-ke lapho? Kungcono kakhulu ukuchaza umbhalo ngokubonisa ukuthi usebenza kanjani. Ngemva kokuveza ukuthi usebenza kanjani, ungabe usugxila emagameni aphethe umqondo eBhayibhelini.