Isifundo 6

‘Nakekela Ukufunda Kwasobala’

1, 2. Siwathola nini amathuba okwenza ukufunda kwasobala na?

¹ Umphostoli uPawulu wayalisisa uThimothewu, “Nakekela ukufunda [kwasobala].” Futhi wayala uThimothewu ukukufundisa lokhu nezimfanelo ezengeziwe zenkonzo ezikhonzini ezingamaKristu akanye nazo. (1 Thim. 4:13, qhathanisa neNW) Lesoseluleko esiphefumulelwe sisifanele futhi esinye nesinye isikhonzi sikaNkulunkulu namuhla, futhi senza kahle ukusilalela.

² Ukufunda kwasobala kaningi kuyabizwa ngasesikhonzini esingokwasezulwini. Esifundweni seNqabayokulinda nasesifundweni sencwadi sebandla imibhalo nezigaba kumelwe kufundwe. Phakathi nomhlangano womsebenzi Nesikole Senkonzo esingokwaseZulwini, kanye nasenkonzweni yasensimini, amatekisi eBhayibheli ayafundwa. Ngakho-ke kungokwenzuzo yesinye nesinye isikhonzi nangokwenzuzo yalabo abalalelayo, ngaso ukuba-ngumfundi wasobala omuhle.

3. Kungani ukulungiselela kubalulekile na?

³ Ukufunda kwasobala kuwukufunda ngezwi elikhulu ngenzuzo yabanye. Kepha izilaleli ziyozuza ngempela yini ngokugcwele uma umfundi engingiza emazwini esebenzisa nokusho ngamazwi okungeyikho noma ukugcizelela okubekwe endaweni engeyiyo okufiphaza umcabango na? Yikuphi ukulalela eziyokunikela uma engenakushiseka, efunda ngezwi elidinayo na? Ukufunda kahle eqenjini, ukulungiselela kudingekile. Kuhle ukungayi nanini esabelweni, ngisho sokufunda esifundweni sencwadi sebandla, ngaphandle kokuthi indaba ifundwe yonke ngaphambili. Uma kungenjalo izilaleli ziyobe-zingatholi inzuzo ebezingahle ziyithole, futhi zingahle ngakhona zizwe ukuphinyiswa kwamazwi okwedukile kumfundi. Yebo, kukhona indingeko ngesinye nesinye isikhonzi yokunakekela ukufunda kwasobala.—Hab. 2:2.

4, 5. Yiziphi izimfanelo ezidingekayo ukuze ukufunda kwasobala kuqhubezele izilaleli, futhi kuqondwe kalula na?

⁴ Izimfanelo ezidingekayo. Lapho ufunda, shiseka. Faka ukufudumala ekunikeleni kwakho, ubonisa imizwelo echazwe ngamazwi. Kanjalo uyoxwaya ukunikela okubandayo nokufile. Qaphela ukunganciphisi izwi lakho kufinyelela lapho izilaleli zakho zilahlekelwa yizingxenye ezibalulekile. Izwi lakho limelwe lanele ukufinyelela zonke izingxenye zekamelo noma iholo esetshenziswayo. Akakho ofanele athole ubunzima ekubambeni ngisho izwi elilodwa.

⁵ Kunendingeko yokuthi uzwakalise amazwi akho ngokukhanyayo, ngaphandle kokunqamula ingxenye yamanye amazwi, noma ukuwasithekisa ngokuwahlanganisa ukuwenza angezwakali. Ngenye indlela, akukuhle ukuba-ngochache kangangoba ukunikela kwakho kuxoshane esigijimini. Ukufunda okuphinyiswe kahle kusho ukuthi isilaleli asingabazi nanini ngamazwi owafundayo. Ukungezwakali kahle kaningi kuvela ngenxa yokuthi izwi lomfundi alikhishelwa ezilalelini, njalo kwenze injwayelo ukuphakamisa ikhanda lakho lapho ufunda. Vula umlomo wakho ukuze uvumele imisindo iphume ngaphandle kokuvimbeleka.

6. Ukubekwa okufanele kokugcizelela kunqunywa kanjani, futhi amakhefu anikela ngayiphi indlela ekugcizeleleni na?

⁶ Ukugcizelela okufanele kubalulekile. Ngempela, kuyisihluthulelo sokuqonda lokho okufundayo. Kwaziwa kahle ukuthi inguquko yokugcizelela ingaqondisa incazelo eyahluke ngokuphelele ezilalelini. Ngezinye izikhathi izwi elilodwa libizela ukugcizelela okukhethekile, kepha kaningi kuyiqembu lamazwi, wonke umshwana, ofanele ugcizelelwe. Ukubekwa kokugcizelela kufanele kunqunywe ngumcabango omelwe unikezwe, nalokho kuphathwa, hayi nje okusele komusho, kepha yonke indaba. Amakhefu enziwe kahle ayingxenye ebalulekile yokugcizelela. Amakhefana amafushane asiza ukuhlanganisa amazwi ngendlela ezwakalayo futhi enza kuqashelwe imicabango eyisihluthulelo; amakhefu amade abonisa isiphetho sengxenye enkulu yendaba.

7. Yini esizayo ukwenza ukufunda kuzwakale njengengxoxo na?

⁷ Ukwahlukahluka ekuphakameni nasekushesheni nakho kumelwe kucatshangelwe njengoba uzama ukufunda kahle. Ngaphandle kwakho ukunikela bekuyokuba-nesidina futhi kungahlabi-mxhwele. Kepha lapho kusetshenziswa ngokufaneleyo, ukwahlukahluka okunjalo enkulumweni kuyokwenza kukhulu ekwenzeni ukufunda kwakho kuzwakale ngaphezulu njengengxoxo yemvelo, eshisayo.

8. Kunini lapho inkulumo ibingahle inikezwe ngokufanele embhalweni olotshiwe na?

⁸ Ukufundwa kombhalo olotshiwe. Esinye sezimo ezibalulekile esihilela ukufunda kwasobala wukunikela kwenkulumo yombhalo olotshiwe. Loluhlobo lokunikela lunendawo yalo. Ngokwesibonelo, iSociety ingahle ilungiselele ngezinye izikhathi ukuthi onke amabandla abantu bakaNkulunkulu ezweni elithile alalele ukwaziswa okufanayo ngasikhathi-sinye. Futhi, izinkulumo zombhalo olotshiwe zinendawo yazo ezimisweni zemihlangano, lapho kunokwenzeka khona ukuthi okukhishiweyo kwenkulumo kuyocashunwa ngamaphephandaba noma lapho indaba eyinkimbinkimbi idinga khona ukunikezwa ngokushaya emhloleni.

9, 10. Yibuphi ubunzima obukhulu bokunqotshwa lapho kunikezwa inkulumo yombhalo olotshiwe, futhi kungenziwa kanjani na?

⁹ Ubulukhuni obukhulu bokunqotshwa ekufundweni kombhalo olotshiwe wukwenza ukuthi kuzwakale sengathi amazwi nemishwana bekuhlanganiswa ngendlela yengxoxo. Nokho, izwi lidinga ukukhuliswa kakhudlwana. Ngokuvamile ukushiwo ngamazwi kwendaba kwahluke ngempela kulokho obuyokusebenzisa ngokuvamile, imisho mhlawumbe emidana futhi iyinkimbinkimbi ngaphezulu. Kungahle kube-nokukhetheka kwenkulumo nesigqi okungavamile ekukhulumeni okuvamile. Ungahle ucabange ukuthi ubungenza ukunikela okungcono uma ubeka indaba ngamazwi akho. Kepha ukuzijwayeza nobungcweti kuyokwenza ukwazi ukuthuthuka kakhulu ekunikezeni izinkulumo zombhalo olotshiwe.

¹⁰ Ukuze kube-nempumelelo, ukulungiselela ngaphambili kuyisihluthulelo. Isikhathi simelwe sichithwe ukujwayelana nombhalo olotshiwe. Ufanele uphinde uyifunde indaba yakho kaningana ukuthola imicabango emikhulu ngokukhanyayo engqondweni. Uma kungake kubekhona amazwi athile ongawazi, ahlole kusichazimazwi esihle futhi ulobe izimpawu zokuphinyiselwa embhalweni. Bese uzijwayeza ukunikeza inkulumo ngezwi elikhulu ukuzijwayeza nendlela yokunikeza yomlobi wokuqala. Abanye abafundi bafumana ukuthi ukuzijwayeza ngezwi elikhulu ngaphambi kwesibuko kuyabasiza ukuthuthukisa ukubheka izilaleli, okuthile okubaluleke ngempela uma inkulumo inikezwa kwencane iholo.

11. Yiziphi izimpawu embhalweni olotshiwe ezinosizo na?

¹¹ Kuyasiza ukudwebela ngaphansi noma ukuphawula ngaphezu konkamisa amazwi ayisihluthulelo ofuna ukuwagcizelela. Abanye abafundi bakufumana kunosizo ukwahlukanisa imishwana embhalweni olotshiwe ngomdwana omncane ome ngqo. Futhi, amazwi asemaqenjini alukhuni noma angavamile amelwe akhulunywe ndawonye angabhanqwa ngemidwa egobile ukukukhumbuza ukuthi ungahlabi ikhefu kuze kube-sekugcineni komshwana. Lokhu kuvimbela ukungabikho esimweni semvelo noma ukulahleka kwengqondo. Kungacatshangwa nangokuphawula umbhalo olotshiwe ukubonisa lapho amakhefu amade ngokufanele abeyofaneleka khona. Amakhefu angenza ithemba, anikele ukugcizelela futhi avumele isikhathi sokuthi indaba ingeniswe. Kubalulekile nokuphawula izihloko noma amaphuzu aphakeme enkulumweni. Lawa angaphawulwa, ekwenza ukwazi ukwakhela kumvuthondaba omuhle, bese uguqula ukushesha.

12-15. Kungani ukulungiselela ngaphambili kubaluleke kakhulu ekufundweni kweBhayibheli na?

¹² Ukufundwa kweBhayibheli. Ukufundwa kweBhayibheli kubalulekile kwabasha nabadala ngokufanayo. Kaningi kukhona izimo ezibizela ukufundwa kweBhayibheli ngezwi elikhulu. Kungahle kube-nezabelo ezinjalo Esikolweni Senkonzo esingokwaseZulwini ngezinye izikhathi. Futhi sonke sifunda imibhalo lapho sikhuluma nabantu enkonzweni yethu. Kepha ingabe siyifunda kahle na? Ingabe sizijwayeze yona ukuze singangingizi, ukuze sigcizelele izingxenye ezifanele indaba yethu nakanjalo ukufunda kwethu kuzwakale kungokwemvelo, kuyingxoxo na?

¹³ Ukulungiselela kudingeka ngempela lapho kufika ekufundweni kweBhayibheli. Khumbula ukuthi lokhu kuyiZwi likaNkulunkulu, eligcwele izindima zobuhle obumangalisayo nomzwelo, kanye nengqondo eshaya emhloleni nehlelekile. Sifanele sizame ukuyifanekisa ngokufanele ngenzuzo yezilaleli. Uma sazi ngaphambili ukuthi simelwe sifunde iBhayibheli, kufanele kwenziwe ukulungiselela okuhle, ukuvimbela ukungingiza emazwini angavamile, emishwaneni noma ezindleleni zenkulumo.

¹⁴ Cabangela lesosikhathi esivusa amadlingozi lapho abadingisiweyo bakwaIsrayeli behlangana esigcawini ngaphambi kweSango laManzi laseJerusalema ukulalela ngenhliziyo ethathekileyo amazwi kaNkulunkulu wabo. Ingabe lawomaLevi abelwe ayengalungiselele kahle, ethe shampushampu ekunikeleni kwawo na? Incwadi iyaphendula: “Bafunda encwadini, emthethweni kaNkulunkulu, bephumesela kahle; bachaza, babaqondisa okufundwayo.” (Neh. 8:8) Labobafundi babenenhlonipho ejulile ngoPhezukonke, omazwi akhe babewadlulisela kubakhulekeli abakanye nabo.

¹⁵ Noma sifunda ngezwi elikhulu ngenzuzo yethu luqobo, emkhayeni, eHolweni loMbuso, noma sifundela omunye emnyango wakhe, makube-ngenjongo yokufanekisa ngokwethembekile indaba yokuqala, kanye nawo wonke umzwelo wayo namandla akha ukukholwa. Lawamandla ashukumisayo okufunda kwasobala agcizelelwa ngalamazwi alotshwe ngumphostoli uJohane: “Ubusisiwe ofundayo nabo abawezwayo amazwi alesisiprofetho, bagcine okulotshiweyo kuso, ngokuba isikhathi siseduze.”—IsAm. 1:3.