Isibonelo Esihle—UmShulamiti

Intombi yomShulamiti iyazi ukuthi kufanele icabange ngendlela ehluzekile ezindabeni zothando. Ithi kubangane bayo: “Nginifungisile ukuba ningazami ukuphaphamisa noma ukuvusa uthando kimi luze luzivukele lona.” UmShulamiti uyazi ukuthi imizwa ingasheshe ikwenze ucabange ngendlela engahluzekile. Ngokwesibonelo, uyaqaphela ukuthi abanye bangamcindezela ukuba avume ukuthandana nomuntu ongamfanele. Ngisho nemizwa yakhe ingafiphaza ukwahlulela okuhle. Ngakho umShulamiti uba ‘njengodonga.’—IsiHlabelelo SeziHlabelelo 8:4, 10.

Ingabe umbono wakho ngothando uvuthwe njengowomShulamiti? Ingabe uyokwazi ukungayivumeli inhliziyo yakho ilawule indlela ocabanga ngayo? (IzAga 2:10, 11) Ngezinye izikhathi abanye bangase bakucindezele ukuba uthandane nomuntu ungakakulungeli. Kungenzeka nokuba uzilethele kwawena lokho kucindezela. Ngokwesibonelo, uma ubona umfana nentombazane bebambene ngezandla, ingabe uzizwa usha amashushu ukuba nothile ozothandana naye? Ungamvuma yini umuntu ongenazo izinkolelo ezifana nezakho ezisekelwe eBhayibhelini? Intombi yomShulamiti yayivuthiwe uma kuziwa ezindabeni zothando. Nawe ungafana nayo!