ISIFUNDO 15
Kungani Kufanele Uqhubeke?
1. Kuzokuzuzisa kanjani ukuqhubeka nesifundo sakho seBhayibheli?
Akungabazeki ukuthi lezi zimfundiso zeBhayibheli eziyisisekelo ziluqinisile uthando lwakho ngoJehova. Lolo thando ludinga ukukhuliswa ngokuqhubekayo. (1 Petru 2:2) Ithemba lakho lokuthola ukuphila okuphakade lixhomeke ekutheni uyaqhubeka yini usondela kuNkulunkulu ngokufunda iZwi lakhe.—Funda uJohane 17:3; Jude 21.
Njengoba ulwazi lwakho ngoNkulunkulu lukhula, ukholo lwakho luyoqina. Ukholo luyokusiza ukuba ujabulise uNkulunkulu. (Hebheru 11:1, 6) Luyokwenza ukuba uphenduke futhi wenze izinguquko eziyokusiza endleleni ophila ngayo.—Funda izEnzo 3:19.
2. Ulwazi onalo ngoNkulunkulu lungabazuzisa kanjani abanye?
Ungaba nobuhlobo obukhethekile noJehova
Cishe uzothanda ukuxoxela abanye lokho okufundile—sonke siyakujabulela ukuxoxela abanye izindaba ezinhle. Njengoba uqhubeka ufunda iBhayibheli, uzofunda ukusebenzisa iBhayibheli ukuze uchaze ukholo lwakho kuJehova nezindaba ezinhle.—Funda eyabaseRoma 10:13-15.
Iningi labantu liqala ngokuxoxela abangane nezihlobo. Kodwa ungabacunuli. Kunokuba uthi inkolo yabo inamanga, baxoxele ngezithembiso zikaNkulunkulu. Ukhumbule nokuthi ngokuvamile abantu bathonywa yindlela enomusa obaphatha ngayo kunalokho okushoyo.—Funda eyesi-2 Thimothewu 2:24, 25.
3. Ungaba nobuhlobo obunjani noNkulunkulu?
Ukufunda iZwi likaNkulunkulu kuzokusiza ukhule ngokomoya. Ngokuhamba kwesikhathi, ungaba nobuhlobo obukhetheke kakhulu noJehova. Empeleni ungaba yilungu lomkhaya wakhe, ngaleyo ndlela ube ngowakhe.—Funda eyesi-2 Korinte 6:18.
4. Ungathuthuka kanjani?
Ungathuthuka ngokomoya ngokuqhubeka ufunda iZwi likaNkulunkulu. (Hebheru 5:13, 14) Cela omunye woFakazi BakaJehova ukuba afunde nawe iBhayibheli esebenzisa incwadi ethi Lifundisani Ngempela IBhayibheli? Uma uqhubeka ufunda iZwi likaNkulunkulu, uyophumelela ekuphileni.—Funda iHubo 1:1-3; 73:27, 28.
Izindaba ezinhle zivela kuJehova, uNkulunkulu ojabulayo. Ungasondela kuye ngokusondela kubantu bakhe. (Hebheru 10:24, 25) Ngokuqhubeka uzama ukujabulisa uJehova, uzama ukufinyelela ukuphila kwangempela—ukuphila okuphakade. Ukusondela kuNkulunkulu kuyinto enhle kakhulu ongayenza.—Funda eyoku-1 Thimothewu 1:11; 6:19.