“Ukusondela KuNkulunkulu Kuhle” Kithi!

1-2. (a) Yini okudingeka uyenze ukuze ube umngani oseduze nomuntu othile? (b) Sizoxoxa ngani kulesi sihloko?

UNAYE yini umngani osondelene naye? Naba kanjani abangani? Cishe wawuchitha isikhathi naye, wakutshela ngokuphila kwakhe, wathola nokuthi yini ayithandayo nangayithandi. Wathola ukuthi unezimfanelo ezinhle ongathanda ukuzilingisa. Lokho kwakwenza wamthanda umngani wakho.

² Ukuze ube umngani oseduze nomuntu othile kudingeka uchithe isikhathi naye. Kungashiwo okufanayo nangokuba umngani oseduze noJehova uNkulunkulu. Kulesi sihloko, sizoxoxa ngokuthi singasondelana kanjani noNkulunkulu wethu nangokuthi yiziphi izinzuzo esiyozithola ngokwenza kanjalo. Okokuqala, cabanga ngokuthi kungani kukuhle ukusondelana noMngani wethu omkhulu uJehova.

3. Kungani kufanele sizindle ngezinzuzo zokusondela kuJehova? Fanekisa.

³ Akungabazeki ukuthi uyavuma ukuthi ukusondela kuJehova kuhle. Kodwa ukuzindla ngokuthi kuhle kangakanani kungasikhuthaza ukuba siqhubeke sisondela kuye. (IHu. 63:​6-8) Ngokwesibonelo, siyazi ukuthi ukudla ukudla okunempilo, ukuzivocavoca, ukuphumula ngokwanele nokuphuza amanzi ngokwanele kuyasisiza. Noma kunjalo, abantu abaningi abanandaba nalezi zinto, abayinakekeli impilo yabo. Nokho, uma sicabanga njalo ngokuthi kusizuzisa ngani ukunakekela impilo yethu, maningi amathuba okuthi siyoqhubeka sikwenza lokho. Ngendlela efanayo, kungenzeka siyazi ukuthi ukusondela kuJehova kuhle kithi, kodwa ukuzindla ngezinzuzo zokwenza kanjalo kungasikhuthaza ukuba siqhubeke sisondela kuMngani wethu.—IHu. 119:​27-30

4. Njengoba kuboniswe kumaHubo 73:​28, wayezizwa kanjani umhubi?

⁴ Funda iHubo 73:28. Umbhali weHubo 73 wayengumLevi owayemiswe ukuba akhonze njengomculi ethempelini likaJehova. Cishe wayesekhonze uJehova ngokwethembeka iminyaka eminingi. Noma kunjalo, wayesasibona isidingo sokukhumbuza yena nabanye ukuthi “ukusondela kuNkulunkulu” kuhle kuye nakwabanye. Ziyini ezinye izinzuzo zokwenza kanjalo?

“UKUSONDELA KUNKULUNKULU” KUYAJABULISA

5. (a) Kungani ukusondela nakakhulu kuJehova kusijabulisa? (b) NgokwezAga 2:​6-16, nikeza izibonelo zendlela ukuhlakanipha kukaJehova okungakuzuzisa ngayo futhi kukuvikele.

⁵ Uma siqhubeka sisondela kuJehova, siyojabula nakakhulu. (IHu. 65:4) Ziningi izizathu eziyosenza sijabule. Esinye sazo ukuthi siyazuza lapho sisebenzisa ukuhlakanipha okuwusizo okutholakala eZwini lakhe iBhayibheli. Lokho kuhlakanipha kuyasivikela emathonyeni amabi nasekwenzeni amaphutha amakhulu. (Funda izAga 2:​6-16.) Yingakho iBhayibheli lithi: “Uyajabula umuntu othola ukuhlakanipha nomuntu othola ukuqonda.”—IzAga 3:13.

6. Yini eyenza umhubi waphelelwa yinjabulo?

⁶ Yiqiniso ukuthi ngisho nabangani bakaJehova bayadabuka ngezinye izikhathi. Umbhali weHubo 73 waphelelwa yinjabulo lapho enqotshwa imicabango engakhi. Wacasuka futhi waba nomona ngoba wayecabanga ukuthi abantu ababi abangenandaba noNkulunkulu noma imithetho yakhe kwakubahambela kahle. Wayenombono oyiphutha wokuthi abantu abanobudlova nabaqhoshayo babehlale becebile kunabanye, beyimiqemane futhi babengahlupheki ngisho nokuhlupheka. (IHu. 73:​3-7, 12) Ngesinye isikhathi umhubi wayekhathazeke kangangokuba waze wazibuza ukuthi kazi imizamo yakhe yokukhonza uJehova yayizuzisa yini. Edabukile wathi: “Impela kube yize ukugcina inhliziyo yami imsulwa nokuhlanza izandla zami zibe msulwa.”—IHu. 73:13.

7. Yini engasisiza lapho sifikelwa izikhathi zokudabuka ezisiqedela injabulo? (Bheka esisekhasini 1.)

⁷ Umhubi akazange avumele ukudabuka kumqede amandla. Wenza okuthile. ‘Wangena endlini engcwele kaNkulunkulu’ lapho uJehova alungisa khona ukucabanga kwakhe. (IHu. 73:​17-19) Lapho sidabukile, uJehova uMngani wethu omkhulu usuke ekwazi lokho. Uma sithandaza kuye sicela isiqondiso sakhe, samukele nosizo asinika lona ngeZwi lakhe nangebandla, siyothola amandla okukhuthazelela ukudabuka. Ngisho nalapho izinto ezisikhathazayo zisiqeda amandla, uJehova uyosiduduza asenze sizole.—IHu. 94:19.a

“UKUSONDELA KUNKULUNKULU” KUSENZA SIBE NENJONGO NETHEMBA EKUPHILENI

8. Ukusondela kuNkulunkulu kuhle kithi ngaziphi ezinye izindlela ezibalulekile?

⁸ Ukusondela kuNkulunkulu kuhle kithi nangezinye izindlela ezimbili ezibalulekile. Okokuqala, kusenza siphile ukuphila okunenjongo. Okwesibili, kusenza sibe nethemba eliqinisekisiwe ngekusasa. (Jer. 29:11) Ake sixoxe kabanzi ngalezi zinzuzo.

9. Ukusondela kuJehova kukwenza kanjani ukuphila kwethu kube nenjongo?

⁹ Ukusondela kuJehova kwenza ukuphila kwethu kube nenjongo. Namuhla, abantu abaningi abaphika ukuthi uNkulunkulu ukhona bacabanga ukuthi ukuphila akunanjongo nokuthi ekugcineni abantu ngeke besaba khona emhlabeni. Nokho, ngokwalokho esikufunde eZwini likaNkulunkulu, siyaqiniseka ukuthi uNkulunkulu “ukhona nokuthi uyabavuza labo abamfuna ngobuqotho.” (Heb. 11:6) Ngisho nanamuhla, siphila ukuphila okujabulisayo ngoba senza lokho esasidalelwe ukuba sikwenze—sikhonza uBaba wethu osezulwini uJehova.—Dut. 10:​12, 13.

10. Yini eshiwo iHubo 37:29 ngekusasa lalabo abathembele kuJehova?

¹⁰ Abantu abaningi bacabanga ngokuphila kwamanje kuphela, abacabangi ngesikhathi esizayo—abakwenzayo nje ukuya emsebenzini, ukukhulisa abantwana nokubeka imali abazoyisebenzisa lapho bengasasebenzi. Abacabangi ngoNkulunkulu. Ngakolunye uhlangothi, izinceku zikaJehova zibeka ithemba lazo kuJehova. (IHu. 25:​3-5; 1 Thim. 6:17) Siyamethemba uNkulunkulu wethu esisondelene naye, siyakwethemba nalokho asithembise kona. Ikusasa lethu lihlanganisa nethuba esinalo lokumkhonza phakade ePharadesi.—Funda iHubo 37:29.

11. Ukusondela kuNkulunkulu kusithinta kanjani futhi kumthinta kanjani yena?

¹¹ Ukusondela kuNkulunkulu kuhle kithi nangezinye izindlela eziningi. Ngokwesibonelo, uJehova uthembisa ukuthethelela izono zalabo abaphendukayo abasondele kuye. (Isaya 1:18) Ngenxa yalokho, akudingeki silokhu sihlushwa umuzwa wecala ngenxa yezono esazenza esikhathini esidlule. (IHu. 32:​1-5) Sinelungelo lokwenza uJehova ajabule. (IzAga 23:15) Ngokuqinisekile, ungacabanga nangezinye izibusiso esizithola ngokuba abangani bakaNkulunkulu abaseduze. Ungaqhubeka kanjani-ke usondelana noNkulunkulu?

ESINGAKWENZA UKUZE SIQHUBEKE ‘SISONDELA KUNKULUNKULU’

12. Yini oyenzile ukuze usondele kuNkulunkulu?

¹² Uma ungumKristu obhapathiziwe, ngokwezinga elithile kakade ususondelene noJehova. Ufunde amaqiniso amaningi ngoJehova uNkulunkulu nangoJesu Kristu, waphenduka ezonweni zakho zangesikhathi esidlule, wabonisa ukholo oluqinile kuNkulunkulu, wenza konke okusemandleni ukuze wenze ngokuvumelana nentando yakhe. Nokho, ukuze sisondele kuNkulunkulu kumele siqhubeke sizenza lezi zinto.—Kol. 2:6.

13. Yiziphi izinto ezintathu ezingasisiza siqhubeke sisondela kuJehova?

¹³ Yini ezosisiza siqhubeke sisondela kuJehova? (1) Kumele siqhubeke sifunda futhi sitadisha iBhayibheli. Njengoba senza kanjalo, umgomo wethu akufanele kube ukufunda amaqiniso ayisisekelo ngoNkulunkulu nje kuphela. Kunalokho, kufanele sizame ukuqonda ukuthi iyini intando kaNkulunkulu ngathi, siphile ngezimiso asibekele zona eZwini lakhe. (Efe. 5:​15-17) (2) Kumele siqinise ukholo lwethu ngokuzindla ngobufakazi obuningi obubonisa ukuthi uyasithanda. (3) Kumele siqhubeke sizonda izinto ezizwisa uJehova ubuhlungu, sigweme nokuba abangani nabantu abenza izinto ezinjalo.—IHu. 1:1; 101:3.

14. Ngokuvumelana nalokho okushiwo kweyoku-1 Korinte 10:​31, yiziphi ezinye zezinto esingazenza nsuku zonke ukuze sijabulise uJehova? (Bheka nezithombe.)

¹⁴ Funda eyoku-1 Korinte 10:31. Kubalulekile ukuba senze izinto ezijabulisa uJehova. Asigcini nje ngokwenza lezo zinto lapho sisenkonzweni yasensimini nasemihlanganweni yebandla. Izinto ezinhle ezijabulisa uJehova zihlanganisa nezinto esizenza nsuku zonke. Ngokwesibonelo, lapho senza zonke izinto ngokwethembeka futhi siphana sijabulisa uJehova. (2 Kor. 8:21; 9:7) Ufuna nokuba sibonise ukuthi siyasazisa isipho esiwukuphila. Ngokuqhubeka sinakekela impilo yethu uma kuziwa kwesikudlayo, esikuphuzayo nezinye izinto esizenzayo ezisisiza sibe nempilo, sisondela nakakhulu kuNkulunkulu okunguye osiphe ukuphila. Yonke imizamo esiyenzayo ukuze sijabulise uJehova ngisho nasezintweni ezincane iyomenza asithande ngisho nakakhulu.—Luka 16:10.

15. UJehova ulindele ukuba sibaphathe kanjani abanye?

¹⁵ UJehova unomusa kwabalungile nabangalungile. (Math. 5:45) Ulindele ukuba nathi sibe nomusa kwabanye. Ngokwesibonelo, kumele ‘singakhulumi kabi ngamuntu, singazithandi izingxabano, . . . sibonise bonke ubumnene kubantu bonke.’ (Thithu 3:2) Sinalokho engqondweni, asibabukeli phansi abanye ngenxa nje yokuthi banezinkolelo ezihlukile kwezethu. (2 Thim. 2:​23-25) Ngokubabonisa umusa nangokubacabangela njalo bonke abantu, sisondela nakakhulu kuJehova.

‘SINGASONDELA KUNKULUNKULU’ NGISHO NALAPHO SENZA AMAPHUTHA

16. Umbhali weHubo 73 waqala ukuzizwa kanjani ngemva kwesikhathi esithile?

¹⁶ Kodwa kuthiwani uma ngemva kwesikhathi esithile uqala ukuzizwa ungalufanelekeli uthando lukaJehova? Njengoba sixoxile, kwenzeka okufanayo kumbhali weHubo 73. Wathi: “Kusale kancane ukuba izinyawo zami ziphambuke; kusale kancane ukuba ngishelele lapho nginyathela.” (IHu. 73:2) Wavuma ukuthi ‘wayesemuncu’ futhi ‘wayengacabangi,’ ‘wayenjengesilwane esingenangqondo’ phambi kukaJehova. (IHu. 73:​21, 22) Ingabe waphetha ngokuthi ngenxa yephutha lakhe, uJehova wayengeke amthethelele futhi wayengalufanelekeli uthando lwakhe?

17. (a) Yini okubonakala sengathi umhubi wayenza ngisho nalapho ayezizwa edikibele kakhulu? (b) Yini esingayifunda kulokho akwenza? (Bheka nezithombe.)

¹⁷ Uma umhubi ayenomuzwa wokuthi uJehova umlahlile, kumele ukuba wazizwa ngaleyo ndlela okwesikhashana. Kubonakala sengathi ngesikhathi ezizwa edikibele kakhulu, waqaphela ukuthi kwakudingeka asondele ngisho nakakhulu kuNkulunkulu, njengoba kuboniswe emazwini akhe athi: “Kodwa manje nginawe njalo [Jehova]; ubambe isandla sami sokudla. Uyangiqondisa ngeseluleko sakho, kamuva uyongiholela enkazimulweni.” (IHu. 73:​23, 24) Nathi kufanele sibheke uJehova njengedwala lapho sizizwa sibuthakathaka noma sidangele. (IHu. 73:26; 94:18) Ngisho noma izinyawo zethu ziphambuka okwesikhashana, singabuyela kuJehova siqiniseka ngokuthi “ukulungele ukuthethelela.” (IHu. 86:5) Lapho sizizwa sidikibele kakhulu, kufanele sisondele nakakhulu kuNkulunkulu wethu.—IHu. 103:​13, 14.

“UKUSONDELA KUNKULUNKULU” PHAKADE

18. Kungani singaqhubeka silokhu sisondela kuJehova kuze kube phakade?

¹⁸ Singakwazi ukulokhu siqhubeka sisondela kuJehova futhi asisoze sayeka ukufunda ngaye. IBhayibheli lithi izindlela zikaJehova, ukuhlakanipha kwakhe nolwazi lwakhe ‘akunakuthungathwa.’—Roma 11:33.

19. AmaHubo asiqinisekisa ngani?

¹⁹ IHubo 79:13 lithi: “Thina, bantu bakho nomhlambi wedlelo lakho, siyokubonga kuze kube phakade; siyomemezela udumo lwakho esizukulwaneni ngesizukulwane.” Njengoba uqhubeka usondela kuNkulunkulu, nawe ungaqiniseka ukuthi uyokubusisa kuze kube phakade futhi ungawasho ngokuqiniseka amazwi athi: “UNkulunkulu uyidwala lenhliziyo yami nesabelo sami kuze kube phakade.”—IHu. 73:26.