Phambili, Nina Zikhonzi ZoMbuso!
“Wenze umsebenzi womvangeli, ufeze ukukhonza kwakho.”—2 Thimothewu 4:5.
1. Imuphi umehluko phakathi kwezimo ezingokomoya zeBabiloni Elikhulu nezoFakazi BakaJehova?
NAMUHLA, emazweni amaningi, amadlelo angokomoya enkolo yamanga aye oma namanzi iBabiloni Elikhulu elihlezi phezu kwawo ayabohla. Kusikhumbuza isiprofetho sikaIsaya esigcwaliseka esikhathini sethu, esitholakala kuIsaya 65:13: “Bhekani, izinceku zami ziyakudla, kepha nina niyakulamba; bhekani, izinceku zami ziyakuphuza, kepha nina niyakoma; bhekani, izinceku zami ziyakuthokoza, kepha nina niyakujabha.” Lokhu kunjalo ngoba abantu bakaJehova ngempela bafuna uMbuso kuqala, benza wonke umzamo ukuba baqaphele ukuthi izindaba ezinhle zoMbuso kaNkulunkulu osezandleni zeNdodana yakhe eyiNkosi, uJesu Kristu, ziyashunyayelwa emhlabeni kabanzi.—IsAmbulo 14:6-8; 16:12; 17:5, 15.
2. Obani abanesibopho sokuqhubekela phambili njengezikhonzi zoMbuso?
2 Isimemo esingamandla osukwini lwethu sithi ‘Phambili, nina zikhonzi zoMbuso!’ Ukuze bamukele lesimemo njengendikimba yabalandeli beNkosi yethu uJesu Kristu bonke oFakazi BakaJehova abasesikhundleni sokungamela, kanye nabanye, amadoda, abesifazane, abafana namantombazane, bangaphansi kwesibopho sokumela umbuso kaNkulunkulu. (AmaHubo 145:10-12; , 13; 2 Thimothewu 4:2, 5) Lokhu kunjalo nakuba abanye, ngenxa yezimo ezithile, bengakwazi ukwenza okuningi njengabanye. Kodwa umsebenzi wabo usikhumbuza umfelokazi owanikela ngakho konke ayenakho nakuba kwaba izinhlamvu ezimbili zemali encane.—Luka 21:1-4.
3. Isintu sizidinga ngezinga elingakanani izindaba ezinhle zoMbuso kulesikhathi, futhi isigijimi soMbuso sihlanganisani?
3 Ingabe isintu namuhla siyawudinga umbuso? O, yeka indlela esiwudinga ngayo! Siyawudinga, hhayi kuphela ukuze kuqedwe ubuhlungu, ukugula, ukudabuka nokufa, kodwa futhi ukuba ulethe isiphelo kukho konke ukungalungi, bonke ububi, bonke ubulelesi, ubudlova nempi, yebo, ukuletha isiphelo kukho konke ukungaphathwa kahle, nakho konke ukubandlululana. (Isaya 9:7) Ngokuqhubekela kwethu phambili njengezikhonzi zoMbuso sinikeza abantu okuthile abangakwethemba, okuthile okungabaqinisa kuze kube ilapho iArmagedoni iqeda isimiso sezinto sikaSathane. Ngenxa yokungabi namthetho okukhulayo kumelwe siqhubekele phambili, kungabi kuphela ngesigijimi sothando nethemba, kodwa futhi nangesigijimi sesixwayiso ngokuqondene ‘nosuku lwempindiselo kaNkulunkulu wethu.’—Isaya 61:2.
4. Yini okumelwe ibe isisusa esiyinhloko esishukumisa umuntu ukuba abe isikhonzi esikhuthele sombuso kaNkulukulu?
4 Nokho, singaqhubeka kanjani ngomoya wokuzidela njengezikhonzi zikaNkulunkulu ezweni eligcwele izisusa ezingafanele futhi elivame umoya wobugovu? Okokuqala nje, ngokombono womusa wothando lukaJehova oboniswe kithi, simelwe sifune ukuqhubekela phambili ngenxa yokumthanda, ngenxa yokwazisa ngakho konke akwenzile, akwenzayo nasazosenzela khona. Njengoba umphostoli uJohane esikhumbuza, ukuthanda uNkulunkulu kuwukugcina imiyalo yakhe, futhi omunye wemiyalo yakhe uwukushumayela izindaba ezinhle zombuso wakhe. (Mathewu 24:14; 1 Johane 5:3) Futhi, uJehova uNkulunkulu ubekwe icala ngezinkathazo zesintu futhi uhlanjalazwa njengoNkulunkulu ohlupha phakade. Ngokuqinisekile uthando ngoJehova, uBaba wethu wasezulwini onothando, luyosishukumisela ukuba siqhubekele phambili njengezikhonzi zakhe, sisiza ekuhlanzeni igama lakhe kukho konke ukuhlanjalazwa okubi okunjalo.
5. Isiphi-ke isisusa esengeziwe esinaso sokusibangela ukuba siqhubekele phambili njengezikhonzi zombuso?
5 Uthando ngabanye abantu luyosibangela futhi ukuba siqhubekele phambili njengezikhonzi zombuso kaNkulunkulu. Uthando ngomakhelwane wethu luyosibangela ukuba sibeke izithakazelo zakhe ezingokomoya, ikusasa lakhe laphakade, ngaphambi kwakho konke ukunethezeka kwethu siqu. Uthando luyosisunduzela ukuba sihlanganise insimu yethu ngokuphindaphindiwe futhi siyisebenzisise. Uthando luyosishukumisela ukuba senze izimpindelo futhi samukele isibopho sokuqhuba izifundo zeBhayibheli zasekhaya isonto ngalinye nabantu abathanda iqiniso. Lokhu kusho ukuthi sifuna ukuba nomusa, ukubekezela, ubumnene nokuhlakanipha, sibonise uzwela nesihe ngabanye.
6. Ukungayinaki inkonzo yethu kuyosiphuca kanjani injabulo?
6 Ingabe silikholelwa ngempela iZwi likaNkulunkulu? Lisitshela ukuthi “kubusisekile ukupha kunokwamukela.” (IzEnzo 20:35) Uma singayinaki inkonzo yasensimini sibonisa ngezenzo zethu ukuthi asiwakholelwa ngempela lawomazwi kaJesu. Siyaqinisekiswa futhi ukuthi ‘Uma sihlwanyela kakhulu siyovuna kakhulu’ nokuthi ‘umphefumulo ophanayo uyakukhuluphaliswa, ophuzisayo uyakuphuziswa naye.’ Lezi akuzona nje izinkulumo ezimnandi eziyize kodwa zingamaqiniso angenakubalekelwa nezimiso ezihlola uthando lwethu ngoJehova uNkulunkulu nangomakhelwane wethu, ukwethembeka kwethu embusweni kaNkulunkulu.—2 Korinte 9:6; IzAga 11:25.
7. Umuntu angabonisa kanjani ukuthi ukhululekile egazini labo bonke abantu?
7 Kodwa akukhona nje ukuphila kwabanye kuphela okuhilelekile. Kumelwe siphikelele phambili njengezikhonzi zombuso kaNkulunkulu ukuze sikhululeke ecaleni legazi. Khumbula amazwi akuHezekeli 33:2-4: “Ndodana yomuntu, khuluma kubantwana babantu bakho, uthi kubo: Lapho ngehlisela phezu kwezwe inkemba, abantu bezwe bese bethatha umuntu phakathi kwabo, bambeke umlindi wabo, nalapho yena esebona inkemba yehla phezu kwezwe, abethe icilongo, axwayise abantu, okuzwayo ukukhala kwecilongo angaxwayi kodwa, beseyehla inkemba, imsuse, igazi lakhe liyakuba-sekhanda lakhe.” Sifuna ukusho njengomphostoli uPawulu: “Anginacala egazini labo bonke.”—IzEnzo 20:26, 27.
Indlela Inkonzo Efezwa Ngayo
8. Imiphi imibuzo ebuzwa ngakufanelekile ngendlela inkonzo efezwa ngayo?
8 Nokho, siqhubekela kanjani phambili? Ngamandla ethu siqu? Ngesimo sokuzithwala nokuzethemba? Ngokwethembela esikhalini senyama? Noma, ngakolunye uhlangothi, ngokungajabuli, ngokubamadolonzima, sibonise ukwesaba abantu? Ingabe siyoqhubekela phambili ngokuzibusa, singakunaki ukuqondisa kwalabo abaholayo phakathi kwethu? Lutho neze! Kunamaphuzu amathathu okumelwe siwakhumbule ngokukhethekile:
9. (a) Umuntu uqhubeka kanjani enkonzweni ngamandla kaJehova? (b) Ikuphi ukuqondisa u-1 Petru 3:15 akunikezayo ngokuqondene nokuziphatha kwethu enkonzweni?
9 Elokuqala: Siqhubekela phambili njengezikhonzi zombuso kaNkulunkulu ngamandla kaJehova uNkulunkulu, sibheka emoyeni wakhe ukuba usishukumise, usikhanyisele futhi usiqinise. Ngokuqhubekela phambili ngamandla kaJehova singabonisa lesosibindi sokukhuluma, lokho kuchaza kahle, lesosibindi uPetru noJohane abasibonisa lapho bebhekene nezikhulu zenkolo zosuku lwabo. (IzEnzo 4:13) Ngesikhathi esifanayo sifuna ukuba ngabaqaphile ukuba sishumayele isigijimi sethu ngokuthobeka nangenhlonipho ejulile.—1 Petru 3:15.
10. (a) Kusho ukuthini ukuba ‘umphathi ohlanzekile’ wesigijimi sikaJehova? (b) Isiphi iseluleko esikuFilipi 1:10, 11 ngokuqondene nalokhu?
10 Elesibili: Sifuna ukuqhubekela phambili njengabaphathi abahlanzekile besigijimi sikaJehova, ngokuvumelana nesikufunda kuIsaya 52:11: “Nizihlambulule nina eniphatha izitsha zikaJehova.” Izitsha zikaJehova namuhla, amaqiniso ayigugu eZwi lakhe, amsulwa, ahlanzekile, mahle futhi alungile. Ngakho bonke labo abawayisa kubantu kumelwe bazigcine behlanzekile ngokuziphatha futhi bebahle ngokomoya. Ingabe asibamemeli yini abantu ukuba bazihlanze ngokuziphatha, bahlukane nemisebenzi yenyama, njengoba uJesu enza, ‘siyise izoni ekuphendukeni’? (Luka 5:32) Khona-ke akumelwe yini sibabekele isibonelo esihle ngokuqondene nalokhu? Khumbula, uPawulu waluleka amaKristu aseFilipi: “Ukuze nikwazi ukwahlukanisa, nize nibe-mhlophe nabangakhubekisiyo kuze kube-lusuku lukaKristu, nigcwaliswe ngezithelo zokulunga ezingaye uJesu Kristu, kube-yinkazimulo nodumo kuNkulunkulu.”—Filipi 1:10, 11.
11. (a) Kubaluleke kangakanani ukuzilungisa esikhonzini sikaNkulunkulu? (b) Isibonelo sobani okumelwe sikwazi ukusilandela ngokuqondene nalokhu?
11 Elesithathu: Ekuqhubekeleni phambili kumelwe sifune njalo ukuba ngabazilungise kahle. Phela noma iyiphi inceku kaJehova uNkulunkulu efuna ukulingisa izitayela ezibonakalisa abantu abaziphethe kabi, abahlubukayo bezwe likaDeveli kunzima ukuyiqonda. Ufunelani ukufana nezwe otshela ngalo abantu ukuthi lizofinyelela esiphelweni ngezenzo ezilungile zikaNkulunkulu? Ufunelani ukufana nezwe bese uba ngohlukile phakathi kwabantu bakaJehova? Akufanele yini kunalokho ufane nabantu bakaJehova, bese uba ngohlukile uma uphakathi kwabantu bezwe? Ubani esifuna ukumjabulisa? Umusa kabani esiwuncengayo? Kungani ungathathi isibonelo ngokuqondene nokugqoka okufanelekile nokuzilungisa kubazalwane nodade abavuthiwe abaphakathi kwethu ebandleni? Asinakusithatha isifundo kubo silingise isibonelo sabo esihle?—1 Thimothewu 2:9; 1 Petru 3:3, 4, 16, 17.
12. Nakuba inkonzo yendlu ngendlu ingase ibe nzima, iziphi izinzuzo ezilethayo kulabo abahlanganyela kuyo?
12 Kuyavunywa, akulula kwabanye ukuba baye endlini ngendlu nezindaba ezinhle zombuso kaNkulunkulu. Kodwa ukubaluleka nokuphumelela kokwenza kanjalo kuye kwaboniswa izikhathi eziningi. (Mathewu 10:7, 11-13; IzEnzo 20:20, 21) Ukuyisebenzisa kahle kwethu lendlela yokushumayela endlini ngendlu kuye kwayifanisa ‘nophawu’ lwezinceku zeqiniso zikaJehova. Futhi awuphumeli nje kuphela ekuyiseni ubufakazi kwabanye kodwa umsebenzi wendlu ngendlu ngokwawo usizuzisa kakhulu sonke esihlanganyela kuwo. Lona kanye iqiniso lokuthi umzimba wethu ungase uwunyibele lenza kube ukunqoba isikhathi ngasinye lapho isikhonzi esingumKristu sihlanganyela kuwo.—1 Korinte 9:16, 27.
Ukunakekelwa Nokuqondiswa Komkhaya
13. Naphezu kwezibopho zenkonzo, imuphi umthwalo wemfanelo abaningi abanawo, ufuna kuphi ukulinganisela?
13 Ngaphezu kwesibopho sethu njengezikhonzi zoMbuso kunomunye umthwalo ohlezi phezu kwabanemikhaya. Izikhonzi zombuso eziqhubekela phambili kanye nemikhaya kumelwe, ngokucabangela indima yazo eziyinikwe uNkulunkulu njengabazali, zifundise abantwana bazo siqu. Unyaka ngamunye inani elihle lababhapathizwayo liyintsha abazali bayo abaye bayikhulisa “ngokuyala nangokuqondisa kweNkosi.” (Efesu 6:4) Kuyadabukisa ukuthi, lesibopho nalelithuba liye ladebeselwa abanye, kwaphumela ekudabukeni okukhulu. Ngokuqinisekile ukuba yizikhonzi eziqhubekela phambili kudinga ukulinganisela. Asifuni ukudebesela umsebenzi wethu wendlu ngendlu ngokubeka izaba zokuthi sifakaza ngokwethukela; futhi asifuni ukuwenza ize amathuba okufakaza ngokwethukela ngenxa yokuthi siyaya endlini ngendlu. Ngokufanayo, abazali akumelwe bavumele inkonzo yasensimini noma imithwalo yebandla neminye imisebenzi ithathe isikhathi sabo esiningi kakhulu baze bangayinaki imikhaya yabo. Kakade, ukunakekela izidingo ezingokomoya nezingokwenyama zomkhaya kuyisibopho sabo esiyinhloko.—1 Thimothewu 5:8.
14. (a) Labo abangabazali bangalahlekelwa kanjani isikhathi sabo, isineke nemali abakukhiphile ekukhuliseni abantwana babo? (b) Isiphi isidingo esiqhubekayo ekukhuliseni abantwana kusukela ebuntwaneni kuze kube yilapho sebekhulile?
14 Yebo, abantwana bafuna isikhathi, ukunakekelwa nemali. Kuye kwalinganiselwa ukuthi kuthatha izinkulungwane zamaRandi ukukhulisa umntwana aze abe mdala. Indlela eyaziwa kahle yokulahla leyomali oyikhiphile kanye nesikhathi, iwukwehluleka ukunikeza ukuqondisa okufanele ngokomoya kulabo esibaletha emhlabeni. Ukwanda kokungalaleli kwabasha namuhla kufakazela iqiniso lokuthi abantwana abaningi bashiywa bodwa ngabazali babo. (IzAga 29:15) Abantwana abasancelayo nezingane ezincane ngokuvamile bayatotoswa abazali, izihlobo nabanye. ‘Yeka indlela ababukeka kahle ngayo! Yeka ukuthi bahle kanjani! Intombazanyana kaMa, umfanyana kaBaba!’ Konke lokhu kungase kube iqiniso. Kodwa abazali kudingeka bakhumbule ukuthi njengoba labantwana bekhula befinyelela iminyaka engaphezu kweshumi nambili, futhi lapho, bengena ebudodeni nasebufazini, bayaqhubeka bedinga isineke nokunakekelwa, uthando nokuyalwa, ukuqeqeshwa okungokomoya nemfundo. (Duteronomi 11:18-21) Lona umthwalo womzali ongumKristu. Izikhonzi zikaNkulunkulu azinakusikhohlwa lesibopho esisemahlombe azo.
Ubunye Bezikhonzi ZikaNkulunkulu Emhlabeni Wonke
15, 16. (a) Singaqiniseka kanjani ukuthi isigijimi soMbuso esisishumayelayo siyakhanya futhi sinjengecilongo kwabasizwayo? (b) Iluphi usizo esinalo lokusiza ekukhulumeni ngobunye emhlabeni wonke?
15 Nokho, cabanga ngomunye umthwalo wezikhonzi ezingamaKristu. “Ngokuba uma icilingo likhala ngezwi elingaqondakaliyo, ngubani oyakuzilungiselela ukulwa na?” (1 Korinte 14:8) Ngalamazwi umphostoli uPawulu wamema abalandeli bakaKristu ukuba basebenzise izilimi zabo ngendlela yokuthi abanye baqonde okushiwoyo. Osukwini lwethu, ukuze isigijimi sombuso esisishumayelayo siqondakale, njengecilongo elikhala esintwini, khona-ke kumelwe ngokudingekile sikhulume ngazwilinye. UIsaya 52:8 uthi: “Izwi labalindi bakho, bayaliphakamisa izwi, bajabule kanyekanye.” Ukuhlanganyela esimemweni esihlanganisa kanjalo kudinga ukuzithoba nothando lobuzalwane. Siyazi ukuthi ukuze ukufakaza kwethu kuphumelele kumelwe sishumayele isigijimi esifanayo, esiphethe igama likaJehova, ukuhlakanipha kwakhe nothando noMbuso wakhe njengowukuphela kwethemba lesintu. Kweyoku-1 kwabaseKorinte 1:10 uPawulu waluleka ukuthi kumelwe sifune ukukhuluma zwilinye sonke.
16 Akumelwe sivumele isigijimi sethu sincishiswe yinoma ikuphi ukungezwakali. Sinomyalo njengezikhonzi zikaNkulunkulu. UIsaya 61:1, 2 ubeka ngokukhanyayo ukuthi siyini isigijimi sethu. Inceku kaJehova ethembekile neqondayo yenza yonke imizamo yokusisiza ukuba sikhulume ngazwilinye, ikhipha amaBhayibheli futhi amaBhayibheli asiza ngezilimi ezingamashumishumi ukuze abantu bafinyelelwe ngesigijimi esingaqondakala. Singenza ingxenye yethu ngokufuna ukusakaza “izindaba ezinhle” njengendikimba ehlangene yabakhulekeli bakaJehova.—AmaHubo 66:1, 2; 68:11.
Ingabe Siyosisebenzisa Isikhathi?
17. Ikuphi ukuzihlola ngobuqotho okumelwe sikwenze ngokuqondene nendima yethu enkonzweni?
17 Njengoba siqhubekela phambili ngabanye, kungenzeka yini ukuba sithuthuke ngokuqondene nesikhathi esisinikela enkonzweni yethu? Ngamunye wethu ongummemezeli webandla ophile kahle nongenasibopho sokukhulisa abantwana noma sokunakekela abathandekayo asebegugile wenza kahle uma ezibuza, Yini engivimbela ukuba ngibe senkonzweni yesikhathi esigcwele? Ingabe kuwukwehluleka ukwazisa ngokugcwele ukubaluleka kwenkonzo yoMbuso? Kungenzeka kube ukwehluleka ukuba nomoya wokuzidela? Uma ubona kungenakwenzeka ukuba ukhonze njengephayona elivamile kungenzeka yini uzinikeze ithuba lenkonzo yamaphayona asizayo ekuphileni kwakho? Uma ungase wenze kanjalo ngokuqinisekile uyobe uqhubekela phambili njengesikhonzi esingumKristu. Ukuzihlola kwenu ngobuqotho kungase kwembule kini ngabanye ukuthi ningenzani ngokuqondene nokwandisa isikhathi enisisebenzisa inyanga ngayinye ekukhonzeni izithakazelo zikahulumeni woMbuso kaBaba wethu wasezulwini neNdodana yakhe.—IHubo 26:1, 2, 11, 12; Marku 12:28-34.
18. Yini eyosisiza ukuba sigcine ubuhlobo obuhle noJehova noKristu Jesu?
18 UJehova uNkulunkulu noJesu Kristu bayisibonelo kithi sokubheka phambili nokuphikelela phambili. Ngathi ngabanye ukuze senze okufanayo, sidinga, okokuqala, ukuba nobuhlobo obuhle noJehova uNkulunkulu. Ingabe sizama kanzima ukuzigcina sinonembeza omuhle, singabi ngabanganaki ngokuqondene nanoma yini engase ingcolise unembeza wethu? Ingabe silisebenzisa kahle ilungelo eliyigugu lomthandazo, sibekezela kuwo? (Roma 12:12) Ingabe sizinikeza isikhathi sesifundo somuntu siqu nokuzindla? Mhlawumbe kunoshintsho okumelwe silwenze ngendlela esiphila ngayo ukuze sinikeze lezizinto ezibaluleke kakhulu ukunakekelwa ezikudingayo, ukuze inkonzo yethu ibe inhloko ekuphileni kwethu ngamazwi nangezenzo.—Efesu 4:22-24.
19, 20. (a) Liyini “izwi likaNkulunkulu” okukhulunywa ngalo kumaHeberu isahluko 4? (b) Leli“zwi” lizibonise kanjani ukuba ngeliphilile futhi elibukhali kunenkemba esika nhlangothi zombili, futhi kungani sizohlola omunye womsebenzi owenziwe onyakeni wenkonzo ka-1981?
19 Kuyajabulisa ukubika ukuthi, ezweni lonke, izikhonzi zikaJehova bezimatasatasa ekumemezeleni lezindaba ezinhle zombuso nyakenye. Isigijimi siye savusa isithakazelo esikhulu esingapheli ekuphileni kwamashumi ezinkulungwane zabantu. Izinguquko ezimangalisayo ziye zenziwa kwabanjalo ngenxa yamandla aphendulayo eZwi likaNkulunkulu. Akungabazeki ukuthi isigijimi se“zindaba ezinhle” siphilile nokuthi sinamandla sibukhali kunenkemba esika nhlangothi zombili. (Heberu 4:2, 12, 13) Futhi, lapho izwi likaNkulunkulu lenza umsebenzi walo omuhle ezandleni zezikhonzi ezifanelekile, khona-ke igama likaJehova liyadunyiswa futhi umbuso wakhe uyaphakanyiswa njengethemba okuwukuphela kwalo lesintu.—Efesu 6:17.
20 Ukuze uthole umqondo ngalokho oFakazi BakaJehova abakwazile ukukufeza esikhathini sezinyanga eziyi-12 zonyaka wenkonzo ka-1981, umbiko olandelayo uzobonisa okwenzekile ngalesosikhathi ngenxa yemizamo enobunye yaleliviyo elincane lamaKristu asebenza emazweni angama-206 naseziqhingini zezilwandle. (IzAga 25:25) Siyaqiniseka ukuthi uzokujabulela lokhu kubukezwa komsebenzi wezikhonzi zikaNkulunkulu kulelikhulu lama-20.
[Isithombe ekhasini 18]
Sibheka kuJehova ukuba asiqinisele inkonzo yakhe
[Isithombe ekhasini 19]
Izingubo ezifanele nokuzilungisa kahle kuyazifanela izikhonzi ezingamaKristu
[Isithombe ekhasini 20]
Izikhonzi eziqhubekela phambili, zikhulisa abantwana bazo ‘ngokuyala kukaJehova’
[Isithombe ekhasini 21]
Izikhonzi esezikhulile zoMbuso ziqhubekela phambili njalo