Ukukhulisa Abantwana Abajabulayo Ezweni Elikhathazekile

Lesi esokuqala kwezimbili izihloko ezizofundwa ebandleni. Lesi ngesabazali nabantwana, kulapho esesibili ngesabasha ngokwabo.

“Sengathi kungaba-khona kubo inhliziyo enjalo ukuba bangesabe, bagcine njalo yonke imiyalelo yami kube-kuhle kubo nakubantwana babo kuze kube-phakade.”—Duteronomi 5:29.

1. Kungani indaba yalesifundo inokubaluleka okukhulu kithina

“IZIBULO LAMI!” Yeka ukuthi amazwi ajabulisa kanjani aphuma kumama ogone usana lwakhe esifubeni sakhe. IBhayibheli likhuluma ngothando olufudumele lomdlezane, ilusebenzise njengesibonelo sothando okumelwe lube-khona ebandleni lobuKristu. Ngisho nabantu abangalungile bayabathanda abantwana babo futhi babapha izinto ezinhle. Thina-ke esithanda ukulunga yeka indlela okumelwe sibonakalise ngayo ngokwengeziwe ukukhathalela abantabethu futhi sibaqeqeshela ukuphila ezweni lanamuhla!—1 Thesalonika 2:7; IHubo 127:3-5; Mathewu 7:11.

2. Uyini umthombo ongcono kakhulu weseluleko nesiqondiso mayelana nokukhuliswa komntwana? Ngani?

² Kodwa umzali oqala ngqá ukuba nomntwana ngokushesha uyaqaphela ukuthi ukukhulisa umntwana kuwumthwalo wemfanelo ongathi sína. Ungasitholaphi iseluleko esinengqondo nokuqondiswa? Kungani ungaphendukeli kuMdali? Walungiselela ukuzalwa komntwana. (Genesise 1:28) Uye wabona ukuzalwa kwabo bonke abantwana nemiphumela yalokho abazali abakwenza. Izeluleko zakhe yizona ezingcono kakhulu. Zilotshiwe eBhayibhelini—kanye nezibonelo zabantu abalandela izimiso zakhe, nalabo abangazange.—IzAga 3:5, 6.

3. (a) Yiziphi ezinye zezinto abantabethu abazidingayo? (b) Kungani lokhu kungamelwe kusidumaze?

³ Lencwadi emangalisayo isifundisani ngokukhuliswa komntwana? Ibonisa izinto eziningi izihlakaniphi zanamuhla ezicabanga ukuthi zizisungule ngokwazo. Phakathi kwezinye zazo, libonisa isidingo somntwana sokuthandwa nokulondeka. Kumelwe bafundiswe ngoNkulunkulu nangeZwi lakhe. Badinga imfundo enhle, okuhlangenwe nakho okwakhayo, izibonelo ezinhle nabangane abafanelekile. Kumelwe bafunde ukulalela nokuhlonipha igunya. Kumelwe bafundiswe ngokuziphatha okuhle nomshado, ngohlobo lomyeni noma unkosikazi okumelwe bafune ukuba nalo noma ukuba yilo, nokuthi bangaba kanjani abazali abahle. Lokhu kungase kuzwakale kuwumsebenzi omkhulu kuwena njengomzali. Kodwa khumbula, iBhayibheli linganikeza ukuhlakanipha. Linga“nika abangenalwazi ukuhlakanipha,” futhi kwabasha “ukwazi namasu.” Make sihlole ezinye zezinto elisitshela zona ngokukhuliswa komntwana.—IzAga 1:4.

Izibonelo ZeBhayibheli

4. (a) Yini eyafundwa abantwana babazali abesaba uNkulunkulu? (b) Lokhukufundiswa kwenziwa kanjani futhi ngobani?

⁴ IBhayibheli libonisa ukuthi abantwana babazali abesaba uNkulunkulu babekhuliswa ngokulondeka, yimikhaya eyayikhathalela ubuthakathaka babo nokudinga kwabo ukuvikelwa. (Genesise 33:14; 43:8) Abantwana babefundiswa izindlela zokuziphilisa—uDavide wayengumelusi, futhi uJesu wayengumbazi. (1 Samuweli 16:11; Marku 6:3) Bafunda futhi okuthile okubaluleke kakhulu—izindlela ezimangalisayo zikaJEHOVA uNkulunkulu omkhulu. Lokhukuqeqeshwa kwakunganikezwa kuvela kumakhathekhizimu noma kumaSonto-sikole, kodwa ngabantu ababenesithakazelo esikhulukazi kubantwana—abazali babo uqobo. UJehova wayefuna amaIsrayeli azise abantwana bawo nabazukulu izindlela zakhe. (Duteronomi 4:9, 10) Abazali kwakumelwe bafundise abantwana babo ngazo zonke izikhathi—ekhaya noma lapho bengekho ekhaya, lapho belala noma bevuka. Kwakumelwe babafundise ngezwi nangesibonelo, bedlulisela amaqiniso amangalisayo ezizukulwaneni ezazilandela.—Duteronomi 11:18-21.

5. Isichazamazwi esaziwayo seBhayibheli sithini ngokuqeqeshwa komntwana?

⁵ IDictionnaire de la Bible edumile yamaFulentshi ithi ngokushesha lapho umntwana esekwazi ukukhuluma wayefundiswa amazwana ambalwa omthetho weBhayibheli. “Unina wayephindaphinda ivesi uma eselazi wayemfundisa elinye. Kamuva, umbhalo olotshiwe wamavesi abakwaziyo ukuwasho ngekhanda wawubekwa ezandleni zomntwana. Kanjalo, babefundiswa ukufunda, futhi lapho sebekhulile, babekwazi ukuqhuba imfundo yabo yezenkolo ngokufunda nangokuzindla ngomthetho weNkosi.”a Lencwadi ecashuniwe iyaqhubeka: “Umntwana wayethola izifundo ezizuzisa kakhulu zokuqala zokuziphatha ekulondekeni komkhaya egonwé uyise nonina.”—Umq. II, Uhlu 1596.

6. (a) Yiziphi izimo ezijabulisayo abantwana bamaIsrayeli abazijabulela? (b) Ingabe abantwana bakho bajabulela izimo ezifanayo, uma kunjalo, zibe yini izinzuzo kubona?

⁶ UNkulunkulu wayazi ukuthi abantwana basabela kahle ezimweni ezintsha futhi lezi zingaba usizo ekufundiseni. Kanjalo, kwakuthathwa ‘abantwana’ ngohambo oluthakazelisayo lokuya eJerusalema ukuze bezwe lapho umthetho kaNkulunkulu ufundwa. (Duteronomi 31:12, 13) Abantwana bakho bangase bajabulele izibusiso ezifanayo, ngokuba-khona njalo emihlanganweni yesifunda neyesigodi yoFakazi BakaJehova lapho bengazuza khona eselulekweni, bahlanganyele njengamavolontiya, futhi bazenzele abangane abahle. Ungase wenze ukuthi izehlakalo ezinjalo zibe yizinto ezibalulekile ekuphileni kwabo, njengoba uhambo lokuya eJerusalema lwaluyisehlakalo esikhethekile kubantwana bakwaIsrayeli.

7. Kungani kubaluleke kangaka ukubeka isibonelo esiqondile?

⁷ UNkulunkulu wayekwazi ukubaluleka kwesibonelo esihle. Abantwana balingisa lokho abakubonayo. Bangase balufunde ulimi—ngisho noma kanjani—ngokulingisa lokho abakuzwayo. UNkulunkulu wathi: “Sengathi kungaba khona kubo [abantu] inhliziyo enjalo ukuba bangesabe, bagcine njalo yonke imiyalelo yami, kube-kuhle kubo nabantwana babo kuze kube-phakade.” IBhayibheli lithi: “Olungileyo ushiyela abantwana bakhe ifa.” (Duteronomi 5:29; IzAga 13:22) Kanjalo, okuningi kuxhomeke kuwe. Njengabazali, kumelwe senze konke okusemandleni ethu ukuze sibeke isibonelo esifanelekile, ngoba ngokuqinisekile asinakufuna ukuba abantabethu balandele esingalungile.

Abangane Ababi

8. Yimiphi imibuzo okumelwe sizibuze yona ngabangane babantwana bethu?

⁸ UNkulunkulu udonsela futhi ukunakekela kwethu ezingozini zabangane ababi. IZwi lakhe lithi: “Ukujwayelana nababi konakalisa ukuziphatha okuhle.” (1 Korinte 15:33) Khona-ke, kubalulekile ukwazi ukuthi abantabakho bajwayelene nobani. Ingabe uyabazi ngempela ukuthi bangobani abangane babo? Ingabe uyabavumela yini ukuba balethe abangane babo ekhaya, babangenise endlini, ukuze ubazi? Noma ingabe umane nje ubahlalise phandle ukuze bangakuphazamisi? Uyalwazi yini uhlobo lolimi abantabakho abaluzwayo, nokuthi siyini isimo sabangane babo ngokuqondene nokuqamba amanga, ukweba nemilaliso?

9. Yiziphi izinyathelo ezifanelekile ongase uzithathe ukuze usize abantabakho bathole abangane abangcono?

⁹ Uma labobangane bengabazisa ngandlela-thize, abantabakho bangabatholaphi abangane abangcono? Phakathi ebandleni loFakazi BakaJehova—lapho ulimi olungcolile, ukuqamba amanga, ukweba nemilaliso kungavunyelwa. Ingabe uye wafisela ukuthi abanye ebandleni bajwayelane kakhudlwana nabantabakho? Khona-ke kungani ungayi kubo? Ingabe uye wathatha kuqala izinyathelo? Kungani ungamemeli abanye abasha ekhaya lakho, noma ubacele ukuthi babe nawe ekufakazeni kobuKristu noma bajabulele kanye nawe ezinye izinto ezakhayo?

10. Ungabasiza kanjani abantabakho ukuze babe ngabangane abangcono kwabanye?

¹⁰ Uma uye wakuzama lokhu, futhi inkinga yabangane ilokhu iqhubeka, kungase kube kuhle ukuzibuza ukuthi, Kungani? Ingabe usand’ kuqala ukusebenzisa izimiso zeBhayibheli? Ngezinye izikhathi abantu abasha abalethwa eHholo LoMbuso basuke bengakazilungisi izinkinga ezithile, ukuba abangane abahle ngokwabo. Omunye omusha wathi ngomunye: “EHholo loMbuso ulungile, kodwa ngeke wakukholelwa akwenzayo esikoleni!” Isimo salentombazane sokuziphatha okuxekethile esikoleni senza abanye ukuba bangafuni ukuphawuleka njengabahlanganyela nayo. Ungabasiza kanjani abantabakho ukuze baguqule izingqondo zabo ezindabeni ezinjalo? Iseluleko sakho, isifundo sakho seBhayibheli, ukuhlanganyela komkhaya wakho ekufundiseni kobuKristu, isibonelo sakho luqobo enkulumweni, ukuziphatha nasekwethembekeni nomzamo wakho wokufinyelela inhliziyo yomntwana ngezimiso eziqondile kungafeza okukhulu. Lapho kudingeka, abadala bebandla nabo bangacelwa ukuze banikeze usizo olubonisa uthando.—Jakobe 5:13-15.

Izinkinga Zomkhaya

11. Kungani kungamelwe uphelelwe ithemba uma kukhona izibonelo ezimbi emkhayeni wakho?

¹¹ Kodwa kuthiwani uma kukhona izinkinga ezingathi sína khona kanye emkhayeni wakho? Kuthiwani uma umngane ongakholwa eziphatha ngokuphambene ngokuphelele nezimiso zeBhayibheli ezifanelekile? Musa ukuphelelwa ithemba. Ithonya lakho elifanelekile nosizo lomoya kaNkulunkulu kungenza izimanga. Kukhona abantwana abaye bazinqoba izinkinga okwakubonakala sengathi azinakunqobeka, baba abantwana abahle. Abantu benziwa uNkulunkulu, ngisho nabantwana abancane bangase babonakalise amandla amangalisayo lapho beqondiswa ngendlela efanelekile ngumngane, umuntu omdala onengqondo, noma ngumzali okuwukuphela kwakhe emkhayeni wamalungu amaningi angakholwa.

12. Izibonelo zikaLoti noThimothewu zisikhuthaza kanjani kulendaba?

¹² Cabangela isibonelo sikaLoti. Umkhaya wakhe wawuhlala eSodoma elibi, futhi umkakhe ngokusobala wayekufuna ukuhlala lapho. Kodwa uLoti namadodakazi akhe babaleka basinda ukubhujiswa komuzi. (Genesise 19:15-17, 23-26) UThimothewu osemusha wayenobaba ongakholwa, kodwa unina nogogo bamfundisa imiBhalo futhi bamsiza waba umlandeli kaJesu Kristu othembekile nomngane oqotho kamphostoli uPawulu. (2 Thimothewu 1:5; 3:14, 15) Ngakho-ke, ngisho noma unomngane womshado ongakholwa, uNkulunkulu angase akusize ukuba ufake uthando olujulile lweqiniso nokulunga ezinhliziyweni zabantabakho.

Ulwazi Nemfundo

13. (a) Kungani amaKristu asemasha kufanele abheke imfundo ngokungathi sína? (b) Isibonelo sikaSolomoni sikubonisa kanjani ukubaluleka kwenkulumo eqondile?

¹³ Ingabe uyabakhuthaza yini abantabakho ukuba bafunde, kokubili esikoleni nasebandleni? Ingabe ukufunda kubalulekile emkhayeni wakho? Kwakubalulekile kumaIsrayeli. Umphakathi wawo wawungowabantu abafundile. Abantwana babo babekwazi ukufunda imiBhalo. Ukwenezela ekufundeni, abantabakho bayoxoxa nabanye ngeZwi likaNkulunkulu. Ingabe bakhuluma ngendlela ehloniphekile? Ingabe usuye wawalungisa amaphutha okungenzeka ubulokhu uwenza iminyaka eminingi, ukuze abantwana bakho bakuzwe ukhuluma kahle? USolomoni ngokucophelela wawakhetha amazwi ayedumisa uNkulunkulu ngawo. Ngokuvumelana nalokhu, siyafunda: “Umshumayeli wafuna ukuthola amazwi enamisayo afanele ukulotshwa, amazwi eqiniso.”—UmShumayeli 12:10.

14. Singabasiza kanjani abantabethu ukuze bafunde ukwenza izinqumo ezifanelekile?

¹⁴ Ngokusobala sifuna ukuthi abantabethu babe abantu abadala abavuthiwe futhi benze izinqumo ezifanelekile ngokuvumelana neZwi likaNkulunkulu. Khona-ke, kuyoba kuhle ukuqala besebancane ukubafundisa izimiso ezifanelekile—hhayi nje imiyalo okumelwe ilalelwe kodwa futhi nezizathu zayo. Khona-ke abantwana bayofunda indlela yokuzenzela izinqumo eziqondile ngokwabo.

15. (a) Yikuphi ukusekelwa okubalulekile abantabethu abakudinga kithina? (b) Yini okumelwe siyiqaphele?

¹⁵ Abantabethu babhekene nezwe elonakele. Kubalulekile ngabo ukuba babone kithina umuzwa wamandla nokholo, futhi kumelwe bazi ukuthi uma benza kahle, siyobasekela, njengoba uSara avikela uIsaka kuIshmayeli. (Genesise 21:9, 10) Kumelwe futhi sikhumbule ukuthi ngokulindela izinto ezinhle, kunokwenzeka kakhulu ukuba sizithole. “Uyazi yini ukuthi kungani ungenankinga ngathi?” uFakazi osemusha wabuza uyise. “Ngoba awuzami ukusicupha ngokubi—ulindele ukuba senze okuhle, futhi akukho okunye esingakwenza.” Yeka ukuthi abazali bavamise kangakanani ukubeka abantwana icala ngokuthile bese kuthi kamuva bathole ukuthi abazange bakwenze kwanhlobo! Uma ubeka abantabakho icala lokukhuluma amanga futhi necala obabeka lona lingelona iqiniso, bangase bacabange ukuthi ufuna ukuthi bakhulume amanga, futhi ngesikhathi esilandelayo bayokwenzenjalo.

16. (a) Ikuphi ukusikisela okuphawuliwe mayelana nemihlangano yobuKristu? (b) Yini ebonisa ukuthi lemihlangano inokubaluleka okukhulu kubantwana? (c) Zikhona yini izibonelo ozaziyo ezibonisa ukubaluleka kwalokhu kubantwana?

¹⁶ Abantu abaningi baye bakuthola kuhlakaniphile ukuya nabantwana babo, besebencane kakhulu, emihlanganweni lapho kuxoxwa khona ngeZwi likaNkulunkulu—hhayi ukuhlala nje kwelinye ikamelo nabo noma ukuphumela phandle (ngaphandle kwezikhashana ezifushane, nangesizathu esihle) kodwa ukubafundisa ukuba bahlale ngokuzotha, babonise inhlonipho ngemihlangano futhi bazuze ezintweni ezinhle okuxoxwa ngazo. Namuhla, abantu abadala, abaqinile okholweni, bakhumbula intshiseko yabazali babo ababehamba ngaso sonke isikhathi amabanga amade mhlawumbe ngemoto endala ukuze babe-khona emihlanganweni enjalo. Umdala ebandleni ukhumbula iziprofetho ezinzima azizwa ngenkathi abazali bakhe bexoxa ngazo belungiselela isifundo seNqabayokulinda esikhathini eside esedlule, lapho yena njengomntwana omncane wayedlala phansi endlini. Babengacabangi nokucabanga ukuthi wayelalele—kungasaphathwa ukuthi wayeyokhumbula incazelo yazo eminyakeni engaphezu kwama-50 kamuva!

17. Yiziphi izibonelo zeBhayibheli ongazisho zabantwana ababeba-khona emihlanganweni, futhi yimiphi imibuzo esingazibuza yona mayelana nalokhu?

¹⁷ Osukwini lukaEzra bonke labo ababenengqondo yokuzwa babema kusukela ekuseni kuze kube semini enkulu ukuze bezwe kufundwa imiBhalo. (Nehemiya 8:2, 3) Uma wawuphila ngalesosikhathi, ingabe abantabakho babeyoba khona lapho noma ingabe wawuyocabanga ukuthi okuxoxwa ngakho kujule kakhulu futhi nokufunda kuthatha isikhathi eside kakhulu bese ubatshela ukuthi baphume bayodlala? UJosefa noMariya “baya eJerusalema iminyaka yonke ngomkhosi wePhasika.” Kungalesosizathu babelapho ngenkathi uJesu eneminyaka eyi-12 ubudala. (Luka 2:41-49) Ingabe wawuyolihamba yini lelobanga, ngezinyawo noma ugibele imbongolo ukuze ube kulowomhlangano? Lapho isixuku kuhlanganise na“bantwana,” bezokuzwa uJesu, futhi kungekho kudla, uJesu ngesimangaliso wabapha ukudla. (Mathewu 14:21; 15:38) Ingabe abantwana bakho babeyoba khona lapho, noma ingabe wawuyohlala ekhaya ubapha ukudla abakudingayo?

18. Kungayiphi enye indlela futhi esingabonisa ngayo ukwazisa imihlangano yobuKristu?

¹⁸ Ingabe abantabakho bayazi yini ukuthi ubheka imihlangano yesifundo seBhayibheli ngokungathi sína? Ingabe bayabona ukuthi ubheka lemihlangano njengebaluleke kakhulu hhayi nje kuphela ukuba ube-khona kuyona kodwa ukuba uhlanganyele kuyona, uphendula lapho kubuzwa? Ngokwesibonelo, usilungiselele yini lesifundo nabantabakho, futhi ingabe njengomkhaya niyonikeza ngamunye okungenani eyodwa impendulo emhlanganweni okuxoxwa ngaso kuwo?

Umgomo Ophakeme

19. Yisiphi isimo esiqondile okumelwe sibe naso ngokukhulisa abantabethu abathandekayo?

¹⁹ Ingabe ukhona yini okwazi ukwenza zonke lezinto ngokuphelele? Ngokusobala akekho! Izinto okuxoxwa ngazo lapha yizinto okumelwe kusetshenzelwe kuzo, akuyona imigomo esifinyelelwe kakade. Kulelizwe izinkinga ziyohlala zikhona, kodwa iBhayibheli lisinikeza izindlela zokuzisingatha, futhi uma sizama ukwenza izinto ngendlela kaNkulunkulu, uyosisiza. Lapho ebuzwa ukuthi kungani abantabakhe bebonakala beqinile okholweni, omunye ubaba ongumKristu wathi: “Angazi ngempela. Akukho lutho olukhethekile esalwenza. Samane nje sazama ukusebenzisa iseluleko esisithola eBhayibhelini nasenhlanganweni.”

20. (a) Ziyini ezinye zezinto ongazenza ukuze ukhulise abantwana abathokozayo namuhla? (b) Umbhalo okusekelwe kuwo lesifundo ekuqaleni kwesihloko nezAga 20:7 kusikhuthaza kanjani kulendaba?

²⁰ Uma kuziwa ephuzwini lakho, yilokho okudingekayo ukuze ukhulise abantwana abathokozayo namuhla. Beka isibonelo. Sifundise abantabakho. Jabulela izinto ezinhle abazenzayo, futhi uzame ukubasiza ukuba baqondise abanye. Hlanganyela nabo izinjabulo zabo nokuphila. Bonisa uthando. Yenza izinto ngendlela kaNkulunkulu futhi uyobusisa imizamo yakho. Khumbula amazwi kaSolomoni akhuthazayo: “Olungileyo ohamba ekupheleleni kwakhe, babusisiweabantwana bakhe emva kwakhe.”—IzAga 20:7.

[Imibhalo yaphansi]

Imiyalo kaNkulunkulu kwakumelwe ibhalwe ezinsikeni zomnyango futhi iboshwe ezandleni—okuyizinto ezazingenakusho lutho kubantu ababengakwazi ukufunda. (Duteronomi 6:8, 9; 27:8) Inkosi kwakumelwe izibhalele esayo isiboniselo somthetho futhi isifunde nsuku zonke. (Duteronomi 17:15, 18, 19) Insizwa yaseSukoti yabhala amagama ezikhulu zedolobha lakubo.—AbAhluleli 8:14.

Ukufunda nokubhala kwakungalinganiselwe esigabeni sabafundile kuphela. Encazelweni yakhe yencwadi yabaHluleli, uJames D. Martin wabhala ukuthi “obunye bobufakazi bethu bakuqala ngokubhalwa kwama-alfabethi kwakuqoshwe ezindongeni zemihume yizigqila ezimayini zaseSinayi. UAmose wayengumalusi othobekile. UMika wayengumprofethi wasemaphandleni emzini waseMoresheti. (Amose 1:1; Mika 1:1) Kodwa nokho bobabili babhala izincwadi zeBhayibheli.

Incwadi yeBhayibheli engaphefumlelwe kaMaccabees wokuQala, ngokunokwenzeka eyabhalwa ngokuphathelene nengxenye yamuva yeminyaka yekhulu lesibili B.C.E., ibonisa ukuthi abantu babeneziboniselo zoMthetho emakhaya abo. (1 Maccabees 1:55-57) Umlobi-mlando ongumJuda uJosephus waveza umbono wakhe ngekhulu lokuqala wokuthi uMthetho uyala ukuba abantwana “bafundiswe ukufunda, futhi bafunde kokubili imithetho nezenzo zoyisemkhulu.—Against Apion, II ikh. 375 (25).

BAZALI NABANTWANA, NINGAYIPHENDULA KANJANI LEMIBUZO?

◻ Abazali kumelwe basifune kuphi iseluleko ngokukhuliswa komntwana, futhi ngani?

◻ Yiziphi ezinye izibonelo zeBhayibheli zokuqeqeshwa komntwana okufanelekile?

◻ Kungaziphi izindlela ezingokoqobo abazali abangaqaphela ngazo abangane babantwana babo?

◻ Ukusetshenziswa kwezimiso zeBhayibheli kungazinqoba kanjani izinkinga emikhayeni ehlukene?

◻ Yimaphi amanyathelo abazali okumelwe bawathathe, njengoba beqaphela imfundo yabantwana babo?

◻ Ingabe abazali nabantwana bangalindelwa ukwenza zonke izinto ngokuphelele? Nokho bangaphumelela kanjani?

[Isithombe ekhasini 14]

Umntwana wabuza unina: “Awubheke nje ukuthi kukhathaza kangakanani ukukhulisa umntwana—ingabe ufisa sengathi awungizalanga?” Eminyakeni eminingi kamuva, ngothando olujulile usayikhumbula impendulo kanina: “Noma yini efanelekile ifuna isikhathi nomzamo.”

[Isithombe ekhasini 15]

Njengabazali, nivamise kangakanani ukubeka isibonelo hhayi ngokuba-khona nje emihlanganweni kodwa ngokuhlanganyela lapho kuxoxwa ngeZwi likaNkulunkulu?