Ingabe Uyalisebenzisa Lelobhokisi?
NJENGOBA uye wafunda INqabayokulinda onyakeni odlule, uye wasiphawula yini isici esisha esivela ezihlokweni eziklanyelwe ukufundwa ebandleni? Lelo ibhokisi elincane, njengalelo ozolithola kulomagazini emakhasini 20 no-26. Liyini lelibhokisi?
Singase sibize lesisici esisha ngokuthi ‘ibhokisi lokufundisa,’ ngoba lingelaleyonhloso. Izigidi zabantu ziba khona ezifundweni zebandla zeBhayibheli zisebenzisa INqabayokulinda. Kodwa izikhonzi eziningi ezabelwe ukufundisa kulemihlangano ziye zabika ukuthi abanye abantu banobunzima ekubambeni amaphuzu ayinhloko ezifundo ezithile. Lokho akumangalisi, ngoba umphostoli uPetru wavuma ukuthi amaKristu amaningi agcotshiwe ekhulwini lokuqala athola ukuthi izincwadi zikaPawulu zaziqukethe “izinto okunzima ukuziqonda.” (2 Petru 3:16, NW) Futhi, abanye abafundi beNqabayokulinda baye bathi bebengazuza okwengeziwe uma bengaphetha ngokubukeza amaphuzu ayinhloko. Ekusabeleni ezidingweni ezinjalo, kwenziwa lamabhokisi.
Manje, ngemva kwezinyanga ezimbalwa, ingabe lamabhokisi okufundisa ayaziswa futhi ayasetshenziswa? Udade ongumKristu eOhio waloba: “Sinibonga kakhulu ngamaphuzu okubukeza aba sekuphetheni kwezihloko ezifundwayo zeNqabayokulinda. Angisiza ngempela ukuba ngiqonde amaphuzu ayinhloko okumelwe akhunjulwe.”
Umama wamadodana amabili wathi: “Ngithanda ukuba wazi ukuthi siyayazisa futhi siyayijabulela imibuzo namazwi asebhokisini lokubukeza eniye nawabeka ekugcineni kwesihloko esifundwayo ngasinye. Awusizo ngempela ekubukezeni ngalelosonto nangesonto elilandelayo uma isifundo sisaqhubeka nesihloko esifanayo.” Ngemva kokuveza ukwazisa kwakhe ngalokho osekuye kwavela kakade, umKristu eNew York wathi: “Ngithemba ukuthi kuyintando kaJehova ukuba leyomibuzo ivele kubo bonke omagazini besikhathi esizayo. Ikusiza ngempela ukuba uthole umqondo wokuthi lezizifundo zimaqondana nani.”
Amazwi alandelayo ashiwo umfundi eNgilandi angase akusize ukuba ubone izindlela ongawasebenzisa ngazo lamabhokisi okubukeza: “Ngithola izifundo zeNqabayokulinda zamuva namabhokisi nemibuzo ekugcineni kuwusizo olukhulu kimi ekuzuzeni okwengeziwe ezifundweni. Kuyamangalisa ukuthi kuningi kangakanani manje engikuzuzayo. Ngemva kokusifunda sonke kuqala isihloko angikwazi ngaso sonke isikhathi ukuphendula imibuzo ebengicabanga ukuthi ngingayiphendula. Ngakho-ke ngiphinde ngiyifunde indaba okwesibili noma ngisho nokwesithathu kuze kube yilapho ngingaphendula yonke imibuzo. Futhi ngithola ukuthi lokho kuye kwangisiza ukuze ngikhumbule okwengeziwe.”
Njengoba uqeda ukutadisha kwakho siqu isihloko, kungani ungaphindeli ebhokisini lokufundisa ubheke iphuzu ngalinye. Uma, ngaphandle kokubheka futhi isihloko ungaphendula umbuzo ngamunye noma ukhumbule iphuzu eliyinhloko ngalinye, kuhle kakhulu! Kodwa uma ungabaza kancane ngempendulo ethile, noma unomuzwa wokuthi oye wakufunda ngendaba akwanele ngokuqondile ukuba ungakuchazela abanye, phindela engxenyeni efanelekile yesihloko. Ukubukeza khona ngalesosikhathi kuyokuthuthukisa kakhulu ukuqonda kwakho futhi kuyogxilisa amaphuzu njengosizo lwenkumbulo. Akunakuthatha isikhathi esiningi, kodwa kuyokulethela imivuzo ecebile.
Uma uqhuba isifundo sebandla seNqabayokulinda, unesizathu esenezelwe sokusebenzisa amabhokisi okubukeza. Qhuba isifundo ngendlela yokuba kube nesikhathi esithile sokubukeza ngaphambi kokuphetha, khona-ke gxilisa ukunakekela ebhokisini. Kunokumane nje ufunde amaphuzu, noma umane usikisele ukuthi izilaleli zenze njalo ekhaya, zama ukukhanyisa iphuzu ngalinye. Noma ngendlela yemibuzo, ungase ufune ukubuza izilaleli ‘ngokubukeza izincwadi zivaliwe.’ Ngalendlela bonke abakhona bayobona ukuthi ayini amaphuzu ayinhloko esifundo. Wena kanye nabo niyowakhumbula kangcono amaphuzu ayinhloko!
Sithemba ukuthi lesisici siyoqhubeka sinisiza njengoba nifuna ukwazi iqiniso elingakhulula abantu futhi eliholela ekuphileni okuphakade.—Johane 8:32; 17:3.