Ukuthambekela Kwanamuhla Emculweni—Ingabe Kungakuthonya?

MANJE kuthiwani ngomculo wanamuhla—irock, ipunk, ifunk, irhythm, neblues, icountry newestern nezinye izinto ezihehayo ezanda kakhulu namuhla? Ingabe ngezosha, noma ngaphandle kwazo, ungathonya indlela yakho yokucabanga noma ulimaze ingokomoya lakho?

UBill Mullane, owayengumculi werock waseNew Jersey, U.S.A., wakuchaza ngalendela: “Lapho ngidlala isiginci sebhesi eqenjini lerock wonke umphumela kwakuwukuthinteka ngokomzimba. Isigqi esibelesela ngokudlanga nesimo esinamandla simane sikungene. Njengomculi ngaba yingxenye yakho. Khona-ke, njengoba ngangibheka izilaleli zisabela futhi zithatheka ngesimo esifanayo, ngangifuna ukuzithinta ngokwengeziwe. Yilolohlobo lomsindo. Luyakubamba. Yebo, ngalesosikhathi ngokuvamile ngangiphansi kwethonya lemilaliso, njengoba ngisho nabaningi ezibukelini babenjalo. Khona-ke uzizwa uphile ngokwengeziwe. Uyazi, kufana nokuyeka konke ukuzibamba. Ungahlanya futhi ukhohlwe izinkinga zakho.

“Yingakho ngicabanga ukuthi intsha ihambisana nayo yonke imiculo ehlukahlukene ekhishwa kulezinsuku. Izihlanganisa nayo nalokho ekhuluma ngakho. Uma ngibheka emuva ngiyabona ukuthi ibonakalisa indlela ezizwa ngayo ngezwe nokuphila kwanamuhla. Kakade, ukusongela kwenyukliya kulenga phezu kwesintu. Ubani owaziyo ukuthi sizophila isikhathi esingakanani? Ngakho ivumela isimo sokuthi ‘phila lapho usakwazi. Thola konke ongakuthola ekuphileni.’”

Lokho kuphawula ngokuzifanelisa kusiholela endikimbeni yendaba. (Qhathanisa no-1 Korinte 15:32.) Ingabe umKristu weqiniso kumelwe afune ukuzihlanganisa nezindlela eziningi zomculo wanamuhla? Muva nje iphephandaba laseCanada, iToronto Star labika: “Ubulili nobudlova bobulili kuhlangana ekhonsathini yamaTubes [iqembu lerock laseSan Francisco].” Umlobi waqhubeka wathi: “Lokho okuyichilo emphakathini, kumaTubes kungaba nje yinjabulo ekulimazeni abanye, ukugqilazwa ubulili, inhlamba nokona noma ubani.” Yikuphi okufana nalokhu ubuKristu obungaba nakho?

INew York Post yayinesihloko esithi “Umhlaba WobuSathane WamaRolling Stones.” Kwakuwukubukeza okugcwele ikhasi kokuhileleka kwaleliqembu emilalisweni. Isimo samaRolling Stones mayelana nemilaliso, ubulili noSathane sizwakala kakhulu futhi ngokusobala emculweni wawo. Ingabe ungahambisana nezimo ezinjalo futhi uqhubeke uzihlanganise noKristu?—2 Korinte 6:14, 15.

Umculo Nemimoya Emibi

Ngokudabukisayo, lezi akukuphela kwezingozi emiculweni eminingi yanamuhla umKristu oqaphayo okufanele azicabangele. Umphostoli uPawulu wakhuthaza amaKristu: “Hlomani izikhali zonke zikaNkulunkulu, ukuze nibe-namandla okumelana namaqhinga [“izenzo zobuqili,” The Kingdom Interlinear Translation of the Greek Scriptures] kaSathane; ngokuba sibambene . . . nababusi bezwe balobubumnyama, nabawomoya bobubi emkhathini.” (Efesu 6:11, 12) Akumelwe sisithathe kalula lesixwayiso. Ithonya lamademoni lidlangile, futhi ikhona yini indlela engcono yokukhohlisa abantu, ikakhulu isizukulwane esisakhula, ngaphandle komculo?

Manje kubonakala ukuthi amaqembu ahileleke ngokujulile emimoyeni emibi nasemikhubeni yokulumba. Abanye bazama ukwandisa inkolo yaseMpumalanga nomqondo othile ngomculo wabo. Ngokwesibonelo:

URobert Palmer, umhloli wejazz elobela iThe New York Times ngaphansi kwesihloko esithi “Ubuthakathi Bungenela Irekhodi LeJazz,” wakhuluma ngeqembu lejazz labansundu elibizwa ngokuthiwa iThe Art Ensemble of Chicago, wathi: “Isosha seThe Art Ensemble of Chicago siwu‘Mculo Omkhulu Omnyama—Owasendulo Esikhathini Esizayo’ . . . Kodwa kunohlobo olungaphezu kolulodwa lobumnyama lapha. Kukhona . . . ubumnyama bobuthakathi obubonakala phakathi nobusuku. Akubona ngokuqondile ubumnyama obubi, kodwa lolu akulona uhlobo lwerekhodi umuntu angalidlala ngisho nasembuthanweni ongahlelekile. . . . Kuwuhambo lwasemaphusheni lokuya ebumnyameni obukhulu.” Njengomfundi kaKristu ubungathanda yini ukuba lolohlobo lomculo lube phakathi kwamarekhodi akho?

Ngenxa yalokho uPawulu akusho kumaKristu ase-Efesu ngamandla emimoya emibi, ingabe bekungaba okunengqondo ngomKristu wosuku lwanamuhla ukuba abe namarekhodi adumisa amademoni nemimoya emibi? Uma azi ukuthi amanye amaqembu ahileleke shí ekutadisheni imilingo nemikhuba yayo, ingabe bekungaba okulondekile ukucabanga ukuthi alikho kulelothonya elinganyelela ezosheni, isigqi noma ngisho nesembozo serekhodi?

Ngokwesibonelo, elinye iqembu lidlala ingxenye ethi “Mr. Crowley.” Ubani uMr. Crowley? Usathane wekhulu lama-20 futhi ongumgqugquzeli wobuthakathi banamuhla! Ezikhathini eziningi, ukubheka kanye isembozo serekhodi kufanele kwanele ngomKristu ongufakazi kaJehova ukunquma noma alithenge irekhodi noma cha, ikakhulu lapho kunemifanekiso yobuthakathi nobudemoni, noma izimpawu zobuhedeni noma imilingo.

Owayengumdlali wenightclub uGordon Grant, owayekade ephila ngokudlala iJazz kamuva irock eLos Angeles, U.S.A., wathi: “Wonke amaqembu engangihlanganyela nawo ayenemimoya emibi ezingeni elithile. Indlela yokuqala ingxoxo uma ubona othile omusha yayiwukuthi ‘Luyini uphawu lwakho?’ Babethatha ukufundwa kwezinkanyezi ngokungathi sína nophawu lwakho lwenkanyezi lwalubalulekile.” Ingabe ufuna ukuhlanganiswa nokufundwa kwezinkanyezi neminye imikhuba yobudemoni?—Duteronomi 18:10-13.

Umculo Nokuziphatha Kabi

Umphostoli uPawulu wanikeza iseluleko esiqondile encwadini yakhe kwabase-Efesu leso esisebenza ngokufanayo namuhla endabeni yomculo. Waluleka: “Kepha ubufebe, nakho konke ukungcola, noma isangabe [kuhlanganise nobugovu bobulili], makungaphathwa nangegama phakathi kwenu, njengokuba kufanele abangcwele, nehlazo . . . nokulawula.”—Efesu 5:3-5.

Nina bazali nani bantu abasha: Ingabe niye nazihlola izosha zamarekhodi asendalini—noma lawo mhlawumbe osunawo kakade ekhaya lakho? Kungenzeka ucabanga ukuthi umculo uyakhanga, noma mhlawumbe unesigqi osithandayo. Okokuqala awunandaba namagama futhi ngokushesha uzithola ucula ingoma. Ngisho nezinye izinkundla zokushelela eqhweni zidlala loluhlobo lomculo. Kungaba okufanelekile yini ngoFakazi BaJehova ukuba ngesikhathi beshelela babe behlanganyela kulowomculo? ‘Kodwa ikuphi ingozi kulokhu?’ ungase ubuze.

Emculweni wawo, amaqembu adumile abonisa ubufebe nemilaliso njengendlela yokuphila. Yebo, umculo wabo ubonakalisa indlela yabo yokuphila. Ukuthi “I wanna see what you’re like in bed,” nokuthi “She’s hot, she’s sexy,” yizosha ezivela kwelinye irekhodi lamuva nje. Omunye umculi odumile uveza umbono wakhe ngokuqondile esembozweni serekhodi, ngokuthi: “Angiyiboni into embi ngobulili phakathi kwabantu abavumelene. . . . Angikholelwa emqondweni wokuziphatha kahle ngokweqile.” Yikuphi ukuhlangana kwemiqondo okungabakhona phakathi kwamaKristu eqiniso nezimo ezivezwa ezosheni ezinjalo? Ingabe abalandeli bakaKristu kumelwe bahlanganiswe nalokho ‘kucabanga okudukile’?—Efesu 4:18, qhathanisa noGenesise 39:7-12.

Umculo Nesizukulwane Sabadala

Kulula ngesizukulwane sakudala ukucabanga ukuthi konke lokhu kubhekisela kubantu abasha kuphela nomculo wabo. Kodwa kuthiwani ngezingoma ezazidumile zeminyaka engama-20 nama-30 edlule lezo abanezinkumbulo zasekhaya abasazijabulela? Ethi “Big Spender” yayibonisa isifebe sizama uku“bamba” ikhasimende. I“Fever” kwakuyincazelo efihliwe yesifiso esikhulu sobulili. I“Never on Sunday” ngokufanayo kwakuyingoma yezifebe. Bangaki ngaleso sikhathi ababejabulela izingoma ezinjalo, ngaphandle kokucabangela ezikushoyo?

Singaqhubeka sinikeza izibonelo ezibonisa amacebo obuqili bukaSathane bokusithola ukuba samukele, imiqondo eyonakele ngomculo, kanye nemibono ngokuvamile esingayilahla ngokushesha. Lokhu kubonisani? Kubonisa ukuthi sonke, abancane nabadala, sidinga ukubheka ngokungathi sína uhlobo lomculo ebesiwujabulela. Ngaphandle ngisho kokuqaphela kungenzeka besihambisana “nomsindo wokushinga” walomhlaba.—1 Petru 4:4.

Kukhona okumelwe kucatshangwe yiwo wonke umKristu kungaba umdala ebandleni, umzali, umuntu osemusha noma umntwana. Ukunganeli kwendawo kuyasivimbela ukuba siveze bonke ubufakazi obutholakalayo maqondana nemiphumela eyonakalisayo yezithile izisho zomculo “ezingathi sína” nezesimanje. Kodwa wonke umKristu oqotho uzokwenza kahle ukuhlolisisa umculo awuthandayo futhi nanoma iliphi iqoqo lamarekhodi angase abe nalo, futhi enze ngokuvumelana nokuzindla okungokomBhalo okuphilile.

Yini UmKristu Angayenza?

Lapho uPawulu eshumayela e-Efesu inkonzo yakhe yaphumelela kangangokuthi abaningi abenzi bemilingo bamukela ubuKristu bathatha isinyathelo sokuvikela ingokomoya labo lesikhathi esizayo. Umbhalo uthi: “Kepha abaningi kubo abenza imilingo babuthela ndawonye izincwadi zabo [zemimoya emibi], bazishisa phambi kwabo bonke; bahlanganisa amanani azo, bafumana ukuthi ayizinhlamvu zesiliva eziyizinkulungwane ezingamashumi ayisihlanu. Kanjalo izwi landa ngamandla eNkosi, lanqoba.”—IzEnzo 19:18-20.

Ingabe iZwi likaJehova liyoqhubeka landa futhi linqoba kuwena? Uma kudingekile, ingabe uyothatha isinyathelo ukuze uqashelwe njengelungu elifanelekile “labantu abangcwele” bakaJehova? (Efesu 5:3) Muva nje, lapho lendaba ibekwa ngokuqondile phambi kwelinye iqembu elikhulu lezikhonzi zikaJehova zesikhathi esigcwele, amathini emfucumfucu amaningi agcwele amarekhodi alethwa futhi ashiswa ngokusobala ngenxa yokuvimbela kwabo ukonakala, ukuhileleka ebudemonini noma ukumelela indlela eyonakele yokuphila yalelizwe. Isizathu esibalulekile sasingekhona ukuzuza kwabo imali kodwa sasiwumphumela olimazayo ezinzuzweni ezingokomoya.

Abanye bangaba nomuzwa wokuthi kufanele sibe ngabaqondile ngamaqembu athile noma izinhlobo zemiculo. Nokho, umphostoli uPawulu uthi: “Ukudla okuqinileyo kungokwabakhulileyo, abathi ngokujwayela ukuwusebenzisa umqondo, sebenawo osulungele ukwahlukanisa okuhle nokubi.” (Heberu 5:14) UmKristu ovuthiwe, ngokusebenzisa unembeza wakhe oqeqeshwe ngokweBhayibheli, akumelwe abe nobunzima ekuhlukaniseni ukuthi iziphi izinhlobo zomculo owemukelekayo. OFakazi BakaJehova abadingi uhlu lwemithetho ukuba lubaqondise noma “inkomba” yomculo ongafuneki. Omunye nomunye akasebenzise ukuhlakanipha njengoba efuna ukuthokozisa uYise wasezulwini kuzo zonke izinto, kuhlanganise ukukhetha kwakhe umculo.—Efesu 5:18-20; Filipi 1:9-11.

[Isithombe ekhasini 9]

Ingabe amarekhodi akho amelela imimoya emibi, imilaliso noma ukuziphatha okubi?