“Ukubuthanela Ukuzihlelela Impi”
“Onke lawomadoda empi angahlela impi afika eHebroni ngezinhliziyo ezipheleleyo ukubeka uDavide inkosi kwaIsrayeli.”—1 IZIKRONIKE 12:38.
1. Isiphi isimo esiphuthumayo namuhla esidinga ukuqapha?
KHUZANI isaga sempi! Bonke ofakazi bakaJehova abangamaqhawe mababuthanele umsebenzi! Ukulwa nesitha kusondela ezingeni elibucayi. Izinsuku ziyaphuthuma. Asikwazi ukuwela esimweni sokuthatha kalula noma siluthwe ukucabanga ukuthi impi isiyaphela. Ilokho isitha esifuna sikucabange, ngoba siyazi ukuthi isikhathi saso sifushane. Kunalokho, singalindela ukuthi isitha sizohlasela ngamandla ngethemba lokuthola abalwela iqiniso bengazelele.—1 Thesalonika 5:1-6.
2. Kungani oFakazi BakaJehova bengadingi ukwesaba izitha zabo? (IHubo 24:8)
2 UJehova ubheka ofakazi bakhe abathembekile namuhla njengamabutho asempini engokomoya ebheke ngokushesha emvuthwandaba wayo. Uma ebizwa, uJehova uba “indoda yempi” esandla sayo sokunene siphohloza futhi siwisele phansi izitha zakhe. (Eksodusi 15:3, 6, 7) Isithembiso sakhe kuIsrayeli wasendulo owawuzoholwa ingelosi yakhe sisamile: “Kepha uma ulalela nokulalela izwi layo, ukwenze konke engikukhulumayo, ngiyakuba-yisitha sezitha zakho, ngiphambane nabaphambana nawe.”—Eksodusi 23:20-22.
3. (a) Chaza isikhundla sikaJesu kusukela ngo-1914 C.E. (b) Uye wahileleka kuyiphi impi? (c) Kungani abalandeli bakaJesu abagcotshiwe namuhla bengaphansi kokuhlaselwa?
3 Iqiniso elingokwesiprofetho lembula emehlweni ethu okholo ukuthi kusukela ngasekupheleni konyaka ka-1914 C.E., uKristu Jesu okhazinyulisiwe uye wamiswa uJehova njengoMphathi weMpi wamabutho asezulwini ezingelosi. (AmaHubo 110:1, 2; Mathewu 25:31) Ngokushesha wahola lamabutho ngokumelene noDeveli nezingelosi zakhe, ehlanza amazulu ngokususa ukuba khona kwabo okungcolisayo futhi ebalahlela embulungeni yethu enguMhlaba. Lapho, elindele isibonakaliso sokugcina esivela kuJehova sokubhubhisa isitha, uKristu Jesu uqhuba umsebenzi obonakalayo womhlaba wonke lowo ngokufanayo ohilela impi. (IsAmbulo 12:7-9) USathane namabutho akhe angamademoni, beqaphela ukuthi isikhathi sabo sifushane, ngentukuthelo balwa impi nensali yabalandeli abagcotshiwe bakaJesu. Ngani? Ngoba ngokulalela imemezela uMbuso kaNkulunkulu wayo nokaKristu wakhe.—IsAmbulo 12:17.
‘Amasosha KaJesu Kristu’
4. Chaza lokho okwenza ‘isosha elihle likaKristu Jesu.’
4 Kusobala ukuthi bonke labo abahlanganyela futhi abasekela insali yabantu bakaNkulunkulu abagcotshiwe ngokufanayo baba izisulu zalempi esabekayo. Ngakho-ke, kunoma ubani okhonza njengomunye woFakazi BakaJehova namuhla nasi iseluleko sikaPawulu esikhuthazayo: “Hlanganyelani nami ukuhlupheka njengebutho elihle likaKristu. Akakho osempini olibala imidingo yalokhukuphila, aze akholeke kulowo abuthwé nguye.” (2 Thimothewu 2:3, 4) Noma imuphi omunye umsebenzi ekuphileni kumelwe uthathe indawo yesibili kunenkonzo yethu kuMphathi weMpi omkhulu kaJehova.
5. (a) UPawulu uyichaza kanjani impi yamaKristu engokomoya? (b) Siyini isinqumo samasosha kaKristu, futhi yini eyowakhuthaza ekulweni?
5 Ukuba ngokoqobo kwesimo salempi engokomoya kuyakhanya kithi njengoba sicabangela lezizikhumbuzo zikamphostoli uPawulu: “Ngokuba noma sihamba sisenyameni kasilwi ngokwenyama, ngokuba izikhali zethu zokulwa kasizo ezenyama, kodwa ngaye uNkulunkulu zinamandla okubhidliza izinqaba, sichitha izizindlo, nakho konke okudephileyo okuziphakamisela ukuthiyana nokumazi uNkulunkulu, . . . futhi silungele ukujezisa ukungalaleli konke, nxa sekuphelele ukulalela kwenu.” (2 Korinte 10:3-6; bheka futhi abase-Efesu 6:12.) Njengamasosha kaKristu Jesu, sifuna ukubonisa kubo bonke ukuthi siyazithoba eziyalweni zakhe zempi futhi sikulungele ngaso sonke isikhathi ukuhlanganyela futhi senze amasu awakhethayo. Ukuze sikhuthazeke enkundleni yempi engokomoya, masiphenye amakhasi eZwi likaNkulunkulu esehlakalweni esingokomlando kwaIsrayeli wasendulo. Lapha singathola izibikezelo ezingokwesiprofetho zezenzakalo ezenzekayo manje.—Roma 15:4; 1 Korinte 10:11.
Ukukhetha Inkosi—Okudlule Nokwanamuhla
6. Chaza izenzakalo zangaphambi kokwamukelwa kukaDavide njengenkosi nendlela lokho okwathinta ngayo abantu ngabanye.
6 Cabangela isimo esikhathini seNkosi uDavide, eyakhethwa uNkulunkulu njengenkosi yawo wonke uIsrayeli. Ngemva kokufa kukaSawule amadoda akwaJuda aba ngawokuqala ukuqaphela ukukhetha kukaNkulunkulu uDavide njengenkosi yawo. Ezinye izizwe zakhetha indodana kaSawule uIshi-Bosheti njengenkosi, futhi lokhu kwaphumela embangweni ongapheli. (2 Samuweli 2:1-11; 3:1) Ngokubulawa kukaIshi-Bosheti eminyakeni emibili kamuva, indlela yavuleka ukuba ezinye izizwe zizihlanganise noJuda. Ngemva kwesikhathi uDavide wagcotshwa ngokufanele njengenkosi phezu kwawo wonke uIsrayeli. (2 Samuweli 4:5-12; 5:1-3) Kodwa phakathi nalesikhathi abantu abaningi kwafuneka bakhethe ukuthi ubani ababeyomkhonza. Kwakumelwe bacabangele ubufakazi bokufaneleka kwalensizwa enguDavide. Ingabe ngempela wayengogcotshiweyo kaJehova? Ingabe wayeyilowo onesibusiso sikaJehova ngokuphambene nokungamukelwa kwaphezulu kukaSawule? Ingabe uDavide wayezohola amabutho akwaIsrayeli ngokuphumelelayo ekulweni nezitha ezazizungezile?
7. Yini eyayihilelekile ekwamukeleni ubukhosi bukaDavide?
7 Ngokusobala amanye amaIsrayeli anquma ukusekela indlu eyayiqalekisiwe kaSawule. Abanye banquma ngokwalokho okubonakala kungokwenzuzo kubo. Kodwa abanye babelokhu bemanqikanqika. Kodwa ngesikhathi esithile kwakumelwe kukhethwe, futhi yeka ukuthi bajabula kanjani labo abakhetha ngenhliziyo yonke ukusekela inkosi uDavide! Laba babengenabo ubugovu noma bethatha inkambo elula. Babengebona abamanqikanqika. Kunalokho, ukusekela kwabo inkosi kaJehova kwabaholela ekwamukeleni indima yenkuthalo njengezikhonzi zikaDavide namasosha. Njengoba ezoku-1 IziKronike 12:22 zibika: “Ngokuba imihla ngemihla bafika kuDavide ukumsiza, kwaze kwaba-yimpi enkulu njengempi kaNkulunkulu.”
8. Ezo-1 IziKronike 12:32, 38 zibachaza kanjani labo abamukela ubukhosi bukaDavide?
8 Ngokwemininingwane yombhalo siphawula ukuthi phakathi kwalabobantu abaningi kwakunalabo “abazi ukuqonda izikhathi ukuba bazi okufanele ukwenziwa nguIsrayeli.” (1 IziKronike 12:32) Laba babengesivivi ekuthobeleni kwabo inkosi. Babehlome ngokuphelele ukuze baziveze belungele ukwamukela ukuhola kukaDavide empini. Abazange balindele ukuphila okunethezekile. ‘Baziqonda izikhathi’ futhi bazi ukuthi umbuso wawuzungezwe izitha ezazilungele ukushwabadela uIsrayeli futhi zichithe ukukhulekelwa kukaJehova. Labo ababevela empumalanga yoMfula iJordani kwakunga“madoda empi angahlela impi” futhi elungele ukukhonza ngaphansi kukaDavide “ngezinhliziyo ezipheleleyo.”—1 IziKronike 12:38.
9. (a) Ingabe siyakuthola okufanayo namuhla nesimo sosuku lukaDavide? (b) Iyiphi impikiswano ebhekene nawo wonke umuntu namuhla?
9 Yeka ukuthi kuvusa amadlingozi kanjani manje ukubona kwembuleka phambi kwamehlo ethu isimo esifana naleso namuhla! UDavide Omkhulu, uKristu Jesu, uye wakhethwa uJehova futhi manje ubusa njengeNkosi yasezulwini. Izizwe zomhlaba zimelene nobukhosi bakhe. Zisongela ukuqeda izikhonzi zeNkosi emhlabeni. (IHubo 2:1-3) Ngakho-ke, emhlabeni wonke abantu ngabanye babizelwa ukuba bathathe uhlangothi kwenye ingxenye yempikiswano noma kwenye. Impikiswano yile: Ingabe basekela uMbuso weNdodana kaJehova noma bamelene nawo? Uquqaba lumanqikanqika. Abanye banquma ukuma kwabo ngokwalokho okubonakala kuyinzuzo kubo, ngobugovu becabangela okwabo siqu ukulondeka nenzuzo kuphela.—Zefaniya 2:2, 3; Joweli 3:14.
10. (a) Kungani abaningi bemanqikanqika ngokwamukela ubukhosi bukaKristu? (b) Imuphi umthwalo manje ophezu koFakazi BakaJehova?
10 Njengoba udumo lwabameleli boMbuso kaNkulunkulu emhlabeni luqhubeka lusakazekela yonke indawo, abantu abengeziwe bayakwazi ukwenza ukukhetha ngokuhlakanipha. (Mika 4:1-3; Zakariya 8:23) Abaningi abakanqumi ngobanje bantula ulwazi lwamaqiniso; bantula ukuqonda maqondana nencazelo yalezikhathi nesidingo esiphuthumayo ngabo sokuba bathathe ukuma kwabo okuqinile ngaseMbusweni kaNkulunkulu. Ngakho-ke uquqaba lusengaphansi kwethonya lamanga kaSathane futhi lisengozini yokudonselwa ekubhujisweni noSathane nabangane bakhe abangababulali. Ngakho-ke, ubizo oluphuthumayo ngabo bonke oFakazi BakaJehova luwukuzihlela ngasohlangothini lukaDavide Omkhulu, uKristu Jesu ohlomele ukulwa nesitha.—Qhathanisa noMathewu 12:30.
Obani Abafanelekela Impi?
11. Chaza ukuthi uJesu wayibonisa kanjani indlela yokuthi ukulalela kwethu uKristu kunge“nziwa ngokuphelele.”
11 Empini yawo engokomoya wonke amasosha kaKristu kumelwe ahlangabezane nezinye izimfuneko ezibaluleke kakhulu. Ngokwesibonelo, uPawulu wabonisa indlela ukulalela kwawo uKristu okumelwe ‘kwenziwe ngayo ngokuphelele.’ (2 Korinte 10:5, 6) Singaqonda kanjani ukuthi lokhu manje kuyabonakala enkambweni yethu siqu nesimo sengqondo? Imibuzo elandelayo kumelwe isisize ekunqumeni kwethu ngabanye:
Ingabe ngempela sesiyibekile inkonzo yethu kuNkulunkulu noKristu ngaphambi kwanoma ibuphi ubuhlobo bobuntu? (Mathewu 10:37)
Ingabe sesiye sakuyeka yini noma ikuphi ukulangazelela ukuceba ngokwezinto ezibonakalayo noma udumo ezweni? (Luka 6:20-26)
Ingabe sishisekela ukuthokozisa umHoli wethu noMbusi esikhundleni sokushisekela lezozinto uJehova asithembise ukusinikeza zona—ukudla, okokwembatha nendawo yokuhlala? (Mathewu 6:25-32)
Sesiyekile yini ukwahlulela nokugxeka amabutho kaKristu esikanye nawo ukuze singalethi ukwahlukana nokungezwani emabuthweni angcwele? (Luka 6:37; IHubo 133:1-3)
Ingabe sibathanda ngempela abazalwane bethu futhi sibafisela inhlala-kahle bonke esibuthwe nabo kulempi engokomoya yokulwa nezitha zikaNkulunkulu? (Johane 13:35; 1 Petru 4:8)
Lena imibuzo ehlolayo bonke abalandeli bakaKristu okumelwe bayiphendule ngokomuntu siqu.
12. Kungayiphi indlela abangane nezitha zoMbuso kaNkulunkulu ezingahlukaniswa ngayo? (Mathewu 25:31-46)
12 Enye indaba ebalulekile edinga ukucatshangelwa enhlalakahleni yethu yobuKristu iwukuba nombono okhanyayo ngegebe elihlukanisa inhlangano ehlanzekile kaNkulunkulu ezinhlanganweni eziyekelelayo, eziziphethe kabi zalelizwe. (Genesise 3:15; IHubo 97:10) Amabutho alwayo empini kumelwe akwazi ukwehlukanisa ngokucacile phakathi kwawangakubo nezitha. Lokhu kwenziwa kube sobala ngokugqoka kwawo okufanayo okuwahlukanisayo kanye nezikhali zempi. Siye sayalwa maqondana nezithelo zomoya kaNkulunkulu. Siye saqasheliswa imisebenzi yenyama, nayo ebonakala njengezithelo. (Galathiya 5:19-24) Ngakho-ke akukho bunzima bokwehlukanisa inhlangano kaNkulunkulu nenhlangano kaSathane.
13. Imihlangano eqhutshwa njalo ifeza yiphi injongo empini yethu engokomoya?
13 Ngokungaphezulu, ingabe siyabonisa ngenkambo yethu yesenzo ukuthi ‘siyasiqaphela isidingo sethu esingokomoya’? (Mathewu 5:3; Heberu 10:25) Empini engokwenyama kufanelekile ukuba izinduna namanye amaqembu abe nezikhathi zokubonisana ukuze ahlale ezazi izinyathelo zokuthathwa enkundleni yempi namasu amuva ezitha. Ngokufanayo, imihlangano yethu eHholo LoMbuso noma kwenye indawo ibalulekile ukuze siqiniswe njalonje ngeZwi likaNkulunkulu nangomoya wakhe ongcwele, nokuba siqasheliswe ukuviva kwezitha.—1 Petru 5:8.
14. Amazwi kaZakariya kuLuka 1:74, 75 ayiveza kanjani kahle imizwa yethu?
14 Yeka ukuthi sonke kumelwe simbonge kangakanani uJehova neNdodana yakhe ngokusihlomisela kahle kangaka impi engokomoya! Njengoyise kaJohane uMbhapathizi, uZakariya, sizizwa sishukunyiselwa ukudumisa uJehova ngokusinikeza ‘ilungelo lokumkhonza, simkhonze singenakwesaba ngobungcwele nangokulunga phambi kwakhe zonke izinsuku zethu, ngemva kokusikhulula esandleni sezitha.’ (Luka 1:74, 75) Siye sakhululwa eBabiloni Elikhulu. Futhi manje, sesiye sahlangabezana nezimfuneko zomHoli wethu noMphathi, sisesimweni sokuhlelelwa ukulwa nezitha zikaNkulunkulu noKristu.
15, 16. (a) USathane uye wafaka miphi ‘imicabango’ ‘nezinto ezigxilile’ ezingqondweni zabantu? (b) Lokhu kunga‘chithwa’ kanjani, futhi lokhu kwenzeka ngezinga elingakanani?
15 Zonke izikhali zempi namabutho ahlomile alelizwe kunjengezinto zokudlala zezingane uma kuqhathaniswa nezimfundiso ezingamanga zabantu eziphefumlelwe uSathane nesixuku sakhe samademoni. Ngokufisela ukuba njengoNkulunkulu ngobukhulu nangamandla, uSathane uye wandisa izimfundiso zakhe ezingamanga yonke indawo. Uphikisana noNkulunkulu weqiniso futhi ngamanga uthi yena ngokwakhe uwumthombo wolwazi. Ufundisa ukuthi umuntu akamdingi uJehova, nokuthi ngamandla akhe, umuntu angathuthukela ezingeni lokuba njengoNkulunkulu. UDeveli uphika amalungelo kaNkulunkulu okuba uMdali, ugxilisa esintwini umbono wokuthi umuntu uvele ngokuziphendukela kwemvelo. Uye waphumelela ekwenzeni izixuku zikholelwe ukuthi akukho ukufa okungokoqobo, ukuthi lokho okubonakala sengathi ukufa kumane nje kuwukushintshela kolunye uhlobo lokuphila. Uye waveza izinhlobonhlobo zohulumeni, bonke begxile futhi besekelwe ebugovwini. Lezi nezinye eziningi ngokwengeziwe ‘ziyizizathu ezinkulu eziye zaphakanyiswa ngokumelene nolwazi lukaNkulunkulu.’—2 Korinte 10:5.
16 Leyo‘miqondo egxile ngokuqinile’ idinga ukuchithwa, ukudalulwa, ukuze izisulu zenkohliso zikwazi ukukhululwa ngokwengqondo nangokomoya. (2 Korinte 10:4) Sinezikhali ezidingekile nesivikelo—ukholo njengehawu, iqiniso njengebhande eliqinisayo, ukulunga njengesivikelo senhliziyo, ithemba losindiso njengesigqoko, iZwi likaNkulunkulu njengenkemba nezindaba ezinhle zokuthula, zokusiza labo abafuna ukuzithoba eNkosini ekhethwe uJehova. (Efesu 6:14-17) Ngokusebenzisa lezikhali ezingokomoya ofakazi bakaJehova abangamaKristu bakhulula iziboshwa ezingenakubalwa!
Ukunqoba Kuqinisekisiwe
17 IHubo 45:3, 4 libonisa muphi umphumela uma uKristu elwa nesitha okokugcina?
17 Isikhathi sisondela kakhulu lapho uJehova eyonikeza iNkosi yakhe ekhethiwe uphawu lokuba ilwe nesitha empini yokugcina. Ekhuluma nalowomHoli wamabutho asezulwini, uJehova uyomemeza ngamazwi eHubo 45:3, 4: “Bophela inkemba yakho okhalweni lwakho wena-qhawe, kube-ngukuphakama kwakho nobukhosi bakho. Hlahlameleka ebukhosini bakho, uqhubeke ngenxa yeqiniso nokuthobeka nokulunga; isandla sakho sokunene siyakukufundisa izinto ezesabekayo.” Umphumela walesosenzo uqinisekile. Yonke inhlangano kaSathane, ebonakalayo nengabonakaliyo, iyosuswa, kususwe emhlabeni yonke imibuso emibi necindezelayo. Yeka usuku olujabulisayo okuyoba yilo ngabasindayo, lapho bonke abacindezeli, abaqambi manga, nezifebe nababhubhisi bomhlaba benyamalele phakade!—IsAmbulo 11:16-18; 19:11-21.
18. Kusukela ngo-1914 C.E., kuye kwenzeka kanjani “ukubuthanela ukuzihlelela impi”?
18 Yeka ukuthi kumangalisa kanjani ukubona ukugcwaliseka kwezimo ezimangalisayo ezilotshwe emiBhalweni manje zenzeka! Osukwini lwethu, abafowabo bakaKristu Jesu abagcotshiwe abangokomoya baba ngabokuqala ukumamukela njengeNkosi yabo, ngemva kokubekwa kwakhe esihlalweni sobukhosi ngo-1914 C.E. Bonke baye ‘bahlelelwa impi.’ Khona-ke, ikakhulukazi kusukela ngo-1935, lapho ukukhanya kukhanyisa isAmbulo 7:9-17, “isixuku esikhulu” siye saqaphela umthombo weqiniso wempumelelo nesibusiso futhi siye ‘sabuthana ndawonye.’ Siye sazihlanganisa nowanamuhla uIsrayeli ongokomoya, siyabonakala ekubuthweni kwempi, silungele ukuhlanganyela ukuhlupheka nobunzima bempi esobala nayo yonke inhlangano kaSathane—kube ukubonga nodumo kuJehova.—Zakariya 2:11.
19. Khona-ke, kumelwe sibe yini isinqumo somunye nomunye ufakazi kaJehova oyiqhawe?
19 Ngokukhanyayo-ke, izinsuku ziyaphuthuma. Lesi akusona isikhathi sokucabanga ukuthi impi engokomoya isiphelile. Kwangathi isitha singeze sasizuma enkathini ebucayi esondelayo yenkonzo yethu engcwele. Kungakhathaliseki ukuthi singabensali yamaIsrayeli angokomoya noma singabe“sixuku esikhulu” sabangane bayo, sonke ‘singama sibuthanele ukulwa, ngenhliziyo epheleleyo.’ Kwangathi singaqhubeka ngesibindi sikhuza isaga sempi ngoba uJehova usiqinisekisa ngokunqoba!—2 IziKronike 20:15.
Ukubukeza:
□ Kungani manje kuphuthuma “ukubuthanela impi”?
□ Hlobo luni lwempi oFakazi BakaJehova abahileleke kuyo?
□ Bonke abantu namuhla babhekene nayiphi impikiswano ebalulekile?
□ Obani abafaneleka njenga‘masosha kaJesu Kristu’?
□ Ikuphi ukunqoba manje okuqinisekisiwe?
[Isithombe ekhasini 17]
Ukuhlangana njalo eHholo LoMbuso (1) kusiqinisela impi engokomoya, (2) kusisiza ukuba ‘siqonde izikhathi’ (3) futhi kusibonisa indlela yokukhonza “ngezinhliziyo eziphelele”