Ihhashi Elimnyama Lendlala

“BHEKA!, nanto ihashi elimnyama nohlezi phezu kwalo ephethe isilinganiso ngesandla sakhe. Ngase ngizwa kungathi izwi phakathi kwezidalwa ezine lithi: Imbenge kakolweni ngodenariyu nezimbenge ezintathu zebhali ngodenariyu; kepha amafutha newayini ungakoni.”—IsAmbulo 6:5, 6.

Ngalamazwi adumazayo, umphostoli uJohane uchaza umgibeli wesithathu wabagibeli bamahhashi abane besAmbulo, ogibele ihhashi elimnyama lendlala.a Ingabe wake wazibuza ukuthi lokhu kugibela kwakhe okudlokovulayo kwenzeka nini? Kumelwe uzibuze. Kumemezela ushintsho olukhulukazi lelizwe eliyolubona.

Abanye banomuzwa wokuthi lomgibeli ubelokhu egibele phakathi kwesintu. Futhi yiqiniso ukuthi umlando ugcwele imibiko yendlala kusukela kudala ezinsukwini zika-Abrahama noJosefa kuze kube sendlaleni enkulukazi kwezake zabakhona, leyo eyahlasela iShayina phakathi kuka-1878 no-1879. (Genesise 12:10; 41:54) Izilinganiso zamanani abantu baseShayina abafa kuleyondlala ziphakathi kwezigidi eziyi-9 kuya kweziyi-13.

Nokho, ihhashi elimnyama nomgibeli walo akuhlobene nakho konke ukuswelakala kokudla emlandweni. Kungani kunjalo? Kungoba embonweni wakhe uJohane wabona kuhamba ngaphambi kwehhashi elimnyama ihhashi elibomvu lempi, nomgibeli wehhashi elimhlophe ethwele umqhele. Lomgibeli uJesu Kristu, iNkosi esanda kumiswa futhi ophuma “engonqobayo noyakunqoba.” (IsAmbulo 6:1, 2) Ngakho, ihhashi elimnyama eligadulayo nomgibeli walo kufanekisela ukuswelakala kokudla okukhathaza umhlaba uma uJesu eba iNkosi emisiwe yoMbuso kaNkulunkulu.

Umbono wabagibeli bamahhashi besAmbulo uhambelana nesiprofetho esashiwo uJesu ngokwakhe. Ngesinye isikhathi wabikezela ngokuningiliza okukhulu izimo emhlabeni ezaziyophawula ukuba khona njengeNkosi engabonakali emazulwini. Ingxenye yalesosiprofetho yathi: “Ngokuba isizwe siyakuvukela isizwe, nombuso uvukele umbuso, kube-khona indlala nokuzamazama komhlaba izindawo ngezindawo.”—Mathewu 24:3, 7.

Lesisibonakaliso sigcwaliseka nini? Ikakhulukazi kunini lapho umgibeli wehhashi elimelela indlala egabavula emhlabeni? Eminyakeni eminingi oFakazi BakaJehova baye bamemezela ukuthi isizukulwane esabona unyaka ka-1914 yiso esiye sabona imiphumela yokudlula komgibeli wehhashi. Ingabe ukuqonda kwabo akunaphutha?

‘Qha,’ abanye bangase basho. ‘Phela umhlaba ukhiqiza ukudla okuningi ngokwengeziwe kunangaphambili, siyababonga abezolimo besimanje. Kunamanxusa ahlangene neZizwe Ezihlangene, njengeFAO (Inhlangano Yezokudla Nezolimo), ezama ukuba wonke umuntu nakanjani athole ukudla okwanele. Ngaphandle kwalokho, izindinganiso zokuphila ziye zakhula ngokumangalisayo kwezinye izindawo. Izizwe ezinjengezaseNgilandi, lapho indlala yayivamise khona, sekuyethukela nje kubé nendlala manje. Amazwe amaningi namuhla ajabulela izinga eliphezulu lokuphila kunelake laba khona. Singasho kanjani ukuthi lesizukulwane ngaphezu kwazo zonke ezinye yiso esizwa imiphumela yehhashi elimnyama lendlala?’

Lowo umbuzo othakazelisayo. Kuyiqiniso ukuthi isintu kuwo wonke umlando siye sahlaselwa indlala. Bobabili umphostoli uJohane noJesu ngokwakhe babekwazi lokho. Kodwa babikezela isikhathi lapho indlala yayiyohlasela umhlaba ngendlela ephawulekayo. Lendlala yayiyophawuleka kanjani? Futhi, ngenxa yokuchuma ngokwezinto ezibonakalayo eziningi zalelizwe lesimanje, ingabe sikhona isizathu sokukholelwa ukuthi isizukulwane esiphilayo manje sibona indlala?

[Umbhalo waphansi]