Indlala Isho Ukuthini?

NAKUBA kuyiqiniso ukuthi umsebenzi wezolimo uye wenza intuthuko enkulu eminyakeni yamuva, kuyiqiniso futhi ukuthi kusukela ngo-1914 isintu siye sabona ukuntuleka kokudla okuningana. Make sihlole okunye kwalokhu ukuze sibone ukuthi kungenzeka yini kugcwalisekise isiprofetho sikaJesu nombono womphostoli uJohane ngalendaba. Uma kubonakala kuhambelana, khona-ke siyoqhubeka futhi sibone ukuthi ingabe kukhona yini okuthile kulelikhulu lamashumi amabili leminyaka ngokuntuleka kokudla okuphawuleka kwehlukile kulokho okwabonwa ngaphambili emlandweni wezwe.

Indlala Phakathi Kwenala

Abanye bangase babe nomuzwa wokuthi ngoba kunomnotho omningi kangaka namuhla, akunangqondo ukuthi lesi isikhathi lapho ihhashi elimnyama lendlala selikuwo wonke umhlaba. Kodwa iBhayibheli alisho ukuthi wonke umuntu uyobe elamba ngalesosikhathi. Eqinisweni, izwi embonweni lamemezela intengo ephakeme kakhulu yokudla okuvamilea lathi futhi: “Amafutha newayini ungakoni.” (IsAmbulo 6:6) Amafutha newayini kwakuyizinto zokunethezeka. Ngakho-ke isAmbulo sibonisa ukuthi abanye babeyojabulela ukunethezeka kulapho abanye bephethwe indlala.

NoJesu lapho eprofetha ngendlala, waxwayisa: “Xwayani ukuba izinhliziyo zenu zingasindwa ngukuminza nokudakwa nokunaka okwalokhukuphila, lunizume lolosuku ningazelele, ngokuba luyakufika njengogibe.” (Luka 21:34, 35) Ngesikhathi lapho abanye bephethwe indlala, abanye babeyoba sengozini yokuminza. Ingabe kunjalo namuhla?

Yebo. Eqinisweni, imibiko isitshela ukuthi ukwenyuka kwezinga lokuphila kwabanye abantu kubangela ukuba abanye balambe. “Ukuthuthuka kwezinga lokuphila nesidingo sokudla esandayo kulo lonke izwe kuye kwacindezela intengo yokudla [okubangela ukuba ukudla kubize kakhulu] okwenza kube nzima ngamazwe ampofu ukuba athenge izidingo zokudla kwawo kwamanye amazwe.” (The New York Times, August 16, 1981) Ngamanye amazwi, “ukuminza” kwabanye kwandisa “ukuntuleka kokudla” kwabanye.

“Izindawo Ngezindawo”

UJesu waxwayisa ngokuthi kwakuyoba khona “indlala . . . izindawo ngezindawo.” (Mathewu 24:7) Ingabe lokho kuye kwenzeka kusukela ngo-1914? Yebo. Ukubala ezimbalwa: Ngo-1921, indlala yabulala abantu abayizigidi eziyi-5 eU.S.S.R. Ngo-1929, indlala yabulala abantu abalinganiselwa ezigidini ezintathu eShayina. Ngawo-1930 izigidi ezinhlanu zabulawa indlala eU.S.S.R. Eminyakeni embalwa nje edlule isomiso esadonsa isikhathi esithile emazweni asemnceleni woGwadule iSahara sabangela izimpabanga ezingenakubalwa nokufa kwabayizi-100 000.

Nokho, khumbula ukuthi embonweni womphostoli uJohane ihhashi elimnyama lendlala lalandela ihhashi elibomvu lempi. Ngokuvumelanayo, indlala osukwini lwethu iye yaba umphumela wempi ngokuqondile. (IsAmbulo 6:3, 4) Ngokwesibonelo, impi yamaqembu aseSpain yabangela indlala kulelozwe ngawo-1930. IMpi Yezwe II yabangela indlala eGreece, ePoland, eRussia, eHolland nakwezinye izindawo. Abangaphezu kwesi-1 500 000 bafa eBengal, eNdiya ngeminyaka yawo-1943-44 endlaleni eyayibangelwa ngokwezinga elithile ileyompi efanayo.

Muva nje, ngawo-1960, abantu babulawa indlala eCongo (manje okuyiZaire) naseNigeria ngenxa yempi yamaqembu esizwe esisodwa. Abantwana abalambayo eKampuchea babesigqolozele emaphephandabeni ethu phakathi nempi kulelozwe. Muva nje, sifunde ukuthi ababaleki abangaphezu kwesigidi basongelwa indlala eSomalia, lapho babalekela khona isomiso nempi eThopiya. Ababiki bezindaba bathi izimpabanga ezingaphezu kwezigidi eziyi-9 cishe zizofa indlala eThailand, eSudan, eZaire, eNicaragua, eHonduras nasePakistan. Ngakho izindaba ezibuhlungu azipheli.

Ngokomlando, indlala iye yabangelwa impi, isomiso, ukuhlupha kwezilokazana noma enye inhlekelele. Ingabe siye sakubona yini ukuntuleka kokudla okunjalo okungaphezu kwalokho okwabonwa yizizukulwane zangaphambili? Asinakusho ngokuqiniseka ngoba izibalo ezibonisa lendaba aziphelele. Kodwa lelikhulu leminyaka liye laba nengxenye yalo ezinhlekeleleni zemvelo futhi liye lakhathazeka kakhulu ngenxa yempi kunanoma isiphi esinye isizukulwane emlandweni.b Ngakho, kungathiwa ngezwi elilodwa kuye kwaba khona indlala engaphezu kwanoma inini ngaphambili. Ngokuqinisekile, siye sabona indlala phakathi kwenala, indlala ebangelwa impi nokuntuleka kokudla “izindawo ngezindawo,” njengoba kwaprofethwa.

Kunohlobo olusha lokuntuleka kokudla manje okukhulayo okuphawula isikhathi sethu niengesehlukile.

“Isimo Esivelele Emlandweni Womuntu”

Esingenisweni sakhe encwadini The Dimensions of World Food Problems, umhleli, uE. R. Duncan, uchaza ukuthi kuze kube muva nje ukudla kwakuvamise ukwanda nabantu. Kuyiqiniso, izinhlekelele ziye zabangela indlala lapha nalapha. Kodwa abantu basinda. Nokho, kusukela ngawo-1940 isici esisha siye sabonakala: ukwanda kwabantu okusheshayo kwakhinyabeza amandla omhlaba esikhathi eside okuzondla ngokwawo. “Lesisimo,” uyasho “singesivelele emlandweni womuntu.”

INdiya iyisibonelo. INdiya iye yabona indlala enzima kuwo wonke umlando wayo, kodwa namuhla kwehlukile. “Kuze kwaba kulelikhulu leminyaka elidlule, futhi kwaba ngezinga elikhulu kulelikhulu lamashumi amabili, lapho izimo ziye zaba ngezingabekezeleleki [eNdiya]. Leliqiniso alinakugcizelelwa ngokwanele ukuze liphikise inkulumo ephahlukayo yokuthi indlala nomlando abangane abangenakwehlukaniswa.” Kusho uGeorg Borgstrom, isazi esidumile ezweni lonke ngokudla kwezwe.

Uqhubeka athi: “Lapho iNgilandi ifika okokuqala kulelizwekazi elincane elicebile, cishe eminyakeni engamakhulu amabili edlule, kwakunabantu abathi ababe yizigidi ezingamashumi ayisithupha abebehlala kulendawo eyi-INdiya namuhla. Kulabo, abacela ezigidini eziyishumi babelamba. Kusukela kulesosikhathi, inani labantu liye landa ngokuphindwe kasikhombisa futhi manje isimo sesishintshile, kunabondliwayo ngokwanele abalinganiselwa ezigidini eziyishumi.”—The Hungry Planet, nguGeorg Borgstrom.

Isimo esifanayo siyakhula kwamanye amazwe. Kuyiqiniso, kucatshangwa ukuthi ezweni lonke kusenokudla okwanele okungakhiqizelwa wonke umuntu. Kodwa uma abantu beqhubeka banda, ngokushesha lokhu akuyikuba njalo. Ngisho namanje, amazwe amaningi ampofu ake akhiqiza ukudla okwanele izidingo zawo awasakwazi, futhi ngenxa yokuthi ampofu awakwazi ukuthenga ukudla okwanele ukuba aphe abantu bawo. Ngesinye isikhathi, ngisho nasezweni elinokudla okwanele, iningi labantu limpofu kangangokuba alikwazi ukuthenga ukudla. Ngakho libulawa indlala.

ILos Angeles Times yabika nyakenye: “Ukuntuleka kokudla eAfrika kuye kwadlanga ezinyangeni eziyisithupha ezidlule futhi amazwe angama-28 aphethwe indlala.”

IVancouver Sun yathi: “Namuhla, ekupheleni konyaka ‘ovamile,’ iFAO [Inhlangano Yokudla Nezolimo] ilinganisela ukuthi kunabantu abayizigidi ezingama-450 abangabulawa indlala, nabalinganiselwa ezigidini eziyinkulungwane abangenakudla okwanele.”

Umbiko ovela kuyi“United Nations Children’s Fund” (Esikhwameni Semali Yokunakekela Abantwana SeZizwe Ezihlangene) ulinganisela ukuthi izingane eziyigidi eziyi-17 emhlabeni zabulawa indlala nezifo ngo-1981. Lokho kungaphezu kwesilinganiso sabafa ngendlala eyayinzima yaseShayina ngeminyaka yawo-1878-79.

Ingabe likhona ikhambi elithile? IThe New York Times iyabika: “Izibalo Zebhange Lezwe zibonisa ukuthi kuyodingeka ukulondolozwa kwemali eyizinkulungwane eziyizigidi ezingama-R600 emazweni asathuthuka . . . eminyakeni eyishumi ezayo ukuze kube khona ukudla okungaqeda lendlala. Akekho oneqiniso lokuthi leyomali enkulu kangaka iyovelaphi.” Ngakho-ke, akukho khambi elingokoqobo elibonakalayo.

Izindaba Ezinhle

Lona kanye izinga lenkinga yendlala namuhla neqiniso lokuthi isenokuqhubeka ibe nzima lenza ibe ngevelele. Kunokuthile okungajwayelekile ngayo. Ihambisana nezinye izinkinga eziningi ezibonakala zingaxazululeki.

Embonweni womphostoli uJohane, ihhashi elimnyama lendlala lalihambisana nehhashi elimpofu lempi nehhashi elibomvu lezifo. Futhi uJesu, lapho ebikezela ngendlala “izindawo ngezindawo,” wathi lokhu kwakuyohambisana nokuzamazama komhlaba okukhulu, ubhici, izimpi nezinye izinhlupho eziningi. (Mathewu 24:7-14; Luka 21:10-28) Iqiniso lokuthi zonke lezinto ziyenzeka namuhla liphawula lokhu njengesikhathi esibalulekile uJesu nomphostoli uJohane abasibikezela.

Ukugibela kwabagibeli bamahhashi abane besAmbulo kwakuyoba isibonakaliso sokuthi uJesu osanda kuthweswa umqhele wayephuma “engonqobayo noyakunqoba.” (IsAmbulo 6:1-8) Incazelo eningiliziwe yezenzakalo zezwe uJesu ayinikeza yayiyimpendulo yombuzo wabafundi bakhe: “Lokhu kuyakuba-nini, nesibonakaliso sokuza kwakho nesokuphela kwezwe siyakuba-yini na?”—Mathewu 24:3.

Siphila ezinsukwini ezibalulekile. UJesu manje uyabusa ngokungabonakaliyo njengeNkosi. Ngokushesha ‘uyonqoba’ ngokususa abantu ababi aphuce uSathane uDeveli amandla, oyimbangela eyinhloko yobubi. (IHubo 37:9-11; IsAmbulo 20:1-3) Kungakho uJesu aqhubeka wathi: “Nxa nibona lezozinto zenzeka, yazini ukuthi umbuso kaNkulunkulu useduze.”—Luka 21:31.

Lezi izindaba ezinhle ezilandela usizi esifunda ngalo emaphephandabeni ethu. Ngokushesha ukugadula kwehhashi elimnyama lendlala kuzophela futhi uMbuso kaNkulunkulu uyoletha uhulumeni olungileyo emhlabeni. (IHubo 72:1, 16) Lolo kuyoba ushintsho olukhulukazi oluzuzisayo kuwo wonke umlando wesintu. Kungani ungazifundeli ngalo ngokwakho eBhayibhelini lakho siqu? OFakazi BakaJehova bayojabulela ukukunikeza noma iluphi usizo oludingayo. Kanjalo ungaqonda incazelo engokoqobo yenkambo eyingozi yehhashi elimnyama lendlala.

[Imibhalo yaphansi]