IZwi LikaNkulunkulu Liphilile

Yini Umbuso KaNkulunkulu Oyoyenza?

ENTSHUMAYELWENI yakhe edumile yaseNtabeni, uJesu Kristu wafundisa abalandeli bakhe umthandazo ngokuvamile obizwa ngokuthi Baba Wethu noma uMthandazo weNkosi. Mhlawumbe uye wawuphinda izikhathi eziningi. Izinkulungwane zabantu ziye zakwenza lokho. Ziye zathandaza kuNkulunkulu: “Umbuso wakho mawufike.” (Mathewu 6:10) Lapho wenza leso sicelo, ingabe uyazi ukuthi yini oyicelayo?

Mhlawumbe njengabantu abaningi uye washo lamazwi ngaphandle kokucabanga kangako ngencazelo yawo. Kodwa njengoba uMbuso kaNkulunkulu unguhulumeni woqobo, kuyokwenzekani ngohulumeni bezwe abakhona lapho uMbuso kaNkulunkulu ufika? Ingabe uye wacabanga ngakho?

IBhayibheli lisishiya singangabazi ngempendulo. Esiprofethweni esikhomba phambili osukwini lwethu, iBhayibheli lithi: “Ezinsukwini zalawomakhosi uNkulunkulu wasezulwini uyakumisa umbuso [lona uMbuso kaNkulunkulu, lowo amaKristu awuthandazelayo] ongasoze wachithwa. . . . Uyakuchoboza, uqede yonke lemibuso [imibuso ekhona yezwe], wona uqobo ume phakade.”—Daniyeli 2:44.

Cabanga nje ngalokho! UMbuso kaNkulunkulu uzobhubhisa bonke ohulumeni bezwe abakhona. Futhi lapho uthandaza, “Umbuso wakho mawufike,” uthandazela ukuba lokhu kwenzeke. Ngempela ushintsho olunjalo luyadingeka. Akukaze emlandweni kube nohulumeni wabantu owanelisa ngokuphelele. Ngakho akukho obekungaba ngcono kunokuba uhulumeni kaNkulunkulu ophelele uthathe isikhundla sabo bonke ohulumeni babantu!

Ngenxa yokuthi uJehova uNkulunkulu unguMninimandla onke, uMbuso wakhe uzokwanelisa izifiso zabo bonke abantu abathambekele ekulungeni. “Umbuso wakho ungumbuso kuze kube-phakade,” kuchaza iBhayibheli. “Uyavula isandla sakho, usuthise ukufisa kwakho konke okuphilayo.” (IHubo 145:13, 16) Yiziphi izifiso ofisa ukuzibona zigcwaliseka? Ukuphela kwempi, indlala, ukungabi namthetho, ukuswelakala kwezindlu, ubugebengu, ukugula ngisho nokufa? Zonke lezinkinga nezinye zizosuswa uMbuso kaNkulunkulu. IBhayibheli lithembisa ‘ukuvama kokuthula, ize ingabikho inyanga.’ “Kepha ababi,” lithi “bayakunqunywa ezweni.” Yebo, abantu ngaleso sikhathi “bayakwakha izindlu, bahlale kuzo.” “UNkulunkulu abe-nabo, azesule izinyembezi zonke emehlweni abo; ukufa akusayikuba-khona.”—IHubo 72:7, 8; IzAga 2:22; Isaya 65:21-23; IsAmbulo 21:3, 4.

Yeka izibusiso ngomkhaya wesintu! Ingabe ungathanda ukuba isikhonzi soMbuso kaNkulunkulu? Khona-ke funda ukuthi ungaba kanjani yiso. Tadisha iZwi likaNkulunkulu futhi usebenzise lokho okufundayo.—Johane 17:3.

[Izithombe ekhasini 18, 19]

uyosusa lesimiso . . .

. . . ungenise esisha