Ingabe Wena Wawukhona?
EDUZANE nendawo yaseJonestown edume ngenani elikhulu labantu abazibulala eGuyana kunendawo ebizwa ngokuthi iMathew’s Ridge. Ngonyaka odlule iqembu lamaKristu ayisikhombisa lapho lahlela ukuba libe seMhlanganweni WesiGodi WoFakazi BakaJehova “WeQiniso LoMbuso” enhlokodolobha yesizwe, eGeorgetown. IMathew’s Ridge imane iyimizuzu engama-45 ngendiza ukusuka eGeorgetown, kodwa iqembu lalingenayo imali yendiza. Ngakho lahamba ngesikebhe. Uhambo lwabathatha izinsuku eziyisikhombisa.
Ingabe wawukomunye weMihlangano “YeQiniso LoMbuso” engamakhulu eyaqhutshwa emhlabeni jikelele ngonyaka odlule? Uma kunjalo, wawungomunye wabangaphezu kwezigidi ezi-4, abaningi babo bahlangabezana nezinkinga eziningi ukuze babe lapho.
Kwadinga Ukuzimisela
Ngabaningi kwadinga ukuzimisela ukuze babe lapho. Yilokho uAl, waseMaceió eBrazil, anakho. UAl ukhubazekile, futhi wayengakwazi ukungenisa isihlalo sakhe esinamasondo ebhasini ukuze aye emhlanganweni. Ngakho kwadingeka azihudule phansi, futhi emhlanganweni kwadingeka aziphakamise ngokwakhe ukuze ahlale endaweni yokuhlala. Kodwa wayezimisele ukuba angalahlekelwa yiwo.
Ngabanye kwadingeka ubambiswano. UFakazi ongumJapane wayehlela ukuba abe-khona emhlanganweni lapho isivunguvungu somoya sivuthuza wonke amapheya ezihlahleni engadini yomkhaya yezithelo. OFakazi bebandla lakuleyondawo nabantwana babo basiza ukuba bawaqoqe amapheya futhi kamuva bawathengise. Konke kwaqedwa ngesikhathi, kwaze kwathi umyeni wakhe ongakholwa wajabula kakhulu ukuba amvumele ukuba ahambe.
Futhi ngabathile kwadingeka ukwazisa okuphelele. Indoda engumKristu eBrazil yashonelwa umkayo ngezinsuku ezinhlanu nje ngaphambi komhlangano. Kungakhathaliseki ukulahlekelwa okubuhlungu, yaba-khona nabantwana bayo abancane abathathu. Ukuhlangana neseluleko eyasijabulela lapho kwayisiza nomkhaya wayo ukuba ilulame ekushaqekeni kwemizwelo.
Kungani laba, nezigidi zabanye, babezimisele ukuba kungabikho lutho oluma endleleni yabo yokuya eMhlanganweni WesiGodi “WeQiniso LoMbuso” ngonyaka odlule? Uma wake waba-khona komunye wemihlangano yoFakazi BakaJehova, kakade usuyazi. Ngokwesibonelo, inikeza ithuba elingavamile lokujwayelana kobuKristu kwenani elikhulu. (IHubo 133:1) Isilaleli emhlanganweni eNew Caledonia, eSouth Seas, saphawula, “Ubunye babantu bakaNkulunkulu babikezelwa eBhayibhelini, futhi ububona ikakhulu phakathi nemihlangano.” Ngaphezu kwalokho, isimiso ngaso sonke isikhathi sigcwaliswe ngezinto okunenzuzo ngempela ukuzilalela.
‘Zafinyelela Izinhliziyo’
Kusukela ngosuku lokuqala lokwamukelwa ngusihlalo kuze kube ngeSonto ngenkulumo yokuphetha, isimiso sasigcwele okuhlangenwe nakho okwakufudumeza inhliziyo, izingxoxo ezaziqinisa ukholo nezeluleko ezinosizo.
NgoLwesihlanu ekuseni izilaleli zajabulela ukuba zaziswe kwabathile abangomakadebona. Izilaleli eSydney, eAustralia, zazilalele uGeordie Gibb oneminyaka engama-85 ubudala, owabhapathizwa ngo-1927 futhi wakhonza nezisebenzi zendlunkulu yaseAustralia kusukela ngo-1929. Bakhona abantu abanjengoGeordie emhlabeni wonke, abasikhathi sabo sokuphila sonke basisebenzisele enkonzweni yokwethembeka. Imihlangano yesigodi ka-1982 yanikeza ithuba elihle lokwazi abanye babo.
Izinkulumo zaziswa kakhulu, ikakhulu lezo ezaziveza izilingo ezifihlekile. Ngemva kokulalela inkulumo “Qaphela Umculo Owonakalisayo,” uAna, waseBrazil, wathi: “Nganginamarekhodi amaningana anamazwi angakhi nakancane. Kodwa sawagcina ngoba sasithanda umculo wawo. Ngemva kokulalela leyonkulumo sanquma ukuba siwalahle wonke.”
UBarbara, isilaleli eHawaii, wavumelana ngokuphelele nezixwayiso azizwa enkulumweni “Ukudalula Amacebo Obuqili KaDeveli.” Phakathi kwezinye izinto, inkulumo yaxwayisa ngezinhlobo ezithile zezinhlelo zethelevishini. UBarbara wayethanda imidlalo yethelevishini futhi wathola ukuthi lezizinhlelo zazifiphaza umbono wakhe wokuhle nokubi. Wathi, “Ngisho ‘nezinsizwa ezilungile’ zaziqamba amanga futhi ziziphatha kabi, futhi ngangiqala ukwamukela indlela ezikubheka ngayo ukuphila.” (1 Korinte 15:33) Umkhaya othile eKorea wawulondoloza imali ukuze uthenge ithelevishini yemibala. Ngemva kokuzwa lezi nezinye izinkulumo emhlanganweni, washintsha umqondo wawo. Wawungafuni ukuchitha imali yawo ngento eyayingangenisa amathonya obusathane ekhaya lawo.
Okwakuvelele kuyo yonke imihlangano yoFakazi BakaJehova kwakungamadrama ashukumisayo ayeboniswa, lapho kuboniswa khona izimo zakudala noma ezanamuhla ezisho okuthile ngamaKristu namuhla. Izilaleli zazwelana noJeremiya, edrameni “Ummemezeli Ongesabi Wesigijimi Esingathandwa.” Futhi abaningi bathinteka inhliziyo idrama “Bayakuzwa Kanjani Kungekho Oshumayelayo Na?” Lena kwakuyindaba, isekelwe kokuhlangenwe nakho koqobo ekuphileni kukaDaniel Ngcobo. Edrameni, uDaniel wayephikisa ukushumayela kwendodana yakhe izindaba ezinhle futhi wayixosha ekhaya lakhe. Khona-ke, eminyakeni ethile kamuva, wasizwa ukuba ashintshe inhliziyo yakhe lapho abazukulu bakhe abancane, bedonsela ekunakekeleni kwakhe igama likaNkulunkulu, uJehova, kumaHubo 83:18 eBhayibhelini lakhe.
“Kukhona uDaniel Ngcobo emkhayeni wethu,” kusho uLois waseBahamas, njengoba ngenjabulo wayechaza ushintsho esimweni somyeni wakhe. Idrama yayikhuthaza ngokukhethekile eKorea, lapho amakhosikazi angamaKristu amaningana enamadoda aphikisayo.
Okunye okuvelele kuyo yonke imihlangano yoFakazi BakaJehova ubhapathizo. Emihlanganweni “YeQiniso LoMbuso,” amashumi ezinkulungwane zabantu abonakalisa ukuzinikezela kwawo kuJehova uNkulunkulu ngokucwiliswa emanzini obala. Ngabaningi, isinyathelo sasidinga umsebenzi onzima. Ngokwesibonelo, owesifazane oneminyaka engama-23 owabhapathizwa eJapane, ngesinye isikhathi wayeshadile futhi ezethwele, futhi ebhema osikilidi abangama-40 kuya kwaba ngama-50 ngosuku. Kwakunokuningi okwakudingeka ukuba akulungise ngaphambi kokuba abhapathizwe, kodwa ngosizo lukaJehova wakwenza futhi manje uphila ukuphila okuhlanzekile, okuphelele futhi ushade noyise wengane yakhe.
Kwakukhona okunye okuvelele futhi. Ingabe uyakukhumbula ukukhululwa okuthakazelisayo kwencwadi entsha enhle Ungaphila Phakade EPharadesi Emhlabeni, incwajana Jabulela Ukuphila Emhlabeni Phakade noma ipheshana elikhangayo Ingabe Sisondela EArmagedoni?
Kungenzeka wawungomunye wababe-khona emhlanganweni abaphuma ngoLwesihlanu ntambama futhi bahlanganyela amapheshana nabaninikhaya emzini womhlangano. Abaninikhaya abaningi basabela njengensizwa yaseKalgoorlie, eNtshonalanga Australia, eyahileleka engxoxweni nababili ababesemhlanganweni yaze yazimisela ukuba ibe-khona ngokwayo emhlanganweni.
Kwamanye amazwe izilaleli zazinezibusiso ezengeziwe lapho izincwadi zazikhululwa ukuba zikhonze izidingo zazo ezikhethekile. Izilaleli zaseJapane zajabula kakhulu ukuthola iNew World Translation of the Holy Scriptures ephelele ngolimi lwazo. “Angizange ngilale bonke ubusuku,” kusho esinye isilaleli esasijabulile esathola esaso isiboniselo.
“Izinkulumo kulomhlangano ngempela zifinyelele inhliziyo,” kusho isilaleli saseHawaii. Ngisho nabangesibo oFakazi bavuma. “Lesi kwakuyisikhathi sokuqala ekuphileni kwami lapho ngizwa izinkulumo ezisho okuthile ngempela,” kuphawula ilungu leqembu lezombangazwe elalikhona emhlanganweni eBrazil.
Futhi Manje . . . “Ubunye BoMbuso”!
Yebo, imihlangano “YeQiniso LoMbuso” yayiyimpumelelo eyayingenakulinganiswa. Izigidi zabantu zasizwa yiyo. Uma wawulapho, ngokungangabazeki wazuza kakhulu. Kodwa kuthiwani uma ungazange ube khona? Nokho, awulahlekelwe ngokuphelele. Kulonyaka oFakazi BakaJehova bazoba nolunye uchungechunge lwemihlangano emhlabeni jikelele, enesihloko esithi “Ubunye BoMbuso.”
Nakulonyaka, futhi, kuzoboniswa amadrama, izinkulumo ezakha ukholo, nemiboniso, iseluleko esiza ngesikhathi, futhi ngokungangabazeki, nokumbalwa esizobe singakulindele! Lokhu kuzohlanganisa isici esihlukile esizokwenza imihlangano yesigodi yalonyaka ibe ngevelele. Uma wawukhona emhlanganweni ka-1982, sinomuzwa wokuthi uzofuna ukuba khona futhi zonke izinsuku ezine. Uma wawungekho, zimisele ukuba khona kulonyaka. Kuzobonakala kuwunyaka wakho ovelele.
[Isithombe ekhasini 12]
Emhlanganweni eSão Paulo, eBrazil oFakazi abasha abangama-626 babhapathizwa
[Isithombe ekhasini 13]
Isilaleli esincane eMhlanganweni wesiGodi “WeQiniso LoMbuso” eKalgoorlie, eNtshonalanga Australia ngoSeptember 23-26, 1982