“Uphelisa Ukulwa”

“KWAKUNGO-AUGUST 8, 1942. Amabutho aseJapane ayekanise kwezinye iziQhingi zaseAmerican Aleutian ngenjongo yokuhlasela ugu olungasentshonalanga neU.S. Ngangabelwe neButho lamasosha ezindiza ezivikela imikhumbi yempi elalifanele lingene lapho futhi licwilise imikhumbi yamaJapane.

“Phakathi nombhudukezo sadutshulwa futhi isibonakude sethu sendlela asibange sisakwazi ukusebenza. Kwadingeka sibuyele esikhungweni sethu sidlula enkungwini ekhasa phansi ezintabeni eziwuhide olubonakala lunganqamuki zeAleutians—selungasekho usizo lwethu olukhulu lokuqondisa indiza, isimiso sethu sesibonakude sendlela. Salahlekelwa indlela yethu. Sasazi ukuthi ngakwesobunxele sethu kwakuneziqhingi nezintaba zazo. Kodwa kude kangakanani? Ekugcineni akuzange kusabonakala. Ngokushesha umholi wamemeza, ‘Sizoshayisa!’

“Angazanga lutho olwengeziwe kwaze kwaba yilapho ngiphaphama. Indiza yethu yayishayise intaba futhi ngandlela-thile ngangijikijeleke kude nengozi. Ngabona ukuthi indiza yethu yayisavutha. Ingxenye yomsila yayinqamukile. Uma ngabe kwakunababesaphila babeyobe belapho.”

Okungenhla kwalandiswa uHarley Miller, owasinda. Kwenzekani kwamanye amalungu ayisishiyagalombili ebutho? UHarley ulandisa lokhu esihlokweni esilandelayo. Sikunxusa ukuba ufunde lendaba, hhayi njengendaba yempi, kodwa njengendaba yendoda ekugcineni eyathola ukuthula.

Phakathi nomsebenzi wakhe wezempi uHarley wabona abantu abaningi befa. Babeyingxenyana nje yengqikithi yabantu abafa ngeMpi Yezwe II, kodwa babanele ukumenza abone ubuze obuphelele bezimpi nokubuza ukuthi, Kungani?

Ingabe Umuntu Useye Wahlakanipha Kangcono?

Phakathi neMpi Yezwe II, kwafa abantu abayizigidi ezingama-55—amasosha nezakhamuzi. Yeka usizi nobuhlungu okwasakazeka kulo lonke izwe! Izigidi zabafelokazi nezintandane zashiywa ukuba ziziqhwandele ngokwazo. Ngakho umbuzo osobala lapho impi iphela ngo-1945 wawuwukuthi, Ingabe izimpi ziyoke ziphele?

Impendulo edabukisayo kusukela ngo-1945 iwukuthi umuntu akahlakaniphile neze kangcono. Izizwe ziyaqhubeka zilungiselela futhi zihileleka empini nasembangweni. Emhlanganweni wamuva nje ngokungehlela umhlaba, uNdunankulu wemikhumbi yempi uGene La Rocque osethathe umhlala phansi wabonisa ukuthi, ngokombiko ovela kuyiPentagon, kuye kwaliwa izimpi ezingama-270 kusukela ekupheleni kweMpi Yezwe II. Wanezela ukuthi iUnited States neSoviet Union kuphela inezikhali zenyukliya eziyizi-20 000, futhi waxwayisa: “Uma siqhubeka ngendlela yethu yamanje, sizoba nempi yenyukliya.”

Yebo, njengezilwane ezinobudlova, ohulumeni bayaqhubeka nokulungisa ukungezwani kwabo ngokuchitha igazi, kodwa ngokuvamile kungelona elababusi bezombangazwe. Futhi lapho impi ingaliwa ngokoqobo, izizwe zinokuthula okuntengantengayo okusekelwe ekwesabaneni—umqondo weMbubhiso Elinganayo Nakanjani. Kodwa kungani? Kungani impi ibonakala ingenakugwemeka emlandweni wesintu? Ingabe likhona ikhambi?

Kungani Kunezimpi?

Izazi zengqondo nezenhlalo yabantu ziveza imiqondo eyizinhlobonhlobo ukuze zichaze lenkinga. Kuyiqiniso, imibono yazo inemisuka yemiqondo yokuziphendukela kwemvelo kanye nomcabango wokuthi umuntu umane nje uyisilwane esiphakeme. Ngakho-ke, abanye bathi “ukudala ingxabano kudingeka impela ukuze kusinde isintu.” Ngakho umphumela womqondo wokuziphendukela kwemvelo, ukufaneleka kwempi.

Nokho, ezinye izazi zengqondo azikwamukeli ukuthi impi imane iwumphumela wobumpi obusegazini. Zikholelwa ukuthi impi iyisimo esifundwayo, iwumphumela wokukhungatheka ebuntwaneni. Ngokomphumela, zisekela ukukhuliswa kwezingane okuyekelela ngokwengeziwe nomphakathi oyekelela ngokwengeziwe. Kodwa njengoba izwe laseNtshonalanga manje linomphakathi walo oyekelelayo, ingabe lokho kuye kwanciphisa ukusongela kwempi?

URobert Leckie, encwadini yakhe ethi Warfare, waphetha ngokuthi: “Impi . . . ayichazeki ngamazwi angokwemvelo. Okungenani kubonakala kuyinkinga engokwenhlalo, engokombangazwe nengokomthetho. . . . Umphakathi ngokwawo ubonakala uyimbangela eyinhloko yempi, futhi uma nje imiphakathi emikhulu—izizwe ezinomazibuse—iqhubeka inemibuso emikhulu engakhuzwa, impi iyolokhu ingagwemeki.”—Omalukeke abethu.

Cishe eminyakeni eyizi-2 000 edlule, esimweni senhlalo sebandla lokuqala lamaKristu, umfowabo kaJesu ngamzali munye uJakobe wabuza: “Yini ebangela ukuphikisana nokuxabana [ngokoqobo, ngesiGreki, “izimpi nokulwa,” Kingdom Interlinear] phakathi kwenu? Akuveli yini ekulweni kwezifiso zemizimba yenu? Nifuna okuthile eningenakukuthola . . . ninenkanuko, kodwa ngeke niyanelise inkanuko yenu.”—Jakobe 4:1, 2, The New English Bible.

Lamazwi anikeza isizathu sezimbangela eziyisisekelo zempi—umona, inkanuko, ukuhaha. Lesisimo siye sabakhona iminyaka eyizi-6 000. (Genesise 4:2-10) Yeka ukuthi izimpi ziye zalwiwa kaningi kangakanani ngenxa yamazwe, izinto ezibonakalayo kanye nomcebo! Ukuqhosha, ubuzwe, ukuthembeka kanye nokuzonda abezizwe, noma ukwesaba izihambi kanye nabezizwe, kuyasetshenziswa ukuze kuviviswe amabutho empi. Nokho, kukhona imbangela enkulu ejulile ngaphezu kwalezi ezincane.

Imbangela Enkulu Enganakwa

Kuyiqiniso, kukho konke ukuhlola kwabo kunesici esisodwa leso cishe zonke izingcweti ezikhetha ukungasinaki—amandla angabonakali lawo athanda ukuba isintu sihlukane futhi silwe. Lawomandla ngamabomu aphambukisa isintu ngezindlela ezingenakubalwa—noma ngenkolo, ezombangazwe noma ngokuphishekela injabulo. Lawomandla achazwe ngokukhanyayo eBhayibhelini. Ngokwesibonelo: “Siyazi ukuthi singabakaNkulunkulu nokuthi izwe lonke limi emandleni omubi.” (1 Johane 5:19, NW) Ubani lowo “omubi”? UJesu ngokwakhe wamusho lowo lapho ephendula abaFarisi ababefuna ukumbulala: “Nina ningabakayihlo uSathane, nithanda ukwenza izinkanuko zikayihlo. Yena wayengumbulali wabantu kwasekuqaleni, akemi eqinisweni, ngokuba iqiniso lingekho kuye. Nxa ekhuluma amanga, ukhuluma okungokwakhe, lokhu engumqambimanga noyise wawo.”—Johane 8:44.

Yebo, ithonya elengamele izimpi zesintu umbusi owumoya omubi, uSathane uDeveli. Yena nabalandeli bakhe abangamademoni, nesimo sabo sokuthanda ukuzwiswa ubuhlungu, bagcina isintu sikhuthalele izimpi futhi silungiselela impi. Lapho kuyiqiniso ukuthi izigidi ziyaphakama futhi zimelane nezikhali zempi yenyukliya futhi zifune ukuqedwa kwenyukliya, azibonisi kuthobeka ekhambini okuwukuphela kwalo elingeleqiniso—ukubusa koMbuso kaNkulunkulu ngoKristu. Ngakho uSathane uyaphumelela ‘ukudukisa izwe lonke.’ (IsAmbulo 12:9) Wenza abantu balandelele ukuthula abangenakukuthola—bafune ukuthula kuyilapho bebambelele kuzo kanye izici eziholela empini—izithakazelo zobuzwe zokungacabangeli.

Kuyomiswa Kanjani Ukuthula?

URobert Leckie ocashunwe ngaphambili uthi: “Izazi zesayensi zemithetho yezenhlalo zithi impi yinqubo engasamukeleki . . . nokuthi iqungo lochuku elibangela impi lingaqondiswa ngemfundo, umthetho kanye nezimiso zokuziphatha.” (Omalukeke abethu.) Ngokungaqondiwe, lombono wezazi zesayensi uvumelana nekhambi leBhayibheli empini, elisekelwe “emfundweni, emthethweni nasezimisweni zokuziphatha.” Umprofethi uIsaya wakhomba kulowomzila wokufinyelela ukuthula eminyakeni eyizi-2 700 edlule, ethi: “Abantu abaningi bayakuhamba, bathi: Wozani sikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe, ngokuba umthetho uyakuvela eSiyoni, nezwi likaJehova eJerusalema. Uyakwahlulela phakathi kwezizwe, anqume phakathi kwabantu abaningi; bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.”—Isaya 2:3, 4.

Sibonisani leso siprofetho? Ukuthi abantu bezizwe eziningi kuyodingeka baqaphele umthetho, ubukhosi nokubusa kukaJehova. Kuyodingeka ukuba bamukele imfundo entsha ngokuthula. Ngokuzithoba kuyodingeka bathi: “Uyakusifundisa izindlela zakhe, sihambe emikhondweni yakhe.” Yebo, bayofunda izindlela, noma “izimiso zokuziphatha,” zokuthula kweqiniso kobuKristu futhi bahambe ezindleleni zikaJehova njengoba kubekwe ngokucacile isibonelo esiphelele seNdodana yakhe, uKristu Jesu. Iqiniso liwukuthi oFakazi BakaJehova, njengenhlangano esezweni lonke, bebelokhu begcwalisa lesiprofetho emashumini amaningi eminyaka—naphezu kwezimpi zezwe nazo zonke ezinye eziye zakhathaza isintu.

Nokho, sifanele sibhekane neqiniso lokuthi ukuthula okuhlala njalo ngaso sonke isintu akunakuza ngemizamo yomuntu kuphela. Kudingeka okuthile okukhulu ngokwengeziwe—hhayi nje uhulumeni wezwe lonke, njengoba abaningi baye basho—kodwa uhulumeni ongaphezu kukahulumeni wesizwe, ngaphezu kwazo zonke ezombangazwe ezingabalulekile nobuzwe. Uhulumeni kaNkulunkulu wasezulwini ngoKristu unjalo kanye. Uwukuphela kwendlela yokuthula enokwethenjwa.—Mathewu 6:9, 10.

Lokhu kuthula kuyomiswa kanjani? Njengoba izizwe zingenakuyeka imibuso yazo ngokuzithandela, ngokushesha zizophoqeleleka ukuba zenze kanjalo. Njengoba umprofethi uDaniyeli abikezela: “Ezinsukwini zalawomakhosi uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso, wona uqobo ume phakade.” (Daniyeli 2:44) Ngokungaphezulu, njengoba kushiwo kusAmbulo 20:1-3, umqhathi omkhulu wempi, uSathane uDeveli, ‘uyophonswa kwalasha,’ ayekiswe ukusebenza “iminyaka eyinkulungwane . . . ukuze angabe esadukisa izizwe.”

Ukuphela kwemibuso yomuntu yezombangazwe enobugovu, noma ohulumeni, kuyovulela ukugcwaliseka okuphelele kwamazwi anikeza ithemba amaHubo 46:8-10, athi: “Wozani nibone izenzo zikaJehova, izincithakalo azenzileyo emhlabeni. Uphelisa ukulwa kuze kube-semikhawulweni yomhlaba; uyaphula umnsalo, anqume umkhonto, izinqola zempi azishise ngomlilo. Thulani, niqonde ukuthi mina nginguNkulunkulu; ngiyakuphakama phakathi kwabezizwe, ngiphakame emhlabeni.” Yebo, ubukhosi bukaJehova buyophakanyiswa kuwo wonke umhlaba. Lolosuku luseduze.—Mathewu 24; Marku 13; Luka 21.

Ingabe uyafisa ukubona ukuphela kwazo zonke izimpi? Ngakho qinisekiswa ukuthi simi onqenqemeni lwesikhathi esikhazimulayo leso uDavide akhuluma ngaso kumaHubo 37:10, 11: “Kusengumzuzwana, omubi angabe esabakho; . . . kepha abathobekileyo bazakudla ifa lomhlaba, bathokoze ngokuthula okukhulu.”