‘Ubunye BukaMoya’ Emhlanjini Okhula Ngokushesha
1. (a) Kwabase-Efesu 4:1-6, yisiphi iseluleko esifanelekile ngobunye uPawulu asibhala? (b) Kungani lesoseluleko sifaneleka nasosukwini lwethu?
LAPHO umphostoli uPawulu ebhalela amaKristu ebandla lase-Efesu wagcizelela ubunye, ewanxusa ukuba athobeke, abekezelelane ngothando futhi ngobuqotho ‘agcine ubunye bukamoya ngesibopho sokuthula.’ (Efesu 4:1-6) UPawulu wayechithe iminyaka engaphezu kwemibili e-Efesu futhi wayezazi izizinda ezihlukene zabazalwane lapho. Futhi wayazi ukuthi amathonya ahlanganisayo uJehova aye wawasebenzisa phakathi kwabantu bakhe ayengakunqoba lokho kwehlukana, futhi uPawulu wawanxusa ukuba azise futhi abambisane nalamathonya. Kungokubaluleke ngokufanayo nasosukwini lwethu. Ngani? Ngoba abantu abavela “kuzo zonke izizwe, nemindeni, nabantu, nezilimi” babuthelwa enhlanganweni ngobuningi.—IsAmbulo 7:9, 10.
2. UJehova ubulondoloza kanjani ubunye benhlangano yakhe ebonakalayo?
2 Ngokuvumelana nenjongo yakhe, uJehova uye wahlanganisa izinceku zakhe “njengomhlambi phakathi kwedlelo.” (Mika 2:12) Uzinikeza iziqondiso ezidingekayo ukuze alondoloze lobobunye. Kanjani? Wamisa ngokwakhe iNdodana yakhe siqu, uJesu Kristu, njengenhloko yebandla lobuKristu. EBhayibhelini, uJehova wenza ukuba kubhalwe imininingwane ngenjongo yakhe, futhi ngenhlangano yakhe ebonakalayo uqondisa imizamo yezinceku zakhe ezindleleni ezivumelana naleyonjongo. Kuqinisa ukholo ukucabangela ubufakazi balokhu kuqondiswa kwaphezulu ezikhathini zanamuhla, kusukela ngo-1919.
Ukulungela Ukunikeza Ubufakazi Bembulunga Yonke
3. Imuphi umsebenzi wezindlalifa zoMbuso iBhayibheli elawubikezela maqondana nesiphelo sesimiso sezinto?
3 Ekuxoxeni ngesiphelo salesimiso sezinto, imiBhalo yabikezela ukubuthelwa futhi ‘kwabakhethiweyo’ abahlakazekileyo ebunyeni obungokwenhlangano, kanye nokuqoqwa kwamalungu okugcina esigaba soMbuso. (Mathewu 24:31; 13:37-43, 47-50) Kuye kwenziwa kanjani lokhu?
4. (a) Iziphi izindlela ezibonakalayo uKristu nezingelosi abazisebenzisa ekubuthweni nasekuvunweni kwensali? (b) Ngakho iziphi izindlela ezimbili uJehova ayezisebenzisa lapha ekuhlanganiseni izinceku zakhe?
4 ImiBhalo ithi uKristu wayezothumela izingelosi zakhe ukuba ziwenze. Akekho emhlabeni okwazi ukubona lezozidalwa zomoya zisebenza, kodwa imiphumela yemisebenzi yazo enhlanganweni ebonakalayo kaJehova ikhanya bhá. Ngemva kokushushiswa okunonya ngeMpi Yezwe I, amandla avuselelwe afakelwa ezincekwini zikaJehova ngezihloko zeWatch Tower eyayithi “Babusisiwe Abangesabi,” eyanyatheliswa ngo-1919. UJehova wayenomsebenzi owengeziwe ayefuna ukuba ziwenze. Emhlanganweni wazo waseCedar Point eOhio ngalowonyaka, enkulumweni eyayithi “Ukumemezela UMbuso,” kwanikezwa isaziso sikamagazini omusha, iThe Golden Age (manje eyaziwa ngokuthi iPhaphama!), eyayizosakazwa kabanzi kubantu ukuze ibabonise “Inkathi Enhle kakhulu yokubusa okukhazimulayo kukaMesiya.” Bonke “abakhethiwe” bakhuthazwa ukuba bahlanganyele kulomsebenzi. Ngo-1922, komunye umhlangano eCedar Point, kwanikezwa isikhuthazo esinamandla esithi “Memezelani, memezelani, memezelani, iNkosi nombuso wayo.” Ngo-1925, ukuqondwa kokubaluleka komsebenzi wangemva kwempi wezinceku zikaJehova ngokwesAmbulo isahluko 12 kwanikeza esinye isikhuthazo esinamandla emsebenzini. Khona-ke ngo-1931, ngesinqumo esathathwa emhlanganweni eColumbus, eOhio, nakweminye imihlangano engama-50 emhlabeni kabanzi kamuva, igama elithi oFakazi BakaJehova lamukelwa, lihlukanisa lamaKristu kuwo wonke amahlelo eLobukholwa futhi ligcizelela umsebenzi abawunikezwe uNkulunkulu. (Isaya 43:10-12) Kanjalo uJehova wayehlanganisa izinceku zakhe (1) ngokuqondwa okuthuthukayo kwemiBhalo (2) nangokuzishukumisela emsebenzini wenkuthalo njengofakazi bakhe.
5. Ngo-1935 yini eyafezwa isenzo sobunye ngaphansi kokuqondisa kukaJehova?
5 Nakuba zazimbalwa ngenani, isenzo sazo sobunye ngaphansi kokuqondisa kukaJehova sabangela isigijimi soMbuso ukuba sifinyelele emaphethelweni omhlaba. Kusukela ngo-1921 kuyaku-1935 bahambisa izincwadi ezinkulu nezincwajana eziyizi-205 217 917 ngamashumi ezilimi. Amakhulu ezigidi zamapheshana nawo asakazwa futhi kwasetshenziswa kakhulu umsakazo. Ngenxa yalokho, izinkulungwane ezengeziwe zazinikezela kuJehova, zabhapathizwa futhi zagcotshwa ngomoya ongcwele njengoba ukuqoqwa kwesigaba soMbuso kwakusondela ekupheleni. Nokho, inkonzo yabo kubantu bonke yayingakapheli. UJehova wayebalungiselela okwakusengaphambili.
Ukuqiniselwa Ukubhekana Nokuphikiswa
6. Khona-ke yini enye uJehova ayeyilungiselela izinceku zakhe ezigcotshiwe?
6 Phakathi neMpi Yezwe I, abagcotshiwe babehlakazwe isitha. Imizamo eyengeziwe yonya yokuchitha umsebenzi wabo yayiseza. Kodwa uJehova wabaqinisa ukuze bangaphinde babe umhlambi ohlakazekile. Kwenziwa kanjani lokhu?
7. Ngesikhathi sokwakhiwa kabusha kwethempeli, uJehova wabenza kanjani abantu bakhe ukuba baqhubeke ngobunye naphezu kokuphikiswa?
7 Lapho ukuphikiswa kuvimbela ukwakhiwa futhi kwethempeli likaJehova ngemva kokuba ababethunjiwe sebebuyile eBabiloni, uJehova waqinisa abantu bakhe ngokumisa abaprofethi, abakhulumeli ababonakalayo, nangokubenza balethe izigijimi ezivela kuye ngesikhathi esifanele. Ngokungaphezulu, umoya kaJehova ngokwakhe wanqoba izithiyo ezifana nezintaba futhi wenza ukuba izinceku zakhe zikwazi ukusebenza njengenhlangano enobunye.—Hagayi 1:1-8; Zakariya 4:1-14.
8. UJehova wabaqinisa kanjani abazalwane ekhulwini lokuqala?
8 Lapho abakhulekeli beqiniso bengaphansi kokuhlaselwa isitha ekhulwini lokuqala, uJehova wenza ukuba abaphostoli babhale izincwadi ezinikeza isiqondiso nesiyalo. Kulezi umphehli oyinhloko wokuphikiswa waboniswa ngokukhanyayo ukuthi unguSathane uDeveli, onhloso yakhe iwukuthulisa ukushunyayelwa kwezindaba ezinhle, ekwenza lokhu ngokushushisa ngobudlova noma ngokuchitha ubunye bamabandla ngethonya labazalwane bamanga. Kanjalo bonke basizwa ukuba babone izimpikiswano ezazihilelekile. (Efesu 6:10-13; 2 Korinte 11:12-15; 1 Petru 5:5-8) Ngothando bakhuthazwa ukuba ‘bame beqinile emoyeni munye, nangomphefumulo munye belwela inkolo yevangeli, bengathuswa ngalutho ngabamelene nabo.’—Filipi 1:27, 28.
9. (a) Ezikhathini zanamuhla, uJehova uye walulungiselela kanjani usizo olunjalo? (b) Nikeza izibonelo zalokhu.
9 Ezikhathini zanamuhla, uJehova uye waqhubeka elungiselela usizo oludingwa izinceku zakhe, ekwenza lokhu ‘ngenceku ethembekile neqondayo,’ insali esemhlabeni namuhla, uJesu ayinhloko yayo emisiwe, futhi lolusizo lufika ngesikhathi esifanele. (Mathewu 24:45-47) Kanjalo ngo-1925 isigaba ‘senceku,’ ngeThe Watch Tower, sasiza abafundi bayo ukuba baqaphele ukuthi uMbuso kaNkulunkulu ubusebenza emazulwini kusukela ngo-1914 nokuthi, eqinisweni, kunezinhlangano ezimbili nje—ekaJehova nekaSathane. Ngo-1929 isibopho samaKristu sokulalela umthetho kaNkulunkulu ngaso sonke isikhathi ngaphezu kowabantu sagcizelelwa ngamandla. Ngokuqhubekayo, ukulungisa okungokwenhlangano kwenziwa kwaze kwathi, ngo-1938, konke ukumiswa kwababonisi emabandleni kwenziwa ngokwasezulwini, esikhundleni sokuvotelwa yibandla. Konke lokhu kwahlanganisa futhi kwaqinisa izinceku zikaJehova, futhi yeka ukuthi kwakungesikhathi esifanele kanjani!
10. (a) Lolosizo luye lwabonakala kanjani lungesikhathi esifanele? (b) Njengoba ukushushiswa kwakukhula, yiluphi usizo olwengeziwe uJehova abanikeza lona?
10 Phakathi nawo-1930 kwaze kwaba ngalé kweMpi Yezwe II, oFakazi BakaJehova emazweni amaningi bashushiswa kakhulu. Izinkulungwane zayiswa ezinkantolo. Emazweni amaningi umsebenzi wabo wavinjelwa uhulumeni. Abaningi bavalelwa iminyaka eminingi emakamu okuhlushwa omashiqela. Njengoba lokhu kushushiswa kwakuqala ukuphakama, uJehova waziqinisa ngokwengeziwe izinceku zakhe. Ezifundweni zeNqabayokulinda ngo-1931, kwaxoxwa ngendlela amaJuda ezinsukwini zeNdlovukazi uEsteri angalwelanga nje kuphela ukuphila kwawo kodwa amelana nezitha zawo, futhi kwacatshangelwa indlela lokhu okusebenza ngayo namuhla empini engokomoya. Izihloko ezazikhulumela “Isithando Somlilo,” ngo-1934, zasebenzisa indaba yamaHeberu amathathu ayesesithandweni somlilo ukuze zifake koFakazi BakaJehova ukuzimisela ukuma beqinile bethembela ngokuphelele kuJehova. (Daniyeli 3:17, 18, 28) UJehova wayesenomsebenzi omkhulu wokwenziwa, futhi ukuphikisa kukaSathane kwakungenakuvunyelwa ukuba kuwuvimbele.
Ukubuthwa ‘Kwesixuku Esikhulu’ Ukuze Sisindiswe
11. (a) Yimuphi umsebenzi wokushumayela omkhulu ngokwengeziwe uJehova ayelungiselele izinceku zakhe ngenxa yawo? (b) Bonisa ezinye zezinyathelo kulesisimiso sokulungiselela esasiqondiswa ngokwaphezulu.
11 Njengoba ukubuthwa ‘komhlambi omncane’ wezindlalifa zoMbuso kwakuseduze nokuphela, uJehova waqondisa ukunakekela emsebenzini ongaphezulu kakhulu, ukufundisa “isixuku esikhulu” esiyosinda “osizini olukhulu” ukuze siphile emhlabeni ePharadesi elibuyiselwe. Ngakho-ke ngo-1918 umongameli weWatch Tower Society wanikeza inkulumo eLos Angeles, eCalifornia, enesihloko kamuva esasizophindaphindwa amakhulu ezikhulumi ezengeziwe, esasithi “Izwe Seliphelile, Izigidi Manje Eziphilayo Zingase Zingafi.” Khona-ke ngo-1923, iThe Watch Tower yabonisa ukuthi “ezinye izimvu” zikaJohane 10:16 ziyafana “nezimvu” zomfanekiso kaJesu wezimvu nezimbuzi, nokuthi zase ziqala ukuziveza. Ngo-1931 lezi kwaboniswa ukuthi zafanekiselwa kuHezekeli 9:1-11 njengalabo abaphawulwe emabunzini abo ukuze basindiswe. Ngo-1932 kwambulwa ukuthi lesisigaba esifanayo safanekiselwa uJehonadaba, owaqaphela ukuthi kubaluleke kangakanani ukuba ukuzinikela okukhethekile kuye kuJehova. Lesisimiso sokulungiselela esiqondiswa ngokwaphezulu safinyelela umvuthwandaba ngo-1935, lapho, emhlanganweni owawuseWashington D.C., “isixuku esikhulu,” sesAmbulo 7:9-17 siboniswa futhi ukuthi siyilesosigaba sasemhlabeni, futhi amakhulu ezilaleli azibonakalisa njengakuleloqembu. Ngaphansi kokuqondisa komoya kaJehova, ukuhlanganiswa kwaleliqembu manje kwaqhubeka ngokushesha.
12. (a) Kungani ukuqoqwa kwabantu abanethemba lasemhlabeni behlanganiswa nalabo abanethemba lasezulwini kungadalanga ukungezwani? (b) Ngesibusiso sikaJehova, yini eye yaba umphumela wemizamo yabo enobunye kuze kube namuhla?
12 Ingabe lokhu kuhlanganiswa kwesigaba sasemhlabeni nalabo abanethemba lasezulwini kuye kwabangela ukungezwani enhlanganweni? Ngokuqinisekile akunjalo. Njengoba uJesu abikezela, baye baba “mhlambi munye,” yena ‘engumalusi oyedwa’ wabo. (Johane 10:16) Bayaqaphela ukuthi ukuba kwabo nanoma yiliphi lalamathemba kuwubufakazi bomusa kaJehova ongabafanele, nokuthi bonke banelungelo nomthwalo wemfanelo wokuba ofakazi egameni likaJehova noMbuso, nokuthi isimiso esifanayo sobuKristu sokwethembeka sisebenza kubo bonke. Ngempela bangabantu abamunye. Bonke baye bazinikela ekunikezeni ubufakazi boMbuso kuwo wonke umhlaba owakhiwe, okuye kwaphumela ekuvuneni okukhulu. Ngemva kweMpi Yezwe I kwakunezinkulungwane ezimbalwa nje ezazihlanganyela ekumemezeleni uMbuso kaJehova kubantu bonke. Kwaze kwaba ngo-1941 lapho inani eliphakeme elifika ezi-100 000 lihlanganyela kulomsebenzi emhlabeni wonke. Namuhla labo abamunye njengabamemezeli basobala besigijimi soMbuso bayizi-2 652 323. Kuye kwaba njengoba uJehova abikezela ngomprofethi uIsaya: “Omncane uyakuba-yinkulungwane ophansi abe-yisizwe esinamandla; mina nginguJehova, ngiyakukusheshisa ngesikhathi sakho.”—Isaya 60:22.
Imizamo Ebumbene Yokulungiselela Izakhiwo Ezidingekayo
13. Imuphi umphumela lokhu kwanda okuye kwaba nawo emsebenzini wokunyathelisa weWatch Tower Society, futhi lesisidingo siye sahlangatshezwa kanjani?
13 Lokhu kwanda okukhulu kwamanani oFakazi BakaJehova kuye kwafuna izakhiwo ezandisiwe. Phakathi nawo-1920 ukunyatheliswa okuningi kwezincwadi zeBhayibheli ezisetshenziswa oFakazi kwakwenziwa eBrooklyn, eNew York. Manje ukunyathelisa okunjalo sekwenziwa kwamanye amazwe athi awabe ngama-30. Iminikelo yokuzithandela ilungiselela izimali ezidingekayo, futhi lapho kuye kwaba khona ukusilela kwelinye izwe lokhu kuye kwavalwa usizo lomusa lwabanye.—Qhathanisa neye-2 Korinte 8:14.
14. Kusukela ngo-1935 amaHholo oMbuso amasha adingekayo aye alungiselelwa kanjani?
14 Ngonyaka ofanayo lowo “isixuku esikhulu” esachazwa ngawo ngokufanele njengesigaba sasemhlabeni, uJ. F. Rutherford, owayengumongameli weWatch Tower Society ngalesosikhathi, wetha indawo yokuhlanganyela yoFakazi BakaJehova ngokuthi iHholo LoMbuso eHawaii. Kusukela lapho kuye phambili, leligama liye lasetshenziswa njalo oFakazi BakaJehova ekubizeni amahholo abo okuhlangana. Kusukela ngo-1940 kuze kube manje, inani lamabandla liye lakhula lisuka ezi-5 118 liya ngaphezulu kakhulu kwezi-46 000. Ukuze kubhekwane nokwanda emhlabeni wonke, kuye kwakhiwa izinkulungwane zamaHholo oMbuso amasha namahholo emihlangano amakhulu. Lokho kuye kwafuna umzamo obumbene, kokubili maqondana nezimali nangomsebenzi wokwakha ngokwawo. Abantu bakaJehova abanobunye basekela ngenhliziyo yonke yabo!
15. Kungani kubalulekile ngathi ukuba sibe nezakhiwo ezanele zokuhlanganyela?
15 Namuhla inani labantu abaye batheleka emaHholo oMbuso oFakazi BakaJehova likhulu kunanini ngaphambili futhi likhula ngokushesha. Siyabemukela bonke abafuna ngempela ukufundiswa izindlela zikaJehova ukuze bahambe emikhondweni yakhe. (Isaya 2:2, 3; Heberu 10:23-25) Sifuna futhi ukuba ngokuqinisekile kube nezakhiwo ezanele zokunakekela labo ababonisa ukwazisa ngalelilungiselelo elenziwe uJehova. Kungenziwa kanjani lokhu?
16. (a) Uma iHholo LoMbuso elisha lidingeka ngenxa yebandla lethu elandayo, kumelwe sizizwe kanjani ngomsebenzi nangezindleko ezihilelekile, kungakhathaliseki noma siyolisebenzisa ngokwethu siqu ihholo elisha noma cha? (b) Uma kunokwanda okuhle ezindaweni lapho izindleko zokwakha ziphakeme khona, amaHholo oMbuso amasha angalungiselelwa kanjani?
16 Nakuba sihlangana emabandleni amaningi ezindawo zethu, ‘simhlambi munye,’ abantu abamunye. Isithakazelo sokwandisa ukukhulekela okumsulwa nothando ngabafowethu siyosishukumisela ukuba sisize nganoma iyiphi indlela esingaphumelela ngayo, kungakhathaliseki ukuthi isidingo singase sibe kuphi. Ingabe ukwanda emabandleni amaningi asebenzisa iHholo LoMbuso elithile kufuna ukuba kwakhiwe elinye elisha? Yeka ukuthi kungaba kuhle kanjani ngalabo abaqhubeka besebenzisa izakhiwo ezindala ukuba balungiselele noma iluphi usizo abangalwenza maqondana nokwakhiwa kwehholo ngenxa yebandla elidinga ukuba nendawo futhi! Kwezinye izindawo, abazalwane baye basiza ekwakhiweni kwamanye amaHholo oMbuso uma lawo edingeka. Ngokuhlela ngokunakekela nangomzamo obumbene, kuye kwakhiwa amaHholo oMbuso amaningi amahle amasha ngezinsuku ezimbili noma ngaphansi. Emazweni athile, nokho, ukukhuphuka okusheshayo kwentengo yendawo ezindaweni zasemadolobheni kuye kwenza kwaba nzima ngebandla ukuba likhokhele izinto ezidingekayo lilodwa. Kodwa okungase kuhlule ibandla elilodwa kungafinyelelwa ngomzamo onobunye. Uma saziswa ngamathuba okusiza, siyosabela kanjani?
17. Iziphi izimiso zeBhayibheli ezifanelekayo ekuhlangabezaneni nalesisidingo?
17 Lapho amaIsrayeli enikezwa ithuba lokunikela ekwakhiweni kwetarbenakele elingcwele likaJehova, izinhliziyo ezivumayo zawashukumisa ukuba anikele ngaphezu kokudingekayo. (Eksodusi 35:5-9; 36:5-7) Iminikelo emikhulu yokusekela ukukhulekela kweqiniso akuyona yodwa eyaziswayo. UJesu wancoma ukuphana okwaboniswa ngomnikelo omncane kakhulu womfelokazi ompofu. (Luka 21:1-4) Maqondana namalungiselelo okusiza ezinye izinceku zikaNkulunkulu ngezindlela ezibonakalayo, umphostoli uPawulu wabhala: “Ngokuba uma uthando lukhona, kwamukeleka njengalokho umuntu anakho, kungenjengalokho angenakho. . . . Kube-khona ukulingana, njengalokho kulotshiwe ukuthi: Kowaba-nokuningi kakusalanga, nowaba-nokuncane kantulanga.” (2 Korinte 8:12-15) Leso simiso singasiqondisa ekubambisaneni ukuze silungiselele amaHholo oMbuso amasha noma anwetshwayo lapho edingeka, kungakhathaliseki noma sihlala kuleyondawo noma cha.
18. (a) Yini eyashukumisa iSimemezelo sethu Sobunye emihlanganweni yesigodi edlule? (b) Lisho ukuthini iphuzu lokuqala kulesoSimemezelo? (c) elesibili? (d) elesithathu? (e) Imuphi umthandazo leSimemezelo esaphetha ngawo ngokufanelekile?
18 ‘Ubunye bukamoya’ buwuphawu lwenhlangano kaJehova, futhi thina ngokwethu sinelungelo lokukubonisa lokhu ngokuphilile. Emihlanganweni yethu yamuva nje emhlabeni kabanzi, senza isimemezelo esingesikhathi esifanele maqondana nalokhu. Sikhishiwe ekhasini 22. Sinikhuthaza ukuba nibukeze lesoSimemezelo manje, ngaleyondlela nizinikeza ithuba lokucabangisisa futhi izindlela eningasisebenzisa ngayo ngokomuntu siqu ezinsukwini ezizayo.
Ithini Impendulo Yakho?
□ UJehova ubulondoloza kanjani ubunye bezinceku zakhe?
□ UJehova waziqondisa kanjani izinto ukuze ukuqoqwa kwesigaba soMbuso kuphele?
□ OFakazi BakaJehova baqiniswa kanjani ngenxa yokushushiswa okuqinile okwenzeka ngaphambili naphakathi neMpi Yezwe II?
□ UNkulunkulu wabalungiselela ngayiphi indlela oFakazi bakhe ngenxa yokubuthwa okwaqala ngo-1935?
□ Singahlanganyela kanjani ekulungiseleleni isidingo esiphuthumayo samaHholo oMbuso?
[Ibhokisi ekhasini 22]
ISIMEMEZELO SOBUNYE
Thina, boFakazi BakaJehova, abahlangene eMhlanganweni wethu Wesigodi “Wobunye BoMbuso” sifisa ukubonisa ukwazisa kwethu okujulile ngakho konke uJehova aye wasenzela khona. Sibonga ngempela ngomhlatshelo weNdodana yakhe ethandekayo nangokusikhetha kwakhe njengabantu beGama lakhe.
Ngakho-ke, SIMEMEZELA isinqumo sethu, okokuqala, sokulondoloza ubunye obuhle uJehova aye wasihlanganisa kubo njengomhlambi osesibayeni sakhe, sithembele ngokuphelele ekuholeni kwakhe nasekuqondiseni komoya wakhe ongcwele; okwesibili, ukuba ngazo zonke izikhathi sifune ukulondoloza ukuziphatha kwethu okuhle phakathi kwabezizwe lapho simemezela ngentshiseko ithemba loMbuso kubo bonke abayolalela; okwesithathu, nokuba sigweme noma ikuphi ukuphambuka endleleni kaJehova kungakhathaliseki ukuthi ubani ongase afune ukusithonya ngendlela engalungile.
Futhi SITHANDAZELA ukuthi sengathi singaqhubeka singabafanelekele uthando uJehova aye walubonakalisa kithi, ngaso sonke isikhathi sazisa ilungelo esinalo lokufakazela iGama lakhe nelokumemezela izindaba ezinhle zoMbuso wakhe ngaphansi kukaKristu.
[Isithombe ekhasini 24]
Ukulungiselela amaHholo oMbuso anele kufuna umzamo obumbene, kokubili maqondana nemali nomsebenzi wokwakha