Ukuhaha Kungase Kubulale
“ISISUSA sabe siwukuhaha,” kwasho umsizi wommeli wesifunda. Icala labe liwukubulala. Indoda eneminyaka engama-29 yama phambi kwejajl ibekwe icala lokudubula ngozungu nelokubulala umkhwe wayo, umkhwekazi nomlamu wayo oneminyaka eyi-16. Ngenxa yasiphi isizathu? Ukuze idle ifa elibiza izi-R400 000!
Lapho abaningi bengenakuvumela ukuhaha ukuba kubaqhubele ekubulaleni, ukuhaha ngokuvamile kuphenduka kube isenzo esiphendula ubuhlobo obuhle bube bubi. Lapho ukuhaha kungena ebandleni lobuKristu, ukulimala ngokomoya ngisho nokufa kungase kwenzeke ngokungahlalisani kahle kwabazalwane nokudala ukuba inzondo ikhule kuze kube sezingeni lapho ifinyelela ‘ukubulala’ okungokomoya.—1 Johane 3:15; Marku 7:21, 22.
Obani Abanokuthambekela?
Ukuhaha kuyinto esinayo ngaphakathi. Ngenxa yokungapheleli esakuzuza ngefa, ukuhaha kungumphumela omubi wesifiso esivamile sokuba nezinto ezibonakalayo nokulondeka ngokwezimali. (Roma 5:12) Kuvela esifisweni eseqile noma esifisweni sokunganeliseki ngezinto onazo, udumo noma amandla. Kungashintsha umuntu obacabangelayo abanye abe ononya. Muva nje, kunelinye iqembu eliye lathonywa kalula izindlela zobuqili zabantu abahaha kakhulu kunabanye.
Abantu abangamakholwa bayisisulu esiyinhloko sabakhohlisi. Kungani? Ngokuvamile amakholwa athembekile futhi anomoya omkhudlwana wokuba usizo kunabanye. Amehlo abahahayo abona lokhu njengokuwuphawu lobuthakathaka—lokukhohlisa. Ummeli waseU.S. uBrent Ward, ngemva kokuhlola icebo lenkohliso eUtah elaphanga amalungu enye inkolo amaRandi ayizigidi ezingama-R400 eminyakeni cishe emibili, wathi: “Kubonakala ukuthi noma ngasiphi isikhathi lapho inkolo ingenela indlela ekhangisayo yokuthengisa, umqambi uyakwazi ukuxhumanisa umhosha ukusukela entweni engakholelwa kuya entweni ekholelwayo.” Lezozisulu zakhohliselwa ekukholelweni ukuthi zingase zicebe ngokushesha, ngokumane nje zifake imali yazo ukuze zithole inzuzo. Ingabe isisusa esahunga abathile babo ukuba bafake imali yabo abazigcinele yona beyithole kanzima sabe siwukuhaha?
Umbono Okhohlisayo Wokulondeka
Ukuhaha kukhula kanjani—nesifiso sakho sokufisa ukuba nezinto nokuceba? Kwenzeka kanjani ukuba ukuhaha kwenze umfaki wemali oqaphelayo abe okhohliseka kalula? UmShumayeli 4:4 ukhomba empendulweni eyodwa: “Ngiye ngabona futhi ukuthi kungani abantu besebenza kanzima ukuze baphumelele; kungenxa yokuthi bafisa izinto omakhelwane abanazo. Kodwa akusizi ngalutho. Kufana nokuxosha umoya.”—Today’s English Version.
Abakhuthazi bamabhizinisi abangenazimiso zokulunga ngokuvamile bahlanganisa izindlela zamabhizinisi abo nomuzwa wokuceba—imoto yokunethezeka, izinto eziyigugu—futhi basebenzise lokhu njengesiyengo sokufihla ihuku lokuhaha ukuze babambe abasheshe bakhohliseke. Bafuna ukuba ufisele ukunethezeka kwabo. Kangangokuthi uze ukholelwe ukuthi ngokufaka imali yakho ebhizinisini yabo, nawe futhi, ungaba nezinto ezifanayo eziningi futhi ucebe ngaphandle kokwenza umsebenzi omningi. Empeleni, uma ungalahlekelwa imali yakho zisuka nje, uyophetha usebenza amahora amaningi futhi usebenza kanzima kunanini.
Ukuhaha kudala umbono okhohlisayo wokuthi abantu abakudingayo imali kuphela. Kuyiqiniso, imali ingase ibe isivikelo, kodwa ngeke ikuthenge ukujabula noma ukuphila okuphakade. Inemingcele. “Ngokuba kusemthunzini wokuhlakanipha njengasemthunzini wemali, kepha inzuzo yokwazi ingeyokuba ukuhlakanipha kulondoloza ukuphila kwalowo onakho,” kusho umShumayeli 7:12. Isenzo esisekelwe olwazini oluqondile lukaJehova uNkulunkulu neNdodana yakhe uJesu Kristu ileso esiletha injabulo yoqobo nesiholela ekuphileni okuphakade. Ngakho-ke, akukhona yini okuhlakaniphile ukuba ufune ukuba ngocebile ngokomoya kuNkulunkulu, kunokuba ulwele ukuceba ngezinto ezibonakalayo kubantu?—Mathewu 5:3; Luka 12:20, 21; Johane 17:3.
Nokho, imali ngokwayo ayiyona inkinga. Into eyinkinga ukuthi, Siyithola kanjani imali, futhi senzani ngayo?—Mathewu 6:24.
Ubuhlobo BobuKristu
Izinhlangano ezithile zezentengiselwano zikhuthaza abathengisi bazo ukuba babheke wonke umuntu abamaziyo njengomthengi wesikhathi esizayo—kuhlanganise nalabo abasesontweni. Abantu abakholwa kanye nabo baphenduka babe imakethe engokwemvelo yanoma ikuphi okuthengiswayo. Leli elinye isu amabhizinisi athengisayo alisebenzisayo ukuze andise inani labathengi babo. Kodwa ingabe umKristu weqiniso uyofuna ukuzuza ngokwezentengiselwano ngobuhlobo bobuKristu, kubazalwane nodadewabo akholwa kanye nabo?—1 Korinte 10:23, 24, 31-33.
Umphostoli uPawulu, ngemva kokusebenza iminyaka emithathu nebandla e-Efesu, wayengase aphawule ngonembeza ohlanzekile: “Angifisanga siliva lamuntu, nagolide, nangubo.” (IzEnzo 20:33) UPawulu akanqabanga kuphela ukufisa izinto zomunye umuntu kodwa futhi akazange athande akusebenzisa iqiniso ngokwezinzuzo zomuntu siqu.
Amanye amabhizinisi asebenzisa igama laphezulu ekukhangiseni ngemikhiqizo yawo futhi aqondisa imikhankaso yawo yezinto ezithengiswayo koFakazi BakaJehova ngokusebenzisa amaHholo oMbuso. Ingabe kungashiwo ukuthi lesisenzo siyavumelana nesimiso esikuzEnzo 20:33? Lutho! AmaHholo oMbuso noma amaqembu ezifundo zeBhayibheli noma imihlangano yoFakazi BakaJehova akuzona izindawo zokuxoxa ngezindaba zomuntu siqu zebhizinisi noma zokufuna izisebenzi, kodwa, kunalokho, zisebenza njengezlkhungo zezingxoxo ezingokomoya nobudlelwano ngaphambi kwemihlangano, phakathi nayo nangemva kwayo. (Heberu 10:23-25) Ngakho-ke, ukona ubuhle obungokomoya bobudlelwano bobuKristu ngezentengiselwano kungabonisa ukuntuleka okuphelele kokwazisa ngezinto ezingokomoya.
Kunenye futhi indaba yokusebenzisa ubuhlobo bobuKristu ngaphandle kweHholo LoMbuso. Ingabe lokhu kusho ukuthi amaKristu akhonza ndawonye angeke ayenze ibhizinisi nomunye noma aqalise ibhizinisi ndawonye? Cha, lokho kuyisinqumo somuntu siqu. Nokho, amanye amaKristu aqala ibhizinisi ekhuthaza ukuhaha futhi azame ukuhunga abakholwa kanye nawo ukuba babe abahlanganyela nawo noma babe abathengisi. Amaningi alamabhizinisi ayehluleka, abangele labo abafake imali ngokukhohliswa ukuba balahlekelwe izizumbulu zemali.
Iqiniso, ngezinye izikhathi abafaka imali bona ngokwabo baye bashukunyiswa isifiso esinamandla sokuthola imali ngokushesha. Kodwa ingabe umkhuthazi ngamunye akumelwe yini azizwe enomthwalo wemfanelo ngomphumela ongokwezimali wabanye ebhizinisini? Akumelwe yini acabangisise kahle kusengaphambili ngokungase kube umphumela, ngokomoya, kwabanye uma ibhizinisi lingaphumeleli? Uma kunjalo, ingabe ukwanda komthwalo wemfanelo ngokuvamile akwenzi icala lande?
Kunababonisi abangamaKristu abambalwa abaye bakhuthaza amabhizinisi angabazisayo ayingozi kwabakholwa kanye nabo. Abanjalo kumelwe baqaphele ukuthi lokhu kungase kuthinte amalungelo abo ebandleni. Akekho ongatshelwa indlela okumelwe aphathe ngayo izindaba zakhe ezingokwebhizinisi. Nokho, akekho okumelwe asebenzise kabi ubuhlobo bobuKristu ngokwezinjongo zebhizinisi.—2 Korinte 6:3, 4; 7:2; Thithu 1:7.
Qaphela Izindlela Zokushesha Ucebe
UmKristu osheshe ayibone ingozi yokuzihilela endleleni yezwe yokusheshe ucebe angalahlekelwa ukuqapha kwakhe uma leyondlela ihilela akholwa kanye nabo futhi akhohliswe nayilomcabango: ‘Empeleni, lelibhizinisi lihlukile; livela kumaKristu esikanye nawo, futhi ngingasebenzisa imali eyengeziwe. Ngiyaqiniseka ngeke bahileleke ebhizinisini eyingozi futhi bafake engozini imali yabakholwa kanye nabo. Ngaphandle kwalokho, lokhu kuyonginikeza isikhathi esengeziwe sezlnto ezingokomoya. Ngingase ngikwazi nokuphayona.’ Qaphela! “Inhliziyo iyakhohlisa ngaphezu kwakho konke, futhi imbi,” kuxwayisa iBhayibheli. Lokhu kuhlanganisa neyakho inhliziyo. Ukuhaha kungase kusiphuphuthekise, ukuze silandele inkambo eyingozi noma sisebenzise ithuba ngabazalwane bethu ukuze sifeze izinjongo zobugovu. Kumelwe sizihlolisise izisusa zethu ngokukhanyiselwa yiZwi likaNkulunkulu.—Jeremiya 17:9, 10.
Akuhlakaniphile ukungenela ibhizinisi ngokuphamazela nanoma ubani, ngisho nokholwa kanye nabo. Kuhlakaniphile ‘ukubala izindleko kuqala.’ (Luka 14:28, 29) Yazi amaqiniso—imingcele yakho, imingcele yebhizinisi.
Cabangela lesibonelo: Umshayeli onakekelayo uyayazi imingcele yemoto yakhe neyomgwaqo. Uyazi ukuthi ezinye izimoto zingase ziqondiswe kalula emajikeni nasekujikisweni ukuze zigweme izingozi lapho zigijima kakhulu kuneyakhe. Futhi uyazi ukuthi uma imoto igijima kakhulu ukuqashelwa kwephutha kuyancipha futhi nengozi yokushayisa iba nkulu. Ngakho-ke, uyakwenqaba ukuzama ukuzifanisa nalokho abanye abashayeli nezinye izimoto ezingakwenza—uyayazi imingcele. Ngokufanayo, manje akusona isikhathi sokubona ibanga nejubane esingalihamba kulesisimiso. Iqiniso lokuthi omunye umKristu angase aphumelele ebhizinisini alisho ngempela ukuthi nomunye angase aphumelele. Ukuhaha, njengotshwala kumshayeli, kungase kubangele umKristu ukuba acabangele imingcele yakhe ngokweqile, kuholele ekuwohlokeni okungokomoya nasekulimaleni noma, okwedlulele, ukufa ngokomoya.—Galathiya 5:26.
Ngaphambi kokuzihilela ebhizinisini zibuze: Ingabe ngempela kudingekile? Ingabe indlela yokuthengisa ibonakala ingeyokuhaha, noma ingabe iyosanelisa isidingo sangempela? Ngingase ngikumele yini ukulahlekelwa yiyo yonke imali engiyifakile? Uma ibhizinisi lingaphumelela ingabe ngiyozephuca mina noma umkhaya wami ukulondeka okudingekile okungokwezimali? Kuyingozi kangakanani ukufaka kwami imali? Uma ngingase ngibe umnikazi noma ngibe omunye ohlanganyelayo ebhizinisini, nginokuhlangenwe nakho nolwazi olungakanani ngebhizinisi? Ingabe ngiyijwayele imithetho yentengo? Ingabe ngiye ngayihlola imininingwane yezikweleti nemithetho yabaphathi neyebhizinisi? Ingabe ibhizinisi linemakethe ekhulayo? Ingabe ngiyohileleka kakhulu ebhizinisini kangangokuba ngikuthole kunzima ukulishiya? Uma ngigula kakhulu, ibhizinisi liyokusingatha kanjani lokho?
Futhi, ngokubaluleke kakhulu, zibuze: Ingabe ngempela ngiyoba nesikhathi esengeziwe sokunakekela izinto ezingokomoya, noma siyoba sincane? Obani kakade abakulelobhizinisi abaye ngempela bandisa isikhathi sabo abasisebenzisela ezintweni ezingokomoya?
Izimpendulo kuleyomibuzo ziboshelwe ngokuqondile esimweni sakho esingokomoya. Imikhuba yebhizinisi emibi, imicabango noma izinhloso akuphenduki kube kuhle ngenxa nje yokuthi amaKristu esikanye nawo ahilelekile, kunjalo futhi nangendlu eyakhiwe ngezinto zokwakha ezinhle ayilondekile ngesikhathi sesiphepho uma isisekelo sayo sakhelwe esihlabathini. Ingozi ngomKristu ayikhona kuphela ukulahlekelwa imali kodwa futhi ukuwohloka okungokomova.—Mathewu 7:24-27.
UDaniel, uyise wabantwana abayisithupha, wathola ukuthi ibhizinisi lakhe elingenisa izi-R400 000 ngonyaka lalifuna ukuba asebenzise amahora amaningi ehlukene nomkhaya wakhe futhi wayebulala isimo sakhe esingokomoya. Khona-ke wenzani? Wathi, “nganquma ukulishiya ibhizinisi.” Ngemva kweminyaka eyi-12, uyenezela, “Angizange neze ngizisole; ngiye ngathola izibusiso eziningi ezivela kuJehova, futhi wonke umkhaya wethu ukhonza ngobunye uMdali wethu omkhulu, uJehova.”
Indlela Yobuqili
Indlela yobuqili yezinto ezibonakalayo iphazamisa abaningi, ibangela amaKristu ahilelekile ukuba aphawule:
“Izwe ligcwele izindlela zokwenza imali eningi, ngokusheshayo—njengomsebenzi wesikhathi esigcwele noma wetoho, ikakhulukazi ngokuthengisa ngokukhuphulana. Amaningi amaKristu engikanye nawo aye ahuheka—kuphela aye alahlekelwa isikhathi esihle nemali. Mina ngokwami, ngiye ngalahlekelwa izikhathi ezintathu. Kuye kwangizwisa abuhlungu ukuthi ngiye ngahilela engikholwa kanye nabo. Baye balahlekelwa imali okwakungafanele ibalahlekele.”
“AmaKristu aziwayo lapha asungula izindlela ezihlukahlukene zokulonda imali nezamabhizinisi phakathi kwabazalwane babo. Evikini nje elidlule ngikhulunyiswe izikhathi ezintathu, ukuba ngithenge umkhiqizo othile kumzalwane, ukuba ngifake imali eqenjini likamasikhuphulane elakhiwe umzalwane futhi okungelabazalwane, noma ukuba ngihlanganyele ebhizinisini nomunye umzalwane.”
“Kubonakala sengathi amaKristu aye aba nesithakazelo esikhulu ngalelithuba [imishuwalense kamasikhuphulane] kangangokuba noma ubani, abathakazelayo, abakholwayo abanobunzima obungokomoya, noma ubani nje, ubhekwa njengongase abe isisebenzi esihle enhlanganweni yabo yebhizinisi.”
“Ngezinye izikhathi labo abaye bakhuthaza ‘ukuceba kalula okusheshayo’ baye benza inhlekisa ngezinzuzo ezingokomoya, njengalapho labo abathuthukisa ibhizinisi basho ngokuqondile, ukuthi umcebo wabo omusha noma impumelelo yayiwumphumela oqondile wesibusiso sikaJehova ebhizinisini labo.”
Umbono kaNkulunkulu ngemicebo uyomenza umKristu aqaphe izihibe zokuhaha futhi uyomsiza ukuba amelane nendlela yezwe yezinto ezibonakalayo. Ngakho-ke, umcebo ungabhekwa kanjani ukuze ungavusi inkanuko yokuhaha?
[Amazwi acashunwe esihlokweni ekhasini 25]
Lapho ukuhaha kungena ebandleni, kungase kube nomphumela wokulimala okungokomoya
[Amazwi acashunwe esihlokweni ekhasini 25]
Ukuhaha kudala umbono okhohlisayo wokuthi into abantu abayidingayo imali
[Amazwi acashunwe esihlokweni ekhasini 26]
IHholo LoMbuso aliyona indawo yokuqashelwa umsebenzi noma yokuthuthukisa ezentengiselwano
[Amazwi acashunwe esihlokweni ekhasini 26]
‘Kwangikhathaza ukuthi ngenza engikholwa kanye nabo ukuba bahileleke. Balahlekelwa imali okwangafanele ukuba ibalahlekele’
[Isithombe ekhasini 24]
Abakhuthazi bamabhizinisi abangenazimiso zokulunga bafuna ukuba ufisele ukunethezeka kwawo
[Isithombe ekhasini 27]
Umbono wokwesaba uNkulunkulu ngengcebo wenza amaKrisu aqaphele izihibe zokuhaha