Liyokulahlekiselani Ibhizinisi Lakho?

INKOSIKAZI kamongameli wezwe laseNingizimu Melika yasolwa ngokuqulela amakhulu ezinkulungwane zamaRandi ezivumelwanweni-mbumbulu eyayizenza nezinkampane ezazimiswe amalungu omkhaya wakubo. Umthengi wamasheya oneminyaka engu-38 ubudala eNdiya waboshwa futhi wadingiselwa kude nomuzi wakhe kanokusho nezimoto zakhe ezingu-29 ngenxa yokuhileleka kwakhe emkhonyovwini wezinkulungwane zezigidi ezingu-5,8 zamaRandi emakethe yokuhweba ngamasheya nasekufakeni imali ebhange. EPhilippines, izinkulungwane zezakhamuzi zesinye isiqhingi ziziphilisa ngokukhiqiza izibhamu ezingekho emthethweni. Kubikwa ukuthi ukuze zihlale kulelibhizinisi elizuzisayo, ngokuvamile zifumbathisa izikhulu ukuze zingazihluphi.

Yebo, ukungathembeki nomgunyathi ebhizinisini kwandile emhlabeni wonke. Futhi ngokuvamile kulahlekisela abantu abahilelekile isikhundla nodumo, kanye nemali.

Kuthiwani ngawe? Ingabe usebhizinisini? Noma ingabe ucabanga ukuqala ibhizinisi? Liyokulahlekiselani? Ngokungenakugwenywa, ukuba sebhizinisini kuzokulahlekisela okuthile. Lokhu akukubi ngokwakho. Nokho, kuhlakaniphile ukubala izindleko ngaphambi kokuhileleka emisebenzini yebhizinisi noma ukwenza izinqumo ngokuphathelene nalelo eselikhona kakade. (Luka 14:28) Ibhokisi elisekhasini 31 libonisa izinto ezithile oyofuna ukuzicabangela.

Kuyacaca ukuthi ukuba sebhizinisini akulula. UmKristu unezibopho ezingokomoya nezokuziphatha okumelwe azicabangele. Ingabe ungabhekana nalezizinto ezihilelekile futhi uhlale ulinganisela ngokomoya? Ingabe ezinye zalezizinto zingalé kwalokho obungakwamukela ngokokuziphatha? Iziphi izimiso eziyokusiza ukuba unqume ukuthi iziphi izinto ezamukelekayo nezingamukeleki?

Gcina Imali Isendaweni Yayo

Imali iyadingeka ukuze uqhube ibhizinisi, futhi kwethenjwa ukuthi ibhizinisi lizongenisa imali eyanele ukuze umuntu ondle umkhaya wakhe. Nokho, imigomo ngokuphathelene nemali ingaphendukezelwa kalula. Ubugovu bungangenela. Kubantu abaningi, zonke ezinye izinto ziza kamuva lapho kuhileleke khona imali. Nokho, omunye wabalobi bencwadi yeBhayibheli yezAga, u-Aguri, wazwakalisa umbono olinganiselayo lapho ethi: “Unganginiki ubumpofu nengcebo, kepha ngiphe isinkwa engisimiselweyo.” (IzAga 30:8) Wakuqaphela ukubaluleka kokwaneliseka ngesilinganiso esanele sokudla—wayengafuni “ukubulala imali,” njengoba abanye besho ebhizinisini.

Nokho, ubugovu bungabangela umuntu ukuba asikhohlwe lesisimiso lapho kuvela lelothuba elibizwa ngokuthi elokuchuma. Isikhonzi esijikelezayo soFakazi BakaJehova ezweni elisathuthuka sabika ngesinye isimo esinjalo. Inkampane ethile eyayidinga ukufakelwa izimali yanikeza umuzwa wokuthi abafaki bezimali ngokushesha babeyoyandisa ngokuphindwe kabili imali yabo, mhlawumbe ngezinyanga ezimbalwa nje kuphela. Lelithuba lokwenza imali eningi ngesikhashana labangela abaningi ukuba bafake izimali. Lesisikhonzi esijikelezayo sithi: “Abanye babejahe kakhulu ukusheshe bahileleke kukho. Abazange babuze imibuzo egculisayo, futhi baboleka izimali [ukuze bazifake kulenkampane].”

Ngokuphambene, abantu ababili baya ukuyohlola ihhovisi lalenkampane ngaphambi kokufaka izimali. Isicelo sabo sokubona indawo okusetshenzelwa kuyo senqatshwa. Lokhu kwabenza balingabaza idumela lalenkampane. Kwabonakala kuyisivikelo kubo, njengoba phakathi namasonto ambalwa, iqhinga elisobala lomgunyathi ladalulwa, futhi kwaboshwa abantu. Cabanga nje ukuthi lokhu kwabalahlekiselani labo ababengazange baphenye kuqala. Abazange balahlekelwe imali kuphela kodwa mhlawumbe nangabangane ababebaboleke imali kodwa bengenakukwazi ukukhokhelwa lapho lelisu lihluleka. Ezindabeni zezimali, yeka ukuthi kuhlakaniphe kanjani ukusebenzisa isimiso sezAga 22:3: “Oqondileyo uyabona ububi, acashe, kepha abangenalwazi badlula nje, bahlupheke ngakho”!

Bambelela Ezwini Lakho

Kuthiwani uma ibhizinisi lingakungeniseli imali obuyilindele? IHubo 15:4 litusa umuntu onamathela ezivumelwaneni ngisho nakuba ukwenza kanjalo kungamzuzisi: “Ofunga ngokuzakumlimaza, nokho angalaphuli izwi lakhe.” Kulula ngomuntu ukubambelela ezwini lakhe lapho izinto zisahamba kahle. Kepha kuvivinya ukholo lapho umuntu engazuzi ngokwezimali.

Khumbula isibonelo seBhayibheli sangesikhathi sikaJoshuwa. AbaseGibeyoni bashintsha izinto ngobuciko ukuze izikhulu zakwa-Israyeli zenze isivumelwano nabo futhi zingababulali. Empeleni, babeyingxenye yesizwe esasibhekwa njengosongo ku-Israyeli. Lapho lelicebo selembuliwe, “abantwana bakwaIsrayeli ababachithanga, ngokuba izikhulu zenhlangano zazifungile kubo uJehova.” (Joshuwa 9:18) Ngisho noma leliqembu lalivela ezweni lesitha, izikhulu zaba nomuzwa wokuthi kubalulekile ukuba zigcine izwi lazo. Futhi izenzakalo ezalandela zibonisa ukuthi lokhu kwamjabulisa uJehova.—Joshuwa 10:6-11.

Ingabe nawe uyonamathela ezivumelwaneni zakho zebhizinisi ngisho noma izinto zingahambi njengoba ubulindele?a Ukwenza kanjalo kuyokwenza ube njengoJehova, lowo ngaso sonke isikhathi obambelela ezwini lakhe.—Isaya 55:11.

Thembeka

Ukwethembeka kufana nenye yezinto ezisengozini yokuphela, uma kuwukuthi ayikapheli, ezweni lanamuhla lezamabhizinisi. Abanye emabhizinisini afana nelakho bangase basebenzise izindlela zokungathembeki ukuze bandise imali abayitholayo. Bangase bangathembeki lapho bekhangisa. Bangase bantshontshe igama lenye inkampane futhi balifake emkhiqizweni wabo. Noma bangase baveze umkhiqizo osezingeni eliphansi njengosezingeni eliphezulu. Konke lokhu kuyizinhlobo zokungathembeki. Labo abakwenzayo bafana ‘nababi,’ ngokuka-Asafa, abaye “bandisa imfuyo” yabo cishe ngezindlela zomgunyathi.—IHubo 73:12.

Ingabe wena, njengomKristu, uyosebenzisa izindlela ezingekho emthethweni? Noma ingabe kunalokho uyoqondiswa izimiso zeBhayibheli, ezinjengokuthi: “Asonanga muntu, asonakalisanga muntu, asisizakalanga ngamuntu”; “siye sazilahla izinto zomshoshaphansi okumelwe sibe namahloni ngazo, njengoba singahambi ngobuqili”; “izisindo ezimbili ziyisinengiso kuJehova, nesilinganiso senkohliso asilungile”? (2 Korinte 4:2; 7:2; IzAga 20:23) Khumbula, akekho omunye owaqala ukungathembeki ngaphandle kukaSathane uDeveli, ‘uyise wamanga.’—Johane 8:44.

Abanye bangase baphikise futhi bathi: ‘Kunzima ukuhlala ebhizinisini ngaphandle kokuba umuntu asebenzise izindlela zokungathembeki njengoba kwenza abanye.’ Yilapho-ke umKristu engabonisa khona ukholo lwakhe kuJehova. Ukwethembeka kuvivinywa lapho kukulahlekisela okuthile. Ukuthi umuntu akanakuphila ngaphandle kokungathembeki kuyefana nokuthi uNkulunkulu akabakhathaleli labo abamthandayo. Umuntu onokholo lweqiniso kuJehova uyazi ukuthi uNkulunkulu angazenzela izinceku zakhe amalungiselelo okuphila kunoma iliphi izwe nakunoma isiphi isimo. (Heberu 13:5) Yiqiniso, umuntu kungase kudingeke aneliseke ngemali encane kunaleyo abantu abangathembekile abanayo, kodwa akuzona yini lezi izindleko ezifanele ukukhokhwa ukuze sithole umusa kaNkulunkulu?

Khumbula, ukungathembeki kufana nohlobo lwesikhali okuthi uma siphonsiwe, siphindele kulowo osiphonsile. Uma kutholakala ukuthi usomabhizinisi akathembekile, amakhasimende nalabo abamnikeza impahla cishe bayomshiya. Angabakhohlisa kanye, kodwa kungase kube okokugcina. Ngakolunye uhlangothi, usomabhizinisi othembekile ngokuvamile uzuza inhlonipho yabanye. Qaphela ukuba ungathonywa yilomcabango ongamanga, ‘Bonke abanye bayakwenza, ngakho kulungile.’ Isimiso seBhayibheli sithi, “Awuyikulandela umbimbi ukuyokwenza okubi.”—Eksodusi 23:2.

Ake sithi umuntu osekuyisikhathi eside ubambisene naye ebhizinisini akayena umKristu okanye nawe futhi akabambeleli ngaso sonke isikhathi ezimisweni zeBhayibheli. Bekuyoba okufanele yini ukusebenzisa lokhu njengendlela yokubalekela umthwalo wakho wemfanelo lapho kwenziwa okuthile okungekho ngokombhalo? Khumbula isibonelo sika-Adamu noSawule. Esikhundleni sokugwema isono, bazivumela ukuba bacindezelwe abanye base besola abangane babo ngakho. Yeka izindleko eziphakeme abazikhokha!—Genesise 3:12, 17-19; 1 Samuweli 15:20-26.

Sebenzelana Ngokufanele Nokholwa Nabo

Ingabe zikhona izinto okumelwe uzicabangele lapho ungenela izindaba zebhizinisi nabakhulekeli bakaJehova okanye nabo? Lapho umprofethi uJeremiya ethenga insimu kumzala wakhe edolobheni lakubo lase-Anathoti, akazange nje amnike imali base bexhawulana. Kunalokho, wathi: “Ngaloba incwadi, ngayinamathelisa, ngazifakazisela, ngamlinganisela imali ngesilinganiso.” (Jeremiya 32:10) Ukwenza izivumelwano ezinjalo ezibhaliwe kungavimbela ukungaboni ngaso linye okungase kuvele esikhathini esithile kamuva uma izimo zishintsha.

Kodwa kuthiwani uma kubonakala sengathi umzalwane ongumKristu ukuphathe ngokungafanele ebhizinisini? Ingabe kufanele umyise enkantolo? IBhayibheli licacile kulokhu. UPawulu wabuza: “Ingabe ukhona kini onodaba ngomunye olokotha aye enkantolo phambi kwabantu abangalungile, futhi angayi phambi kwabangcwele?” Kuthiwani uma inkinga ingaxazululwa ngokwanelisayo ngokushesha? UPawulu wanezela: “Kusho ukunqotshwa okuphelele ngani ukuthi niyamangalelana. Kunalokho kungani ningavumi ukuba noniwe? Kunalokho kungani ningavumi ukuba niphanjwe?” Cabanga nje ngedumela elibi okungaliletha enhlanganweni yamaKristu uma abangaphandle bezwa ngamaKristu eqiniso axazulula izingxabano zawo enkantolo! Ingabe isizathu siwukuthi ukuthanda imali kuye kwaba namandla ngaphezu kokuthanda umzalwane? Noma ingabe siwukuthi idumela lothile liye lonakaliswa futhi ukufuna ukuphindisela kuza kuqala engqondweni? Iseluleko sikaPawulu sibonisa ukuthi ezimweni ezinjalo kungaba ngcono ukulahlekelwa kunokuya enkantolo.—1 Korinte 6:1, 7; Roma 12:17-21.

Eqinisweni, ikhona indlela engokomBhalo yokusingatha izingxabano ezinjalo ebandleni. (Mathewu 5:37; 18:15-17) Ekusizeni abazalwane abahilelekile ukuba balandele izinyathelo ezituswayo, ababonisi abangamaKristu bangase banikeze iseluleko esiwusizo kubo bonke abathintekile. Kungase kubonakale kulula phakathi nezingxoxo ezinjalo ukuvumelana nezimiso zeBhayibheli, kodwa ingabe kamuva uyokubonisa ngempela ukuthi ubulalele ngokusebenzisa iseluleko esinikeziwe? Ukuthanda uNkulunkulu namaKristu esikanye nawo kuyosishukumisela ukuba senze kanjalo.

Akungabazeki, ukuba sebhizinisini kuyokulahlekisela okuthile. Kwethenjwa ukuthi kuyokulahlekisela izinto okulula ukuzidela. Lapho ubhekene nezinqumo nanoma isiphi isimo esingabazisayo, khumbula ukuthi kunezinto eziningi ekuphileni ezibaluleke kakhulu ngaphezu kwemali. Ngokugcina imali isendaweni yayo, sigcine izwi lethu, sithembeke, futhi sisebenzelane nesikanye nabo ebhizinisini ngendlela yobuKristu, singaqiniseka ukuthi ibhizinisi alisilahlekiseli isikhathi nemali eyengeziwe kunalokho okudingekile kuyilapho ngesikhathi esifanayo singalondoloza ubungane, unembeza omuhle, nobuhlobo obuhle noJehova.

[Umbhalo waphansi]

[Ibhokisi ekhasini 31]

Izinto Ibhizinisi Lakho Elingakulahlekisela Zona

Isikhathi: Ukuqhuba komuntu ibhizinisi lakhe cishe ngaso sonke isikhathi kudla isikhathi esengeziwe kunokusebenza njengomqashwa enkampanini. Ingabe lokhu kuyosiphazamisa isimiso sakho, kushiye isikhathi esincane semisebenzi engokomoya ebalulekile? Ngakolunye uhlangothi oluhle, ingabe uyokwazi ukuhlela imisebenzi yakho ukuze usebenzise isikhathi esengeziwe ekwenzeni intando kaNkulunkulu? Uma kunjalo, kuhle. Kodwa qaphela! Lokhu kulula ukukusho kunokukwenza.

Imali: Kudingeka imali ukuze kwenziwe imali. Ikuphi ukufakelwa kwezimali ngenjongo yokuba zizale okudingeka ebhizinisini lakho? Ingabe usunazo izimali kakade? Noma ingabe kuyodingeka uziboleke? Ingabe uzimisele ukulahlekelwa ethile? Noma ingabe ukulahlekelwa kuyoba ngaphezu kwalokho ongakwazi ukukuthwala uma izinto zingahambi ngendlela okulindeleke ukuba zihambe ngayo?

Abangane: Ngenxa yezinkinga eziphakama ekusebenzeni usuku nosuku, abasunguli abaningi bamabhizinisi baye balahlekelwa abangane babo. Nakuba amakhono okwenza abangane ekhona, ukuba nobuhlobo obonakalisiwe nakho kungenzeka. Kuthiwani uma lababangane bengabafowethu abangamaKristu?

Unembeza Omuhle: Indlela evamile yokungenela ibhizinisi ezweni lanamuhla ngeyokuthi “Inyoni yakhela ngezinsiba zenye” noma ukuthi “Ngizotholani kukho?” Abahlaziyi abangaphezu kwamaphesenti angu-70 ekuhloleni kwaseYurophu baqinisekise ukuthi izindinganiso zokuziphatha zinendawo encane kakhulu noma azinayo ekuqhubekeni kwebhizinisi. Akumangalisi ukuthi umgunyathi, ukungathembeki, nemikhuba yebhizinisi engabazisayo kuye kwaba insakavukela. Ingabe uyolingeka ukuba wenze okufanayo?

Ubuhlobo Bakho NoJehova: Noma isiphi isenzo esimelene nemithetho nezimiso zikaNkulunkulu ebhizinisini, ngisho noma sivamile ezindabeni zebhizinisi, singabonakalisa ubuhlobo bomuntu noMenzi wakhe. Lokhu kungamlahlekisela ithemba lakhe lokuphila okuphakade. Ingabe lokhu bekungenakuba inani eliphakeme kakhulu ukuba likhokhwe umKristu othembekile, kungakhathaliseki ukuthi ziyini izinzuzo zezinto ezibonakalayo?

[Izithombe ekhasini 31]

Ikuphi okungasiza ekuvimbeleni ukungaboni ngaso linye kwakamuva? Isivumelwano esisekelwe ekwethembaneni noma isivumelwano esibhaliwe?