Ingabe Inkolo Yakho Imthokozisa Ngempela UNkulunkulu?
‘UNKULUNKULU akasiye uNkulunkulu wesiyaluyalu kodwa ungowokuthula.’ (1 Korinte 14:33) Khona-ke, ngokuqinisekile, izinkolo eziningi nezimfundiso zazo eziphambene ngeke zivunyelwe zonke uNkulunkulu. Khona-ke, kungase kube nenkolo eyodwa kuphela ehlangabezana nezimfuneko zakhe zokukhulekela kweqiniso. Singayithola kanjani leyonkolo eyodwa emthokozisa ngempela uNkulunkulu?
Ngokungangabazeki, abaningi banomuzwa wokuthi ukufuna okunjalo kungafana nokufuna inaliti enqwabeni yotshani. Ukubuphenyisisa bonke kungase kube umsebenzi omkhulu! Nokho kukhona indlela elula—ukusebenzisa uzibuthe onamandla. Uyothatha inaliti eyinsimbi futhi uyehlukanise notshani. Ngokufanayo, iBhayibheli lingasetshenziswa njengozibuthe ukuba lihlukanise iqiniso emangeni. Kodwa iBhayibheli likwenza kanjani lokho? Ngokuchaza ukukhulekela okuvumelekile ngokombono kaNkulunkulu.
Umphostoli uPawulu wabhala: “Yonke imibhalo iphefumulelwe nguNkulunkulu ilungele ukufundisa, nokusola, nokuqondisa, nokuyala ekulungeni, ukuze umuntu kaNkulunkulu aphelele, apheleliselwe yonke imisebenzi emihle.” (2 Thimothewu 3:16, 17) Ulwazi oluqondile lweBhayibheli lubalulekile uma sifuna ukugwema isihibe sokuzibekela imingcele yokunamathela enkolweni leyo kuphela ebonakala ilungile noma isithokozisa.
Ngaphezu kwalokho, uJesu Kristu, iNdodana kaNkulunkulu, wathi: “UNkulunkulu ungumoya; abakhuleka kuye bafanele ukukhuleka ngomoya nangeqiniso.” (Johane 4:24) ‘Singakhuleka kanjani ngomoya nangeqiniso’? Ngokulandela iziqondiso eziyiqiniso uNkulunkulu aye wazilungiselela, ngokuphefumlela, eZwini lakhe, iBhayibheli elingcwele.
Abakhulekeli Beqiniso Babonisa Uthando
IZwi likaNkulunkulu lisiholela ukuba silindeleni ekukhulekeleni kweqiniso? Sinesici esiqondile ngamazwi amabili: “UNkulunkulu uluthando.” (1 Johane 4:16) Ngakho-ke, ukukhulekela okuthokozisa uNkulunkulu kumelwe kusekelwe othandweni loqobo.
Ngokuqondile, kusho ukuthini lokho? Inkolo ethokozisa uNkulunkulu ngeke ifundise noma ivumele ukuzondwa kwabanye abantu. Umyalo weBhayibheli olula uthi, “Wothanda umakhelwane wakho njengalokhu uzithanda wena.” (Mathewu 22:39) Lokho kusho ukwehlukana nenzondo yezwe, ubandlululo, neziphithiphithi. Kusho ukungasafundi ukulwa kodwa ukuphishekela ukuthula.—Isaya 2:2-4.
Ukuchaza leliphuzu: Singacabanga yini ngomphostoli uPawulu “ongumFulentshi” ehamba eyobulala umphostoli uPetru ongumJalimane” ngenxa nje yokuthi izizwe zabo ziye zaqhatha impi? Nokho, phakathi nempi yezwe yesibili izinkolo eziningi zazihileleke kakhulu emizamweni yokulwa yezizwe zazo kangangokuthi zaze ngisho zanikela ngamabutho empi! Ngesikhathi esifanayo, abefundisi “abangamaKristu” ezinhlangothini zombili bakhulekela ukunqoba kuNkulunkulu ofanayo. Kodwa ingabe uNkulunkulu wehlukene? Ingabe angafakwa kulokho uProfesa uAlbert Einstein akuchaza ngokuthi “isifo sobuntwana” sokwazisa ubuzwe, “isimungumungwane esiphethe isintu”? Ngempela akunjalo! Kungakho abakhulekeli abathokozisa uNkulunkulu ngempela kumelwe bangathathi-hlangothi futhi babonise uthando loqobo. (Johane 13:34, 35; 17:16) ‘Kabasalwi ngokuqondene nalokho abayikho enyameni.’—Qhathanisa nabesi-2 Korinte 10:3, 4.
Ukukhulekela Kweqiniso Kudumisa Igama LikaNkulunkulu
Umphostoli uPawulu wakhomba kolunye uphawu lwenkolo ethokozisa uNkulunkulu lapho ethi nakuba abaningi bebizwa ngonkulunkulu nangamakhosi, phakathi kwabakhulekeli beqiniso kukhona “uNkulunkulu munye, uYise.” (1 Korinte 8:5, 6) Khona-ke, ngokuqinisekile, labo abathokozisa uNkulunkulu bayolazi futhi balisebenzise igama lakhe.
IBhayibheli, olimini lwalo lokuqala, lisebenzisa ngokuqondile igama likaNkulunkulu izikhathi ezingaphezu kwezi-7 000. Ngokwesibonelo, iHubo 83:18 lifundeka kanje: “Bazi ukuthi nguwe wedwa ogama lakho linguJehova; ungoPhezukonke emhlabeni wonke.” Khona-ke kungani izikhonzi zezinkolo eziningi kangaka zikhulekela uNkulunkulu ongenagama? Futhi kungani zishiya igama lakhe ezinguqulweni zamaBhayibheli azo? Lokho ngokuqinisekile akuyona indlela yokuthokozisa uNkulunkulu, ngokuba uJesu wakhuleka: “Malingcweliswe igama lakho.”—Mathewu 6:9.
Inkolo Ethokozisa UNkulunkulu
Ingabe likhona iqembu lenkolo emhlabeni kabanzi eligcwalisa izimfuneko ezimbili eziyisisekelo zokukhulekela kweqiniso esisanda kuxoxa ngazo? Ikhona yini inkolo ebonisa ngempela uthando uKristu alufundisa? Futhi ingabe labo bakhulekeli abafanayo bamdumisa ngempela uNkulunkulu futhi bayalihlonipha igama lakhe kulelikhulu lama-20 leminyaka?
Kuyiqiniso elifakazelwa kahle ukuthi oFakazi BakaJehova abathathi-hlangothi ezimpini zezizwe. Ngenxa yalesizathu, baye baphathwa kabi ezinkanjini zokuhlushwa nasemajele. Kunokuba badele izimiso zabo ezisekelwe eBhayibhelini, bakhetha indlela yokufela ukholo eyahanjwa amaKristu akuqala. Lokhu kuma kuye kwashukunyiswa uthando lwabo ngoNkulunkulu nangabanye abantu abakanye nabo. Uthando olunjalo lungolunye uphawu lokukhulekela kweqiniso okuthokozisa uNkulunkulu.
Abaningi baye baphawula umlando omuhle woFakazi BakaJehova maqondana nalokhu. Ngokwesibonelo, eminyakeni embalwa edlule umshicileli wephephandaba laseNingizimu Melika waphawula ukuthi oFakazi “bayenqaba ngokwezizathu zikanembeza ukuhlanganyela empini.” Waqhubeka: ‘Ngisho besengabantwana, oFakazi BakaJehova bayazi ukuthi lapho sebeneminyaka eyishumi nesishiyagalombili kuyodingeka babe sejele isikhathi eside ngenxa yokungathathi-hlangothi kwabo. Bemukela isijeziso njengengxenye yenkolo yabo. Bamnene futhi banokuthula.’
Kuthiwani ngenye imfuneko yenkolo ethokozisa uNkulunkulu? Ngempela, obani abahlonipha igama laphezulu, uJehova? Kusobala ukuthi oFakazi BakaJehova kuphela abakwenzayo lokhu emhlabeni kabanzi kokubili ngokushumayela kwabo nokuziphatha kwabo.—Roma 10:13-15.
Kungani ungajwayelani kangcono noFakazi BakaJehova? Ishadi elilandelayo linohlu lwezinye zezinkolelo zabo, ezihambisana nezizathu zazo ezingokomBhalo. Beka isimo sokukhulekela koFakazi kulesivivinyo esilula: Ingabe siyahlangabezana nezindinganiso zikaNkulunkulu zeqiniso njengoba zibekwe eBhayibhelini? Ingabe sithela isithelo sokuthula sothando okumelwe sibe yingxenye yokukhulekela kweqiniso? Siyalihlonipha yini igama likaNkulunkulu? Uma uthola ukuthi siyakwenza konke lokhu, uyobe usuyitholile inkolo emthokozisa ngempela uNkulunkulu.
[Ibhokisi ekhasini 6]
IZINKOLELO ZOFAKAZI BAKAJEHOVA
INKOLELO ISISEKELO ESINGOKOMBHALO
UJehova igama likaNkulunkulu Eksodusi 8:3; IHubo 83:18
IBhayibheli liyiZwi likaNkulunkulu Johane 17:17;
UJesu uyiNdodana kaNkulunkulu Mathewu 3:16, 17;
Umuntu akavelanga ngokuziphendukela
kwemvelo kodwa wadalwa Genesise 1:27; 2:7
Ukufa kwesintu kungenxa yesono
sika-Adamu Roma 5:12
Isihogo siyithuna lesintu elivamile Jobe 14:13; IsAmbulo 20:13,
King James Version
Ukuvuswa kwabafileyo kuyithemba Johane 5:28, 29; 11:25;
labafileyo IzEnzo 24:15
Ukuphila kukaJesu kwasemhlabeni
kuyisihlengo sabantu abalalelayo Mathewu 20:28;
Imithetho yeBhayibheli ngokuziphatha 1 Korinte 6:9, 10
okuhle kumelwe ilalelwe
Izithombe kumelwe zingasetshenziswa Eksodusi 20:4-6;
ekukhulekeleni 1 Korinte 10:14
Imimoya emibi kumelwe Duteronomi 18:10-12;
igwenywe Galathiya 5:19-21
Igazi kumelwe lingafakwa Genesise 9:3, 4;
emzimbeni womuntu IzEnzo 15:28, 29
UmKristu kumelwe ahlale Johane 15:19; 17:16;
ehlukile ezweni Jakobe 1:27; 4:4
Ukubhapathizwa ngokucwiliswa
ngokuphelele emanzini kubonisa Marku 1:9, 10; Johane 3:23;
ukuzinikezela kuNkulunkulu IzEnzo 19:4, 5
Iziqu ezingokwenkolo azifanelekile Jobe 32:21, 22;
Ukuba khona kukaKristu Mathewu 24:3; Johane 14:19;
okungokomoya 1 Petru 3:18
USathane ungumbusi wezwe Johane 12:31;
ongabonakali 1 Johane 5:19
UNkulunkulu uyobhubhisa lesimiso Daniyeli 2:44;
esibi sezinto samanje IsAmbulo 16:14, 16; 18:1-8
“Umhlambi emncane” uyobusa Luka 12:32;
noKristu ezulwini Abanye abantu IsAmbulo 14:1-4; 20:4
[Izithombe ekhasini 5]
Ungayithola kanjani inkolo yeqiniso?
Ungayithola kanjani inaliti enqwabeni yotshani?