Abamemezeli BoMbuso Bayabika
Ukwanda Okungokwasezulwini EVenezuela
KWASEKUPHELE izinsuku ezine ukushisa kucindezela ngokungajwayelekile. Ababedlula ngendlela babemangaliswa ukubona amadoda ayesebenza kanzima elangeni elishisayo lapho iningi labantu lalingase liphumule emthunzini noma ezindlini ezishaya umoya. Kancane kancane, uphahla lwesakhiwo esisha lwaqala ukubonakala. Ezinyangeni ezintathu nengxenye, lamadoda ayesesiqedile isakhiwo esinezitezi ezine—isakhiwo esisha esinezela isakhiwo segatsha leWatch Tower Society eLa Victoria, eVenezuela.
Lokhu eqinisweni kwase kungokwesibili igatsha laseVenezuela linwetshwa kusukela ekuvulweni kwalo ngo-1946, lapho kwakunabamemezeli boMbuso abayi-13 kuphela kulelozwe. Ngo-1977 inani labo lase lenyuke laba ngaphezu kwabayizi-13 000. Ngokomphumela, isakhiwo esisha segatsha saqedwa futhi sanikezelwa eLa Victoria ngalowonyaka. Kusukela ngalesosikhathi, inani loFakazi kulelozwe liye laba ngaphezu kwenani eliphindwe kabili. Kwase kuyisikhathi futhi sokunweba.
Isakhiwo esisha esenezelwe (esingemuva esandleni sokudla esithombeni), esinobukhulu obungamamitha skwele ayi-1 900, okuyinani elingaphezu kweliphinda kabili ubukhulu begatsha. Umgwaqo ongakwesokudla uya ngaphansi kwesakhiwo egaraji lezimoto eziyi-15. Indawo yokunyathelisa iye yasuswa esakhiweni sango-1977 (isakhiwo eside esiphakathi nendawo) yayiswa engxenyeni ephansi yesakhiwo esisha, lapho kukhona indawo yokulungisa izinto ezithile neshabhu lokubazela namahhovisi athile. Ingxenye esele yesakhiwo esisha yenza izindlu zokuhlala umkhaya waseBethel.
Isakhiwo esisha sihlonyiswe ngethange laso lamanzi nejeneretha ebheke ukuhluleka kwamandla kagesi, njengoba ukuswelakala kwamanzi nokuphela kukagesi kujwayelekile kulengxenye yezwe. Futhi ukuze ukukhanya kwelanga okuhlala njalo nomoya kutholakale ngokugcwele, ilondolo yakhiwe yaba ngaphezu kwesakhiwo.
Yini abantu abaseduze abayicabangayo ngesakhiwo esisha? Nakuba abanye bekhalela ingadi enhle eyayilapho, abaningi banomuzwa wokuthi lesisakhiwo siyanezela ekubukekeni okuhloniphekile kwendawo. Umdwebi owaziwayo, owezwa okuningi ngesakhiwo kangangokuba weza wazozibonela ngawakhe, watshela abazalwane: “Lesi ngokungangabazeki isakhiwo esakhiwe kahle eLa Victoria.” Owahlabeka umxhwele ngokufanayo kwakungunjiniyela kamasipala, owakhipha ngenjabulo imvume yokuhlala futhi wathi: “Kuwudumo ukunikeza imvume yokuhlala esakhiweni esinjengalesi.”
OFakazi eVenezuela bajabula ngoApril 21, 1985, lapho abayizi-15 802 babo behlangana eValencia eseduze nalapho ekunikezelweni kwaso, futhi abayizi-38 059 bahlangana kwamanye amadolobha amahlanu ukuze balalele isimiso ngezingcingo ezazixhunyiwe. Lelonani lababekhona lalingaphezulu kakhulu kwenani eliyingqikithi labamemezeli balelozwe. Bayalibonga futhi bayalijabulela lelilungiselelo laphezulu elibahlomisela kangcono ekushumayeleni ngokugcwele izindaba ezinhle zoMbuso ngaphambi kokuba ukuphela kwalesimiso kufike.—Mathewu 24:14.