IBhayibheli—Incwadi Yaso Sonke Isintu
BHEKA-KE, isixuku esikhulu ebesingenakubalwa-muntu, sivela kuzo zonke izizwe, nemindeni, nabantu, nezilimi, simi phambi kwesihlalo sobukhosi.”
Luhlobo luni lwesixuku lolo? Futhi senzani?
Indaba iqhubeka ithi. “Siphethe amahlamvu esundu ngezandla zaso, samemeza ngezwi elikhulu, sithi: Insindiso ngekaNkulunkulu wethu ohlezi esihlalweni sobukhosi neyeWundlu.” Cha, akusona isixuku esinobudlova esifuna okuthile ngenkani noma esibhikishayo ngenxa yesizathu esithile. Kunalokho, yisixuku esijabulayo, esithokozayo esisanda kudlula nje kokuhlangenwe nakho okuqabula kakhulu. “Laba yibo abaphuma osizini olukhulu . . . Kabasayikulamba, kabasayikoma, . . . loNkulunkulu uyakwesula izinyembezi zonke emehlweni abo.”
Isigijimi Saso Sonke Isintu
Ukuboniswa ‘kwalesosixuku esikhulu’ sezizwe zonke kutholakala encwadini yokugcina yeBhayibheli, isAmbulo, esahlukweni 7, amavesi 9 kuya ku-17. IsAm 7:9-17 Ngendlela engokombono, isenza silangazelele isikhathi lapho isintu singasenakwehlukaniswa khona ngezinhlanga, izilimi, nangobuzwe kodwa siyohlangana ngokuthula nangobunye futhi sijabulele inkululeko yeqiniso ekwesabeni nasekusweleni. Lokho, ngokuyisisekelo, kuyisigijimi esivelele iBhayibheli elisinikeza isintu sonke.
‘Kodwa,’ ungase ubuze, ‘sivelele ngayiphi indlela lesosigijimi? Ingabe abantu kuwo wonke umhlaba bebengakhulumi ngokuthula nobunye?’ Yebo, bebekhuluma ngakho. Kulenkathi yokucindezeleka kwezizwe zonke, eyenziwa ibe ngedlulele ngemizabalazo yezombangazwe, yezinhlanga, yezomnotho, nengokwenkolo, ubani onengqondo ephilayo ongakukhathaleli ukuthula kwezwe? Kodwa esikhathini eside ngaphambi kokuba kube nalowo mzabalazo wezizwe zonke nangaphambi kokuba ukusinda kwesintu kube sematheni, iBhayibheli lakhuluma ngesikhathi lapho sonke isintu siyojabulela ukuthula nobunye ngaphansi kukahulumeni owodwa, uMbuso kaNkulunkulu.
Umbono Ngomhlaba Kusukela Ekuqaleni
Kusukela ekuqaleni kwalo, iBhayibheli linikeza umbono ngomhlaba ngokuqondene nekusasa lesintu. Umthetho wokuqala uAdamu noEva abawunikezwa uMdali wabo, uJehova uNkulunkulu wawuthi, “Zalani, nande, nigcwalise umhlaba, niwunqobe.” (Genesise 1:28) UAdamu noEva babengeke babe okhokho bohlanga noma isizwe esisodwa. Kunalokho, babezoba okhokho bohlanga lwesintu. Umphostoli uPawulu walifakazela leliqiniso lapho eletha isigijimi seBhayibheli kumaGreki eAthene. Wawatshela ukuthi uNkulunkulu “wazenza izizwe zonke ngagazi linye ukuba zakhe ebusweni bonke bomhlaba.”—IzEnzo 17:26.
Kumelwe sivume ukuthi bonke abantu babebuswa umqondo wokuthi zonke izinhlanga zesintu zibe munye. Ngisho nanamuhla, naphezu kwakho konke ukukhuluma ngokuthula kwezwe nobuzalwane, akulona yini iqiniso ukuthi ukubandlululana kwezinhlanga nobuzwe kuyaqhubeka kuphakathi kwamandla amakhulu ahlukanisayo ahlupha isintu? Nokho, iBhayibheli liyayinqamula lena neminye imingcele. Likhuluma nabantu bazo zonke izizwe njengomkhaya ewodwa omkhulu futhi likhuluma ngomhlaba njengekhaya elilodwa elikhulu lalo lonke uhlanga lwesintu. Ngalomqondo, ngempela liyincwadi yaso sonke isintu.
Ithemba lokuba zonke izinhlanga zesintu zihlale njengomkhaya ojabulayo emhlabeni wonke laliyoba ngokoqobo ukuba uAdamu noEva bahlala bemlalela uJehova uNkulunkulu. Kodwa akubanga njalo. IBhayibheli liyasitshela: “Isono sangena ezweni ngamuntu munye [uAdamu], nangesono kwangena ukufa, ngokunjalo ukufa kwafikela abantu bonke, lokhu bonke bonile.”—Roma 5:12.
Ngokucabangela lokhu, alukho uhlanga noma isizwe olungaphezu noma olungaphansi kolunye uhlanga noma isizwe. Nalapha futhi, iBhayibheli likhuluma ngaso sonke isintu ngaphandle kokubandlulula noma ukukhetha. Lokhu kumane kubonisa ukuthi “bonke bonile, basilalelwe yinkazimulo kaNkulunkulu.” (Roma 3:23) Nakuba abantu kwezinye izindawo bengase bacebe ngokwezinto ezibonakalayo, babe abafunde kangcono, njalonjalo, akulona yini iqiniso ukuthi kuyo yonke indawo, sibona abantu bebhekene nezinkinga ezifanayo eziyisisekelo—ukugula, ukuguga, ukungapheleli, nokufa?
Isithembiso Esizozuzisa Sonke Isintu
Nakuba isimo sesintu siye saba esidabukisayo, umuntu akazange ashiywe engenathemba. Lapho sisezingeni elibucayi, uJehova uNkulunkulu wangenela ngesithembiso sakhe. UNkulunkulu wathi kuAbrahama: “Ngenzalo yakho ziyakubusiswa izizwe zonke zomhlaba.” (Genesise 22:18) Ngokuzenzekelayo, izinkolo zomhlaba ezintathu kwezinkulu—ubuJuda, ubuKristu, nobulslam—seziye zasemukela lesithembiso njengengxenye yezinkolelo zazo. IBhayibheli kuphela elembula ukufezeka kwalesithembiso ngokuloba ukusebenzelana kukaJehova uNkulunkulu noAbrahama nenzalo yakhe, kuhlanganise nesizwe sikaIsrayeli wasendulo.
Kodwa lokhu yilokho abantu abaningi abangakugxeka. Banomuzwa wokuthi lokhu kuyisenzo esisobala sokukhetha noma sokubandlululwa kwezinhlanga. Ngalesosisekelo bayalenqaba iBhayibheli, noma okungenani imiBhalo eminingi yesiHeberu, njengeyimfundiso nje yesizwe. Nokho, ingabe lokhu kunengqondo? Kungani uJehova amethemba kangaka uAbrahama futhi wenza naye isithembiso?
IBhayibheli liyachaza: “UAbrahama wakholwa nguNkulunkulu, kwabalelwa kuye ukuthi kungukulunga, wabizwa ngokuthi umhlobo [“umngane,” NW] kaNkulunkulu.” (Jakobe 2:23) Ngokuthakazelisayo, incwadi engcwele yamalslam, iKoran, nayo ikhomba ukholo njengesizathu esenza uNkulunkulu wamukela uAbrahama njengomngane. “Ubani onenkolo engcono kunalowo ozithoba ngokuphelele kuAllah? Futhi ungumenzi wokuhle (kwabanye) ulandela ukholo lukalbrahim [uAbrahama], elungileyo, futhi uAllah wenza ulbrahim waba umngane wakhe.”—SURAH IV, ivesi 125, Holy Qur’an, ihunyushwe nguM. H. Shakir.
Kuthiwani ngamaIsrayeli? Eminyakeni engaphezu kwengama-400 ngemva kokuba uNkulunkulu enze isithembiso kuAbrahama, uMose wawatshela: “UJehova akanamathelanga kini, kanikhethanga ngokuba nanibaningi kunezinye izizwe, ngokuba naniyingcosana kunezizwe zonke, kepha ngokuba uJehova enithanda nangokuba ebeyakugcina isifungo asifungela oyihlo.”—Duteronomi 7:7, 8.
Ngakho kwakungengenxa yokuthi uAbrahama noma amaIsrayeli ayengawohlanga noma isizwe esiphezulu, noma ngoba ngandlela-thile ayengcono kunabanye abantu. Kunalokho, kwakungenxa yothando lukaNkulunkulu nangomusa ongafanelekanga awubonisa ngesisekelo sokholo nangemisebenzi elungile. Umphostoli uPetru waliveza leliphuzu lapho ethi: “UNkulunkulu akabheki ubuso bamuntu, kodwa ezizweni zonke omesabayo nowenza ukulunga uyamukeleka kuye.”—IzEnzo 10:34, 35.
Ngalokho, nakuba isikhathi esithile uJehova uNkulunkulu asebenzelana nesizwe sakwaIsrayeli kuphela, ngokuqinisekile wayenombono wenhlala-kahle yaso sonke isintu. Ukusebenzelana kwakhe noIsrayeli akulotshwanga eBhayibhelini ukuba kukhuthaze umoya wobuzwe noma kuphakamise esinye isizwe kunesinye. Kunalokho, “konke okwalotshwa ngaphambili kwalotshelwa ukufundiswa kwethu, ukuze ngokubekezela nangenduduzo yemiBhalo sibe-nethemba.” (Roma 15:4) Yebo, lezizenzakalo ziqokomisa uthando lukaNkulunkulu nokubekezela ekugcwaliseni ithemba lokuthi sonke isintu siyophinde futhi sihlanganiswe ngokuthula nobunye. Lelithemba liyoba kanjani ngokoqobo?
Ukuphatha Kokuthula
UPawulu uyachaza, “ngokuzibonela kwakhe [uNkulunkulu] azimisela khona ngaphambili, kuze kube-yihlelo [“ukuphatha,” NW] lokuphelela kwezikhathi lokuba kuhlanganiselwe ndawonye kuKristu konke okusezulwini nokusemhlabeni” (Efesu 1:9, 10) Kuyini lokhu “kuphatha”?
Leligama lihunyushwe egameni lesiGreki elithi oi·ko·no·miʹa, ngokuyisisekelo elisho “ukuphathwa kwendlu.” Ngalokho, ngisho nakuba isintu sihlukene ngokwezombangazwe, ngokwezinhlanga, ngokwezomnotho, nangokwenkolo, uNkulunkulu uhlose ukususa wonke lamandla ahlukanisayo nokuletha sonke isintu esilalelayo ndawonye futhi njengomkhaya ojabulayo emhlabeni wonke. Uyokwenza kanjani lokhu? Uyokufeza ngoMbuso wobuMesiya ezandleni zeNdodana yakhe, uJesu Kristu.—Bheka uDaniyeli 2:44; Isaya 9:6, 7.
Namuhla, naphezu kokucindezeleka nezinkinga zembulunga yonke, izigidi zabantu kuwo wonke umhlaba ziye zasabela esigijimini seBhayibheli sokuthula nobunye. Ziye zeza njengaleso “sixuku esikhulu” esingenakubalwa esichazwe encwadini yesAmbulo. Ngokomfanekiso, kakade sesiphethe amahlamvu esundu phambi kwesihlalo sobukhosi sikaNkulunkulu, sinikeza udumo futhi sizithoba kulowo “ohlezi esihlalweni sobukhosi,” uJehova uNkulunkulu, ‘nakulo iWundlu,’ uJesu Kristu.—IsAmbulo 7:9, 10.
Ingabe lesosigijimi siyakukhanga? Kungakhathaliseki uhlanga lwakho, ubuzwe, noma ulimi, ngokuhlola nokwamukela isigijimi seBhayibheli manje, ungahlanganyela ‘nalesosixuku esikhulu’ sazo zonke izizwe. Ungasho ngesibindi kanye naso uthi: “Siyalindela ngesithembiso sakhe [uNkulunkulu] amazulu amasha nomhlaba emusha okukhona kuwo ukulunga.”—2 Petru 3:13.
Ngempela, iBhayibheli lingaba yiNcwadi yakho!
[Isithombe ekhasini 5]
UAdamu noEva babengokhokho bohlanga lwesintu
[Isithombe ekhasini 7]
UAbrahama, owashiya izwe lakubo, wazuza umusa kaNkulunkulu ngokholo nangemisebenzi elungile