Ochwepheshe Abathola Umsebenzi Woqobo Wesikhathi Sonke
UMOYA wasebusuku wawubanda namanzi ebandisa okweqhwa. Amakhulu amabili ezinsizwa nezintombi, embethe izingubo ezinde ezimhlophe futhi ephakamisela amakhandlela ngaphezu kwamakhanda awo, angena emanzini, amanzi aze afika ezifubeni. Ingabe kwakuyisiko lokwethwasa lenkolo engaziwa? Noma mhlawumbe ukuganga kwentsha?
Labafundi abaneziqu basesikoleni esiphakeme nabaseYunivesithi babezibandakanya nezinkulungwane zabanye abangontanga yabo kulokho okungase kucatshangelwe njengesiko lokudluliselwa emsebenzini wobuchwepheshe abawukhethile enkampanini enkulu eJapane. Ubhapathizo lwabaningi emanzini abandayo, lwaluhloselwe ukuhlambulula izisebenzi zangomuso kunoma yikuphi ukuthambekela kokuzibusa okungenzeka ukuthi zakuthola esikoleni nokuqinisa isibopho sazo nokwethembeka enkampanini.
Ubuchwepheshe Nokuzinikezela
“EJapane umsebenzi uwumphakathi. Umphakathi uwumsebenzi,” kubhala uFrank Gibney encwadini yakhe ethi: Japan: The Fragile Superpower. Lokhu kusho ukuthi uma umuntu eke wangena enkampanini, konke ukuphila kwakhe kugxila kuyo. “Uma esebenzela iMitsubishi, uyindoda yeMitsubishi. Abangane bakhe abaningi abaseMitsubishi. Uphuza nabo, udlala nabo igalofu nebhola eliginqwa phansi. futhi ahlanganyele izinkinga zakhe nabo. Ngokulondekile, uncintisana nabo, kodwa njengabantwana abancintisana emkhayeni okungekho noyedwa ocabanga ukuwushiya. Ngaphandle kwezihlobo, futhi mhlawumbe nabangane abambalwa basesikoleni, iningi lajwayelene nabo—futhi ngokuvamile abomkhaya wakubo—bavumelana nomqondo waleyonkampani.”
Izisebenzi zinikezwa ukulondeka ngokunikezwa umsebenzi wesikhathi sonke, ukuze kuvuzwe lokho kuzinikezela nokuzidela okunjalo. Lokhu kuhlanganisa ukuqeqeshwa okunganqamuki, ukufundiswa imiqondo emisha, ukushintshelwa kwezinye izindawo, futhi ngokuqinisekile nokukhushulwa esikhundleni.
Intsha eningi eJapane iyamukela kalula lenqubo ukuze iphumelele bese iba yingxenye yesimiso. Abanye, nakuba bengaphishekeli ukuthola izikhundla eziphezulu ezinkampanini, bazama ngamandla ukuqhubekela phambili kweminye imisebenzi yobuchwepheshe. Kodwa ingabe isimiso esinjalo siletha injabulo nokwaneliseka? Ingabe umsebenzi wesikhathi sonke usho injabulo yesikhathi sonke? Abaningi bayabona ukuthi kunokuthile okungcono nokuvuza ngokwengeziwe kunokuphishekela izikhundla eziphezulu enkampanini noma ukuzabalazela ukuzizuzela ingcebo nodumo.
Umsebenzi Wakhe Wawungukuphila Kwakhe
UJunichi wathola iziqu ngo-1961 eYunivesithi yaseKeio Yesikole Sezemisebenzi. Elandela ezinyathelweni zesiko labafundi abaneziqu zaseyunivesithi, wajoyina imboni edumile. Ngokombono wakhe, lena kwakuyimboni enkulu ethengisa izimoto eJapane, enezisebenzi eziyizi-4 700. Akazange akujahe ukuphishekela isikhundla esiphezulu. Ekugcineni, waba umphathi emnyangweni ayekuwo. Nakuba umsebenzi wakhe ngokuvamile owawuqala ekuseni kuze kube phakathi nobusuku, wawungamshiyeli isikhathi sokuba abe nomkakhe nezingane zakhe eziyisihlanu, wakwamukela konke lokhu njengokuzidela okudingekile ukuze babe nekusasa elilondekile.
Kodwa okuthile kwenzeka ngo-October 1974. UJunichi wezwa ukuthi umkakhe nezingane babetadisha iBhayibheli noFakazi BakaJehova futhi behlanganyela nemihlangano yobuKristu. Wenza konke ayengakwenza ukuba abayekise, kuhlanganise nokubashiya, kodwa akaphumelelanga.
Ngolunye usuku ebuya emsebenzini, umkhaya wawungekho uye emihlanganweni. UJunichi wathi: “Ngathola itafula lilungiselelwe ukudla kwami kwakusihlwa, futhi kwakunencwadi engangiyibhalelwe. Encwadini, umkhaya wami wangitshela ukuthi wawungasoze ulilahle iqiniso, ukuthi futhi kwakungokwenzuzo yami uqobo, nokuthi ngolunye usuku ngangiyozwisisa.” Lokhu kwamhlaba umxhwele uJunichi. “Ngacabanga ukuthi mhlawumbe leli kwakuyilona iqiniso, futhi ngayeka ukubaphikisa.”
“Njengoba isikhathi sasilokhu siqhubeka, oFakazi babeza bezongivakashela futhi bangikhuthazele ukutadisha iBhayibheli. Yilapho ukuphila kwami kobuchwepheshe kwaqala khona ukungiphazamisa. Ngangimatasa kakhulu emsebenzini kangangokuba ngazizwa ukuthi ngangingeke ngibe nesikhathi sesifundo seBhayibheli nemihlangano. Futhi-ke ngangazi ukuthi uma ngangizofunda, kwakuzodingeka ngiyeke izenzo zobuqili nomkhuba wokuzijabulisa kuze kube sebusuku kakhulu owawuhlobene nomsebenzi. Njengoba lokho kwakuzolimaza ibhizinisi, ngakungabaza ukutadisha.”
Kodwa ngenxa yesikhuthazo soFakazi, uJunichi waqala ukufunda, futhi ngokushesha wathuthukela ezingeni lokuba anikezele ukuphila kwakhe kuNkulunkulu futhi abhapathizwe. Nakuba esalokhu esebenza isikhathi esigcwele, uJunichi usekutholile lokho akucabangela njengomsebenzi wangempela wesikhathi sonke. Kusukela ngoMarch 1978, ubekhonza ngokuqhubekayo njengephayona elisizayo, echitha amahora angama-60 ngenyanga emsebenzini wokushumayela.
Ingabe uJunichi uye wazuza kulendlela yakhe entsha yokuphila? “Yebo, ngiye ngazuza. Ngithola ukuthi ngikhiqiza kakhulu phakathi nosuku ukuze ntambama ngikhululekele ukuphishekela izithakazelo zoMbuso nomkhaya wami. Ngiye ngaba namathuba amaningi okufakaza kwengisebenza nabo nokufunda iBhayibheli namanye amadoda anemisebenzi ewagcina ematasa njengoba kwakunjalo ngami. Amabili aye abhapathizwa, futhi ngifunda namanye amathathu. Ngibonga uJehova ngesineke sakhe ngami.”
Wayefuna Ukuceba Ngokushesha
Njengomunye wabantwana abayisithupha emkhayeni, uTakafu wasinda ekuhlaseleni kwezindiza eDolobheni laseNogoya enehembe ayeligqokile nomqondo wokuceba ngokushesha. Ngenxa yokuncenga kukamalume wakhe, wangenela isikole sompetha somjaho wamabhayisikili eneminyaka eyi-15. Lapho eneminyaka engama-22, waphumelela njengomjahi wamabhayisikili wekilasi lokuQala, evela emijahweni yakulo lonke izwe. Ukhumbula ebona unina enikela ngemiklomelo yakhe ealtare lomkhaya njengophawu lokubonga. Kwakubonakala ukuthi uTakafu wayewufinyelele umgomo wakhe ekuphileni nokuthi konke kwakumhambela kahle.
Khona-ke isithunywa sevangeli esiwuFakazi kaJehova safika kubo futhi sanika uTakafu ukudla kwengqondo. Amazwi anjengalawo akhulunywa uJesu athi: “Kuyakumsizani umuntu, uma ezuza izwe lonke, onakelelwe ukuphila kwakhe na?” agxila engqondweni yakhe nasenhliziyweni. (Mathewu 16:26) Ngokuhamba kwesikhathi, uTakafu wathuthuka olwazini lweBhayibheli futhi wabona ukuthi kwakumelwe enze ushintsho oluthile.
UTakafu wathi, “Njengomgibeli wamabhayisikili ongumpetha, ngangazi ukuthi umjaho wamabhayisikili nokugembula kwakuhambisana. Kodwa ukwenza isinqumo kwakusenzima. Ngangiye nganikela iminyaka eyisikhombisa yokuphila kwami kulomdlalo, futhi nomholo wami wawubonakala udingeka enhlalakahleni yomkhaya wakithi. Kodwa ngafunda eBhayibhelini ukuthi uMose noPawulu babhekana nokwenza izinqumo ezifanayo futhi bakhetha indlela engcono. Nami ngenze njalo.” UTakafu wangenela umjaho omusha—umjaho wokuphila—futhi usaqhubeka nawo kuze kube namuhla, usekhonze iminyaka ethile esiza amabandla njengombonisi ojikelezayo.
Ibhizinisi Lakhe Lalithatha Sonke Isikhathi Sakhe
USatoshi wayenebhizinisi lezingubo zabesifazane. Njengomnikazi wezitolo ezine zezingubo zabesifazane ophumelelayo, wayelondekile ngokwezimali. Kodwa ukusebenza kwakhe kwezamabhizinisi kwakumholela futhi esiphethweni sokuthi ukungcoliswa komoya komhlaba wonke, ukuswelakala kokudla, nempi ngokushesha kwakuzosho ukuphela kokuba khona komuntu. Kanjalo, lapho uFakazi efika nepheshana elalinikeza isiqinisekiso sokuthi uNkulunkulu wayengeke akuvumele lokhu, isithakazelo sikaSatoshi savuswa.
Kodwa ibhizinisi lakhe lamvimbela. USatoshi wathi, “Ngenxa yomncintiswano onzima, ukunciphisa izinga kwakuyosho ukulahlekelwa ibhizinisi lami. Yindaba yokuthi ‘hlula noma wehlulwe.’ Isaga esikwezentengiselwano esokuthi uma ungematasatasa ngokoqobo uyawa.” Ngakho kwathatha iminyaka emibili, kanye nomzamo omkhulu, ngaphambi kokuba uSatoshi ekugcineni enze isinqumo sokuba nesifundo seBhayibheli.
Ngemva kokuba esewuFakazi kaJehova, wathengisa ezimbili zezitolo zakhe futhi ‘unezinduna’ ezimbhekela lezi ezinye ezimbili. Nakuba manje uSatoshi esebenza njengomgcini-zincwadi nomqondisi izinsuku ezimbili noma ezintathu kuphela ngenyanga uthi: “Ngisalokhu ngineholo elanele. Ngifuna inkonzo yami kuJehova ize kuqala.” Manje usephishekela umsebenzi wakhe woqobo enkonzweni yesikhathi esigcwele, ekhonza njengephayona. Yena nomkhaya wakhe bathuthuka kahle ngokomoya.
Umsebenzi Wakhe Wamsiza Ekutholeni UNkulunkulu
UHiroshi wayesebenza esitolo sakubo samathini. Kodwa isithakazelo sakhe soqobo sasisekuthwebuleni izithombe zemvelo. Waba nekhono elihle kukho kangangokuthi ezinye izithombe zakhe zezilokazane zakhonjiswa yonke indawo. Lapho eseneminyaka engama-29, wayesengumpetha ekuthwebuleni izithombe zendalo.
“Ekutadisheni kwami ngezilokazane” kukhumbula uHiroshi, “ngacabanga ukuthi uma uNkulunkulu wayekhona, kumelwe ukuthi uthanda amahlaya. Lokhu kwangiholela ekungabazeni umqondo wokuziphendukela-kwemvelo, futhi ngaqala ukuba nesithakazelo eBhayibhelini.”
Ngolunye usuku ebusika, oFakazi ababili bahambela uHiroshi. “Lapho ngemukela kubo omagazini abababili ababenezihloko ezikhuluma ngezilwane, basikisela ukufunda nami iBhayibheli ekhaya lami,” kusho uHiroshi. “Ngacabanga ukuthi njengoba ngangingeke ngaya esontweni ukuze ngifunde, kwakungeke kudingeke ngibe yilungu. Ngakho ngavuma.” Nakuba amangala lapho efunda lokho iBhayibheli elalikusho ngoMdali, wakwamukela ngokushesha. Isithakazelo sakhe ngendalo saba ngesesibili othandweni lwakhe ngoNkulunkulu.
UHiroshi manje wondla umkhaya wakubo njengomthwebuli wezithombe ozimele. Kepha umsebenzi wakhe woqobo uwukuba isikhonzi sesikhathi esigcwele.
Bathola Okuthile Okungcono
Kunohlu lochwepheshe baseJapane abashintsha ukuphila kwabo—futhi ngezinye izikhathi, imisebenzi yabo—lapho bezwa ngoJehova nezinjongo zakhe. Izikhundla zabo zihlanganisa odokotela, odokotela bamazinyo, abaklami, abahleli bamacomputer nabaqambi bezinhlelo, othisha, odokotela bezilwane, abacwali bezinwele, neziphathimandla, njalonjalo.
Esikhathini esidlule bonke labochwepheshe babezinikezele ngokugcwele emisebenzi yabo. Ngokufunda ukuthi lesimiso sezinto sisondela ekupheleni kwaso, benza isinqumo esihlakaniphile. Babeka imisebenzi yabo endaweni yayo efanele base beqala ukuphishekela okuthile okungcono—uMbuso kaNkulunkulu nezibusiso zawo ezithenjisiwe. (Mathewu 6:33) Bedela lokho ababekucabangela ngesikhathi Bangaphambili ukuthi kwakuzoba umsebenzi wabo wesikhathi sonke, sebengochwepheshe emsebenzini omusha. Baye bathatha umsebenzi wesikhathi sonke njengezikhonzi ezingamaphayona zikaJehova uNkulunkulu, oPhezukonke.
[Isithombe ekhasini 23]
Umpetha womjaho wamabhayisikili uTakafu Yamaguchi