IBhayibheli Lishintsha Ukuphila Kwabantu
Yini eyabangela indoda eyayithanda izithuthuthu, izidakamizwa nezemidlalo ukuba ikhethe ukuba yisikhonzi sesikhathi esigcwele? Yini eyasiza indoda eyayiphila ngokugembula ukuba ikwazi ukugqashula kulo mkhuba bese yondla umndeni wayo ngomsebenzi ohloniphekile? Wathintwa yini owesifazane osemusha owayekhuliswe njengomunye woFakazi BakaJehova kodwa owayengasaphili ngezimiso zeBhayibheli ukuba aphinde acabange ngendlela yakhe yokuphila? Zizwele njengoba laba bantu bezikhulumela.
IMINININGWANE YAKHE
IGAMA: TERRENCE J. O’BRIEN
UBUDALA: 57
IZWE AZALELWA KULO: I-AUSTRALIA
UMLANDO: WAYEDLA IZIDAKAMIZWA, ETHANDA NEZITHUTHUTHU
UKUPHILA KWAMI: Ngakhulela edolobheni eliphithizelayo laseBrisbane, inhloko-dolobha yaseQueensland. Umndeni wakithi wawungamaKatolika, kodwa lapho ngineminyaka engu-8, sayeka ukuya esontweni futhi asiphindanga sakhuluma ngenkolo. Lapho ngineminyaka eyishumi, sathuthela eGold Coast e-Australia. Sasihlala eduze nogu, ngakho ngangichitha isikhathi esiningi ngibhukuda futhi ngintweza phezu kwamagagasi.
Yize kunjalo, angizange ngikhule kahle. Ubaba wasishiya ngineminyaka engu-8. Umama waphinde washada, futhi ekhaya utshwala nezingxabano kwakuyinsakavukela umchilo wesidwaba. Ngobunye ubusuku, ngihlezi phezu kombhede ngemva kokuxabana kwabazali bami, ngafunga enhliziyweni yami ukuthi uma sengishadile, ngeke ngilwe nomkami. Naphezu kwezinkinga zasekhaya, umkhaya wakithi—owawakhiwa yizingane eziyisithupha, umama nobaba—wahlala usondelene.
Lapho sengizohlanganisa iminyaka engu-20, iningi lontanga yami lase lingamahlongandlebe. Lalibhema insangu, ugwayi lidla nezinye izidakamizwa futhi liyizidakwa. Nami ngangena kulowo mshungu. Ngangikuthanda nokugibela izithuthuthu. Nakuba ngavelelwa izingozi ezimbalwa ezimbi kakhulu, ngaqhubeka ngizifela ngezithuthuthu futhi nganquma ukunqamula i-Australia ngaso.
Naphezu kwayo yonke inkululeko enganginayo, ngangivame ukucindezeleka lapho ngicabanga ngesimo sezwe nangendlela abantu abaningi ababengenandaba ngayo nezinkinga zesintu. Ngangilangazelela ukwazi iqiniso ngoNkulunkulu, ngenkolo nangezimo zezwe. Kodwa lapho ngibuza abefundisi ababili bamaKatolika, izimpendulo zabo zavele zangidumaza. Ngaxoxa nabefundisi abahlukahlukene bamaProthestani kodwa nezabo izimpendulo zangidumaza. Khona-ke, umngane wami wangihlelela ukuba ngihlangane no-Eddie, omunye woFakazi BakaJehova. Ngaba nezingxoxo izikhathi ezine naye, futhi isikhathi ngasinye wayengiphendula ngeBhayibheli. Zibekwa nje, ngabona ukuthi ngangithole into eyigugu. Kodwa ngaleso sikhathi angizange ngisibone isidingo sokushintsha indlela engangiphila ngayo.
INDLELA IBHAYIBHELI ELAKUSHINTSHA NGAYO UKUPHILA KWAMI: Phakathi nohambo lwami lokunqamula i-Australia, ngaxoxa nomunye uFakazi engahlangana naye endleleni. Kodwa lapho ngiphindela eQueensland, angikwazanga ukuxhumana noFakazi izinyanga eziyisithupha.
Ngolunye usuku lapho ngisendleleni ngibuya emsebenzini, ngabona amadoda amabili ayegqoke kahle ephethe izikhwama ehamba emgwaqweni, futhi ngacabanga ukuthi kumelwe ukuba angoFakazi BakaJehova. Lapho ngixoxa nawo, ngathola ukuthi ngangishaye khona, ngabe sengicela ukuba angifundele iBhayibheli. Angipholisanga maseko, ngaqala ukuya emihlanganweni yoFakazi, ngaba khona ngisho nasemhlanganweni omkhulu owawuseSydney ngo-1973. Nokho, lapho abasekhaya—ikakhulukazi umama—bezwa ukuthi ngifundelwa iBhayibheli, abajabulanga neze. Ngenxa yalesi sizathu nezinye, ngayeka ukuhlanganyela noFakazi. Unyaka wonke ngagxila komunye umdlalo engiwuthanda kakhulu, ikhilikithi.
Nokho, ekugcineni ngaqaphela ukuthi okuwukuphela kwesikhathi lapho ngangizizwa ngijabule khona ngempela kwakuba yilapho ngitadisha iBhayibheli noFakazi BakaJehova. Ngaphinde ngathintana nabo, ngaqala futhi ukuba khona emihlanganweni. Nganqamula nobuhlobo nabangane bami ababesebenzisa izidakamizwa.
Into ngempela eyangibangela ukuba ngenze lezi zinguquko, kwaba yilokho engakufunda eBhayibhelini ngoJobe. UBill, uFakazi osekhulile onomusa kodwa oma aqine kwakushoyo, wayengifundela iBhayibheli njalo. Ngemva kokuba sifunde indaba kaJobe, uBill wangibuza ukuthi ubani omunye uSathane amsola ngokuthi akakhonzi uNkulunkulu ngenhliziyo ephelele. (Jobe 2:3-5) Ngabala bonke abantu okukhulunywa ngabo eBhayibhelini engangibazi; uBill wabe esengiphendula ngesineke, “Yebo, kunjalo impela, nalaba obabalile uSathane wabasola.” Wabe esengibuka ngqo emehlweni wathi, “USathane ukubhekise nakuwe lokhu!” Kwaphela nasozwaneni. Ngaphambi kwaleso sifundo, ngangazi ukuthi lokho engangikufunda kwakuyiqiniso. Kodwa ngaqala ukuqonda isizathu sokuthi kungani kufanele ngikusebenzise engikufundayo. Ezinyangeni ezine kamuva ngabhapathizwa njengomunye woFakazi BakaJehova.
INDLELA ENGIYE NGAZUZA NGAYO: Kuyangethusa ukucabanga ukuthi ngabe kunjani ukuphila kwami ukube angizange ngifunde ukuphila ngezimiso zeBhayibheli. Ngicabanga ukuthi ngabe sengafa. Iningi labangane bami bakudala labulawa izidakamizwa notshwala. Lalinemishado engajabulisi. Ngiyabona nje ukuthi nokwami ukuphila ngabe kunjalo.
Manje ngishadile futhi mina nomkami uMargaret sijabulela ukukhonza ehhovisi legatsha loFakazi BakaJehova e-Australia. Akekho emndenini wakithi ohlanganyela nami ekukhulekeleni uJehova. Nokho, eminyakeni edlule, mina noMargaret sajabulela ukufundela abantu abaningi iBhayibheli, kuhlanganise nabanye abashadile, ukuba baguqule ukuphila kwabo, njengoba nje nami ngenza. Siye sazakhela abangane abaningi abahle. Ngaphezu kwalokho, uMargaret, owakhuliswa njengoFakazi, uye wangisiza ukuba ngigcine isifungo engasenza eminyakeni ethi ayibe ngu-40 edlule. Sekudlule iminyaka engaphezu kwengu-25 sijabule emshadweni wethu. Asiboni ngaso linye kuzo zonke izinto, kodwa kuze kube manje asikaze silwe. Sobabili sinomuzwa wokuthi kufanele sibonge iBhayibheli ngalokho.
IMINININGWANE YAKHE
IGAMA: MASAHIRO OKABAYASHI
UBUDALA: 39
IZWE AZALELWA KULO: IJAPAN
UMLANDO: WAYEGEMBULA
UKUPHILA KWAMI: Ngakhulela e-Iwakura, indawana encane eqhele ngesigamu sehora uma uhamba ngesitimela usuka eNagoya. Abazali bami babengabantu abanomusa. Kodwa kamuva ngathola ukuthi ubaba wayeyi-yakuza, noma ilungu leqembu lezigilamkhuba, futhi wake wondla umndeni wakhe onamalungu amahlanu ngokukhwabanisa izimali. Wayephuza abe manzi té nsuku zonke, futhi lapho ngineminyaka engu-20, wabulawa isifo sokusha kwesibindi.
Ubaba weyedabuka eKorea, ngakho sasivame ukucwaswa emphakathini. Lokhu kanye nezinye izinkinga kwenza ukuba ngikhule kanzima. Ngabhalisa esikoleni esiphakeme kodwa ngangiya ngezikhathi ezithile futhi ngashiya phansi ngemva konyaka. Kakade ngase nginamacala okwephula umthetho, okwathi uma esehlangene nokuba kwami negazi laseKorea enza kwaba nzima ukuba ngithole umsebenzi. Ekugcineni, ngawuthola kodwa ngalimala emadolweni futhi angibange ngisakwazi ukwenza umsebenzi odinga amandla.
Ngaqala ukuziphilisa ngokudlala i-pachinko, uhlobo oluthile lokugembula ngomshini wokushaya ibhola. Ngaleso sikhathi ngangikipite nentombazane eyayifuna ngithole umsebenzi wangempela futhi ngiyishade. Kodwa ngangigaya imali eshisiwe ngokugembula, futhi ngangingafuni ukushintsha indlela yami yokuphila.
INDLELA IBHAYIBHELI ELAKUSHINTSHA NGAYO UKUPHILA KWAMI: Ngolunye usuku, kwafika omunye woFakazi BakaJehova wangishiyela incwadi ethi Life—How Did It Get Here? By Evolution or by Creation? Ngangingakaze ngicabange ngalo mbuzo ngaphambili. Nokho, ngemva kokufunda le ncwadi, ngavuma ukufunda okwengeziwe ngeBhayibheli. Ngangihlale ngizibuza ukuthi kwenzekani ekufeni. Izimpendulo ezicacile ezivela eBhayibhelini ngale ndaba zasusa inkungu emehlweni ami.
Ngasibona isidingo sokusebenzisa izinto engangizifunda eBhayibhelini. Ngakho, ngabhalisa umshado wami ngokomthetho, ngayeka ukubhema, ngagunda izinwele zami ezinde engangizidaye zaba mhlophe, ngalungisa nendlela engangibukeka ngayo. Ngayeka nokugembula.
Azikho kulezi zinto okwaba lula ukuziyeka. Ngokwesibonelo, ngangingeke ngikwazi ukuyeka ukubhema ngamandla ami. Kodwa ngokuthandaza ngobuqotho nangokuthembela kuJehova uNkulunkulu, ngayeka. Umsebenzi wokuqala engawuthola ngemva kokuyeka i-pachinko nawo waba enkulu inselele kimi. Ngangihola imali encane uma iqhathaniswa naleyo engangiyithola ngokugembula, kanti nomsebenzi wawunzima futhi ucindezela. Omunye umBhalo owangisiza phakathi naleso sikhathi esinzima kwakungowabaseFilipi 4:6, 7. Uthi: “Ningakhathazeki ngalutho, kodwa kukho konke izicelo zenu mazaziwe nguNkulunkulu ngomthandazo nangokunxusa kanye nokubonga; ukuthula kukaNkulunkulu okudlula konke ukucabanga kuyolinda izinhliziyo zenu namandla enu engqondo ngoKristu Jesu.” Izikhathi eziningi ngiye ngasibona sigcwaliseka lesi sithembiso.
INDLELA ENGIYE NGAZUZA NGAYO: Lapho ngiqala ukutadisha iBhayibheli noFakazi BakaJehova, umkami wayengathandisisi kahle. Kodwa lapho ebona izinguquko ezinkulu engangizenza ekuphileni kwami, safundelwa iBhayibheli sobabili futhi naye waqala ukuba khona emihlanganweni yoFakazi BakaJehova. Manje sobabili singoFakazi BakaJehova. Kuyisibusiso esikhulu ukukhonza uNkulunkulu ndawonye!
Ngaphambi kokuba ngifunde iBhayibheli, ngangicabanga ukuthi ngiyajabula. Nokho, manje sengiyazi ukuthi iyini injabulo yangempela. Ukuphila ngezimiso zeBhayibheli akulula neze, kodwa ngiyaqiniseka ukuthi kuyindlela engcono kakhulu yokuphila.
IMINININGWANE YAKHE
IGAMA: ELIZABETH JANE SCHOFIELD
UBUDALA: 35
IZWE AZALELWA KULO: I-UNITED KINGDOM
UMLANDO: WAYETHANDA UBUMNANDI BANGEZIMPELASONTO
UKUPHILA KWAMI: Ngakhulela eHardgate, idolobha elincane uma udlula eGlasgow, eScotland. Lapho ngineminyaka engu-7, umama, owayesengomunye woFakazi BakaJehova, waqala ukungifundisa iBhayibheli. Nokho, ngesikhathi ngineminyaka engu-17, ngase ngithanda kakhulu ukuzijabulisa nabangane bami basesikoleni—ngiya kuma-nightclub, ngilalela umculo we-rock onesigqi esinamandla, ngiphuza notshwala. Ngangingacabangi nakucabanga ngezinto eziphathelene noNkulunkulu. Ngangiphilela ubumnandi bangezimpelasonto. Nokho, konke lokho kwashintsha lapho ngineminyaka engu-21.
Ngahamba ngayovakashela ezinye izihlobo zami eNyakatho Ireland. Ngesikhathi ngilapho, ngazibonela ngawami umbukiso wokumasha wamaProthestani obizwa ngokuthi i-Orange Walk. Inzondo nobandlululo engakubona kuboniswa obala phakathi kwamaProthestani namaKatolika kwangethusa kakhulu. Eqinisweni, kwangenza ngacabanga. Ngakhumbula izinto umama ayengifundise zona eBhayibhelini, futhi ngangazi ukuthi uNkulunkulu wayengeke abamukele labo abangazinaki izimiso zakhe zothando. Yasuka inkungu, ngabona ukuthi bengilokhu ngimatasa ngenza izinto ezithandwa yimi, ngingenandaba nokuthi uNkulunkulu ufuna ngiphile kanjani. Nganquma ukuthi uma ngifika nje ekhaya eScotland, ngizozikhandla ngifune ukuthola ukuthi yini efundiswa yiBhayibheli.
INDLELA IBHAYIBHELI ELAKUSHINTSHA NGAYO UKUPHILA KWAMI: Ngosuku lokuqala engaphinde ngaya ngalo emihlanganweni yoFakazi BakaJehova ekhaya, ngazizwa ngingafaneleki futhi ngesaba. Nokho, bonke bangenza ngazizwa ngamukelekile. Njengoba ngangiqala ukusebenzisa izinto engizifunda eBhayibhelini, ilungu elithile elinomusa lebandla langisondela. Langisiza ngempela ukuba ngiphinde ngizizwe ngisekhaya. Abangane bami bangaphambili baqhubeka bengimemela kuma-nightclub, kodwa ngabatshela ukuthi ngase ngizimisele ukuphila ngezimiso zeBhayibheli. Ekugcineni bangiyeka.
Esikhathini esidlule, ngangibheka iBhayibheli njengencwadi yemithetho nje kwaphela. Kodwa ngasishintsha isimo sami sengqondo. Ngaqala ukubheka abantu okukhulunywa ngabo eBhayibhelini njengabantu abangokoqobo, ababenemizwa nobuthakathaka njengami. Nabo bawenza amaphutha, nokho uJehova uNkulunkulu wabathethelela lapho bezisola ngobuqotho. Ngazizwa nginethemba lokuthi yize ngamshiya uJehova lapho ngisemusha, kodwa wayezongithethelela futhi akhohlwe engangikwenzile uma nje ngizama ngawo wonke amandla ukumjabulisa.
Isibonelo sikamama naso sangihlaba umxhwele kakhulu. Nakuba mina ngamfulathela uNkulunkulu, yena akazange. Isibonelo sakhe sokuhlala ethembekile sangenza ngaqaphela ukuthi ukukhonza uJehova kuwufanele umzamo. Ngesikhathi ngisemusha ngihamba nomama emsebenzini wokushumayela endlini ngendlu, ngangingakujabuleli neze futhi ngangingaziboni ngichitha amahora ngishumayeza abantu. Kodwa manje nganquma ukubona ukuthi siyasebenza yini isithembiso sikaJesu esikuMathewu 6:31-33 esithi: “Ningalokothi nikhathazeke nithi, ‘Sizodlani?’ noma, ‘Sizophuzani?’ noma, ‘Sizogqokani?’ . . . UYihlo wasezulwini uyazi ukuthi niyazidinga zonke lezi zinto. Ngakho, qhubekani nifuna kuqala umbuso nokulunga kwakhe, khona-ke zonke lezi ezinye izinto niyozenezelelwa.” Ngokushesha ngemva kwalokho ngabhapathizwa njengomunye woFakazi BakaJehova, ngesula emsebenzini, ngathola itoho ngase ngiba yisikhonzi sesikhathi esigcwele.
INDLELA ENGIYE NGAZUZA NGAYO: Ngesikhathi ngisemusha ngisaphilela ubumnandi bangezimpelasonto, angikaze ngizizwe nganelisekile. Ukuphila kwami kwakungenanjongo. Kodwa manje njengoba sengimkhonza ngokugcwele uJehova, ngizizwa nganeliseke ngempela. Ukuphila kwami sekunenjongo. Ngishadile futhi mina nomyeni wami sihambela amabandla oFakazi BakaJehova ahlukahlukene isonto nesonto, siwakhuthaze. Lo msebenzi ngiwubheka njengelungelo elikhulu ekuphileni kwami. Ave ngimbonga uJehova ngokunginika elinye ithuba!
[Amazwi acashunwe esihlokweni ekhasini 27]
“Zibekwa nje, ngabona ukuthi ngangithole into eyigugu. Kodwa ngaleso sikhathi angizange ngisibone isidingo sokushintsha indlela engangiphila ngayo”
[Amazwi acashunwe esihlokweni ekhasini 29]
“Ngangingeke ngikwazi ukuyeka ukubhema ngamandla ami. Kodwa ngokuthandaza ngobuqotho nokuthembela kuJehova uNkulunkulu, ngayeka”
[Amazwi acashunwe esihlokweni ekhasini 30]
“Esikhathini esidlule, ngangibheka iBhayibheli njengencwadi yemithetho nje kwaphela. Kodwa ngasishintsha isimo sami sengqondo. Ngaqala ukubheka abantu okukhulunywa ngabo eBhayibhelini njengabantu abangokoqobo, ababenemizwa nobuthakathaka njengami”