Isici Esisha Sokuhlakanipha Kwaphezulu

“UNKULUNKULU wathi kuMose: Nginguye enginguye. Wathi: Uzakusho kanjalo kubantwana bakwaIsrayeli, uthi: Ungikhona ungithumile.” (Eksodusi 3:14) UJehova wachazela uMose ukuthi ngisho nangaphambi kwalokhu izinceku zaKhe zazingakuqondi ukubaluleka okuphelele kwegama laKhe. UnguNkulunkulu wenjongo futhi ngaso sonke isikhathi uyayifeza intando yakhe. Uma izimo zifuna kanjalo, angayishintsha indlela yakhe ukuze afeze injongo yakhe. Unokuhlakanipha okunjalo!

USathane ngokwakhe akazange akuqonde lokho okushiwo igama likaNkulunkulu. Kungenzeka wayazi ngomuthi wokuphila osensimini yase-Edene. Uma wayeholele uAdamu noEva kuwo, lokhu kwakuyobonakala kubeka uJehova enkingeni enkulu: ukuba agcine izwi lakhe lokuthi isono sasizosho ukufa ngabo noma agcine izwi lakhe mayelana nomuthi wokuphila. (Genesise 2:9; 3:1-6) Kunoma isiphi isehlakalo, uSathane kwakumelwe adunyazwe.

Manje uNkulunkulu waqala ukubonakalisa ukuhlakanipha okwakungalindelwe emadodaneni akhe omoya futhi nokwakungembuliwe ngaphambili kuwo. (Qhathanisa nabase-Efesu 3:10.) Waqalisa ukusungula uchungechunge lwezimemezelo nezehlakalo okwakuzothi esikhathini eside zibonakalise kahle ukuhlakanipha kwakhe okukhulu nekhono lakhe lokufeza injongo yakhe yaphakade, eyayizogcwalisa umhlaba ngabantu abajabulile, abathembekile ababeyophila phakade ePharadesi. (Genesise 1:27, 28) Ngezikhathi ezithile uNkulunkulu wayezonqoba imizamo kaSathane yokuphazamisa.

Imfihlakalo Ebifihlekile Iyavela

Ngokushesha ngemva kokuhlubuka kokuqala, uNkulunkulu wenza okuthile. Wathetha icala lombhangqwana owawunecala futhi wasekela isinqumo sakhe sokufa ngenxa yokungalaleli. Kuthiwani ngokudla kuka-Adamu noEva emthini wokuphila? “UJehova uNkulunkulu wathi: Bheka umuntu usenjengomunye wethu, uyakwazi okuhle nokubi; kepha manje makangeluli isandla sakhe, athathe nakuwo umuthi wokuphila, adle, aphile kuze kube-phakade. UJehova uNkulunkulu wammukisa ensimini yase-Edene.”—Genesise 3:17-23.

Ngalesikhathi uNkulunkulu wathatha futhi indima yokuba umShumayeli, noma ummemezeli wezindaba ezinhle. Washo isiprofetho sokuqala: “UJehova uNkulunkulu wathi enyokeni, . . . Ngizakubeka ubutha phakathi kwakho nowesifazane, naphakathi kwenzalo yakho nenzalo yakhe. Yona iyakuchoboza ikhanda lakho, wena uyakulimaza isithende sayo.” (Genesise 3:14, 15) Eminyakeni engamakhulu kamuva umphostoli uPawulu wachaza: “Ngokuba okudaliweyo [umuntu] kwabekwa phansi kobuze, kungengentando yakhe kodwa ngaye owakubekayo [ngesisekelo sethemba,” NW].”—Roma 8:20.

Yebo, ngemva kwalokho umuntu wayezoba isigqila esingenathemba sokufa okwazuzwa njengefa kuAdamu, kodwa uNkulunkulu wayememezela injongo yakhe yokusindisa inzalo ka-Adamu elalelayo. Nokho, sasiyini “isisekelo sethemba”? Wayezobasindisa kanjani abantu futhi aqhubeke nesigwebo sakhe sokufa ngenxa yesono? Lokhu kwakuzoba ukuhlakanipha kukaNkulunkulu okufihliwe; kwakuhilela “imfihlakalo ebifihlekile selokhu kwaqala izikhathi nezizukulwane.” (Kolose 1:26; 1 Korinte 2:7, 8) Nakuba abathembekileyo besikhathi sakudala babengayiqondi imfihlakalo, babenalo ithemba lokuthi ngandlela-thile uNkulunkulu wayezobasindisa. Phela, ngisho nezingelosi zazizimisele ukufunda indlela uJehova ayezogcwalisa ngayo injongo yakhe! (1 Petru 1:10-12) Ingabe uyayiqonda lemfihlakalo ebifihlekile?

Ukukhululwa Ngesihlengo

Kancane kancane emakhulwini eminyaka, uNkulunkulu wanezela ukwaziswa esithembisweni sakhe sakuqala. KuAbrahama owayethembekile wathembisa inzalo okwakuyokuza ngayo izibusiso ngabo bonke abantu abalalelayo. (Genesise 22:15-18) NgoJakobe wembula ukuthi inzalo yayiyoba inkosi evela esizweni sakwaJuda. (Genesise 49:10) Ngalesikhathi abantu ababe saba uNkulunkulu babekholelwa ovukweni lwabafileyo, nakuba babengayiqondi ngokuphelele indlela okwakuzokwenzeka ngayo lokhu. (Jobe 14:14, 15; Heberu 11:19) Ekugcineni, uNkulunkulu wathembisa uDavide ukuthi iNkosi ezayo, noma uMesiya, wayeyoba inzalo kaDavide futhi wayeyobusa phakade.—2 Samuweli 7:16.

Bonke abaprofethi benezela izingxenye zalokho abakuqondayo emfihlakalweni, kodwa abantu babengawutholi umqondo ophelele. Ekugcineni, isikhathi sokuvela kukaMesiya safika, khona-ke, ekugcineni, lokhu kuhlakanipha okwandiswe kakhulu kukaNkulunkulu kwaba okucacile. Kwakugxile kuJesu Kristu naselungiselelweni lokuphila kwakhe okuphelele kobuntu njengesihlengo sesintu. Enalokho njengesisekelo, yonke injongo kaJehova ekhazimulayo yayizoqhubeka ngoMbuso. Ingabe uyasiqonda isihlengo?

KwabaseRoma izahluko 5 no-6, nesesithupha, uPawulu unikeza incazelo enhle yaso. KwabaseRoma 5:12 uchaza isono sethu esizuzwe njengefa nokufa. Uyaqhubeka ebonisa indlela umphumela wesono esisodwa kuphela sika-Adamu ophelele nokulahlekisela inzalo yakhe ukuphila okwakuzolingana ngayo nokunye ukuphila komuntu okuphelele. Lokhu kwabonakala kungukuphila ‘komuntu uKristu Jesu.’ (Amavesi 15-21; bheka futhi neyoku-1 Thimothewu 2:5, 6) UJesu wayezosinikezelani lesihlengo? Ngoba wayeyiNdodana kaNkulunkulu, uJesu ‘wayengcwele, engenacala, engenabala, ehlukanisiwe nezoni.’ (Heberu 7:26; Luka 1:32, 33) Akumelwe sizame ukuchaza imininingwane yamangqamuzana okuzalwa kukaJesu. Ingelosi uGabriyeli yaqinisekisa unina kaJesu, uMariya, nathi, ukuthi akukho okungenakwenzeka kuNkulunkulu. (Luka 1:37) Ngakho uJesu, nakuba abelethwa ngowesifazane owayeyisizukulwane sika-Adamu, wayeyiNdodana kaNkulunkulu—eqinisweni umuntu ophelele. Igazi lakhe, noma ukuphila, laliyigugu kakhulu kunegazi lezilwane ezingenakubalwa okwakwenziwe ngazo imihlatshelo ngabapristi bakwaIsrayeli bohlu luka-Aroni ethempelini iJerusalema. “WayeyiWundlu likaNkulunkulu elisusa izono zezwe.”—Johane 1:29; 3:16.

Ingabe uNkulunkulu wayengenza lelilungiselelo ngoJesu futhi aqhubeke elungile? Uma uNkulunkulu wavusela iNdodana yakhe ekuphileni ngosuku lwesithathu, kwenzekani ngesihlengo? UPawulu uyasiqinisekisa ukuthi uNkulunkulu ulungile. Landela incazelo yakhe: “Balungisisiwe ngesihle ngomusa wakhe ngokuhlengwa okukuKristu Jesu, ammisileyo uNkulunkulu abeyinhlawulo ngokukholwa egazini lakhe, kubonakaliswe ukulunga kwakhe ngokuyekelwa kwezono ezenziwe ngaphambili ekubekezeleni kukaNkulunkulu, ukuba kubonakaliswe ukulunga kwakhe esikhathini samanje, ukuze yena abe-ngolungileyo abe-ngumlungisi walowo okholwa nguJesu.” (Roma 3:24-26) Manje, lokhu kusho ukuthini? Ngokusobala ukuthi uJesu, njengomuntu ophelele, wenyama negazi, eqinisweni wafa njengomuntu futhi wahlala efile njengomuntu phakade. Wafa “kanye mhla ezinikela yena.” (Heberu 7:27) Ngakho isihlengo siyasebenza. UJesu wafa esenyameni; ngosuku lwesithathu ‘wavuswa emoyeni.’—1 Petru 3:18.

Isivumelwano Esisha Nesidalwa Esisha

Manje sibona ingxenye esemqoka yemfihlakalo ebifihlekile. Ukwethembeka kukaJesu kuze kube sekufeni kumenza afaneleke njengomPristi oMkhulu neNkosi kaJehova. Ngegazi lakhe elachitheka umisa isivumelwano esisha. Lesivumelwano esisha sizoletha abangane abangokwasezulwini abazobusa noJesu njengamakhosi nabapristi. (IsAmbulo 5:9, 10; 20:4, 6) Basungula isizwe esisha, “isidalwa esisha,” futhi lena yinto ebaluleke ngempela!—Galathiya 6:15, 16.

Cabanga: UNkulunkulu ngoKristu Jesu ukhetha inani labameleli esintwini, kokubili abesilisa nabesifazane. Angabalungisisa ngokomthetho futhi ababize njengamadodana angokomoya. Ngesikhathi sikaNkulunkulu esifanele ngemva kokufa kwabo, ubavusela ezulwini futhi abaphe ukungafi, njengoba nje uNkulunkulu avuza uJesu. (1 Petru 1:3, 4) Yeka ukuthembela anakho ‘esidalweni sakhe esisha’ nokuthembeka kwaso kuye! Yeka impendulo kulowo owayebaqambela amanga phambi kukaJehova! (IsAmbulo 12:10) Nakuba beyophila phakade noJesu Kristu, ngeke babephule ubuqotho babo kuJehova. Kodwa akupheleli lapho.

Umhlaba OyiPharadesi

UKristu Jesu, nabangane bakhe abangamakhosi nabapristi ezulwini, bayonakekela ukuba injongo kaJehova ngomuntu nangomhlaba yenziwe ngokuphelele phakathi nokuBusa kwakhe kweMinyaka Eyinkulungwane. Esebenzisa izinzuzo zesihlengo, uJesu uyovusa abafileyo futhi uyoletha abathembekile nabasinde ekupheleni kwalesimiso esibi ekupheleleni kobuntu. Ngesikhathi esifanayo, umhlaba uyokwenziwa ipharadesi. Ngalesosikhathi bonke abenqaba umzamo kaSathane wokugcina wokubonakalisa bayonikezwa ukuphila kobuntu okuphelele phakade. USathane naso sonke isixuku sakhe esibi bayobhujiswa phakade. Ukuthula nobunye kuyokwanda kuyo yonke indalo, imelele ngokugcwele ubukhosi bukaJehova nokubusa kwakhe kothando. Kokubili izingelosi nabantu bayobonakalisa uthando lwabo oluthembekile ngoMdali wabo noNkulunkulu.—IsAmbulo, isahluko 20.

Manje singayiqonda kangcono imfihlakalo ebifihlekile. Manje siyakubona ukuhlakanipha kukaJehova okwedlula kude ngisho nemiklamo yakhe yendalo ezitshalweni nasezilwaneni. Sinesizathu esihle sokubabaza: “Yeka ukujula kwengcebo, nokuhlakanipha, nokwazi kukaNkulunkulu! Yeka izahlulelo zakhe ezingaphenyekiyo, . . . Ngokuba konke kuvela kuye, kukhona ngaye, kuya kuye; makubekuye inkazimulo kuze kubephakade. Amen.”—Roma 11:33-36.

[Isithombe ekhasini 7]

Umphumela wesono esisokwa sika-Adamu ophelele nokuphila kwakhe okwalahleka kungenziwa kulingane. Kanjani? Ngokunye ukuphila komuntu ophelele, okukaJesu