Abamemezeli BoMbuso Bayabika
Owayeyindelakazi Iminyaka Engu-25 Ekugcineni Ufunda Iqiniso
IBHAYIBHELI labikezela ukuthi “isixuku esikhulu” esivela kuzo zonke izizwe sasiyokuza ukuzokhulekela ethempelini likaJehova elingokomoya. (IsAmbulo 7:9) Lokhu kuyenzeka namuhla, futhi siyajabula ukubona ukuthi abaningi, ngosizo lweqiniso likaNkulunkulu, ngaleyondlela bayagqashula ezibophweni zenkolo yamanga. Okuhlangenwe nakho okulandelayo kuyakubonisa lokhu.
◻ Owesifazane eRome, eItaly, uyalandisa: “Kusukela ngisemncane isifiso sami esikhulu kakhulu sasiwukuba ngibe indelakazi, njengoba ngangifisa ngayo yonke inhliziyo yami ukukhonza uNkulunkulu. Ngakwazi ukufeza isifiso sami lapho sengineminyaka engu-32 ubudala, ngoDecember 8, 1960, ngenkathi ngenza izifungo zami zokuqala zokulalela, ubumpofu, nokungashadi. Isabelo sami sasiwukunakekela ubusuku nemini izingane ezimpofu futhi ezingenabani ezingaba ngu-30 ezaziyizintandane noma izingane zeziboshwa. Ngathola ukwaneliseka esabelweni sami.
“Ukholo lwami lwanyakaziseka emva kweminyaka eyishumi yenkonzo ngenkathi kuphakama impikiswano ngaphakathi esikhungweni. Ngazibuza ukuthi kungani, uma kungukuthi uNkulunkulu wayesiqondisa, ayengavumela izimpikiswano ezinjalo nokungahleleki endlini yakhe siqu.”
Lendelakazi yayinodadewabo owayehlala eFrance futhi owayengomunye woFakazi BakaJehova. Wafakaza kulendelakazi ngencwadi futhi wayithumelela iNew World Translation of the Holy Scriptures. Indelakazi iyalandisa: “Ngemva kweminyaka engu-23, lokho kwakuwukuthintana kwami kokuqala neZwi likaNkulunkulu.” Kwakungalesosikhathi lapho yamukela isifundo seBhayibheli noFakazi BakaJehova. Ithi: “Njengoba ngangithuthuka ekufundeni kwami, ngafinyelelela ekwazini ukuthi uJehova uNkulunkulu nezimfuneko zakhe kuhlanganise nezimfanelo zakhe ezimangalisayo. Ngazizwa kabuhlungu kakhulu lapho ngithola ukuthi uyakulahla ukusetshenziswa kwezithombe, njengoba isikhungo sasigcwele izithombe zabo bonke ubukhulu nohlobo. Ngaqonda ukuthi uma ngangifuna ukuthokozisa uJehova, ngangingeke ngihlale kuleyondawo. Ngemva kweminyaka engu-25 yenkonzo yokuzinikela njengendelakazi, ngase ngilitholile iqiniso ekugcineni. Ngakho, ngo-October 1, 1985, ngafaka isaziso sokushiya kwami, okwabethusa kakhulu abaphathi bami.
“Abafowethu nodadewethu abanothando bangisiza kokubili ngokomoya nangokwenyama. Ngibonga uJehova nenhlangano yakhe, ngabhapathizwa ngoAugust 30, 1986, futhi ngaqalisa ukuhamba endleleni engokoqobo eya ekuphileni okuphakade.”
UJehova Ubusisa Isifiso Sosemusha Sokukhonza UNkulunkulu
◻ Uthisha eBrazil owayengomunye woFakazi BakaJehova lapho ehlola amaphepha esikole waphawula ukuthi omunye umfundi oneminyaka engu-14 ubudala wayebhale ngesifiso sakhe sokwazi okwengeziwe ngoNkulunkulu. Waqalisa isifundo seBhayibheli nomfundi, kodwa njengoba lentombazane ithuthuka, umkhaya wakubo ongamaKatolika wasenqabela lesosifundo futhi wonakalisa izincwadi zayo. Lomfundi osemusha waqala ukutadisha iBhayibheli phakathi nekhefu lasesikoleni, kodwa wabanjwa. Ngakho isifundo saqhutshwa ngeposi. Nokho, ngokushesha umkhaya wazithola izincwadi zakhe futhi wazishisa. Uyise waqala ukumphoqelela ukuba aye eMiseni. Wahamba kodwa waphatha ikhophi yeNqabayokulinda ukuze ayifunde phakathi nenkonzo, eyifihle phakathi kwamakhasi encwajana yesonto. Lokhu kwaqhubeka izinyanga eziyisithupha, kwaze kwaba ngolunye usuku lapho ephuma ngokunyenya ekhaya ukuze aye eHholo LoMbuso. Phakathi nomhlangano uyise wavela emnyango futhi watshela abazalwane ukuba batshele indodakazi yakhe ukuthi wayezoyishaya uma ifika ekhaya. Imizamo yabazalwane yokubonisana naye yaba nhlanga zimuka nomoya.
Ngosuku olulandelayo, ejabule futhi emomotheka, waya ukuyobona abazalwane. Wababonisa imivimbo eminingi emzimbeni wakhe lapho uyise ayesanda kumshaya khona. Kungani, pho, ayejabule? Ngemva kokusuka eHholo LoMbuso, uyise wayebuze abantu abaningi edolobheni, kuhlanganise nomphathi wedolobha, ngobuhle nobubi bokuba indodakazi yakhe ibe ngomunye woFakazi BakaJehova. Umphathi wedolobha wathi oFakazi babengabantu abahle, abafanele ukwethenjwa. Wanezela ngokuthi babenokuziphatha okuhle kakhulu futhi kwakungaba kuhle kakhulu ukuba nengane enalezindinganiso, ezaziphakeme kakhulu kunalezo zentsha ngokuvamile.
Naphezu kwalokho, lentombazane yayithola induku. Kodwa uyise wayitshela ukuthi wayeyishayela ukuthi yayiphume endlini ngaphandle kwemvume. Futhi wathi wayezoyishaya futhi uma yayingake ilokothe iyeke ukutadisha iBhayibheli noma ukuba khona emihlanganeni yoFakazi BakaJehova! Indodakazi manje isingummemezeli oshisekayo, futhi abathile emkhayeni wakubo babonisa isithakazelo eqinisweni.
Ngempela, uJehova uyababusisa abasha abanesifiso esiqotho sokumkhonza, njengoba lokhu okuhlangenwe nakho kubonisa.—IHubo 148:12, 13.