Yibani Ngababhekakade Kubo Bonke
“Siyaniyala, bazalwane, ukuba niluleke abangahambi ngomthetho, nithokozise abadanileyo, nisekele ababuthakathaka, nibabekezelele [nibe ngababhekakade kubo, “NW”] bonke.”—1 THESALONIKA 5:14.
1. Kukuphi futhi kungaphansi kwaziphi izimo oFakazi BakaJehova abaye babonisa khona ukubhekakade?
YEKA isibonelo esihle esiye sabekwa oFakazi BakaJehova bosuku lwanamuhla ekubeni ngababhekakade! Kuze kube manje baye bakhuthazelela ubunzima obuningi noshushiso emazweni ayekade engawobuNazi nobuFasi kanye nasemazweni anjengeMalawi. Abanye futhi ababhekakade, yilabo abahlala emikhayeni ehlukene phakathi ngokwenkolo.
2. Yiziphi izici ezimbili ezibangela ipharadesi elingokomoya elijatshulelwa abantu bakaJehova?
2 Naphezu koshushiso nobunzima abahlangabezana nakho, abantu bakaJehova abazinikezele bebelokhu bejabulela izibusiso zepharadesi elingokomoya. Ngempela, amaqiniso abonisa ukuthi amaKristu agcotshiwe aqala ukulijabulela ngonyaka ka-1919. Yini ebangela lelipharadesi elingokomoya? Okokuqala, lezizimo zepharadesi zikhona phakathi kwabantu bakaJehova ngoba uNkulunkulu uye wabuyisela izinceku zakhe ezigcotshiwe ‘ezweni,’ noma esimweni sazo, sokukhulekela okuhlanzekile. (Isaya 66:7, 8) Ipharadesi elingokomoya liyachuma nangenxa yokuthi bonke abakulo babonisa izithelo zomoya kaNkulunkulu. Ukubhekakade kungesinye salezithelo. (Galathiya 5:22, 23, qhathanisa neNW.) Ukubaluleka kwalemfanelo ngokuphathelene nepharadesi lethu elingokomoya kungabonakala kulamazwi esazi uWilliam Barclay: “Ngeke ibe khona into ewukuhlangana kobuKristu ngaphandle kwemakrothumia [ukubhekakade]. . . . Futhi isizathu salokho simane nje siwukuthi—imakrothumia iyimfanelo enkulu kaNkulunkulu (Rom. 2.4; 9.22).” (A New Testament Wordbook, ikhasi 84) Yebo, ukubhekakade kubaluleke kangako!
Ukuba Ngababhekakade Ekusebenzelaneni Nabafowethu
3. Yisiphi isifundo ngokuba ngobhekakade uJesu asinikeza uPetru?
3 Ngokusobala umphostoli uPetru wayenenkinga ekuboniseni ukubhekakade, ngoba wake wabuza uJesu: “Nkosi, umfowethu uyakungona kangaki, ngimthethelela, na? Kuze kube-kasikhombisa na?” UJesu wameluleka: “Angisho kuwe ukuthi kuze kube-kasikhombisa kodwa kuze kube-kamashumi ayisikhombisa aphindwe kasikhombisa [izikhathi ezingamashumi ayisikhombisa nesikhombisa, NW].” (Mathewu 18:21, 22) Ngamanye amazwi, awukho umngcele ngokuqondene nenani lezikhathi okumelwe sibekezelelane ngazo futhi sithethelele othile osonayo. Nokho, asicabangi ukuthi umuntu ubengalokhu ebala kuze kube izikhathi ezingu-77! Nokho, ukuba ngothethelela kangako ngokuqinisekile kudinga ukubhekakade.
4. Kungani abadala ngokukhethekile kudingeka babe ngababhekakade?
4 Uma kuziwa ekuboniseni kwabazalwane abangokomoya ukubhekakade, akungabazeki ukuthi abadala bebandla kudingeka babe yizibonelo. Isineke sabo singase sivivinywe ngoba amanye amakholwa abakanye nawo angase anganaki noma angabi nandaba. Abanye bangase basindwe izinyawo uma kuziwa ekulungiseni imikhuba emibi. Abadala kumelwe baqaphele ukuba bangathukutheli kalula noma bacasulwe ubuthakathaka babafowabo nodadewabo abangamaKristu. Kunalokho, labelusi abangokomoya kudingeka bakhumbule leseluleko: “Kepha thina esinamandla sifanele ukuthwala ubuthakathaka babangenamandla, singazithokozisi thina.”—Roma 15:1.
5. Yini esikwazi ukuyibekezelela uma singababhekakade?
5 Okunye futhi, kungase kuphakame izingxabano ngenxa yobuthakathaka bobuntu namaphutha. Ngenxa yokushiyeka noma imikhuba ehlukile kweyabanye, senza izinto abafowethu abangazithandi, uma singase sikubeke kanjalo, futhi bangase benze lokho kithina. Ngakho-ke, yeka indlela esifaneleka ngayo leseluleko: “Nibekezelelane, nithethelelane, uma umuntu enensolo komunye; njengokuba neNkosi yanithethelela, yenzani njalo nani.” (Kolose 3:13) ‘Ukubekezelelana’ kusho ukuba ngababhekakade, nakuba singase sibe nezizathu ezizwakalayo zokukhononda ngothile. Akumelwe siziphindiselele noma simjezise umfowethu, ngisho nokumvungamela akumelwe sikwenze.—Jakobe 5:9.
6. Kungani ukuba ngobhekakade kuyinkambo yokuhlakanipha?
6 Iseluleko esitholakala kwabaseRoma 12:19 sisho okufanayo: “Ningaziphindiseli nina-bathandwa, kodwa dedelani ulaka, ngokuba kulotshiwe ukuthi: Ngokwami ukuphindisela, ngiyakubuyisela mina, isho iNkosi.” ‘Ukudedela ulaka’ kusho ukuba ngophuza ukuthukuthela, noma obhekakade. Ukubonisa lemfanelo kuyinkambo yokuhlakanipha, ngoba kuzuzisa thina kanye nabanye. Uma kuye kwaphakama inkinga, thina ngokwethu sizizwa singcono ngoba, ngokuba ngababhekakade, asenzi izinto zibe zimbi kakhulu. Futhi umuntu esibonisa kuye ukubhekakade naye uzizwa engcono ngoba asimjezisi noma siziphindiselele ngandlela-thile. Yingakho umphostoli uPawulu ayala amaKristu akanye nawo ukuba ‘athokozise abadanileyo, asekele ababuthakathaka, abekezelele [abe ngabhekakade kubo] bonke’!—1 Thesalonika 5:14.
Phakathi Komkhaya
7. Kungani abantu abashadile kudingeka babe ngababhekakade?
7 Kuye kwathiwa umshado ojabulisayo uwukuhlangana kwabantu ababili abathethelelana ngempela. Kusho ukuthini lokho? Ukuthi abantu abashadile abajabulayo babonisa ukubhekakade ekusebenzelaneni kwabo. Ngokuvamile abantu ngabanye bayakhangana ngenxa yesimo sabo sokwakheka esingafani. Lokhu kungafani kungase kuthakazelise, nokho kungase futhi kube isisusa sokungezwani esinezela ekucindezelekeni nasekukhathazekeni kakade okubangela amaKristu ashadile ukuba abe “nosizi enyameni.” (1 Korinte 7:28) Ngokwesibonelo, ake sithi indoda ayinandaba ngemininingwane ethile noma ithambekele ekubeni enganaki noma eyidlabha. Lokhu kungase kumvivinye kakhulu umkayo. Kodwa uma ukusikisela komusa okushiwo kahle kungaphumeleli, kungase kudingeke ukuba amane nje abubekezelele ubuthakathaka bayo ngokuba ngobhekakade.
8. Kungani amadoda kungadingeka ukuba abe ngabhekakade?
8 Ngakolunye uhlangothi, umfazi angase akhononde ngemininingwane emincane futhi athambekele ekubeleseleni indoda yakhe. Lokhu kungase kukukhumbuze lombhalo: “Kungcono ukuhlala phezu kophahla kunokuhlanganyela indlu nomfazi obeleselayo.” (IzAga 25:24, Today’s English Version) Esimweni esinjalo, ukubhekakade kudingeka ukuba kuvumelane neseluleko sikaPawulu: “Madoda, thandani omkenu, ningabacasukeli.” (Kolose 3:19) Kudinga futhi ukubhekakade ngamadoda ukuba alalele leseluleko somphostoli uPetru: “Kanjalo, madoda, hlalani nabo [omkenu] ngokokwazi, njengalokhu owesifazane eyisitsha esibuthakathaka, nibanike udumo, lokhu beyizindlalifa zomusa wokuphila kanye nani, ukuze imikhuleko yenu ingathiywa.” (1 Petru 3:7) Ubuthakathaka bomkayo ngezinye izikhathi bungayivivinya indoda, kodwa ukubhekakade kuyoyisiza ukuba ibubekezelele.
9. Kungani ukubhekakade kudingeka kubazali?
9 Abazali kudingeka babe ngababhekakade ukuze baphumelele ekukhuliseni abantwana babo. Intsha ingase yenze amaphutha afanayo ngokuphindaphindiwe. Ingase ibonakale inenkani noma iphuza ukufunda izinto futhi ingase ibavivinye abazali bayo ngokuqhubekayo. Ngaphansi kwezimo ezinjalo, abazali abangamaKristu kudingeka baphuze ukuthukuthela, bangacasuki noma bahluleke ukuzibamba kodwa bahlale bezothile nakuba beqinile ezimisweni zokulunga. Obaba kufanele bakhumbule ukuthi nabo bake baba basha futhi benza amaphutha. Kudingeka basebenzise iseluleko sikaPawulu: “Boyise, ningabathukuthelisi abantwana benu ukuba bangadangali.”—Kolose 3:21.
Nakulabo Abangaphandle
10. Kufanele siziphathe kanjani endaweni esisebenza kuyo, njengoba kubonakala kukuphi okuhlangenwe nakho?
10 Ngenxa yokungapheleli kobuntu nobugovu, izimo ezingajabulisi zingase ziphakame endaweni umKristu asebenza kuyo. Kuyinkambo yokuhlakanipha ukuba ube nekhono futhi ubekezelele ukoniwa ukuze kube nokuthula. Okuhlangenwe nakho komunye umKristu owayeyisisulu sokuzondwa okukhulu okwakubangelwa isisebenzi ayesebenza naso esinomona kubonisa indlela lokhu okungaba ukuhlakanipha ngayo. Ngenxa yokuthi lomzalwane akazange akwenze lokhu kube impikiswano kodwa waba ngobhekakade, ngokuhamba kwesikhathi wakwazi ukuqalisa isifundo seBhayibheli nalesisebenzi esasiwuhlupho.
11. Kunini lapho sidinga khona ngokukhethekile ukuba ngababhekakade, futhi ngani?
11 Ikakhulukazi kudingeka ukuba abantu bakaJehova babe ngababhekakade lapho befakaza kulabo abangaphandle kwebandla lobuKristu. Njalo nje, amaKristu athola ukusabela kwabantu okungenanhlonipho noma okunokhahlo. Ingabe bekuyoba okufanele noma okuhlakaniphile ukuphendula ngendlela efanayo? Cha, ngoba lokho bekungeke kube ukubonisa ukubhekakade. Inkambo yokuhlakanipha iwukukhumbula nokulandela lesisaga esihlakaniphile: “Impendulo ethambileyo iyabuyisa ukufutheka, kepha izwi elilukhuni livusa ulaka.”—IzAga 15:1.
Ukholo Nethemba Kuyasiza Ekuboniseni Ukubhekakade
12, 13. Yiziphi izimfanelo eziyosisiza ukuba sibe ngababhekakade?
12 Yini engasisiza ukuba sibonise ukubhekakade, sibekezelele izimo ezibangela usizi? Enye into iwukuba nokholo ezithembisweni zikaNkulunkulu. Kumelwe sikukholelwe lokho uNkulunkulu akushoyo. ImiBhalo ithi: “Anifikelwanga ukulingwa okungenjengokwabantu; kepha uNkulunkulu uthembekile, ongayikuvuma ukuba nilingwe ngokungaphezu kwamandla enu, kepha oyakuthi kanye nokulingwa anenzele indlela yokuphepha, nize nibe-namandla okukuthwala.” (1 Korinte 10:13) Ngamanye amazwi, njengoba omunye umakad’ ebona ekubeka: “Uma uNkulunkulu ekuvumela, ngingakubekezelela.” Yebo, singakubekezelela ngokuba sibe ngababhekakade.
13 Okuhlobene kakhulu nokholo ukuba nethemba eMbusweni kaNkulunkulu. Lapho usubusa umhlaba, zonke izimo ezimbi ezibangela ukuba sicindezeleke ziyosuswa. Ngalokhu, umhubi uDavide wathi: “Pheza ukuthukuthela; yeka ulaka, ungakhathazeki; kubanga ukona nje. Ngokuba ababi bazakuchithwa, kepha abalindela uJehova bazakudla ifa lomhlaba.” (IHubo 37:8, 9) Ithemba eliqinisekile lokuthi uNkulunkulu ngokushesha uzophelisa zonke lezimo ezilingayo liyasisiza ukuba sibe ngababhekakade.
14. Yikuphi okuhlangenwe nakho okubonisa ukuthi kungani kufanele sibe ngababhekakade ekusebenzelaneni nomngane womshado ongakholwa?
14 Kufanele sisabele kanjani uma umngane womshado ongakholwa ebangela ukuba sicindezeleke? Qhubeka ubheka kuJehova ukuze uthole usizo, futhi qhubeka wethemba ukuthi umphikisi uyoba umkhulekeli kaJehova. Umfazi womunye umKristu ngezinye izikhathi wayenqaba ukumlungiselela ukudla nokuhlanza izimpahla zakhe. Wayesebenzisa ulimi olungcolile, engamkhulumisi izinsuku ezithile, futhi wazama ngisho nokumphonsa esebenzisa ubuthakathi. “Kodwa,” kusho lomzalwane, “isikhathi ngasinye ngangiphendukela kuJehova ngomthandazo, futhi ngangithembela kuYe ukuthi uzongisiza ukuba ngihlakulele imfanelo enhle yokubhekakade ukuze ngingalahlekelwa ukulinganisela kwami kobuKristu. Ngangithemba futhi ukuthi ngolunye usuku isimo sakhe senhliziyo sasiyoshintsha.” Ngemva kweminyaka engu-20 yempatho enjalo, umkakhe waqala ukushintsha, futhi lomzalwane wathi: “Yeka indlela engibonga ngayo kuJehova ngokuthi wangisiza ngahlakulela lesithelo somoya, sokubhekakade, ngoba manje ngiyawubona umphumela: Umkami useqalile ukuhamba endleleni yokuphila!”
Umthandazo, Ukuthobeka, Nothando Kuyosiza
15. Kungani umthandazo ungasisiza ukuba sibe ngababhekakade?
15 Umthandazo ungolunye usizo olukhulu ekuboniseni ukubhekakade. UPawulu wanxusa: “Ningakhathazeki ngalutho, kepha kukho konke izicelo zenu mazaziwe nguNkulunkulu ngokukhuleka nokunxusa kanye nokubonga. Ukuthula kukaNkulunkulu okudlula ukuqonda konke kuyakulondoloza izinhliziyo zenu nemicabango yenu kuKristu Jesu.” (Filipi 4:6, 7) Khumbula futhi ukulalela lesiyalo: “Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.”—IHubo 55:22.
16. Ekubeni ngababhekakade, ukuthobeka kungasisiza kanjani?
16 Ukuthobeka kusengolunye usizo olukhulu ekuhlakuleleni isithelo somoya sokubhekakade. Umuntu oqhoshayo akanaso isineke. Ucasuka kalula, athukuthele ngokushesha, futhi ngeke abekezelele noma iyiphi impatho engeyinhle. Konke lokhu kuphambene nokuba ngobhekakade. Kodwa umuntu othobekile ngeke azicabangele ngokweqile. Uyolindela uJehova, njengoba kwenza uDavide lapho ezingelwa iNkosi uSawule futhi edelelwa uShimeyi wakwaBenjamini. (1 Samuweli 24:4-6; 2 Samuweli 16:5-13) Ngakho, kufanele sifise ukuhamba “ngokuthobeka konke nobumnene, ngokubhekakade nokubekezelelana ngothando.” (Efesu 4:2) Ngaphezu kwalokho, kufanele ‘sizithobe ebusweni beNkosi.’—Jakobe 4:10.
17. Kungani uthando luyosisiza ukuba sibe ngababhekakade?
17 Uthando olungenabugovu lusisiza ikakhulukazi ukuba sibe ngababhekakade. Ngempela, “uthando [lubhekakade],” ngoba lusibangela ukuba sizicabangele ngokujulile izithakazelo ezinhle kakhulu zabanye. (1 Korinte 13:4) Uthando lusenza sikwazi ukuba nesihawu, ukuba sizibeke ezimweni zabanye. Ngaphezu kwalokho, uthando lusisiza ukuba sibe ngababhekakade ngoba “lubekezelela izinto zonke, lukholwa yizinto zonke, luthemba izinto zonke, lukhuthazelela izinto zonke. Uthando alusoze lwaphela.” (1 Korinte 13:7, 8) Yebo, njengoba ingoma yoMbuso engunombolo 200 encwadini ethi Hubani Izindumiso zikaJehova ikubeka:
“Uthando lwenz’ okuhle.
Lwakha ubuzalwane.
Lunomusa kwababi,
Lubabhek’ eb’ngconweni.”
Ingabe Kufanele Ube Ngobhekakade Ngenjabulo?
18. Kungenzeka kanjani ukuba sibe ngababhekakade ngenjabulo?
18 UPawulu wathandazela ukuba amakholwa ayekanye nawo eKolose agcwaliswe ngolwazi oluqondile lwentando kaNkulunkulu ukuze ahambe ngokufanele uJehova, amthokozise, futhi athele izithelo kuyo yonke imisebenzi emihle. Kanjalo, ‘ayeyoqiniswa nokuqiniswa konke ngokwamandla enkazimulo yakhe, kuze kube-ngukubekezela konke nokubhekakade ngenjabulo.’ (Kolose 1:9-11) Nokho, umuntu angaba kanjani ‘ngobhekakade ngenjabulo’? Lokho akuziphikisi, ngoba ukuba nenjabulo okukhulunywa ngayo emiBhalweni akuyona nje indaba yokuba ngowenamile noma othokozile. Isithelo somoya senjabulo sihlanganisa umuzwa wokwaneliseka okujulile ngenxa yokwenza okulungile phambi kukaNkulunkulu. Futhi siwukubonakaliswa kwethemba lokwamukela umvuzo othenjisiwe ngenxa yokubonisa ukubhekakade. Yingakho uJesu athi: “[Niyajabula, NW], nxa benithuka, benizingela, bekhuluma konke okubi ngani, beqamba amanga ngenxa yami. Jabulani, nithokoze, ngokuba umvuzo wenu mkhulu ezulwini; ngokuba kanjalo babazingela abaprofethi abananduleleyo.”—Mathewu 5:11, 12.
19. Yiziphi izibonelo ezibonisa ukuthi kungenzeka ukuba ngobhekakade futhi ujabule?
19 UJesu wayenenjabulo enjalo. Ngempela, “ngenxa yenjabulo eyayibekwe phambi kwakhe wakhuthazelela isigxobo sokuhlushwa, engalinaki ihlazo.” (Heberu 12:2, NW) Leyonjabulo yenza uJesu wakwazi ukuba ngobhekakade. Ngokufanayo, cabanga ngalokho okwenzeka lapho abaphostoli beshaywa futhi beyalwa ukuba “bangakhulumi ngegama likaJesu.” “Basuka phambi komphakathi bethokoza, ngokuba babefanele ukudunyazwa ngenxa yalelogama; abayekanga ukufundisa nokushumayela ivangeli ngoJesu Kristu imihla yonke ethempelini nasemakhaya.” (IzEnzo 5:40-42) Yeka isibonelo esihle esifakazela ukuthi abalandeli bakaKristu bangaba ngababhekakade ngenjabulo!
20. Uma sibonisa ukubhekakade, lokhu kungabuthinta kanjani ubuhlobo bethu nabanye?
20 Ngokuqinisekile iZwi likaNkulunkulu linikeza iseluleko esihlakaniphile uma lisiyala ukuba singaphindiseli, ukuba siphuze ukuthukuthela kuyilapho silindele ukuthi kuzolunga—yebo, sibe ngababhekakade! Sidinga umthandazo wasikhathi sonke kanye nalesithelo somoya kaNkulunkulu ukuze sihlalisane kahle nabafowethu nodadewethu ebandleni, nalabo abasemkhayeni wethu, nabantu esisebenza nabo, kanye nabantu ngabanye esihlangana nabo enkonzweni yobuKristu. Futhi yini engasisiza ukuba sibonise ukubhekakade? Ukholo, ithemba, ukuthobeka, injabulo, nothando. Ngempela, uma sinezimfanelo ezinjalo singaba ngababhekakade kubo bonke.
Ingabe Uyakhumbula?
◻ Kungani ukubhekakade kubalulekile ekuhlanganyeleni kwethu epharadesi elingokomoya?
◻ Kungani abadala ngokukhethekile kudingeka babe ngababhekakade?
◻ Kungani amadoda nabafazi kufanele bahlakulele ukubhekakade?
◻ Yiziphi ezinye izimfanelo eziyosisiza ukuba sibe ngababhekakade?
[Isithombe ekhasini 17]
Yisiphi iseluleko sikaJesu esasiza uPetru ukuba abe ngobhekakade?