IBhayibheli—Ingabe Livela KuNkulunkulu?

UJEHOVA, uNkulunkulu onamandla negunya okungenamkhawulo, ngokuqinisekile unelungelo lokuxhumana nendalo yakhe engabantu nganoma iyiphi indlela ayifisayo. Uma akhetha ukuxhumana nayo ngezwi elilotshiwe, kwakudingeka alondoloze isigijimi sakhe iminyaka eminingi. Ingabe kuye kwaba njalo ngeBhayibheli?

Eminyakeni ecishe ibe ngu-1 500 ngaphambi kukaKristu, lapho kuqala ukulotshwa kweBhayibheli, kwakuneminingi eminye imibhalo engokwenkolo eyayikhona. Nokho, yonke lena yaphelelwa umsebenzi futhi ekugcineni yamane yanyamalala. Eminye iye yavumbululwa izazi zemivubukulo futhi manje iyimisebenzi yobuciko yokubukisa eminyuziyamu. Ngakolunye uhlangothi, izingxenye zeBhayibheli ezazilotshwe eminyakeni engaphezu kwezinkulungwane ezintathu edlule azizange zilibaleke, futhi amakhophi aye asinda kwaze kwaba sosukwini lwethu. Lokhu kungokuphawulekayo, ikakhulukazi lapho kucatshangelwa inzondo eye yasungulwa ngokumelene neBhayibheli kuwo wonke umlando. Ayikho enye incwadi eye yaba isisulu sokuphikiswa nesenzondo ngokunamandla kangaka. Ukufunda noma ukusakaza iBhayibheli kuye kwajeziswa ngezinhlawulo, ukuvalelwa emajele, ukuhlushwa, futhi ngokuvamile nangokufa.

Incwadi evamile nje ibingasinda kanjani ngaphansi kwezimo ezinjalo? IBhayibheli ngokwalo liyasitshela: “Izwi leNkosi limi kuze kube-phakade.” (1 Petru 1:24) Ukuphikelela kweBhayibheli likhona nokungabhubhiseki kwalo kuyasisiza ukuba sibone ukuthi liyiZwi likaNkulunkulu elingcwele.

Ngaphezu kwalokho, kufanele silindele ngokunengqondo ukuthi isigijimi sikaNkulunkulu esiya esintwini sasiyotholakala emhlabeni wonke. Ingabe kunjalo ngeBhayibheli? Ngempela kunjalo! Ayikho enye incwadi emlandweni eye yasondela nokusondela eBhayibhelini kulokhu. Ukusakazwa kweBhayibheli kuye kwalinganiselwa enanini elingu-3 000 000 000. Ngaphezu kwalokho, ayikho enye incwadi eye yahunyushelwa ezilimini eziningi kangaka. IBhayibheli manje lingafundwa, lilonke noma ingxenye, ngezilimi ezingaphezu kuka-1 900 ezihlukene. INhlangano YeBhayibheli YaseMelika ibika ukuthi manje litholakala kumaphesenti angu-98 omphakathi womhlaba. INew Encyclopædia Britannica ibiza iBhayibheli ngokuthi “cishe iqoqo lezincwadi elinethonya kunawo wonke emlandweni womuntu.” Khona-ke, akukhona ukugabadela, ukulichaza njengencwadi enkulu kunazo zonke emhlabeni.

Ukuvumelana kweBhayibheli kwangaphakathi kusukela ekuqaleni kuya ekugcineni ngokwakho kuwubufakazi obunamandla bokuthi ngempela laphefumlelwa uNkulunkulu. Ingabe bekungaba nengqondo ukulindela ukuba imibhalo yabantu abangu-40 abahlukene enkathini yeminyaka engu-1 600 ibonakale yonke ivumelana futhi inesihloko esisodwa esiyisisekelo? Lokhu bekungenakwenzeka uma bekushiyelwe enhlanhleni noma ekuqondiseni nje komuntu. Nokho, lokhu kwenzeka ngezincwadi ezingu-66 ezakha iBhayibheli. Ukuhlakanipha okungaphezu kokwabantu kuphela, osekunesikhathi eside okungaphumelelisa umkhiqizo ophawuleka kanjalo.

Aliwona Umlando Nje Kuphela

Umlando oqukethwe iBhayibheli ungophawulekayo. Kodwa isigijimi esivela kuNkulunkulu esiqukethe ngokukhethekile imininingwane engokomlando besiyoba wusizo olulinganiselwe kithi. Sidinga isiqondiso nokuhlakanipha okuwusizo, futhi okunjalo nakho kungatholakala eBhayibhelini. Ngokwesibonelo, iBhayibheli lisikhuthaza ukuba sihlakulele “uthando, nokujabula, nokuthula, nokubekezela, nobubele, nobuvi, nokukholeka, nobumnene, nokuzithiba”—izinto okubhalwe kaningi ngazo emakhasini alo. (Galathiya 5:22, 23; Kolose 3:12-14) IBhayibheli litusa ukukhuthala, ukuhlanzeka, ukwethembeka, ukwethembeka emshadweni, ukuhlonipha nokuthanda abanye abantu; futhi liqukethe izeluleko eziningi ngokuziphatha komuntu emkhayeni nasemphakathini.

Lapho sisetshenziswa, iseluleko seBhayibheli sivelela njengesiyinzuzo ngempela. Siyasikhulula ekungazini nasekukholelweni ezeni. (Johane 8:32) Ukuhlakanipha kwaso okuwusizo akunakuqhathaniswa. Ngempela, ngaphandle kokungabaza, siqukethe ukuhlakanipha kwaphezulu.

Ukugomela kokuthi “izwi likaNkulunkulu liphilile, linamandla” kuvumelana ngokugcwele nendlela iBhayibheli elishintsha ngayo abantu ngokoqobo. (Heberu 4:12) Izigidi namuhla ziye zanqoba izici zobuntu eziyingozi futhi zashintsha inkambo yazo yangaphambili ebulalayo yaba engcono ngenxa yokuthatha ngokungathi sína izindinganiso zeBhayibheli.—Efesu 4:22.

Kwenzekani lapho izindinganiso zeBhayibheli zinganakwa? Umphumela uba ukungajabuli nosizi, izimpi, ubumpofu, izifo ezithathelwana ngobulili, nokuchitheka kwemizi. Izinto ezinjalo zingalindelwa ngoba ukungalinaki iBhayibheli Elingcwele kusho ukwenqaba ukuqondisa kukaNkulunkulu, owadala umuntu nowazi izidingo zakhe.

IBhayibheli futhi libikezela ikusasa, okuthile abantu abangenakukwenza. Ukuvela kwemibuso yezwe kusukela kowaseBabiloni kuqhubeke kuwo wonke amakhulu eminyaka kuze kube sosukwini lwethu kwabikezelwa ngokwesiprofetho eBhayibhelini. (Daniyeli, izahluko 2, 7, 8) Ngaphezu kwalokho, cishe eminyakeni eyizinkulungwane ezimbili edlule, eBhayibhelini kwahlanganiswa incazelo enembile yezimo zezwe kulelikhulu lama-20 leminyaka. (Mathewu, izahluko 24, 25; Marku, isahluko 13; Luka, isahluko 21; 2 Thimothewu 3:1-5; 2 Petru 3:3, 4; IsAmbulo 6:1-8) Uhlu olude lweziprofetho zeBhayibheli esezigcwalisekile lusiqinisekisa ukuthi angokoqobo amathemba ekusasa elijabulisayo njengoba echazwe emakhasini alo.

Umthwalo Wethu Wemfanelo

Konke lokhu kuwubufakazi obuqand’ ikhanda bokuthi uNkulunkulu uye waxhumana ngempela nabantu. Kuyiqiniso, uNkulunkulu wadlulisela isigijimi sakhe ngokusebenzisa amadoda angaphelele. Kodwa lokhu akusona isizathu sokukholelwa ukuthi iBhayibheli alithembekile kunokuba bekungaba njalo ngesigijimi esishiwo ngomlomo sivela kuNkulunkulu, noma esilethwe izingelosi, noma esilotshwe ngokuyisimangaliso ezulwini sase silethwa kubantu emhlabeni.

Nokho, ukuqaphela umsuka ongcwele, noma waphezulu weBhayibheli kubeka kithi umthwalo wemfanelo. Ngokufanelekile uJehova ulindele ukuba silifunde njalo iZwi lakhe. (IHubo 1:1, 2) Ukufunda iBhayibheli okunezithelo kudinga isimo sengqondo esiqondile. Umuntu kumelwe akhumbule ukuthi iBhayibheli alinakufundwa njenganoma iyiphi enye incwadi nje. Umuntu kumelwe alifunde ‘hhayi njengezwi labantu kepha njengezwi likaNkulunkulu.’—1 Thesalonika 2:13.

Ezinye izinto eBhayibhelini kungase kube nzima ukuziqonda. Kodwa ngokulifunda njalo, umuntu angakhula ekuqondeni futhi athole umbono ophelele ngokwengeziwe wentando kaNkulunkulu nowezinjongo zakhe. (Heberu 5:14) Mhlawumbe awukaqiniseki ngokugcwele ukuthi iBhayibheli liyiZwi likaNkulunkulu elingcwele. Kodwa, ngokufanelekile, ungakubonisa kanjani ukukholelwa noma ukungakholelwa eBhayibhelini uma ungazange ulitadishe ngokucophelela?

Naphezu kokungakholwa kwanamuhla ngokuqondene nomsuka walo waphezulu, ukuhlola ngokucophelela iBhayibheli eliNgcwele kuye kwabangela abantu abaningi abacabangayo ukuba basho lamazwi omphostoli uPawulu: “UNkulunkulu uqinisile, wonke umuntu ungumqambimanga”!—Roma 3:4.

[Igrafu ekhasini 4]

(Ukuze ubone ukuthi indaba ihlelwe kanjani, bheka encwadini)

IBhayibheli manje litholakala kumaphesenti angu-98 omphakathi womhlaba

Ayikho enye incwadi emlandweni eye yasondela ekusakazweni kweBhayibheli okulinganiselwa ku-3 000 000 000. INew Encyclopædia Britannica ilibiza ngokuthi “cishe iqoqo lezincwadi elinethonya kunawo wonke emlandweni womuntu”

[Izithombe ekhasini 4]

IBhayibheli liye lasinda, kuyilapho eminye imibhalo yenkolo iye yaba imisebenzi nje yobuciko yaseminyuziyamu

Ngenhla: Ukulandisa kwabaseAsiriya ngoZamcolo

Kwesokudla: Imithandazo eya kunkulunkulu waseGibithe uRa

[Umthombo]

Yomibili: Courtesy of the Trustees of The British Museum

[Isithombe ekhasini 5]

Lilotshwe abantu abangu-40 abahlukene enkathini yeminyaka engu-1 600, iBhayibheli lilandela isihloko esisodwa esiyisisekelo kusukela ekuqaleni kuya ekugcineni. Ukuhlakanipha okungaphezu kokwabantu, nosekunesikhathi eside kuphela obekungaphumelelisa umkhiqizo ophawuleka kanjalo

[Isithombe ekhasini 5]

Ukuvela kwemibuso yezwe kusuka kowaseBabiloni kuqhubeke emakhulwini eminyaka kuze kube sosukwini lwethu kwabikezelwa ngokwesiprofetho eBhayibhelini. (Daniyeli 2, 7, 8)

Kwesokudla: UKesari Awugustu

[Umthombo]

Museo della Civiltà Romana, Roma

[Isithombe ekhasini 6]

Cishe iminyaka eyizinkulungwane ezimbili edlule, iBhayibheli lazibikezela ngokunembile izimo zezwe namuhla. (Mathewu 24, 25; Marku 13; Luka 21; 2 Thimothewu 3:1-5; 2 Petru 3:3, 4; IsAmbulo 6:1-8) Ukunemba okungenaphutha kwesiprofetho seBhaybiheli kusiqinisekisa ukuthi isithembiso sikaNkulunkulu somhlaba oyipharadesi siyogcwaliseka nakanjani

[Umthombo]

Reuters/Bettmann Newsphotos