Yeka Indlela Abajabula Ngayo Abamnene!
“[Bayajabula, “NW”] abamnene, ngokuba bayakudla ifa lomhlaba.”—MATHEWU 5:5.
1. Yibuphi ubumnene uJesu ayekhuluma ngabo eNtshumayelweni yakhe yaseNtabeni?
ENTSHUMAYELWENI yakhe yaseNtabeni, uJesu Kristu wathi: “[Bayajabula, NW] abamnene, ngokuba bayakudla ifa lomhlaba.” (Mathewu 5:5) Lobubumnene, noma ukuthobeka, abukhona nje ukubonakaliswa kwesizotha sokuzenzisa, futhi abuyona nje imfanelo yobuntu engokwemvelo. Kunalokho, buwubumnene bangaphakathi obungokoqobo nokuba nokuthula okuboniswa ngokuyinhloko ekusabeleni entandweni kaJehova uNkulunkulu nasekuqondiseni kwakhe. Abantu abamnene ngempela banomuzwa ojulile wokuthembela kuNkulunkulu obonakaliswa ngokuziphatha ngobumnene ekusebenzelaneni nabantu abakanye nabo.—Roma 12:17-19; Thithu 3:1, 2.
2. Kungani uJesu athi abamnene bayajabula?
2 UJesu wathi abamnene bayajabula ngoba bayodla ifa lomhlaba. NjengeNdodana kaNkulunkulu emnene ngokuphelele, uJesu uyiNdlalifa Enkulu yomhlaba. (IHubo 2:8; Mathewu 11:29; Heberu 1:1, 2; 2:5-9) Kodwa ‘njengendodana yomuntu’ yobuMesiya, wayezoba nababusi abakanye naye eMbusweni wakhe wasezulwini. (Daniyeli 7:13, 14, 22, 27) ‘Njengezindlalifa ezikanye’ noKristu, labantu abamnene abagcotshiwe bayohlanganyela naye efeni lakhe elingumhlaba. (Roma 8:17) Abanye abantu abamnene nabanjengezimvu bayojabulela ukuphila okuphakade ePharadesi endaweni yoMbuso yasemhlabeni. (Mathewu 25:33, 34, 46; Luka 23:43) Lelothemba libenza bajabule ngempela.
3. Yiziphi izibonelo uNkulunkulu noKristu abazibeka ngokuqondene nobumnene?
3 INdlalifa Enkulu emnene yamukela umhlaba kuYise, uJehova, oyisibonelo esivelele sobumnene. Yeka indlela imiBhalo ekusho kaningi ngayo ukuthi uNkulunkulu ‘uyephuza ukuthukuthela futhi uvamé ubumnene’! (Eksodusi 34:6; Nehemiya 9:17; IHubo 86:15) Unamandla amakhulu kodwa ubonisa ubumnene obukhulu kangangokuba abakhulekeli bakhe bangasondela kuye ngaphandle kokwesaba. (Heberu 4:16; 10:19-22) INdodana kaNkulunkulu, ‘eyayimnene futhi ithobekile enhliziyweni,’ yafundisa abafundi bayo ukuba babe mnene. (Mathewu 11:29; Luka 6:27-29) Ngokufanayo, lezinceku ezimnene zikaNkulunkulu neNdodana yakhe zabulingisa ‘ubumnene nokuva kukaKristu’ futhi zabhala ngakho.—2 Korinte 10:1; Roma 1:1; Jakobe 1:1, 2; 2 Petru 1:1.
4. (a) NgokweyabaseKolose 3:12, yini eye yenziwa yilabo abamnene ngempela? (b) Yimiphi imibuzo okufanele siyicabangele?
4 Namuhla, kokubili amaKristu agcotshiwe nabangane bawo basemhlabeni kudingeka babe mnene. Njengoba beye balahla noma yibuphi ububi, ukukhohlisa, ukuzenzisa, umhawu, nokuhlebana, baye basizwa umoya ongcwele kaNkulunkulu ukuba babe basha ‘emoyeni wengqondo yabo.’ (Efesu 4:22-24; 1 Petru 2:1, 2) Banxuswa ukuba bembathe “ububele benhliziyo, nesisa, nokuzithoba, nobumnene, nokubhekakade.” (Kolose 3:12) Kodwa yini ngempela ubumnene obuyihlanganisayo? Kungani kuzuzisa ukuba mnene? Futhi lemfanelo ingaba kanjani nengxenye enjabulweni yethu?
Ukuhlolisisa Ubumnene
5. Bungachazwa kanjani ubumnene?
5 Umuntu omnene uzothile esimweni sengqondo nasekuziphatheni. Kwezinye izinguqulo zeBhayibheli, yisiphawulo esithi pra·ysʹ esihunyushwe ngokuthi “ukuthobeka,” “ubumnene,” nangokuthi “isizotha.” NgesiGreki sakudala, lesiphawulo esithi pra·ysʹ singasebenza ekubhekiseleni ezwini noma emoyeni opholile. Singabonisa futhi umuntu onomusa. Isazi uW. E. Vine sithi: “[Ibizo elithi pra·yʹtes] lisebenza okokuqala nangokuyinhloko kuNkulunkulu. Liyilolohlobo lomoya esamukela ngawo ukusebenzelana kwaKhe nathi njengokulungile, futhi ngenxa yalokho sikwenze ngaphandle kokuphikisa noma ukudaza inkani; lihlobene ngokuseduze negama elithi tapeinophrosunē [ukuthobeka].”
6. Kungani kungathiwa ubumnene abusibo ubuthakathaka?
6 Ubumnene abusibo ubuthakathaka. “Kunesizotha egameni elithi praus,” kubhala isazi uWilliam Barclay, “kodwa ngemuva kwesizotha kunamandla ensimbi.” Kudingeka amandla ukuze sibe mnene. Ngokwesibonelo, amandla ayadingeka ukuze sibe mnene lapho sicasukile noma lapho sishushiswa. INdodana kaNkulunkulu emnene, uJesu Kristu, yabeka isibonelo esihle kulokhu. “Wathi ethukwa, akaphindisanga athuke; ehlushwa akasongelanga kepha wakunikela kuye [uJehova uNkulunkulu] owahlulela ngokulunga.” (1 Petru 2:23) NjengoJesu omnene, singaqiniseka ngokuthi uNkulunkulu uyobathathela isinyathelo labo abasithukayo nabasishushisayo. (1 Korinte 4:12, 13) Singaba nokuthula kwengqondo, njengoStefanu owayeshushiswa, siqaphela ukuthi uma sithembekile, uJehova uyosisekela futhi angavumeli lutho ukuba lusilimaze phakade.—IHubo 145:14; IzEnzo 6:15; Filipi 4:6, 7, 13.
7. IzAga 25:28 zibonisani ngomuntu ontula ubumnene?
7 UJesu wayemnene, kodwa wabonisa amandla ekukumeleleni ngokungaguquki okulungile. (Mathewu 21:5; 23:13-39) Noma ubani ‘onomqondo kaKristu’ uyoba njengaye kulokhu. (1 Korinte 2:16) Uma umuntu engemnene, akafani noKristu. Kunalokho, ufanelwa yilamazwi: “Njengomuzi odiliziweyo ungenalugange, unjalo umuntu omoya wakhe ungenakubanjwa.” (IzAga 25:28) Umuntu onjalo ontula ubumnene usengozini yokuhlaselwa imicabango engalungile engambangela ukuba enze izinto ngezindlela ezingafanele. Nakuba umKristu omnene engeyena umuntu obuthakathaka, uyazi ukuthi “impendulo ethambileyo iyabuyisa ukufutheka, kepha izwi elilukhuni livusa ulaka.”—IzAga 15:1.
8. Kungani kungelula ukuba mnene?
8 Akulula ukuba mnene, ngoba sinokungapheleli nesono esikuzuze ngefa. (Roma 5:12) Uma siyizinceku zikaJehova, sinempi futhi okumelwe siyilwe ngokumelene namandla omoya amabi angase avivinye ubumnene bethu ngoshushiso. (Efesu 6:12) Futhi iningi lethu lisebenza phakathi kwalabo abanomoya wokhahlo wezwe elingaphansi kokulawula kukaDeveli. (1 Johane 5:19) Ngakho singabuhlakulela kanjani ubumnene?
Indlela Esingabuhlakulela Ngayo Ubumnene
9. Yimuphi umbono oyosisiza ukuba sihlakulele ubumnene?
9 Ukuqiniseka okusekelwe eBhayibhelini kokuthi kufuneka sibonise ubumnene kuyosisiza ukuba sibe nalemfanelo. Nsuku zonke kumelwe sisebenzele ukuhlakulela ubumnene. Kungenjalo, siyoba njengabantu ababheka ubumnene njengobuthakathaka futhi sicabange ukuthi ukuze siphumelele kumelwe sibe abaqhoshayo, abanezinhliziyo ezilukhuni, size sibe nanonya. Nokho, iZwi likaNkulunkulu liyakulahla ukuqhosha, futhi isaga esihlakaniphile sithi: “Umuntu onesihawu wenzela okuhle umphefumulo wakhe, kepha ononya uhlupha inyama yakhe.” (IzAga 11:17; 16:18) Abantu bayamgwema umuntu onokhahlo nongenamusa, lokho bekwenza ngokuyinhloko ukuze bagweme ukuzwiswa ubuhlungu wunya lwakhe nokuntula kwakhe ubumnene.
10. Ukuze sibe mnene, yini okumelwe sizithobe kuyo?
10 Ukuze sibe mnene, kumelwe sizithobe ethonyeni lomoya ongcwele kaNkulunkulu, noma amandla ayisiphekupheku. Njengoba nje uJehova eye wakwenza kwaba nokwenzeka ukuba umhlaba ukhiqize izitshalo, ngokufanayo wenza izinceku zakhe zikwazi ukuthela izithelo zomoya wakhe, kuhlanganise nobumnene. UPawulu wabhala: “Izithelo zikaMoya ziluthando, nokujabula, nokuthula, nokubekezela, nobubele, nobuvi, nokukholeka, nobumnene, nokuzithiba. Akukho-mthetho omelana nokunjalo.” (Galathiya 5:22, 23) Yebo, ubumnene bungesinye sezithelo zomoya kaNkulunkulu ezibonakaliswa yilabo abamjabulisayo. (IHubo 51:9, 10) Futhi yeka izinguquko ubumnene obuzibangelayo! Ngokwesibonelo: Kwakunesichwensi esigama laso lalinguTony esasilwa, siphanga abantu, sishushumbisa izidakamizwa, sihola iqembu lezithuthuthu, futhi sachitha isikhathi esithile sisejele. Nokho, ngokuthola ulwazi lweBhayibheli nangosizo lomoya kaNkulunkulu, sashintsha saba inceku kaJehova eziphatha ngobumnene. Indaba kaTony ayisona isimanga. Khona-ke, yini umuntu angayenza uma kuwukuthi ukuntula ubumnene bekulokhu kuyisici esivelele sobuntu bakhe?
11. Umthandazo unayiphi indima ekuhlakuleleni ubumnene?
11 Umthandazo oqotho wokucela umoya kaNkulunkulu nesithelo sawo sobumnene uyosisiza ukuba sihlakulele lemfanelo. Singase sidinge ‘[ukuqhubeka, NW] sicela,’ njengoba uJesu asho, futhi uJehova uNkulunkulu uyosinika esikucelayo. Ngemva kokubonisa ukuthi obaba abangabantu banikeza abantwana babo izinto ezinhle, uJesu wathi: “Uma nina [eninesono futhi ngenxa yalokho] eningababi [ngokuqhathaniswa] nikwazi ukubapha abantwana benu izipho ezinhle, kakhulu kangakanani uYihlo osezulwini uzakubapha abacela kuye uMoya oNgcwele.” (Luka 11:9-13) Umthandazo ungasisiza ukuba senze ubumnene bube isici esihlala njalo sobuntu bethu—imfanelo enengxenye enjabulweni yethu neyabangane bethu.
12. Kungani ukuhlala sikhumbula ukuthi abantu abaphelele kungasisiza ukuba sibe mnene?
12 Ukukukhumbula njalo ukuthi abantu abaphelele kungasisiza ukuba sibe mnene. (IHubo 51:5) Asinakucabanga noma senze izinto ngendlela ephelele, njengoba nje nabanye bengenakukwenza, ngakho kufanele sibe nesihawu ngempela futhi sibaphathe ngendlela esingathanda ukuphathwa ngayo. (Mathewu 7:12) Ukuqaphela ukuthi sonke siyawenza amaphutha kufanele kusenze sibe abathethelelayo nabamnene ekusebenzelaneni nabanye. (Mathewu 6:12-15; 18:21, 22) Kakade, asibongi yini ngokuthi uNkulunkulu usibonisa uthando nobumnene?—IHubo 103:10-14.
13. Singasizakala kanjani ukuba sihlakulele ubumnene uma sikuvuma ukuthi uNkulunkulu wenze abantu baba nenkululeko yokuzikhethela?
13 Ukuvuma ukuthi uNkulunkulu wenze abantu baba nenkululeko yokuzikhethela nakho kungasisiza ukuba sihlakulele ubumnene. Lokhu akuvumeli muntu ukuba angayinaki imithetho kaJehova futhi angajeziswa, kodwa kuyakuvumela ukwehlukahluka ezintweni ezithandwayo, nezingathandwa phakathi kwabantu bakhe. Ngakho masikuvume ukuthi akekho umuntu ophoqelekile ukuba azivumelanise nobuntu obuthile thina esingase sicabange ukuthi bungcono. Lomoya uyosisiza ukuba sibe mnene.
14. Ngokuqondene nobumnene, yini okufanele sizimisele ukuyenza?
14 Ukuzimisela ukuba singabulahli ubumnene kuyosisiza ukuba siqhubeke sihlakulela lemfanelo. Ukuzithoba ethonyeni lomoya kaJehova kwabangela izinguquko ekucabangeni kwethu. (Roma 12:2) Umoya omnene nonjengokaKristu manje uyasisiza ukuba sigweme ukuhlanganyela ‘ekuhambeni ngamanyala, nangezinkanuko, ngokudakwa, nangokuminza, nangokuxokozela, nangokukhonza izithombe okuyichilo.’ Kumelwe singalokothi silahle ubumnene ngezizathu zemali, zezenhlalo, noma ezinye noma ngenxa yokuthi abanye abantu bakhuluma amagama okweyisa ngokwesaba kwethu uNkulunkulu. (1 Petru 4:3-5) Akumelwe sivumele noma yini isenze sihlanganyele ‘emisebenzini yenyama,’ kangangokuba size silahlekelwe ubumnene bethu futhi sihluleke ukudla ifa loMbuso kaNkulunkulu noma sijabulele izibusiso zawo. (Galathiya 5:19-21) Masihlale njalo silazisa ilungelo lokuba abantu bakaNkulunkulu abamnene, kungakhathaliseki ukuthi sigcotshelwe ukuyophila ezulwini noma sinethemba lasemhlabeni. Ukuze senze lokho, ake sicabangele ezinye zezinzuzo zobumnene.
Izinzuzo Zobumnene
15. Ngokuvumelana nezAga 14:30, kungani kuwukuhlakanipha ukuba mnene?
15 Umuntu omnene unokuzola kwenhliziyo, ingqondo, nomzimba. Lokhu kunjalo ngoba akahlanganyeli ezingxabanweni, athukutheliswe izenzo zabanye, noma azihluphe ngokukhathazeka okungapheli. Ubumnene bumsiza ukuba alawule imizwelo yakhe, futhi lokhu kunenzuzo engqondweni nasemzimbeni. Isaga sithi: “Inhliziyo ezolileyo ingukuphila kwenyama.” (IzAga 14:30) Ukuntula ubumnene kungase kuholele entukuthelweni engaphakamisa umfutho wegazi noma ibangele izinkinga zesimiso sokugaya ukudla, isifuba somoya, ukuhlushwa amehlo, nezinye izinkinga. UmKristu omnene ujabulela izinzuzo ezihlukahlukene, kuhlanganise ‘nokuthula kukaNkulunkulu’ okulondoloza inhliziyo yakhe namandla engqondo. (Filipi 4:6, 7) Yeka indlela okuwukuhlakanipha ngayo ukuba mnene!
16-18. Ubumnene bunamuphi umphumela ebuhlotsheni bethu nabanye?
16 Imfanelo yobumnene ithuthukisa ubuhlobo bethu nabanye. Mhlawumbe sake saba nomkhuba wokuphoqelela izimo kuze kube yilapho sikuthola esasikufuna. Abantu kungenzeka babesithukuthelela ngoba sasintula ukuthobeka nobumnene. Ngaphansi kwezimo ezinjalo, akufanele ukuba kwasimangalisa ukuthi sasihlala njalo sisezimpikiswaneni. Nokho, isaga sithi: “Ngokuphela kwezinkuni umlilo uyacimeka, nalapho kungekho abancethezi, kuyabodla ukuxabana. Njengamalahle othuthwini nezinkuni emlilweni, unjalo umuntu ophikisa ukuvusa inkani.” (IzAga 26:20, 21) Uma simnene, esikhundleni ‘sokwenezela izinkuni emlilweni’ futhi sicasule abanye, siyoba nobuhlobo obuhle nabo.
17 Umuntu omnene usethubeni lokuba nabangane abahle. Abantu bayakujabulela ukuzihlanganisa naye ngoba unesimo sengqondo esiqondile, futhi amazwi akhe ayaqabula futhi amnandi njengoju. (IzAga 16:24) Wayenjalo uJesu, owathi: “Bekani ijoka lami phezu kwenu, nifunde kimi, ngokuba ngimnene, ngithobile ngenhliziyo; khona imiphefumulo yenu iyakufumana impumuzo. Ngokuba ijoka lami lihle, nomthwalo wami ulula.” (Mathewu 11:29, 30) UJesu wayengenalo ukhahlo, futhi ijoka lakhe lalingacindezeli. Labo ababeza kuye babephathwa kahle futhi beqabuleka ngokomoya. Kuba njalo lapho sizihlanganisa nomngane omnene ongumKristu.
18 Ubumnene busenza sithandwe esikholwa kanye nabo. Ngokungangabazeki, amaKristu amaningi aseKorinte ayezizwa eseduze noPawulu ngoba wayewaphatha “ngobumnene nangokuva kukaKristu.” (2 Korinte 10:1) Ngokuqinisekile abaseThesalonika kumelwe ukuthi basabela kahle kulomphostoli, njengoba ayewumfundisi omnene nonesizotha. (1 Thesalonika 2:5-8) Akungabazeki ukuthi abadala base-Efesu babefunde okuningi kuPawulu futhi bemthanda kakhulu. (IzEnzo 20:20, 21, 37, 38) Ingabe ubonisa ubumnene obenza abanye bakuthande?
19. Ubumnene bubasiza kanjani abantu bakaJehova ukuba bagcine indawo yabo enhlanganweni yakhe?
19 Umoya omnene usiza abantu bakaJehova ukuba bazithobe futhi bagcine indawo yabo enhlanganweni yakhe. (Filipi 2:5-8, 12-14; Heberu 13:17) Ubumnene busivimbela ekubeni sifune udumo, olusekelwe ekuqhosheni nolumcasulayo uNkulunkulu. (IzAga 16:5) Umuntu omnene akazibheki njengongaphezu kwakholwa kanye nabo, futhi akazami ukuphumelela ngokubabangela ukuba balahlekelwe. (Mathewu 23:11, 12) Esikhundleni salokho, uyakuvuma ukuthi unesono nokuthi udinga ilungiselelo likaNkulunkulu lesihlengo.
Ubumnene Buletha Injabulo
20. Ubumnene bunamuphi umphumela ekuphileni komkhaya?
20 Zonke izinceku zikaNkulunkulu kufanele zikhumbule ukuthi ubumnene buyisithelo somoya wakhe esiletha injabulo. Ngokwesibonelo, ngenxa yokuthi abantu bakaJehova babonisa izimfanelo ezinjengothando nobumnene, kuvame imikhaya enenjabulo phakathi kwabo. Lapho indoda nomfazi besebenzelana ngendlela emnene, abantwana babo bakhulela esimweni esizolile, hhayi emkhayeni othambekele emazwini nasezenzweni ezinokhahlo. Njengoba ubaba eluleka abantwana bakhe ngobumnene, lokhu kuba nomphumela omuhle ezingqondweni zabo ezisakhula, futhi cishe umoya omnene uyoba yingxenye yobuntu babo. (Efesu 6:1-4) Umoya omnene usiza amadoda ukuba aqhubeke ethanda omkawo. Usiza abafazi ukuba bathobele amadoda abo futhi ushukumisele abantwana ukuba balalele abazali babo. Ubumnene futhi bubangela amalungu omkhaya ukuba abe nomoya wokuthethelela onengxenye enjabulweni.—Kolose 3:13, 18-21.
21. Empeleni, yisiphi iseluleko umphostoli uPawulu asinikeza kweyabase-Efesu 4:1-3?
21 Imikhaya emnene nabantu ngabanye yenza kube nenjabulo emabandleni ehlanganyela nawo. Ngakho-ke, abantu bakaJehova kudingeka benze umzamo oqotho ukuze babe mnene. Ingabe uyakwenza lokho? Umphostoli uPawulu wanxusa amaKristu agcotshiwe ayekanye nawo ukuba ahambe njengokufanele ubizo lwawo lwasezulwini, lokho ekwenza “ngokuthobeka konke nobumnene, ngokubhekakade nokubekezelelana ngothando, [ekhuthalela] ukugcina ubunye bukaMoya ngesibopho sokuthula.” (Efesu 4:1-3) AmaKristu anethemba lasemhlabeni nawo kumelwe abonise ubumnene nezinye izimfanelo zokwesaba uNkulunkulu. Lena inkambo eletha injabulo yeqiniso. Bayajabula ngempela abamnene!
Ubungaphendula Kanjani?
◻ Kungani abantu abamnene bejabula?
◻ Kusho ukuthini ukuba mnene?
◻ Ubumnene bungahlakulelwa kanjani?
◻ Yiziphi ezinye zezinzuzo zokuba mnene?