Usibheka Kanjani Isono?
“KUNGANI elokhu ecela ukuthethelelwa kwezono zethu lapho ethandaza?” kukhononda owesifazane othile owayetadisha iBhayibheli nomunye woFakazi BakaJehova. “Kuzwakala sengathi ngiyisigebengu.” Njengalowesifazane, abantu abaningi namuhla abaziqapheli izono zabo ngaphandle uma benze ubugebengu obuthile.
Lokhu kuyiqiniso ngokukhethekile eMpumalanga, lapho abantu ngokwesiko bengazi lutho ngesono esazuzwa njengefa njengoba kufundiswa ezinkolweni zamaKristu obuJuda. (Genesise 3:1-5, 16-19; Roma 5:12) Ngokwesibonelo, amaShinto ahlanganisa isono nokungcola okungasulwa kalula ngokushwiba induku yompristi, enephepha noma ifulakisi elinanyatheliswe esihlokweni sayo. Kulenqubo akudingeki ukuphenduka kulokho okuye kwenziwa. Ngani? “Akuzona izenzo ezimbi kuphela, kodwa nezinhlekelele ezingokwemvelo ezingalawuleki, ezazibizwa ngokuthi itsumi [isono],” kuchaza iKodansha Encyclopedia of Japan. Izinhlekelele ezingokwemvelo, itsumi, ezingabangelwanga abantu, zazibhekwa njengeziyizono ezaziqedwa imikhuba yokuhlambulula enemicikilisho.
Lokhu kwaholela ekucabangeni ukuthi noma yisiphi isono, ngisho nezenzo ezimbi ezenziwa ngamabomu (ngaphandle kwezenzo zobugebengu ezijeziswa umthetho) kungasulwa ngemikhuba yokuhlambulula enemicikilisho. Ngaphansi kwesihloko esithi “Umkhuba Onemicikilisho Wokuhlanza Ngokwezombangazwe EJapane,” iNew York Times yabhekisela embonweni onjalo futhi yachaza ukuthi abezombangazwe eJapane abaye bahileleka emahlazweni bazibheka ‘njengabahlanjululiwe’ lapho bephinda bekhethwa abavotayo. Ngaleyondlela, akukho ukulungisa kwangempela okwenziwayo, futhi amahlazo afanayo angase aphinde enzeke.
AmaBuddha akholelwa kuyisamsara, noma ukuphinda uzalwe, nasemfundisweni yeKarma anombono ohlukile. “Ngokwemfundiso yekarman,” kuchaza iNew Encyclopædia Britannica, “ukuziphatha okuhle kuletha umphumela omuhle nojabulisayo futhi kudala ukuthambekela ezenzweni ezifanayo ezinhle, kuyilapho ukuziphatha okubi kuletha umphumela omubi futhi kudala ukuthambekela ezenzweni ezimbi eziphindaphindwayo.” Ngamanye amazwi, ukuziphatha okunesono kuthela izithelo ezimbi. Imfundiso yeKarma ihlangene ngokuseduze nemfundiso yokuphinda uzalwe, njengoba amanye amaKarma kuthiwa athela izithelo ekuphileni kwesikhathi esizayo okukude kakhulu nokuphila okwenziwe kukho isenzo esithile.
Lemfundiso ibathinta kanjani labo abayikholelwayo? Owesifazane ongumBuddha owayekholelwa ngobuqotho kuyiKarma wathi: “Ngangicabanga ukuthi kwakungenangqondo ukuthi ngihlupheke ngenxa yento engazalwa nayo kodwa engangingazi lutho ngayo. Kwakudingeka ngiyamukele njengento engangidalelwe yona. Ukuthemeleza imithandazo nokuzama kanzima ukuphila ukuphila okuhle akuzange kuzixazulule izinkinga zami. Ngaba ngosheshayo ukucasuka futhi nganginganeliseki, ngihlala ngikhononda.” Imfundiso yobuBuddha yemiphumela yokuziphatha okubi yamshiya enomuzwa wokuthi akabalulekile.
UbuConfucian, enye inkolo yaseMpumalanga, yafundisa indlela ehlukile yokubhekana nobubi bomuntu. NgokukaHsün-tzu, omunye wezazi ezintathu ezinkulu zefilosofi yobuConfucian, ubuntu bomuntu bubi futhi buthambekele ekubeni nobugovu. Ukuze kugcinwe ukuhleleka okungokwenhlalo phakathi kwabantu abanokuthambekela okunesono, wagcizelela ukubaluleka kweli, okusho ukufaneleka, ukuziphatha okuhle, nokuhleleka kwezinto. UMeng-tzu, esinye isazi sefilosofi yobuConfucian, nakuba ezwakalisa umbono ohlukile wobuntu bomuntu, wakuqaphela ukuba khona kwezinkinga zomphakathi, futhi ethemba ukuthi ubuntu babantu buzoba buhle, wayethembela ekuzithuthukiseni komuntu ngokwakhe njengokuyikhambi. Noma yikuphi, izazi zefilosofi yobuConfucian zafundisa ukubaluleka kwemfundo nokuqeqeshwa ukuze kulwiwe nesono emhlabeni. Nakuba izimfundiso zabo zivumelana ngesidingo seli, umbono wabo ngesono nobubi ufiphele kakhulu.—Qhathanisa neHubo 14:3; 51:5.
Ukushabalala Komqondo Wesono ENtshonalanga
ENtshonalanga, imibono ngesono ngokwesiko iye yaba ngesobala, futhi abantu abaningi baye bavuma ukuthi isono sikhona futhi kumelwe sigwenywe. Nokho, isimo sengqondo saseNtshonalanga ngesono siyashintsha. Abaningi bayakulahla ukuba khona kwesono, bebiza izwi likanembeza ngokuthi umuzwa wokuba necala, okuthile okumelwe kugwenywe. Eminyakeni engaphezu kuka-40 edlule, uPapa Pius XII wakhala: “Isono salelikhulu leminyaka siwukulahlekelwa ukwazi ngesono.” Ngokokuhlola okwanyatheliswa kuPèlerin yamaKatolika ephuma kanye ngesonto, isibalo esimangazayo samaphesenti angu-90 sabantu baseFrance, lapho abantu abaningi bethi bangamaRoma Katolika, asisakholelwa esonweni.
Ngempela, eMpumalanga naseNtshonalanga, abantu abaningi babonakala bephila ekunethezekeni ngaphandle kokuhlushwa ukwazi ngesono. Nokho, ingabe lokho kusho ukuthi isono asikho? Ingabe singase singasinaki ngokuphumelelayo? Ingabe isono siyoke sinyamalale?